Staub

最近迷上萬寧嘅換購Staub活動，拾爺成日話屋企冇地方擺，想阻止我換購，但每次我一嗲佢，佢就心軟俾我換，結果，換到以下成果！

其實仲有兩個鍋未換，但屋企個廚房真係太細喇，冇位擺喇……我要收手喇！

Jack Wills

一早睇中Jack Wills某件hoodie，但折實都要$510，有啲貴……不過，Standard Chartered做緊優惠，喺Harbour City單一消費滿$500，可以換到$25嘅Starbucks coupon，星期六更多10%回贈，咁件衫即係$460加送多$25 coupon，感覺好好多！所以，我今日赴舊同學約前，專登出尖咀，為嘅就係去買件hoodie，再換coupon，哈哈。本來我上次試完，係想買中碼， 但想要嘅顏色斷哂碼……唯有試細碼啦，發覺原來細碼個膊位仲fit，於是即時扑鎚買細碼。

番娘家前，先到又一城嘅Adidas Women拎番退款，我仲見到經理口中已被解僱嘅員工喎，可能未last day啦，拎錢後，又同拾爺去Jack Wills睇吓嘢，拾爺試褲時，俾我見到件男裝hoodie幾唔錯，尤其係價錢，於是拎俾拾爺試，褲因為冇size，買唔到，但就買咗件hoodie，盛 惠$370，點解男裝平過女裝咁多架﹖！

去旅行時，可以同拾爺嚟件情侶裝了，yeah ~~

再戰Adidas

話說我上個星期日去咗Adidas Women到拎番差額後第二日收到Adidas嘅reply email，對方叫我講番個invoice number同分店名俾佢哋跟進，我就覆佢哋已經拎番退款，但就表示自己其實唔想用正價去買另一件hoodie，仲留埋個電話俾佢哋打俾我。

上個星期二收到Adidas嘅回覆電話，對方話會pass件事俾分店經理跟進番，其實我唔想再同嗰間舖嘅人接觸，唔想再見嗰個salesperson，但customer service嗰邊話佢哋都要了解係咪員工冇跟公司policy做嘢，佢哋自己都要跟進。

番到屋企，我阻止拾爺去洗件hoodie，in case對方真係俾我退番，洗咗就真係冇錢攞得番架喇。

等等等，以為Adidas Women嗰邊唔會打嚟，點知今日就收到佢哋電話，個經理好爽快咁答應俾我refund，因為佢覺得係自己員工冇跟指示，要求咗我俾錢在先，係佢哋唔啱。 經理叫我拎番件衫去分店就得，就算我已經冇咗張單都ok，佢仲因為要我走幾轉而同我講唔好意思添。我多口問句上次啲錢係咪公司出，而唔係 salesperson出，佢話係公司俾番嘅，我都安心啲，但佢同我講個salesperon已被解僱時，我嚇到「吓」咗一聲，對方即刻表示係該員工喺事 件前已請辭，咁都好啲，我只想拎錢，唔係要搞到人工都冇得做架！

呢件事今次真真正正地得到圓滿解決喇！

Izzue + Chocolate

臨近新年，IT旗下店舖又做promotion，喺其中一間舖頭買嘢，憑單可以到其他分店享半價優惠！當然，呢個半價係有上限架啦，價錢唔可以 超過之前嘅消費，即上一單如果係$500，顧客就可以憑單到其他IT旗下分店以半價優惠買$1000以下嘅嘢。呢個promotion其實上年都有，但我 同拾爺買嚟買去，都係去IZZUE買……張單唔可以用番喺同一店舖，而且只有3日有效期，結果，我係白白浪費哂啲優惠……

噚日，同拾爺去行街街，佢喺IZZUE睇中咗兩條運動褲，打算買嚟當睡褲，呢排IZZUE做緊買四件有4折優惠，於是，我倆努力搵嘢買，本來喺葵芳 分店都揀好哂想買嘅嘢，但點知拾爺睇中嘅其中一條褲冇佢個碼，我哋唔想未試就俾錢 (見過鬼，怕黑了……)，寧願搭車番青衣去試。去到青衣，拾爺搵到要試嘅褲，亦試啱，但係……呢到冇我本來打算買嚟湊數嘅belt賣……個sales話因 為佢哋間舖本身冇賣belt，所以唔可以幫我要求由葵芳transfer件貨過嚟……好彩，拾爺試褲時，俾我發現呢到有拾爺著開嘅橫條衫賣，拾爺隨即揀番 條嚟湊數。基本上，橫條衫可算係我哋每次嘅湊數對象！尤其當IZZUE再冇打底賣時。加埋我件灰色線衫，四件價4折後，$854.4。拾爺買嘅褲，其中一 條都幾厚，可以帶去韓國著！俾錢後，sales同我哋講拎住張單去IT旗下嘅其他店舖買嘢，$1710以內可享半價！上年我錯過呢個優惠，今年我誓要用盡 佢！

今日放學後雖然要開會至5點45分，但是晚唔駛番奶奶到食飯，我放學即走，去咗附近嘅Chocolate睇吓啲衫！須知道Chocolate除咗嗰 啲咩staff sales之外，基本上係全年唔減價架！所以有半價coupon，一定係去Chocolate買嘢！行完一round，冇嘢睇啱……正打算走時，俾我發現 佢啲運動褲唔錯，原價$459我當然唔買，但半價之後個價錢就好吸引！試完後，決定買淺灰色同藍色各一，當睡褲著。同sales confirm啲貨後，見到啲底底，於是就問sales我張半價單包唔包底底，一聽到包，即買兩盒！$159六條，平過買Triump同 Muji！Sales知我有張半價單，就提議我買襪，我對女裝襪興趣不大，去咗男裝部執咗pack俾拾爺，行番去女裝部時，俾我發現有另一款運動褲，個 cutting啱我去街著，仲有黑色添！於是，又拎入去試，最後，我放棄原先要嘅藍色運動褲，只要淺灰色嗰條，新發現嗰款就要深灰同黑色各一。因為我 quota有限，所以放棄咗買俾拾爺嘅襪，亦唔受sales所氹買男裝底底駛夠一千，三條運動褲加兩盒各3條底底嘅set裝，最後以$847.5埋單。

我去旅行又有運動褲著啦~~~

冷帽 + 頸巾

放學後，拾爺打嚟話陪我行街，開心！上個禮拜太遲去一田，結果$50 coupon被換哂……今日同拾爺一會合就去一田，都未夠5點，但coupon又係冇哂……收銀姐姐話4點已經被換哂喇……一田冇coupon換，我哋就 先行吓商場。行咗兩、三間舖，我肚餓，於是就入去王家沙食tea，當埋今晚dinner架喇，食飽飽，就去niko and ……到買嘢，上次嚟已經睇中咗條頸巾，但就唔知買藍色好定芥辣色，今次有拾爺陪我，佢幫我揀咗要芥辣色 ($164.5)，再買多頂同色冷帽 ($140)，旅行裝備又多兩樣，yeah ~~

大戰Adidas

話說我星期日喺Adidas Women’s Store到買咗件褸，點知星期五同拾爺行另一分店時，見到件褸大減價！我連件褸都未到手，佢就勁減$450，我當下嬲到噴火！於是，就打電話去訂咗貨嘅Adidas Women’s Store到問佢可唔可refund番個差額俾我啦，因為我真係連貨都未收到架嘛，點知對方用唔多友善嘅語氣同我講﹕「小姐，妳俾哂錢架喇！」，仲要係兩次咁多！我再三confirm佢公司係唔會refund俾我就收線。

收線之後，越諗越唔忿氣，雖然拾爺都覺得我唔可能要求人家退番差額俾我，但就因為對方一句﹕「小姐，妳俾哂錢架喇！」，反而remind咗我當日俾錢時，我係要求過只落訂，但個sales就叫我俾全數。係佢要我俾全數，然後而家用呢樣嘢嚟打發我﹖！我真心覺得被trapped！

太嬲嘅關係，我番到屋企，第一時間喺Adidas個official website到留言，將件事寫咗出嚟，如果佢哋唔跟進，我打算向消委會到投訴佢哋銷售手法有問題！

噚日收到Adidas Women’s Store來電話到貨，仲問我幾時嚟拎，我感覺好奇怪，平時啲舖打俾我叫我去拎貨，係唔會問我幾時去架囉！我唔去住，我要等佢哋official覆我！

今朝一早，先打去其他Adidas嘅分店到，問咗兩間，confirm佢哋公司policy係貨到先收錢，hold貨連一個仙都唔駛俾住後，就再打去Adidas Women’s Store同個sales理論，佢最初一再以我買時係正價嚟同我講，但我搬出佢公司policy係貨到先俾錢，我因為佢要求俾全數，而未能取消hold貨，再以減價價錢去買嚟回應佢，佢就同意refund番啲錢俾我啦。因為我買件褸時，同時買咗件hoodie，所以店方會先扣起之前俾咗嘅9折嘅差價，我實收番$259。其實，如果唔係兩件貨有9折，我係唔會買件hoodie架，更加唔會用正價去買，而家咁樣，我變相要用正價去買hoodie！不過，做人嘅嘢，得些好意須回手，我都唔想去到咁盡，可以拎番少少，就豪件hoodie俾佢啦。

本來今日同拾爺係要努力改嘢，但唔想再拖住件事，所以特登搭車出去拎褸 (真係車錢都蝕埋，本來噚日番娘家可以順便拎埋，但噚日未諗好對策，所以唔拎住……)。去到，佢要收咗我張單，但我件hoodie用正價買，我要求要有單，搞咗一輪，佢就俾我拎番張單走。但隔咗一陣，又打嚟話要拎番，仲話啲錢係佢自己出，要同公司交待云云，佢亦承諾我件衫有問題，可以拎番去換 (老老實實，我已經唔會再相信佢哋講嘢！)，拾爺話我可以唔駛理佢，但我心知自己唔會再番去換嘢，費時佢不停打嚟，就拎番張單俾佢喇。

呢件事擾攘咗我3日，終於得到圓滿解決，我個人即刻開心番哂！

一田感謝日

拾爺補完課打番嚟撩我出街食嘢，本來打算努力工作至傍晚先出街番娘家，但拾爺一通電話，就搞到我出鬼咗去……好彩，勤力嘅我，一朝已經改完一疊功課，加出咗少少來年form six嘅mid-term卷，仲打咗幾題今年DSE份卷嘅題目落word file。因為我個位越嚟越多嘢，實在唔可以keep咁多hard copy，我要將啲past paper逐步轉做soft copy咁keep。

出荃灣，本來想去創意廚房食嘢，但搵咗好耐先搵到嘅海德街又斷開一截截，街道牌又唔show街號……都唔知向左走定向右走好……然後，我又因為心急上網撳錯制，搞到部電話自行upgrade某程式，想上網都唔得……拾爺部電話又唔係smart phone……行到身水身汗嘅我哋，最後放棄，去咗譚仔食米線。等食時，部電話終於upgrade完，上網再check，發現創意廚房所在係我哋頭先行過嘅某條街再轉入去，真係好鬼「liu lung」……

食完譚仔，行出餐廳一刻，個肚同個胃有少少唔舒服……應該係因為頭先太熱，飲咗凍華田所致……其實我已經好少飲凍飲，一嚟凍飲對女性身體唔好，二嚟對我氣管唔好，三嚟，餐廳嘅冰通常用水喉水，我腸胃一向比人差，飲完好易肚痾……

同拾爺行去荃灣廣場買suitcase，行一圈後，始終心儀American tourister，本來我倆都情傾一個青色嘅24吋suitcase，但番轉頭打算買時，俾我見到另一個25吋嘅suitcase，仲有得加大20% volume嘅suitcase，價錢仲要平啲，$838！雖然，呢個suitcase嘅顏色只有灰、橙同紫，著實冇青色咁吸引，但佢大啲之餘，仲要平成一百蚊！Money is king，我倆最後買咗25吋嗰隻suitcase，要咗紫色。

買完suitcase，上一層買skincare，原來荃灣一田得好少skincare舖頭，本來想買Ultima II嘅water massage cream，但$220嘅優惠價賣哂，所以我冇買到嘢，再上去supermarket，個肚越嚟越痛，最後拾爺都唔買嘢，陪我番屋企。

是晚，番唔到娘家食飯，個肚痛咗兩、三個鐘，去咗三次洗手間，先真正肚痾……

打番娘家話番唔到去，爸爸聽到我又肚痾都表現得好無奈。

血拼Sogo第二回

七點幾喺張床到痛醒咗，其實前晚喺camp site已覺個肚唔多妥，噚晚都有少少唔舒服……痛到要起身去個洗手間，但又正常喎！瞓到九點到，起身，個肚仲有少少唔舒服，搞到我唔敢換衫出街……等等等，到十點半，準備出門口，再去多次洗手間，仍然正常。

食完早餐番屋企，終於瀉喇……但feel到件事未完，仍然唔敢出去……好彩噚晚爸媽唔准我陪爸爸入院，如果唔係，我出咗去又肚痛，都唔知點算囉。兩點幾，又再瀉多次……到三點半到，見個肚開始好番少少，就換衫出去喇。

先到灣仔，想話買鞋，但睇唔啱……再行去銅鑼灣Sogo。其實每年兩次嘅Sogo thankful week，我都只係買skin care，每次都係Cle de peau！今次買咗3支balancing lotion ($950 x 3)同兩支cleansing foam ($480 x 2)，送咗兩set travel set，今年嘅travel set又唔同咗，多咗mask呢！埋單我用HSBC card簽$3000，拎盡佢嘅$180額外獎賞錢，剩番嘅$810就用中銀去碌，因為中銀簽滿3次$600，就可以抽獎，保證$50回贈。我呢啲計到好盡！

買完skin care，就上去換抽獎券，最後落番supermarket，買紫菜($29.7)同埋三文魚骨肉($31.5)，打算呢個weekend整壽司俾拾爺食！

買完嘢，就番屋企附近同拾爺食dinner。本來夜晚打算同拾爺一齊去探爸爸，點知哥哥打嚟話醫院嗰邊叫爸爸唔駛咁早入院，俾完床位爸爸又叫佢番屋企……拾爺聽完之後覺得醫院太混亂，又要病人入院，之後又叫人出院，聽拾爺咁講，又係喎，爸爸準備接受手術，咁樣出出入入醫院，其實唔多好。等我聽晚番屋企食飯時，了解吓發生咩事先再決定向唔向院方表達不滿。(唔係話投訴，但要佢哋知道咁樣對病人唔好，同一事情，希望唔會發生喺他人身上。)

是晚，同拾爺又去元氣開餐，呢個月第三次，為的就係要為我個會員證續命。今日終於完成使命，不過，我個account仲有百幾分，下個月到期，即係下個月又會再食喇，哈哈。

愛在心內暖

八點九起身，梳洗後，幫拾爺熨衫，我呢個細妹口中唔靚嘅「花瓶」，其實都有建樹架！拾爺每日番學嘅衫，都係我幫佢熨架！

九點九出發，今日哥哥約咗姑媽、表哥一家同表姐一家飲茶，拾爺要留家工作唔去，只有我一人赴會。去到大家都到哂喇，我一早講明會遲啲到，噚晚咁夜先番到屋企，今日實在不能更早起身……小王子今日好精靈，完全唔怕陌生，同佢嘅表姐、表哥玩得好開心。

不過，最開心係我，因為小王子今日餵我食嘢呀！！！潔癖如我，都唔理得小王子隻手摸完呢樣摸嗰樣，麵包皮同馬拉糕都唔太乾淨，小王子伸出小手餵我，我就急不及待擘大個口去食，仲要啜爆佢隻手指仔！實在太太太窩心喇！小王子餵咗我好幾次，都冇人幫我影相或拍片…… (因為平時呢啲工作係我負責……)好彩，後來細妹幫我錄低呢珍貴嘅一刻！最好笑係，小王子最後一次餵我時，馬拉糕由我口中跌咗出嚟，佢即時皺眉，面露不悅，仲望一望地下，再啤一啤我，小王子未識講嘢，但我feel到佢話我浪費食物呢，哈哈！其實之前有次又係跌咗落地，佢指指地下，想我好似佢平時咁執嚟食呢，好得意呀！但呢個小子都開始古惑喇，佢試過伸出手要餵我，我擘大口想要食時，佢即時將個糕放入自己口中，我即時扁嘴扮可憐，佢見到就馬上奸笑，衰豬！

飲完茶，就去尖咀Sogo，兩層都行咗一圈，最後喺supermarket血拼咗五百幾蚊，買咗﹕

1. AGF宇治抹茶煎茶粉 ($48 x 4): 呢個簡直係心動價！我之後喺一田見到賣成$69.9定唔知$79.9，呢到原價都係呢個價錢。想試飲好耐架喇，但之前賣得太貴，而家趁低吸納！其實我唔係自己要哂架，有兩盒係買嚟送俾人架！

2. 北海道即食帆立貝帶子 ($99 x 2): 今日嚟呢到都係為咗佢！我一向都好鍾意食呢類嘢，好耐以前幫襯過優の良品，但佢越賣越貴……真係食唔落……今次呢個價，買得過！

3. Chiyoda北海道芝士腸 ($32.5 x 2): 未食過呢隻牌子嘅芝士腸，但都大膽地要咗兩包，希望好食啦！我知過幾日會再平啲，但嗰日我要入camp，根本嚟唔到買……而且，我只要兩包，慳埋嘅錢都cover唔到車費，所以今日買埋佢算喇。

4. 味醂 ($25.7): 屋企嗰支用哂，順便添置，呢個價又係平咗唔少，我見一田賣超過$30。

5. UCC即溶咖啡No.117 ($28.8): 買俾拾爺嘅，湊夠$500。

以為自己只會買少少嘢，所以冇帶環保袋……好彩有個背囊頂住！但啲嘢好重……原本打算慢慢行去太子，途中上Cake Library買cream cheese，再行去太子，邊shoppiong邊等拾爺剪完頭髮一齊去一田，但啲嘢太重，改為搭地鐵去太子搵拾爺先。好彩，頭先一早去咗啪平$2卡啫，哈哈。

去到太子同拾爺會合，將背囊嘅嘢拎哂出嚟咁滯，全數過入拾爺個背囊中！自己輕鬆行街等拾爺，去咗聯合shopping，當然出事喇，又買咗嘢……之前喺網上睇中嘅一條頸錬($128)，因為對方要連件我唔鍾意嘅衫賣，我冇買到，而家見到有剩錬賣，當然唔會放過啦！之後又睇中一個hair band($93)，議價後$210。離開前，見到有個真皮袋都幾靚，七百幾蚊，老闆仲有另一隻色，因為之前用spotlight射到個tone唔同咗，所以只賣$500，呢個價絕對令我心動！但我怕買完拾爺又彈，所以hold咗一hold，等埋拾爺先決定買唔買。

拾爺剪完髮後，第一時間捉佢去睇袋。果然，拾爺覺得個袋太番工feel，唔啱我番學用，平時出街更加唔夾……(我自己都咁覺得……)最後冇買到袋，反而睇中咗件橙色外套($388)，結果買咗，哈哈！我當然又講吓價啦，盛惠$360，多謝拾爺。

轉戰一田，買咗今晚準備下廚嘅食材就快快番屋企。

番屋企放低戰利品後，又再落樓去萬寧買coupons ($1000)、759買罐頭 ($8.9)同去百佳買toilet paper ($28.9)，今日真係駛咗好多錢……