一把年紀當然唔會再出去倒數同人迫加捱夜啦，去超市買餸後，回家煮飯歎番餐就算喇。今日超市好多人！
香煎鴨肝配青蘋果蓉﹕拾爺嘅煎鴨肝技術已經爐火純青，呢塊鴨肝煎得好靚！今次配青蘋果蓉，效果好過梨蓉，冇咁甜，鴨肝煎出嚟又唔會變黑，正！
冇得輸嘅risotto！
汲取聖誕夜食到爆肚嘅教訓，是晚得番三道菜，最後一道當然係我整嘅vanilla mousse cake啦！
Monthly Archives: 十二月 2013
德福花園
食完tea，同拾爺行去地產舖前，見有個亞伯喝停兩個破壞緊種喺平台上嘅植物嘅細路，但兩個細路當佢冇到，我再出聲喝停佢哋，兇佢哋再搞破壞就叫警察拉佢哋，佢哋即時停低走開，但見我哋離開，就番轉頭再嚟過……
我哋行去香港置業，有一婆婆企咗喺門口，見我哋睇緊啲盤，就offer俾鎖匙盤我哋睇，於是我哋就跟佢入去。
入去坐低，例牌俾身份證人哋寫睇樓紙，我哋一路留意住嗰兩個細路，發現佢哋去咗另一邊拍打植物，搞到一地都係樹葉……唔見佢哋有家長陪同，最慘係連保安都冇……想搵人制止佢哋都唔得……
等緊睇樓時，聽到婆婆叫另一個agent打去約業主，我即時表示我哋只想睇鎖匙盤，因為我哋想睇睇個則，但佢好似聽唔明我講嘢咁，竟然以一陣睇咩盤，面積幾大，人家叫價幾多作回應……完全係九唔搭八……呢一刻，我覺得自己搵錯agent！
離開地產舖，婆婆再三提醒我哋簽咗睇樓紙，睇咗嘅單位就唔好跟其他agent去睇，如果唔係兩邊都收我哋commission。行多兩步，終於見到保安，拾爺即時話佢知嗰兩個細路嘅惡行，我哋見到保安即時行去收拾佢哋，好嘢！
婆婆同另一女agent先帶我哋去業主盤，睇樓紙寫係一樓，但其實係地下……我哋一去到，佢哋指一指個單位，我倆嚇親咁滯！兩個agents一人講一邊係入口，好唔pro……個單位根本就位處地下，入口仲要喺大廈嘅大閘出面，即係番屋企唔駛經過保安，所有人出出入入都會經過單位門口……
Agent按鐘後，我先問單位有冇小動物，婆婆同我講呢到唔俾養寵物，但原來業主偷偷養咗兩隻貓……我一聽到就唔敢行入去，拾爺因為唔想除鞋，所以扮驚都唔入去，我哋只係企喺門口裝吓，裝唔到嘅部份，就靠婆婆入去影相俾我哋睇。其實，我哋對呢個單位一啲興趣都冇，所以入唔到去睇都冇所謂。呢個單位係就係幾特別，一入門口會有樓梯落下面，好似外國啲basement咁，但521呎建築面積到最後實用面積唔到400呎，個實用率真係太低喇！我見業主打通哂所有嘢，整到間屋成個studio flat咁，好明顯就係因為單位太細，細到連書房位都冇……單位位處地下，私隱度奇低，我哋唔會考慮lu。我哋好快睇完，但婆婆就同業主講開$420萬太高，叫人開$390萬就算，業主就話自己屋企有裝修，仲用成廿萬架！佢sell我哋可以一買就咁就搬入去住添，只係……我哋根本就唔buy佢個裝修……業主話之前有人嚟睇過都話鍾意，自己又由$440萬減到$420萬，所以唔會再減。唉……其實根本就唔係我哋想壓佢價，因為呢個單位我真係$300萬都唔會買，所以婆婆喺嗰個moment講啲咁嘅嘢，真係好奇怪……
離開單位後，婆婆同另一agent都話頭先個單位當年啲人要搶購架，話係咩特色單位喎。咁佢真係有佢嘅特色嘅，只係我哋唔buy啫，全個單位只有一邊有窗，但都唔可以開得大，如果唔係，出面嘅人就睇到自己做緊乜，業主要喺窗外鍍層嘢，令外面嘅人望入去時只係照鏡咁，住喺呢個單位同住喺不見天日嘅地牢冇分別……
去第二個單位，婆婆同女agent好似冇咩共識去邊間先……第二間個單位唔係地下，所以我哋要先搭lift。入到大堂，聞到一陣動物味，婆婆再三強調呢到唔俾養小動物，但表示有人偷偷哋養，保安未必發現。係，有人偷偷哋養係唔會發現，但搞到成個lobby都係動物味，應該唔係偷偷哋，係明目張膽地帶出帶入喎！呢到啲lift都幾細，一出lift，個通道又窄又暗，仲要推開防火門先去到有單位嘅走廊，當然個走廊都係又窄又暗啦。今次個單位大啲，但個廳係向住晾衫位，而且個窗好細，搞到個廳勁暗……睇到個廳我已經唔開胃，再望吓個廚房，好細！雪櫃都要擺出廳！洗手間長而窄，唔好用……睇到呢到，我已經對兩間房提唔起興趣，佢哋幾正常都冇用。呢個單位嘅房間望到地鐵，但周邊都唔少馬路，所以都嘈嘈哋。
到第三個單位，婆婆話呢個block都幾受歡迎，原因係佢個initial同money有關……Well，我哋唔buy呢樣嘢架喎。出lift行去單位，婆婆口中嘅單位號數，同女agent唔同……最後，女agent啱，婆婆要修改我哋張睇樓紙，仲要佢哋冇筆要問我哋借……第三間單位有哂傢俬，agent仲話買咗佢唔駛裝修仲附送傢俬，但係……我一行入去，只覺得成間屋嘅裝修都好老土，啲傢俬又核突……拾爺發現個假天花已裂紋，問問agent呢到裝修咗幾耐，佢話兩年，兩年都搞成咁……Agent話應該係裝修師傅手工唔好，咁有裝修就唔係呢到嘅selling point啦！單位望到少少運動場，但周圍都係馬路，唔駛開窗已經覺得好嘈……離開單位，婆婆又提我哋跟咗佢睇嘅單位就唔好搵其他agent去睇，如果唔係要兩邊俾佣。
行過另一座，睇第四間，其實……我已經冇興趣再睇，因為呢個屋苑嘅則好差，景觀亦唔見得好，但叫價大部份過五百萬，如果咁都要五百萬，我寧願買番自己屋苑嘅大單位，甚至再加多幾十萬盈翠低層，反正呢到嘅高層等同盈翠嘅低層。第四間景觀係HKU Space，對開有偉業街呢條大馬路，又係唔駛開窗都嘈到人癲……
捱到第五間，婆婆話係最筍，業主叫價由來已$580萬降至$515萬，我都坦白回應係業主自己心雄，而家只係貼近番個市場。但最好笑係，婆婆不停話佢最筍時，女agent就話呢間都唔係最筍，一陣嗰間仲正！咁即係點……一入屋，裝修好殘舊，全屋都要執。業主將其中一邊廳間咗做房，令單位變成三房單位，但個細到死嘅廚房只得半個窗，黑到呢~~~呢個單位望警局，即係……會有bibubibu啦~~拾爺好耐心咁度位，我就已經冇哂心機去睇，反正我哋兩個潔癖人一早講好，任何冇廚房或洗手間近入口嘅單位，我哋都不作考慮！(因為我哋著完鞋一定要洗手架！)
最後一間，唯一嘅內園單位，最靜一間。但呢到嘅內園，靚極有限……不過都望到噴水池。
婆婆問我哋有冇邊間鍾意，可以幫我哋講平啲。其實佢每一間睇完都話可以講到幾多錢，雖然有啲煩，但feel到婆婆個人幾老實，佢成日驚我哋唔識呢樣同嗰樣，同一樣重覆幾次。唔記得睇緊第幾間單位時，婆婆問我哋要唔要再帶父母嚟睇一次……拾爺話我哋自己話到事。究竟佢係覺得我哋都係要用父母錢先買到樓，定佢見到拾爺個樣young，又以為我哋讀緊書呢﹖婆婆叫我哋番去諗吓，有咩需要可以打俾佢，佢話佢哋手頭上仲有其他盤，不過全部要過六百萬。原來佢睇得出我哋冇錢，所以俾啲平嘢我哋睇咗先。
德福花園，又一個從此不作考慮嘅屋苑！
Ruby Tuesday
假期就快完結，我同拾爺呢個假期都好鬼懶，冇咩點做過嘢……拾爺今日點都要番一番學校做吓嘢，本來我都打算去睇Dr Lam，因為呢排個lower back有條骨一掂就痛……但Dr Lam放假至1月7日……
起身打吓notes，點幾收到拾爺電話，叫我出去陪佢食嘢，懶惰蟲上身，即時換衫向九龍灣出發！
出到去，等咗陣，拾爺就到喇。拾爺叫我揀餐廳，入咗Ruby Tuesday佢先話其實佢對呢到啲嘢興趣不大……
兩個人點咗兩個tea set﹕
Ruby Minis ($56)﹕麵包微暖同微脆，我揀咗牛肉，肉汁夠而且好軟，只係牛味唔夠……跟餐竟然係薯片唔係薯條，令人失望……差唔多食完先得知可以轉，太遲了……薯片係自家製，好厚，但我鍾意食薄身嘅多啲……
肉醬意粉 ($44)﹕個份量少到令人好失望！味道正常，唔特別好食，意粉好粗，唔鍾意！
我嫌熱檸茶嚿檸檬唔夠，要求要多嚿，結果……
拾爺講笑話人家俾咗成個檸檬我，呢到值三個幾喎。
埋單$110，臨走時，waitress俾咗本calendar我哋，內有coupons，yeah~~~
車厘茄
屋企太多車厘茄，今日喺Amore di Italian Restaurant 食到嘅tomato sauce太好味，拾爺要嚟個山寨版！
晏晝食太多，夜晚要light番啲！仍然要繼續清屋企嘅車厘茄，哈哈！
Amore di Italian Restaurant
今日約咗奶奶同爸媽一齊去食意大利菜，餐廳係我好耐之前睇報紙見到嘅Amore di Italian Restaurant，報紙講到餐廳環境好正，食物水準一流，於是我就提議去呢到，結果……
約好十二點三喺銅鑼灣地鐵站等，奶奶例牌早到，媽媽就例牌遲到……齊人一齊向餐廳出發，餐廳位於駱克駅25-26樓，reception喺25樓，出lift後，個waiter就帶我哋行樓梯上一層，餐廳好細……25樓攞咗嚟做廚房同水吧，26樓先serve顧客，但全間餐廳只有40個位到，地方一啲都唔寬敞。Waiter帶我哋去坐餐廳中間嘅長枱，我即刻要求換枱，我打電話book位時已經講得好清楚唔要通道位，waiter即時表示可以俾個窗邊位我哋。其實我見corner個廉入面都有枱，不過好似有人坐咗，窗邊位都ok，所以就算喇。但呢到俾我報紙睇到嘅相差好遠……一啲都唔靚……
我哋部相機都影到呢到好似幾唔錯咁，但其實餐廳好細……環境一般……
坐低只有一個menu俾我哋share嚟睇……拾爺即時要求更多menu，waiter話唔夠menu，所以要等等……
終於等到多幾個menu，我哋就開始揀嘢食。爸爸手術後才剛可以食嘢，所以都有好多嘢唔食得……啲set lunch唔多啱佢，於是拾爺問waiter拎其他menu，但呢到全部都係set嚟嘅，其他menu都只係set dinner……爸爸想唔叫，五個share四個餐，但我哋又怕唔好睇，於是就幫爸爸叫咗個risotto，特別要求chef要煮得淋啲。最好笑係我同拾爺提議叫個chef煮淋啲時，奶奶覺得唔可行，理由係人哋可能煮好哂……我哋已經話咗唔會，但佢仲一再提出呢個point，我都忍唔住remind佢呢到唔係快餐店，拾爺更表示risotto一煮好就會吸水吸得好利害，所以唔可以煮定。
落單時，我哋問waiter沙律同湯係咪都會有，佢話係，拾爺聽唔到佢第一次講餐湯係乜，要求佢重覆，佢即時表現得唔耐煩，呢個態度令我對呢到再扣分！
等食時，waiter先上麵包。
餐麵﹕好好味！個麵包邊邊好crispy，內裡軟軟，但最正係個sauce，酸味味好開胃！
之後就係各人嘅沙律，沙律有兩種選擇﹕
鮮蝦柚子沙律配柚子油醋汁﹕冇食到呢個，聽拾爺講個蝦都幾鹹……
芝士菠菜煙肉焗生蠔伴沙律﹕爸爸本來想食呢個，但媽媽見到menu寫住生蠔，即時reject爸爸嘅要求！我同拾爺初時以為焗咗就係熟，但媽媽試食後insist係生嘅，最後爸爸要食番佢個蝦沙律，而我就可以食番自己揀嘅焗生蠔喇。媽媽講得啱，佢只係面嗰層焗咗，內裡都係生架！所以呢個係一隻熱熱哋嘅生蠔，味道一般，冇咩蠔味……
雜菜雞湯﹕感覺飲緊羅宋湯，我都搵唔到有雞……但味道正常。
香辣欖油辣椒炒帶子扁意粉 ($128)﹕奶奶嘅main dish，我唔敢要求去試……但佢應媽媽要求，換咗粒帶子俾爸爸，爸爸食到，話幾淋。
蟹肉南瓜意大利飯伴大蝦 ($148)﹕點俾爸爸嘅main，雖然chef煮得夠淋，但爸爸嫌佢嚡，食咗少少就唔食喇……結果，我、拾爺同媽媽要幫佢清埋。個意大利飯因為應我哋要求煮淋咗，所以不便評論，加上我哋食完自己碟main先食佢，啲汁都索乾哂，再落comment對個chef唔公平，但我幾鍾意佢飯入面有拆咗嘅蟹肉，當然啲蟹肉放面我會仲開心，睇到份量嘛，哈哈。
炭燒紐西蘭頂級西冷配白菌汁 ($168)﹕拾爺要medium rare，結果出嚟有8、9成熟……肉汁完全流失，乾到呢……令人極為失望。
相片睇落比實物生，但其實件扒好熟……同埋medium rare應該要有血水出先係，呢件一定冇囉。
意式燴豬仔脾配青蘋果鮮茄肉桂汁 ($118)﹕拾爺覺得呢個最好食，我一向唔好豬仔脾，點佢只為俾爸爸多一個選擇，但爸爸食完之後，都係覺得嚡，唔肯要……我只食咗一隻，味道只覺正常，肉質好淋，但唔特別好食，拾爺覺得佢最好，係因為佢件扒好唔掂啫。再用一隻嚟同媽媽交換佢點嘅羊扒，另一隻就俾咗拾爺。
開心果烤澳洲羊扒配紅酒燒汁 ($168)﹕其實呢道菜應該係好食架！我好鍾意佢面層嗰堆煎到脆口嘅開心果加蒜片，但個chef煮到羊扒過熟，今次我幫媽媽揸主意，要medium well，佢就煮個差唔多well done嘅扒出嚟……塊羊扒被煎到乾哂水，乜肉汁都冇哂……
相片睇落好粉紅，其實實物顏色好沉……只怪我哋部相機太美化景象……
食哂main後，我哋就order嘢飲，跟餐仲有甜品呢。
聖誕布甸﹕唔會好甜，而且好淋，爸爸都食到。
朱古力﹕唔駛加錢都可以飲朱古力，但呢杯嘢根本就冇味嘅……
咖啡﹕拾爺話咖啡都好難飲……
埋單$803，呢到真係不可一，不可再！
食完飯，就同媽媽去工展會，奶奶因為屋企個閘出事，所以冇心情陪我哋行，爸爸就之前同我兩個妹行咗，所以又唔去。去到工展會入口，打俾我愛徒，佢即刻拎飛出嚟俾我，之後，我當然叫佢退下，再同媽媽分開行。想唔到今日平日都有咁多人行，我同拾爺行咗半個場，就走喇，買咗兩盒Market O嘅cheese chip，轉戰IKEA，之後就番歸。
掃毒
噚晚番屋企途經Taste，見到好多車厘茄減價，我哋屋企雖然仲有貨，但都忍唔住買咗四包，今日去到Taste，又有減價貨，難抵誘惑，再嚟三包，搞到啲車厘茄食極都食唔完，哈哈！
拾爺又發揮佢嘅愛煮意，呢份早餐正呀！
去睇十二點九場嘅掃毒，因為有換票證！呢套戲之前聽日月媽講前半段唔好睇，後半段先精彩，但肥仔就話前半段好過後半段……睇完，我覺得成套都唔好睇！陳木勝都係focus番佢嘅打打殺殺啦，講兄弟情完全唔係佢嗰瓣，好多場景都好突兀……明明要爆嘅時候，張家輝又九唔搭八地講笑，唔知佢想點……不過，學肥仔話齋，打還打，都要合情合理，三個人殺一隊兵，呢啲80年代嘅英雄主意已經唔啱我哋呢個年代喇！呢套戲真係唔駛錢先入去睇吓槍戰，要錢我先唔睇！
睇完戲，番屋企開餐！今朝唔係食咗好多嘢，有啲肚餓，拾爺買咗沙律菜整沙律！
之後就到我整Vanilla Mousse Cake，再交個場俾拾爺整dinner。
Vanilla Mousse Cake
雲呢嗱mousse凍餅 (食譜來源A Piece of Cake)
材料：
餅底：
芝士餅碎 60g (原食譜為朱古力餅碎5塊)
牛油 20g (原食譜為8g)
雲呢嗱mousse：
蛋黃 2隻
砂糖 25g (原食譜為50g)
淡忌廉 300ml
雲呢嗱條 4條 (原食譜為半條)
魚膠片 2塊半 (1塊=2.5克)
做法：
1. 餅底：牛油以熱水座溶，拌入芝士餅碎內，放入模內，放入雪櫃約15分鐘。
2. 魚膠片以冰水浸軟，瀝乾，備用。
3. 蛋黃及5g砂糖隔熱水略打散，加入雲呢嗱籽，拌勻。
4. 以小鍋將100毫升淡忌廉加熱至微滾，加入蛋黃漿，拌勻，熄火。
5. 魚膠片瀝乾後，放入蛋黃忌廉內，拌勻。
6. 將20g砂糖及200ml淡忌廉打至8成挺身。
7. 再將蛋黃忌廉加入淡忌廉內，拌勻。
9. 入模，放雪櫃6小時，完成。
吃後感﹕冇加奶始終差咁啲……
大脾氣小子
約咗舊生唱K，其實……我唔想同舊生唱，但佢之前成日買貴cake番嚟請我同小肥佢哋食，唔想欠佢太多，請佢食飯佢又話要唱K，唯有去唱啦。出門口前，拾爺一定要我先食早餐﹕
十二點唱到兩點半後，舊生陪我行去佐敦睇醫生。去到佐敦，舊生就走喇，拾爺接棒陪我，明明係咗三點九嘅appointment，因為前面有對準父母超級長氣，搞到我哋四點九先見到醫生，然後，呢對超長氣嘅準父母俾錢都要俾幾個字，搞到我出嚟又要呆等……醫生提醒我同拾爺，如果係準備要做父母，我就要開始食葉酸，一直以為有咗先開始食，原來係準備時就要食。醫生知我易病，提我睇醫生時要同對方講自己準備懷孕，咁樣對方就唔會開啲對懷孕有影響嘅藥俾我。佢翻查病歷知我個心有事，就叫我問清楚心臟科醫生我做手術(就連剝牙都計)要唔要用抗生素，原來……懷孕係一件咁煩嘅事嚟架……
睇完醫生，陪拾爺去食嘢，之後就搭車番娘家。成個禮拜冇見小王子喇，今日轉涼，小王子又被紮到成隻糭咁喇，哈哈。聽哥哥講，呢個衰仔脾氣越嚟越臭，早幾日發惡打到哥哥，哥哥一嬲之下丟咗佢落網床，唔准其他人營救，結果個衰仔喊到收聲，哥哥先放佢監。想唔到哥哥開始做嚴父喇，我以為佢一定會寵壞個仔添！
小王子嚟咗一陣，哥哥就餵佢食通粉，但個衰仔扭要嫂嫂餵，嫂嫂唔理佢(唔想佢學揀人餵食咁衰)，佢就發脾氣，本來我同哥哥吼佢，佢都乖咗一吓，但唔知點解佢突然發惡打哥哥，哥哥好嬲，就好惡咁鬧佢，再推開佢張凳去面壁。個衰仔又唔知點解唔喊喎，但嫂嫂就心痛，等咗一陣，佢就主動餵個仔食嘢。唉……想唔到哥哥同嫂嫂換轉咗個角色，嫂嫂而家要做慈母添。
嫂嫂餵食後，即時展笑顏。
笑嘻嘻指到上眼……
自己大力拍大後整親，即時嗲人，正古惑仔！
海欣花園 + 宏福花園
放咗自己咁耐假，係時候踢走懶蟲蟲，九點番到學校做嘢！但係……學校裝修，樓上不停鑽鑽鑽，我個頭就轉轉轉，工作效率奇低，成朝只係改埋個S.6 test同入分，仲有執好Market Intervention入面嘅price ceiling咋！
噚日應承Mr Ma send錢錢嘅contact俾佢，我好乖，今朝一番到學校就做咗，仲開咗個group，add咗部份我仲有contact嘅人，之後天使媽媽幫我add多少少，但全班一半人都未到……我已經好樣衰地，N年後先喺facebook要求add某啲同學做friend，其中有啲係我自己當年ignore人添架！人哋而家唔show我，當然正常啦，不過，我係為著老師一句說話而做，樣衰都唔怕！
十二點鬆啲離開學校，十二點半前已經到咗新世紀。直上六樓鴻星攞位，今日約咗舊同事茶聚，因為其中一人出嫁了，佢約我哋收餅卡。只係……我哋明明book咗枱，同鴻星個reception講完後，佢只係自顧自咁寫嘢，冇再理我……我見佢久久都唔俾反應我，就出聲問佢有枱未，佢先答話要等。結果，等到準新娘嚟埋(其他人又遲到……)，對方都仲未俾到枱我哋……我問準新娘係咪一定要去鴻星，因為落一層就係小南國同北京樓，準新娘表示轉場都ok，於是我落去問小南國，即刻有位，但我打俾準新娘時，佢又話其他人表示過小南國啲嘢食油膩……我奇怪點心就唔油膩﹖！算，改去北京樓，又係即刻有位。
入到去，正想行去坐，部長一嘢踩落嚟，痛到我死！佢仲要唔道歉！我當然唔會就咁算，企喺到表示痛，佢先好冇誠意咁講句對唔住……難為我隻腳先黑後紅，即時瘀咗……
今餐準新娘請，其實我已多次表示唔要佢請，我哋之前派帖都冇請，但佢堅持要請，後尾我先知原來佢只係派餅，唔係請我哋飲。點都好啦，學大頭話齋，結婚要用好多錢，雖然佢未來夫婿應該都係有米之人，但佢咁樣我真係唔好意思。大家一直冇咩點聯絡，原以為呢場飯局會幾悶，但食落又唔係，大家都有話題去傾，餐飯食到兩點半就散喇。
食完飯，我先到一田買三文魚骨，再到Addidas睇吓有冇我想買嘅衛衣，如果又係買唔到……點知……件衫竟然喺Catalog到有！雖然上次試過中碼大咗少少，細碼會fit啲，但佢已經係全線剩低嘅最後一件……件衫連專門店都未必買到，買到都冇折，但喺Catalog就有9折，加上我都prefer鬆身衫，所以就即時買咗喇。
番到屋企，放低嘢後，就同拾爺再出去睇樓。今次睇咗海欣花園同埋宏福花園。
海欣花園全為兩房單位，有三隻則，最靚嘅方廳則全部向西……我哋參觀嘅單位雖然景觀尚算開揚，但就處處都曬死……個agent話間屋一定要有太陽入屋，呢樣我都知，但當間屋各處都咁曬時，真係唔得佢死……仲有，所有方廳單位都會面向馬路，嘈都嘈死……
睇完靚則，就睇鑽石廳嘅單位。呢個單位都奇怪喇，鑽石廳已經衰架啦，細房仲要極奇「岩慚」，放得張單人床後，旁邊最多放衣櫃，書枱都放唔到……但放衣櫃個area又係奇形怪狀，一定要訂造傢俬先得……Agent提議我哋將嗰個超細嘅三角窗台改做書枱，先唔好理會呢個咁細嘅位只夠打開一本書，間房根本就細到放完張床，都冇位放凳，唔通真係要將張床當埋做書枱凳﹖！當然，呢個單位都有佢賣點，就係無敵大海景！由廳到細房，再到主人房，全部都係！尤其主人房，個窗又超大，望住個海，係幾舒服嘅！不過，呢個view係望到墳景嘅！我個人唔mind望墳，但可以嘅話，都唔會買呢啲單位，因為怕放售困難。
最後一間，亦係最衰嘅一間，雖然價錢最平，但我寧願俾多幾十萬都唔會吼佢，雞脾廳，傢俬都唔知點放好……買咗番嚟，咁多空間用唔到，講到佢有幾大都冇用啦！
如果呢個屋苑價錢低水，我都覺得一分錢一分貨地，所有唔好嘅嘢都應該要接受，但佢唔係喎！以上幾間全部都要四百萬以上，甚至貼近五萬百，我知而家個市係高到唔正常(雖然已回落少少)，但呢到個性價比實在太低！當然，佢樓齡新，外觀吸引，會所設施足夠，全部都係賣點，但呢啲對我哋嚟講都唔重要(咁樓齡當然唔可以太舊啦，即係三十年以上嘅，我哋都唔會考慮架啦，如果唔係，整時又要一筆，邊有咁多錢﹖！)，我寧願住舊樓，但則靚景好。
睇完海欣花園，又多一個被我哋剔除，即係就算大跌市都唔會考慮嘅屋苑啦。
行去睇宏福花園時，agent問我哋係咪買嚟新婚用……我話我哋已經結咗婚……
睇宏福花園，我哋睇咗一個三房單位，雖然宏福係房協樓，冇會所冇華麗嘅外表，但我一直好鍾意呢個屋苑，因為佢坐擁靚景，唔係向海向運動場，就係望青衣公園，全部都係不變景觀，而且單位實用率接近九成，買咗真係唔願走！我哋睇嘅單位就係望海同運動場景，景觀一流，而且單位好大，絕對夠用，價錢嘛，$690萬……對於我哋嚟講，當然係高啦，所以，只能恨一吓就算喇。
葵涌廣場 + 新葵芳花園
出葵芳睇樓，睇咗葵涌廣場同新葵芳花園，睇完之後，葵芳從此喺我哋嘅買樓名冊中消失！
先講葵涌廣場，睇咗一個三房單位，去到嘅時候，有另一個agent帶緊一對夫婦睇緊，佢見我哋企喺門口，竟然係叫我哋轉頭再嚟，我即時問自己個agent﹕「唔可以一齊睇架咩﹖」，記得以前睇樓，都試過幾次係同其他人一齊睇，agent於是就問一句可唔可以一齊睇，對方先點頭俾我哋入去。
入到去，見到個廚房都算正常，但大唔過我哋自己屋企嗰個，個廳就差啲喇，我哋屋苑嘅三房單位個廳一定大過佢！再入去，洗手間好細，閂門有困難……三間房，全部都唔ok！唔好講奇細嗰間，另外兩間，擺得床嚟，個衣櫃只可以放一個size細細嘅，好似喺到住嘅人唔洗點換衫咁……擺衣櫃嘅空間真係放得夏天衫嚟，冬天衫都唔知放邊好咯。
離開葵涌廣場，一連睇咗幾個新葵芳花園嘅單位，全部嘅則都好有問題！主人房個窗極細，客房仲大過佢！再唔係，就係個廚房勁細，細到打開個雪櫃門，自己就冇容身之處！越睇，就越範得自己間屋好好！
睇完樓，同拾爺去咗Spaghetti House到食tea，剛好喺5點前入座落order，遲多十分鐘都冇tea食呀！食tea時，就同拾爺商量我哋嘅置業大計，一直猶豫於貴買貴賣，住高級啲嘅屋苑，同等個市大大大大跌後買多間同屋苑嘅(真係要跌得跳樓價先得喇……)之間，最後，我哋prefer後者。貴買貴賣，係就係可以住好啲，但供又辛苦啲，而且買完大跌，以我性格，一定唔開心，哈哈。
食完tea，行咗一陣街，就去Taste買餸，想唔到會喺Taste到撞到自己個Maths & Stat老師，大家閒聊幾句後，夜晚，佢facebook inbox我，仲send咗我當年last day時，一班Maths & Stat同學同佢嘅合照俾我添。估唔到亞sir仲keep住張相，而我……應該丟咗囉。亞sir話雖然多年冇見，但希望可以搞個gathering。其實聽到佢咁講，我都好感動！自己都係老師，但完全冇呢種heart，我好怕同一堆學生相處，感覺大家個generation gap太大。為咗佢呢句說話，我決定喺facebook開番個group，add啲同學仔入去，不過……以我嘅號召力，應該冇乜人show我……點都好，總算做過。如果同學們有所回應，我會搞番個gathering。
Eat, Play, Love 