一早睇中Jack Wills某件hoodie，但折實都要$510，有啲貴……不過，Standard Chartered做緊優惠，喺Harbour City單一消費滿$500，可以換到$25嘅Starbucks coupon，星期六更多10%回贈，咁件衫即係$460加送多$25 coupon，感覺好好多！所以，我今日赴舊同學約前，專登出尖咀，為嘅就係去買件hoodie，再換coupon，哈哈。本來我上次試完，係想買中碼， 但想要嘅顏色斷哂碼……唯有試細碼啦，發覺原來細碼個膊位仲fit，於是即時扑鎚買細碼。
番娘家前，先到又一城嘅Adidas Women拎番退款，我仲見到經理口中已被解僱嘅員工喎，可能未last day啦，拎錢後，又同拾爺去Jack Wills睇吓嘢，拾爺試褲時，俾我見到件男裝hoodie幾唔錯，尤其係價錢，於是拎俾拾爺試，褲因為冇size，買唔到，但就買咗件hoodie，盛 惠$370，點解男裝平過女裝咁多架﹖！
去旅行時，可以同拾爺嚟件情侶裝了，yeah ~~
補祝打工達人嘅生日飯，日月媽話要去咖啡弄朝聖……其實我真係冇乜興趣去排咁耐隊去食個半鐘我覺得水準一般嘅嘢，但我又冇時間去搵嗰頭附近嘅nice restaurant，於是就陪佢癲一次。大家約好4點去到等位，我一如以往早到，去到企咗一陣，記起呢間要拎飛，於是就去拎，當時餐廳叫到119號，我張飛係159號……打工達人如我所料要遲啲先到到，日月媽就遲咗幾分鐘，國泰再遲多兩、三個字……等等等，等到打工達人都到埋，仲未有位……原來日月媽、國泰同我一樣，打算6點走人，大家各有節目，但其時接近5點，仲有10張飛先到我哋……打工達人又全日冇有嘢落過肚……於是，我哋就分兩批，打工達人同國泰到附近嘅Agnes b cafe睇吓有冇位，我同日月媽就留低繼續等。等等吓，聽到前面到籌嘅一行3人想要即時有位，只可以坐二人枱加張凳，等4人枱就要多等半個鐘……我同日月媽眼見就快到籌，國泰嗰邊又隨時有枱，於是就入去問清楚係咪要等多半個鐘先有4人位，問緊時，俾我見到shared table到有兩對couples埋單，負責人本來話嗰到用以serve兩組客，反建議我哋等另一張4人枱，話感覺人家就嚟埋單，我當然唔想再等，於是佢哋就先俾shared table嘅位我哋，到有4人枱時就再幫我哋轉。
我同日月媽坐低冇耐，4人枱真係埋單，於是，我倆又轉過去坐。呢頭坐低，嗰頭國泰佢哋番嚟，大家快快叫嘢食。日月媽見到隔離枱個草莓千層派賣相吸引，本來係叫咗呢個嘅，但當見到隔離枱叫嘅棉花糖霜淇淋後，又轉呔要呢樣……結果，我要即時叫住waitress去改單……
Oreo碎片冰沙﹕日月媽之選，我試咗一啖，味道過淡……
熱鮮果茶 ($56)﹕我同國泰都點咗呢個，上次我飲嘅係冰鮮果茶，覺得味道唔錯，所以再點，但今次要熱嘅就覺得太甜！可能上次有冰溝淡咗啲甜味。
提拉米蘇咖啡﹕打工達人之選，唔知咩味……
法國麵包佐咖哩牛腩 ($68)﹕份量少，但味道佳，四片法包烘得外脆內軟，咖哩汁香辣醒胃，牛腩炆得夠淋，薯仔亦非常入味，值得一試！
玉米里肌起司可頌﹕除咗鹹，我食唔到其他味道……
御茶之水棉花糖冰淇淋 ($52)﹕甜品上枱時，其賣相確實吸引，但呢道甜品卻真係圖具賣相，棉花糖就係食就過甜，淋上咖啡後，迅速收縮後，才發現底下已溶緊嘅雪糕，撈埋一齊食，味道都只屬一般……
香蕉巧克力冰淇淋鬆餅 ($54)﹕再一次證明呢到嘅鬆餅係唔好食嘅，完全做唔到外脆內軟嘅水準。
埋單$491。
評分時間﹕
食物：一般
服務：一般
環境：一般
衛生：一般
價錢：Overpriced
總結﹕可以一試！
餐廳資料：
咖啡弄
銅鑼灣邊寧頓街9-11號登龍閣1樓B1-B3室
2493 3033
話說我上個星期日去咗Adidas Women到拎番差額後第二日收到Adidas嘅reply email，對方叫我講番個invoice number同分店名俾佢哋跟進，我就覆佢哋已經拎番退款，但就表示自己其實唔想用正價去買另一件hoodie，仲留埋個電話俾佢哋打俾我。
上個星期二收到Adidas嘅回覆電話，對方話會pass件事俾分店經理跟進番，其實我唔想再同嗰間舖嘅人接觸，唔想再見嗰個salesperson，但customer service嗰邊話佢哋都要了解係咪員工冇跟公司policy做嘢，佢哋自己都要跟進。
番到屋企，我阻止拾爺去洗件hoodie，in case對方真係俾我退番，洗咗就真係冇錢攞得番架喇。
等等等，以為Adidas Women嗰邊唔會打嚟，點知今日就收到佢哋電話，個經理好爽快咁答應俾我refund，因為佢覺得係自己員工冇跟指示，要求咗我俾錢在先，係佢哋唔啱。 經理叫我拎番件衫去分店就得，就算我已經冇咗張單都ok，佢仲因為要我走幾轉而同我講唔好意思添。我多口問句上次啲錢係咪公司出，而唔係 salesperson出，佢話係公司俾番嘅，我都安心啲，但佢同我講個salesperon已被解僱時，我嚇到「吓」咗一聲，對方即刻表示係該員工喺事 件前已請辭，咁都好啲，我只想拎錢，唔係要搞到人工都冇得做架！
呢件事今次真真正正地得到圓滿解決喇！
噚日，同拾爺去行街街，佢喺IZZUE睇中咗兩條運動褲，打算買嚟當睡褲，呢排IZZUE做緊買四件有4折優惠，於是，我倆努力搵嘢買，本來喺葵芳 分店都揀好哂想買嘅嘢，但點知拾爺睇中嘅其中一條褲冇佢個碼，我哋唔想未試就俾錢 (見過鬼，怕黑了……)，寧願搭車番青衣去試。去到青衣，拾爺搵到要試嘅褲，亦試啱，但係……呢到冇我本來打算買嚟湊數嘅belt賣……個sales話因 為佢哋間舖本身冇賣belt，所以唔可以幫我要求由葵芳transfer件貨過嚟……好彩，拾爺試褲時，俾我發現呢到有拾爺著開嘅橫條衫賣，拾爺隨即揀番 條嚟湊數。基本上，橫條衫可算係我哋每次嘅湊數對象！尤其當IZZUE再冇打底賣時。加埋我件灰色線衫，四件價4折後，$854.4。拾爺買嘅褲，其中一 條都幾厚，可以帶去韓國著！俾錢後，sales同我哋講拎住張單去IT旗下嘅其他店舖買嘢，$1710以內可享半價！上年我錯過呢個優惠，今年我誓要用盡 佢！
今日放學後雖然要開會至5點45分，但是晚唔駛番奶奶到食飯，我放學即走，去咗附近嘅Chocolate睇吓啲衫！須知道Chocolate除咗嗰 啲咩staff sales之外，基本上係全年唔減價架！所以有半價coupon，一定係去Chocolate買嘢！行完一round，冇嘢睇啱……正打算走時，俾我發現 佢啲運動褲唔錯，原價$459我當然唔買，但半價之後個價錢就好吸引！試完後，決定買淺灰色同藍色各一，當睡褲著。同sales confirm啲貨後，見到啲底底，於是就問sales我張半價單包唔包底底，一聽到包，即買兩盒！$159六條，平過買Triump同 Muji！Sales知我有張半價單，就提議我買襪，我對女裝襪興趣不大，去咗男裝部執咗pack俾拾爺，行番去女裝部時，俾我發現有另一款運動褲，個 cutting啱我去街著，仲有黑色添！於是，又拎入去試，最後，我放棄原先要嘅藍色運動褲，只要淺灰色嗰條，新發現嗰款就要深灰同黑色各一。因為我 quota有限，所以放棄咗買俾拾爺嘅襪，亦唔受sales所氹買男裝底底駛夠一千，三條運動褲加兩盒各3條底底嘅set裝，最後以$847.5埋單。
我去旅行又有運動褲著啦~~~
話說我星期日喺Adidas Women’s Store到買咗件褸，點知星期五同拾爺行另一分店時，見到件褸大減價！我連件褸都未到手，佢就勁減$450，我當下嬲到噴火！於是，就打電話去訂咗貨嘅Adidas Women’s Store到問佢可唔可refund番個差額俾我啦，因為我真係連貨都未收到架嘛，點知對方用唔多友善嘅語氣同我講﹕「小姐，妳俾哂錢架喇！」，仲要係兩次咁多！我再三confirm佢公司係唔會refund俾我就收線。
收線之後，越諗越唔忿氣，雖然拾爺都覺得我唔可能要求人家退番差額俾我，但就因為對方一句﹕「小姐，妳俾哂錢架喇！」，反而remind咗我當日俾錢時，我係要求過只落訂，但個sales就叫我俾全數。係佢要我俾全數，然後而家用呢樣嘢嚟打發我﹖！我真心覺得被trapped！
太嬲嘅關係，我番到屋企，第一時間喺Adidas個official website到留言，將件事寫咗出嚟，如果佢哋唔跟進，我打算向消委會到投訴佢哋銷售手法有問題！
噚日收到Adidas Women’s Store來電話到貨，仲問我幾時嚟拎，我感覺好奇怪，平時啲舖打俾我叫我去拎貨，係唔會問我幾時去架囉！我唔去住，我要等佢哋official覆我！
今朝一早，先打去其他Adidas嘅分店到，問咗兩間，confirm佢哋公司policy係貨到先收錢，hold貨連一個仙都唔駛俾住後，就再打去Adidas Women’s Store同個sales理論，佢最初一再以我買時係正價嚟同我講，但我搬出佢公司policy係貨到先俾錢，我因為佢要求俾全數，而未能取消hold貨，再以減價價錢去買嚟回應佢，佢就同意refund番啲錢俾我啦。因為我買件褸時，同時買咗件hoodie，所以店方會先扣起之前俾咗嘅9折嘅差價，我實收番$259。其實，如果唔係兩件貨有9折，我係唔會買件hoodie架，更加唔會用正價去買，而家咁樣，我變相要用正價去買hoodie！不過，做人嘅嘢，得些好意須回手，我都唔想去到咁盡，可以拎番少少，就豪件hoodie俾佢啦。
本來今日同拾爺係要努力改嘢，但唔想再拖住件事，所以特登搭車出去拎褸 (真係車錢都蝕埋，本來噚日番娘家可以順便拎埋，但噚日未諗好對策，所以唔拎住……)。去到，佢要收咗我張單，但我件hoodie用正價買，我要求要有單，搞咗一輪，佢就俾我拎番張單走。但隔咗一陣，又打嚟話要拎番，仲話啲錢係佢自己出，要同公司交待云云，佢亦承諾我件衫有問題，可以拎番去換 (老老實實，我已經唔會再相信佢哋講嘢！)，拾爺話我可以唔駛理佢，但我心知自己唔會再番去換嘢，費時佢不停打嚟，就拎番張單俾佢喇。
呢件事擾攘咗我3日，終於得到圓滿解決，我個人即刻開心番哂！
帶完隊，同拾爺一齊行街街，但行街前要先醫肚，去咗莆田開餐。
莆田當日其中一樣小食做緊半價優惠，睇相賣相精緻，於是我哋就要咗一碟，但係……上枱後，見到實物同張相卻係相距甚遠……
蝦苗拌紫菜 ($21)﹕撇除佢個賣相衰過張相，蝦苗細到眼力差啲都睇唔到佢存在，呢道前菜其實幾好食架！個sauce酸酸味味，好開胃！紫菜又唔會過淋，有咬口！
莆田荔枝肉 ($88)﹕味道好似咕嚕肉，外脆內軟又唔會感覺好熱氣，只係……份量少得可憐……
蒲田燜豆腐 ($78)﹕好夠熱！份量亦好足！但味道就好一般……
嗌多個白飯 ($10)，連茶價 ($8位)，埋單$249。
餐廳門口有免費薑茶俾人試飲，味道唔錯，我同拾爺各飲咗兩小杯！
評分時間﹕
食物：一般
服務：一般
環境：一般
衛生：一般
價錢：以份量嚟講有啲貴
總結﹕可以一試！
餐廳資料：
莆田
銅鑼灣波斯富街99號利舞臺廣場7樓A舖
2111 8080
Eat, Play, Love 