Kitchen M

噚晚對腳又變冰條！明明已經冇咁凍架啦，但唔知點解噚晚反而係最難整暖對腳……拾爺用佢對發熱腳幫我暖咗好耐，都唔成功……我仲去咗四次洗手間添呀！本來，呢個冬天身體好似乖咁，一覺瞓天光，通常六點先起身去洗手間！但呢個禮拜，晚晚都半夜起身(雖然我一直都有呢個老毛病……)……搞到成晚冇覺好瞓……所以……今 朝係我唔願起身……成十點幾十一點先起床……反而拾爺今日好乖，九點二就起身啦！

因為我太晏起身，飲唔到早茶……拾爺扭哂計呀！冇得飲茶，拾爺就煮麥片食，而我呢個不嬲都唔好麥片嘅人，就食合桃糕。食完早餐，拾爺就繼續改文，我就一路煲 住「家政婦三田」(噚日開始煲，已經煲咗五集！真係好好睇呀！)，一路整本Big Day album part II。

晏晝食番噚晚食剩嘅炒飯，兩點鬆啲，拾爺終於俾我開薯片食啦~~哈哈！包薯片噚日買架！買咗番嚟我已經即刻想食架喇！但拾爺唔俾，仲將佢放咗入零食櫃後，嚴 禁我行入廚房……好過份！每次我行近啲廚房，佢就會好嚴厲咁喝住我，叫我唔准去偷食……就算而家佢俾我開嚟食，都仲要限住我食5塊……不過，因為用嚟夾食 物嘅夾用哂，拾爺唯有俾我一次過食哂成包，Yeah~~為免我食得太多，唔好薯片嘅佢又食埋一份。我成日覺得拾爺咁樣係暴殄天物，根本就唔係真心鍾意食 嘅！平時同佢食麥記都係咁架，佢會同我鬥食得多薯條，為嘅就係等我食少啲……但佢都唔鍾意食薯條，何必呢﹖！

三點九出門口去尖咀，約咗奶奶一齊睇「大魔術師」。呢套戲同爾冬陞之前嘅作品好唔同，唔再探究大道理，亦唔多人物性格嘅刻劃描寫，反而係勁多爛gag同笑位。撇除戲情上嘅鬆散，有欠條理，讓觀眾嘻嘻哈哈兩個鐘嚟到 講，都係一套唔錯嘅賀歲電影。不過，如果唔係免費，我都唔會俾錢入場睇囉。三位主角都係好戲之人，但戲中只有劉青雲嘅角色大有發揮。正如某影評人道，片中 梁朝偉嘅表演，只可以叫不過不失，周迅就慘成花瓶……基本上成套戲，劉青雲係最搶嘅一個！其實，如果梁朝偉可以拎到六屆影帝，劉青雲只得一次真係好唔抵！ 佢嘅實力絕不在梁朝偉之下！

睇完戲，就去Kitchen M開餐。噚日book枱時，只剩番outdoor嘅位，都驚凍架！不過，對方話入面有位就會俾我移入去先，咁就搏吓啦~~晏晝佢再打嚟confirm個 booking時，我再問多句有冇入面坐，對方問我係咪confirm三位，我話係，佢就話indoor仲有一張枱，但可能會坐得迫啲，我話唔緊要，最緊要唔駛捱凍。如是者，我哋去到就坐indoor喇。入到去，終於知道點解indoor啲枱冇哂咁滯，呢到細故然係原因啦，仲有就係有一圍枱嚟咗十個客，乜枱都俾佢哋hold哂啦……

坐低，一睇個menu就嚇親，因為set dinner最平都要$288，好彩我根本就冇打算食set dinner，散叫都得架嘛！如果唔係，三個人食，真係破產喇……(今日又唔係咩特別日子……)

最後叫咗三樣嘢﹕M’s Pizza($108)、牛肝菌意大利飯($88)同埋香辣蟹肉椒扁意粉($92)。

先上餐飽，暖暖哋又軟軟哋咁，不過，就冇咩麵包味……

M’s Pizza – 我唔覺得特別好食，雖然佢好多cheese係我幾buy嘅，但如果呢個都係招牌菜嘅話，呢間嘢都冇咩係特別好食喇……講到pizza，海景嘉福酒店入面間The Mistral整得好味好多！

牛肝菌意大利飯 – 夠哂熱！飯心都夠硬，但個sauce唔特別yummy，都係普普通通……

蟹肉蒜香辣椒扁意粉 – 蟹肉又真係冇乜……落單時問佢可唔可以少啲辣，最後都係好辣……不過，又辣得幾惹味嘅！但個扁意粉太淋，唔正宗！

總的來說，食物水準一般，但價錢稍貴，應該冇下次喇！

埋單$317，用啱啱收到嘅AE白金卡碌！呢三個月買嘢，都要以呢張卡優先，因為有十倍分數！要密密碌，賺番個年費番嚟！

一代宗師

王大導拍了多年的電影「一代宗師」終於出爐！各方引頸以待多時，影片才剛登場，各大報章已急不及待紛紛加以評論，有關影片的消息四方八面而來，擋也擋不 住。入場前，已大概掌握影片以章子怡飾演的宮二為主，梁朝偉的葉問「被次要」，張震的戲份更被大大刪減。有了這個心理準備，觀賞影片前已作心理調節，所以 看畢電影，沒有首批觀眾般感到太大的驚訝。

王大導的影片一向以高深、唯美掛帥，前者不是人人理解、欣賞，後者則為大眾公認，「一 代宗師」亦揉合此兩種元素。雖然此片與王大導以往的影片相比，其深度已調低，但面對被剪輯成支離破碎的故事，各片段有著似有還無的關連時，我也有過跟「周 公」奮力頑抗的一刻！一心以為「一代宗師」只談或重視葉問的觀眾，對於宮二於影片中佔戲最重，甚為不滿，認為片名應改為「一代女宗師」，看畢影片，我卻有 不同見解。其實，王大導從無表明「一代宗師」是葉問，戲中談及葉問、宮二及一線天，他們各有本領，其中葉問及一線天分別為香港引入詠春及八極拳，他們的功 力及對香港武術的貢獻，都可被冠以「一代宗師」之名。宮二雖因出道而沒有傳藝，但終其一生，沒輸過一場比武，以她的本事，絕對是「一代宗師」。另有影評人 以為支離破碎的表達方法是王大導一貫作風，我卻覺得此片有別與他的前作，王大導之前執導的電影，故事看似零碎，但當中總有人主要人物貫穿影片，帶出不同的 角色，本片葉問與其妻及宮二的感情線交代完整，唯獨一線天的出現感覺突兀，他與葉問沒有交流，與宮二也只有一臉之緣，是王大導故意的安排，還是影片的剪輯 出現問題﹖自問道行未夠，實在看不透……

撇除零散的故事，純以美術角度欣賞，影片是讓人賞心悅目的。影片以葉問雨中對敵開首，拍攝手法與黃百鳴的拳拳到肉不同，卻華麗非常，時而慢鏡出拳， 時而快速 腳踢，時而水花四濺，就連水滴著地也漂亮得教人讚嘆。葉問與宮二父親對戰前，上金樓過三關那段亦甚有意思。那時的堂子，不是風塵之所，而是以武會友的英雄 地，遇著北方高手挑戰，雲集堂子的各路英雄以較量為名，指點為實的，將心得一一傳授葉問。大家雖來自不同門派，對武學的熱誠卻是一致的，遇到外敵，更是同 仇敵氣，沒有「留一點」的私心，這一段是王大導對學武之人的氣度之尊敬。喜歡看打戲的觀眾，這一段應該也大飽眼福了，詠春對八卦掌、形意拳及雜家拳，拍得 相當精彩。實實在在的對戰三場後，當觀眾以為葉問與宮老爺的比試更為激烈時，王大導卻給大家一個驚喜，兩人只比掰餅，此幕重意不重武，導演欲透過宮老爺發 揚學武之人的最高意境。王大導不止一次透過宮老爺這角色帶出處世格言，看來，他心中的「一代宗師」，不只拳腳利害，還要有大將之風。

很多人認為影片把章子怡拍得很美，這個我甚表贊同。不論是她與葉問的深情互望，還是兩人對決，宮二都予人淒美之感。雖然最後她與葉問無緣結合，但兩人間的情，觀眾還是可以從細節中感受。

Full / Half

同拾爺去咗睇早場嘅Sherlock Holmes！ 其實，我哋兩個都冇睇第一集架！不過，聽國泰同佢老公講過兩集嘅拍攝手法都好似，又係勁多慢動作咁樣，咁上集好多人都話正架嘛，我估呢集都會幾唔錯嘅，點 知……原來呢套戲嘅「慢動作」係咁kai (容許我咁粗俗，因為我真係諗唔到第二個形容詞喇！)架！睇到我想死！我‧一‧啲‧都‧唔‧欣‧賞‧呢‧種‧拍‧ 攝‧手‧法‧囉！仲有，睇Sherlock Holmes 係想睇佢點樣抽絲剝繭地查案，但呢套根本就係一套動作片，完全唔駛觀眾亦冇時間俾觀眾去思考，不停地塞嘢入我哋到，影片節奏係就係快呀，但快到咁樣，我真係接受唔到！唔係我唔明佢講乜，而係我唔expect去睇一套只為填滿觀眾兩個鐘空間嘅電影囉。只係喺視覺上豐富我哋嘅電影，實在有欠誠意……

睇完戲，就去咗Full / Half到開餐。哈哈，我都幾利害，一個禮拜內食第三次喇！而今日個餐牌唔同咗喇！連個價錢都唔同，平咗！

Starters要咗﹕

1. Fresh Tuna Sesame Salad – 吞拿魚粒都幾大粒架！喺西餐廳食，當然唔可以expect佢好鮮或者係肥美到入口即溶啦！但都叫不過不失！沙律配以芝麻醬，酸酸味味，好開胃！
2. Home-made daily soup – 是日餐湯係匈牙利牛肉湯，又一不過不失之作！

主菜方面，拾爺聽過我大讚呢到嘅西冷，就諗都唔諗指明要呢個！今日食呢個抵過之前好多！價錢平咗之餘，配菜都多啲！呢個set而家叫「烤澳洲雪花西冷‧蕃茄乾‧班尼的水煮蛋」，只售$138！雖然平咗廿蚊，配菜亦多咗，但塊扒依然係大大塊，啲肉仲係咁淋同唔怕dry！讚！

而我，本來係想試吓個「自家燒烤羊肉卷」嘅，但一聽到waiter話廚師推介係蟹肉凍天使麵($105)，又忍唔住轉呔喇……冇法啦，我鍾意食蟹肉呀嘛！但係……我估唔到佢真係整隻蟹鉗仔俾我囉……我寧願佢係蟹肉絲……我鍾意人哋幫我拆埋啲肉咁嚟食架！

嘢飲我都係要咗ginger lemon tea，拾爺就要coffee。

好似好耐冇同拾爺出去食餐好架喇！我哋成個聖誕假都好乖，晚晚(去慳妹屋企打邊爐嗰晚除外！)都係自己煮架！所以，今餐食得好開心，好似餓咗好耐，終於放監咁feel呀，嘩哈哈！

為何又是這樣錯﹖！

又去Full / Half到開餐！又係食lunch，結果，個餐牌都一樣……

今次約咗亞柑、亞桔同闊太，四個人，四個餐，四個starter每款要一個，分別係Ceasar salad、虎蝦雞尾酒汁沙律、蕃茄忌廉湯同埋耶菜花湯。Main dishes要咗上次食唔到嘅千層麵，同埋再食多次嘅虎蝦天使麵同埋有機意大利飯‧黑松露菌，今次仲叫咗個貴啲嘅烤澳洲雪花西冷。飲品依然係ginger bread coffee同ginger lemon honey。

四款前菜我哋一致認為個蕃茄忌廉湯最好飲！另一款湯就淡得滯，好似飲水咁……兩個沙律唔係唔好味，但冇咩特別……

上次飲恨食唔到嘅千層麵令我大失所望！好鹹！反而個烤澳洲雪花西冷有驚喜！我哋四個都覺得good！通常炭燒或者烤牛扒都會好乾，甚至會覺得「嚡」！但呢塊唔怕，啲肉好「淋」，肉汁雖然唔可以話好juicy，但冇被完全流失，食落唔覺得好乾。虎蝦天使麵同埋有機意大利飯‧黑松露菌同上次一樣，都係不過不失之作。

大家閒聊兩個半鐘，點半坐到差唔多四點先走。本來想加錢食埋個dessert，點知賣哂……到餐飲上枱時，亞柑同亞桔明明係要ginger bread coffee，但就只有coffee冇ginger bread，我出聲問，個waiter先話冇哂……service真差！

成餐飯，我都極到忍耐，完全冇質問過亞柑任何嘢，但其實話題去到某啲位，我真係忍得好辛苦唔去串去！我覺得亞柑可能知道我已經知道咗佢又同埋亞田一齊單嘢， 但佢唔出聲，我就繼續扮唔知。揭穿佢又點呀﹖唔通佢就真係唔會中番個頭埋去咩﹖！學亞桔話齋，做埋做埋咁多嘢，搞到自己成個三姑六婆咁要去阻撓佢哋偉大嘅 愛情，真係自討沒趣！佢咁大個人，要為自己每一個決定去負責！所以，從今以後，亞田再一腳踏幾條船(如果佢有咁嘅能耐嘅話)，又或者佢變心，飛咗亞柑，又或者佢娶完亞柑再出去「滾」，我都唔會再理！其實上次亞柑死唔切咁同埋佢一齊，我已經對佢哋嘅事不聞不問，係亞柑暑假打嚟時主動報告分手同佢哋三個嘅千絲 萬縷嘅關係。當時我以為佢真係會醒，作為朋友，當然要俾啲精神支持佢啦！點估到，個男嘅被揭穿謊話連篇後，知道冇可能再腳踏兩條船時，都係揀咗另一方去求 婚而唔係要亞柑，亞柑都仲可以當冇事發生過，唔介意自己只係因為人哋放手，個男嘅冇得揀先揀自己而同埋個賤man喺番埋一齊。反正，只要呢個賤man肯講幾句好聽嘅說話，亞柑又會愛到死心塌地。既然當事人唔介意佢個男友呢頭攪住第二個女人親熱，嗰頭又同自己卿卿我我，咁我呢個外人咁多事做乜﹖！呢啲咁「偉 大」嘅愛情，我真係呢世都唔會明。男嘅就博愛，女嘅就盲目去愛。現實嘅我，從來都唔會相信自己係電影故事嘅女主角，以為自己就係可以改變男方嘅the one。不過，呢個世界係會有好多愛做夢嘅女性，以為個男之前有幾花弗都好，自己一定可以成為佢最後同唯一一個。唉……可悲可悲……

我知亞柑已經唔再常睇我呢個blog，所以都’no fear’地寫到咁白！不過就算佢睇到，我都唔介意俾佢知道我寫過啲咁嘅嘢。係！啲咁刻薄嘅說話係作為朋友嘅我寫嘅！因為，朋友唔可以盲目支持友人嘅決 定！我唔想講佢想聽嘅說話，我想俾佢睇到現實係點！現實係個男嘅只會覺得個女永遠唔會飛出自己掌心！做到幾錯都好，say吓sorry，講啲好聽嘅說話， 買份早餐，搞掂！想同妳好時咪氹吓妳囉，食番住妳後，第時想搵第二個咪又再對妳呼之則來揮之則去囉！他日搵到個更鍾意，再同佢一生一世嘅，飛埋妳都得呀！ 搵唔到嘅，都可以娶妳架！反正娶完番嚟，都可以出去偷食嘅。結婚前偷食妳都原諒啦，婚後都只會啞忍嘅啫。

我唔係完全唔信浪子回頭呢樣嘢，但當一個男人被發現不忠，仍然滿口謊言，繼續一腳踏兩船，企圖享齊人之福時，佢有咩誠意去改過﹖拍拖一年都冇就已經咁花心， 結婚後點算﹖對於偷食過嘅伴侶，另一半一定會比之前多疑，擔憂之下嘅快樂真係會開心咩﹖與其窮一生去擔驚受怕，去猜度對方，不如揮慧劍，活出精彩人生！