同拾爺同埋同事去咗Cafe Marco食tea buffet！
我同拾爺一早到咗，但酒店唔 俾入座住……我哋喺Lane Crawford行咗一陣，番去就見到一條人龍等緊入座……其實人本來唔多，但個reception真係好唔掂，搵枱俾已reserve人仕搵得好慢！我唔明，張紙明明有名有姓，佢就唔係搵人名，係叫人俾電話號碼，結果我哋前面個女人嘅number佢搵極都搵唔到……搞咗好耐。點解有人名，佢哋張紙唔可以 設計好少少，跟alphabetical order嚟排﹖！等，本來唔係大問題，但等緊嘅位置冇冷氣就係一大問題！熱死人！好彩前面個女人通氣，叫reception處理咗我哋先。
終於有人帶我哋入去，原來同事們已經到咗……佢哋喺lift口嗰邊入，好快！其實我哋之前都係喺lift口入，但因為未夠鐘，waitress要我哋行去另一面熱死人嘅地方等……
為咗呢個tea buffet，我今朝食完早餐後，lunch都唔食，就係要等食佢！
揀呢啲嘢食作為第一碟嘅食物，其實係因為佢哋放得最近自己張枱，太肚餓喇！
刺身﹕味道一般，感覺唔特別新鮮，而且款式只有我碟中嘅兩種……
壽司﹕又係得兩種，三文魚同太卷，三文魚好薄……唔拎咁多係因為唔想食飯食飽，但啲飯個味調得唔錯，好開胃！可惜……當我想再拎時，佢已經被吃光！酒店好遲 先refill(後來發現好多嘢食都係被拎哂之後，酒店好遲先會再refill，甚至唔再refill……)，但refill完一次之後竟然出哂全碟太卷 就算，好唔掂囉！
中華沙律﹕正常味道，我以前成日以為呢樣嘢好難整得難食，直至一次我食到一間我真心覺得整得甚難食之後，我先知呢樣嘢要味道正常，都唔係必然……
一口豆腐﹕正常味道，唔覺得豆腐特別滑。
Ham﹕冇特別……
Ham toast﹕塊ham都ok，但個toast淋哂，我咬咗啖就唔再食lu……
Tomato toast﹕又係只食面層啲料，啲cheese冇特別……
Salmon burger﹕味道一般……
雞沙律﹕呢到嘅沙律款式唔多，而且都唔合我胃口……呢個雞沙律亦然……
Cheese﹕拾爺極愛，食完一次又一次，但我覺得好普通……
薯仔沙律﹕味道普通。
熱葷開始！
串燒﹕拎時只剩兩條，都已經唔夠熱，但酒店完全冇refill嘅意慾……
牛肉﹕都ok，唔太韌。
糯米雞﹕雞肉入面釀入糯米，一挾就散……味道一般。
黃色嗰嚿﹕其實我唔太知係乜，因為佢味道普通。
海南雞飯﹕啲飯都ok，但由於我拎時又係只剩下一碗，碗飯唔太夠熱……但係，塊雞雖然係雞胸，卻唔嚡，good！
想食嘅唔再refill……唯有試吓興趣唔太大嘅嘢啦。
太卷﹕嘥quota食物。
Ham toast﹕質素中下。
燒賣﹕唔ok。
終於要跳去食dessert喇！
開心果杏脯蛋糕﹕我同拾爺都buy佢唔甜，但如果開心果味再重啲就好喇！
芒果cheese cake﹕其實都唔太食到芒果味……
圓型物體﹕唔記得個名，但有橙酒成份，加上所有甜品我其實都係同拾爺一人一半，呢個好難分，我只係食咗一啖上面啲cream，冇特別。
兩種chocolate cake﹕一樣咁甜，唔好食！
士多啤梨奶凍﹕士多啤梨酸嘅……奶凍又唔夠滑……
是日焦點﹕Movenpick雪糕！！！拾爺放我監，雖然我拎番嚟嘅(上圖)要同拾爺一人一半，但……拾爺拎番嚟嘅，我哋都係一人一半架，哈哈！估下我最後食咗幾多球﹖
Tiramisu﹕達人之前狂讚呢隻味，仲叫我買盒番屋企，好彩冇聽佢講。各人口味唔同，我同達人好多時鍾意食嘅嘢都好唔一樣，所以……我真係唔太buy呢隻味，酒味同咖啡味都太濃，苦……
Vanilla﹕呢隻味永遠係我哋至愛！真係好香，好滑！如果甜道再減少就perfect喇！
意大利奶凍﹕其實……唔太食得出係奶凍味……
拾爺拎嘅~~
碎朱古力﹕加咗碎朱古力，雪糕梗係冇咁滑……
焦糖燉蛋﹕原來呢隻味都唔錯，個雪糕都滑，而且唔太甜，同vanilla有得fight！
Vanilla﹕都話係我哋至愛！
拾爺投降後，我個人再戰兩球半，點解﹖因為其中一隻我唔太buy……
Swiss chocolate﹕其實隻味有少少甜，但個雪糕口感好得意，有少少煙韌feel，我鍾意。
焦糖﹕要咗佢，完全係美麗嘅誤會，我其實想要焦糖燉蛋架，但因為之前係拾爺拎，我問拾爺個味道時，佢答咗焦糖，我聽唔到燉蛋，就咁就拎咗隻唔係我想要嘅味……我有嘗試去接受佢，但真係太甜喇……
Vanilla﹕都話至愛咯！
開開心心又一餐，呢餐我同鄰座夾份請，盛惠$1231.2。餐廳環境一般，我覺得座位唔夠舒服。服務一樣，尤其reception做事太慢，嘢食又遲遲唔 refill，連亞頭都察覺我唔止一次complain佢哋嘢食冇哂但冇refill。最最最不滿係洗手間要行出去Lane Crawford隔離個後樓梯去，酒店竟然冇洗手間……Frankly，呢個價錢，咁嘅環境，我唔會再幫襯。
Eat, Play, Love 