和膳一風

等極都收唔到Olivia嘅 email，去佢個blog又唔見佢update今日個market嘅information，終於忍唔住打俾佢問吓佢個market幾點開始。打去先知 佢已經到咗Discovery Bay喇，個fair會去到五點，但佢話通常啲人四點幾就會執嘢。收線後，拾爺就幫我查吓有乜車去Discovery Bay，然後就換衫出發！

去到Discovery Bay已經兩點幾，雖然我同拾爺都肚餓(我個胃仲有少少唔舒服，不過唔敢話俾拾爺知……)，但為咗爭取時間睇嘢，我哋先行咗一圈先。行行吓，見到 Olivia嘅擋攤，買咗幾張pattern paper，盛為$45！其實佢有好多pattern paper都好靚，但我未諗到點用，而且我只係上過一堂paper craft 101同travel album，未學滿師，所以都係唔好咁衝動地敗家住。

買完嘢，就去食lunch喇。本來想去ZAKS，但佢啲set lunch只係sandwiches，最慘係三文治都要成七、八十蚊，貴到癲，於是就去咗和膳一風到食喇。

叫咗兩個set lunch，分別為香蔥吞拿魚腩飯定食($85)同鰻魚飯定食($98)。

侍應先上吞拿魚腩飯定食，定食配以蒸蛋同麵豉湯。吞拿魚腩飯嘅飯落咗唔少醋，不過我個人都幾食得醋， 所以覺得好開胃，而且啲醋落得好均勻，唔怕一啖有時，另一啖又冇，總之就啖啖都有醋味，唔錯唔錯！至於個吞拿魚腩，解凍得好夠，唔怕食冰咁，不過就唔係好 食到個吞拿魚味……蒸蛋唔夠滑之餘，仲鹹到不得了，好似啲鹽唔駛錢咁……不過，個蒸蛋鹹極都唔夠個麵豉湯鹹……

拾爺個鰻魚飯定食就配以前菜、蒸蛋同麵豉湯。鰻魚有三片，size都足以用嚟送飯，可惜啲鰻魚肉過「淋」，感覺有啲「梅」。至於個前菜，我冇食過，所以不便評論。

餐飲可以改要雪糕，我同拾爺就一人要一隻味。食第一啖綠茶味時，覺得佢太甜，綠茶嘅苦澀之後先慢慢滲咗少少出嚟，不過味道唔持久，再食多幾啖後，就連綠茶味都唔係好食得到。至於個藍莓味就仲悲慘，我都食唔出係藍莓，杯雪糕根本就冇味……拾爺就話覺得佢似士多啤利多啲。

P.S. Post埋個bird punch俾大家睇吓啦！

Munch

本來打算同拾爺兩個留家玩煮飯仔(咪又係即係佢煮，哈！)，然後再落樓下個公園賞月，點知一個風打嚟，天文台話賞月難，於是我哋就決定去Munch食dinner，用咗張就嚟到到期嘅coupon喇。

是夜中秋，大部份中式酒樓都高朋滿座，西餐顯然係另類之選，不過，Munch仍然有唔少捧場客。呢間餐廳喺Openrice個分數都唔差，我哋大婚當日亦由佢提供食物，雖然當日我冇食到，但之前試菜都覺得食物水準唔錯。

今晚，我哋叫咗兩個set dinner，再加一碟鵝肝。

先上餐飽，軟硬適中，暖暖地，再配以一小樽嘅牛油，真係好易令我哋兩個愛牛油之人唔覺唔覺咁食多咗。

我倆放棄凱撒沙律，同要是日餐湯 — 野菌湯。湯嘅份量好少，廚師落咗少少辣椒油，呢個配搭尚算新鮮！可惜個湯偏鹹，而且打得唔夠滑，「鞋」口！

拾爺話有人讚過呢度嘅鵝肝冇筋，所以我哋先外加一個「香煎鵝肝伴士多 啤利‧蘋果薯餅」，點知……一切開個鵝肝已經見到有筋……廚師想做到脆內溶嘅感覺，其實真係好難，要煎脆外邊，就好容易令鵝肝過熟，入面做唔到溶入口嘅感 覺，所以做嘅人功力一定要好足！好明顯，呢個廚師未到家！外邊係有少少煎香之感，但口感唔強烈，內裡唔夠熱，溶化感唔夠都算，竟然有冰凍感……

食完starter，就上pasta，我哋要咗個鮮帶子意大利飯。碟飯好夠熱，但帶子只有四粒……而且都係普通size……成個飯不過不失，冇為我哋帶嚟驚喜，不過啲飯唔怕太軟，都叫做得唔錯。出面好多餐廳煮risotto都煮得過「淋」！

食完個risotto，已經飽飽哋。再上個巴馬芝士極黑豬鞍伴蘋果批時，見到個批咁大，真係食唔落！ 同拾爺share咗個豬鞍，不得不讚Munch整豬真係有一手，記得big day當日其中一道菜係芝士豬扒，試菜時我同拾爺都已經好喜歡，婚後亦有朋友表示喜歡呢道菜呢！講番個豬鞍，平時啲餐廳，多數係賣豬扒，好少有豬鞍， 「鞍」呢部份，通常都係食羊嘅，好少食豬，但估唔到豬鞍都幾好食！廚師用麵包糠舖邊，再煎香，令到隻豬鞍口感甚為豐富。外邊有麵包糠，內裡嘅豬肉則有肥有 瘦，喺瘦肉同麵包糠嘅中和下，食客自然唔會對肥豬肉為之抗拒。值得一讚係豬鞍嘅生熟度煎得恰到好處，咬下一口，不難發現當中嘅肉色呈粉紅色，不怕過熟。至 於個蘋果批，由於我本身對蘋果批不感興趣，加上已經很飽，所以喺拾爺利誘下，亦只係小試一口。可能我對蘋果批真係好感欠奉，我連嗰一口都吞唔落，當中嘅味 道令我忍唔住將呢一小口都吐出……

埋單六百二，扣除四百蚊coupon後，仲要補二百二，以其食品質素，呢個價錢實在過高！我同拾爺應該都唔會再嚟食dinner架喇，lunch都可以考慮吓嘅。