師姐提建同九月生日嘅同事慶生，其實主要係幫女俠，大家約定今晚去八月花開餐！

六點去到，亞頭仲未到……呢個學年，亞頭被借調到教育局，雖然開學只有四日，但我已經好唔習慣……依賴慣咗佢，凡事只需聽佢吩咐，唔駛自己用腦！而家我要暫時孭起panel嘅嘢，又要變成新仔個亞頭，教佢做事……我自己都未顧得掂自己，都唔知點教人……仲要接手某個俾學生申請嘅funding，好多嘢要靠自己……但其實我自己一啲都唔可靠……好想好想亞頭快快番嚟，等佢做番亞head，我只需聽指令辦事，唔駛自己做決定！

等到六點半到，亞頭終於出現，仲帶埋送俾女俠嘅禮物，然後，大家就喺枱底「偷偷」咁喺張禮物附予嘅卡上簽名，其實……女俠一早知發生緊咩事，係我哋自己「懶」神秘，哈哈。

八月花經過大裝後，成間餐廳感覺唔同哂，採用淺色裝潢，光猛好多！餐具都唔同咗，用咗同「美中‧鴨子」同一系嘅餐具，不過餐具上嘅logo就用番自己個餐廳名。

每次大班人去食嘢，我最開心！因為我係負責點菜嗰位，我可以揀好多自己好想試嘅嘢食之餘，大家又會讚賞我點嘅菜合胃口！滿足！望望menu，見佢更換咗某啲菜式 (都好一段時間冇嚟開餐……)，今次一行8人，可以點多啲新嘢喇！我點咗﹕

鬼唔搭八春卷 ($42)﹕遲咗少少食，唔夠熱……不過……個皮都好似唔太夠脆……

脆脆BB豬 ($78)﹕八月系列招牌菜，挑選個多月大，約兩至三公斤重嘅BB豬，以傳統「手碌」手法燒烤而成，每次我都覺得佢味道普通……Menu就寫到無敵，張相仲影到好靚，但實物卻係完全引唔起我個食慾……但佢係女俠大愛之物，所以必點。

洋蔥頭焗骨 ($95)﹕對我嚟講嘅新菜式，味道ok，唔特別好食，但又唔會覺得唔好食咁囉。

蒜片一口牛柳 ($68)﹕一睇個賣相就令人好失望！一啲都唔吸引！之前食過啲牛肉色澤靚好多！加咗價之後，賣相差咗，份量少咗，想點﹖！

黑椒珍珠雞 ($88)﹕又一道對我嚟講嘅新菜式，鹹咗啲……

金沙翡翠豆腐 ($45)﹕另一道對我嚟講嘅新菜式，好鍾意食「金沙」系列嘅嘢，雖然係唔健康架喇，但真係忍唔住要點！翡翠豆腐其實唔係真豆腐，只係將蔬菜搞爛整成豆腐樣，好特別！

清茶‧淡飯‧素三菇 ($85)﹕愛菇如我，一見到呢道集三菇嘅菜，即點！不過……個名改到咁淡，味道卻濃得過份！令人失望！其實點得呢個菜嘅人，口味又點會過重﹖！餐廳有必要調調個調味！

五香紙包骨 ($88)﹕懷舊系列，大家知我鍾意食，冇折都叫我點。大廚將柱侯醬、沙嗲同南乳混成秘製醬汁，醃製新鮮豬扒個多小時，再將其置於密封嘅紙裝中鮮炸。可惜……味道仍然不及兒時所嚐到的……始終豬扒同排骨有別！

一品砂鍋飯 ($118)﹕好多之前鍾意食嘅麵同飯都冇咗……唯有揀呢個……但我覺得個飯過濕，味道亦過鹹……

魚‧糕 ($98)﹕將生魚拆骨，起肉，製成「魚糕」，蒸後上面放上生魚片。一向唔好魚，但見佢講到咁考大廚功夫就即管一試，味道好普通，不過賣相真係幾靚！

食完主菜，就到甜品，當然又係由我話事，嘻！

幻彩涼粉西米撈 ($48, 2-3位用)﹕其實呢個甜品冇咩特別，點佢純粹係因為頭先食咗咁多口味重嘅嘢，想食啲生果中和番，而且，我見佢份量可以用嚟share，符合經濟原則。其實呢道甜品除咗生果同涼粉，仲有咖啡奶凍，而且整得幾好味！

砂煲香橙布甸 ($32)﹕我係被佢個賣相吸引而點嘅，份量好細，不過我哋都一人一啖咁share嚟食。我同女副校都食唔到橙味……但小肥話佢食到。叫佢做布甸，我覺得佢似勁重奶味嘅蒸糕多啲……老老實實，我覺得佢個賣相同香味更食味道，即係佢個價值好表面，下次再嚟，我唔會點囉。

埋單折前$1200，AE白金卡折後……應該九百幾，師姐請，所以我唔太清楚。

評分時間﹕
食物：一般
服務：一般
環境：一般
衛生：一般
價錢：有折就ok
總結﹕有折先好幫襯

餐廳資料：
八月花
九龍塘達之路80號又一城G層25號舖
2333 0222

80後……

25 八月, 2014honeyhinbaby 同事三分親發表留言

早啲番學校打算執一執個位，事關今個暑假學校下令全世界調位，各人喺七月尾就要將自家物品pack箱，等校工洗乾淨個教員室後，再幫我哋將啲箱移到新位置，我想其他同事早喺今日法定開會日前已經番過去unpack個箱，執好自己個位，唯獨我一個咁遲番香港，執唔切架啫。

懷著興奮嘅心情番去，誓要執靚個位，新學期開始要做個organize嘅人，點知……一番到去，就見到個位好亂！好多人俾嘢我，將啲文件就咁放哂喺我枱面！算！呢啲都好易執！再望，書架上竟然有書！我個箱明明仲封實哂，冇可能有書架喎！一睇，原來係上手業主嘅！上手業主不獲續約，一早去如黃鶴，我想搵人問責都唔得……但心中有氣！邊有人咁冇手尾！明知自己要走，就應該走前將書整理好，再交俾自己個panel head！呢啲先係正確嘅工作態度！2.0見我氣，就叫我體諒上手業主仲細，唔識嘢，嘩！我好肯定我自己當年唔會咁冇手尾囉！明知教員室大執位，下一個坐自己位嘅唔係教相同科目嘅人，執好啲書交番俾panel head是常識吧！嬲都冇用，唯有自己幫佢做埋，執好啲書，同佢panel head講咗聲，人家親自去我個位到拎番走！(好多書，重到腳傷嘅我一定唔會亦冇可能幫佢搬到！)

書架上除咗有教科書，仲有學校送俾老師嘅一啲學校刊物，佢唔要，又唔還俾office，又唔丟咗佢，留喺位到做乜﹖俾我﹖我都有啦！唉……又要幫佢拎俾office。

以為搞掂個書架，可以開工為個位先消毒再放嘢，點知……一打開個櫃桶，又係一大堆上手業主遺留落嚟自己唔要嘅嘢！文具、咪、紙張，凌亂不堪！好心自己唔要嘅嘢就自己丟哂佢啦，留喺個櫃桶到做乜呀﹖！真係好嬲！嬲到喺個位到發哂火！正想抽個櫃桶出嚟丟哂佢啲嘢時，女俠阻止我，帶我去office投訴，office即刻叫校工幫我清，順便幫我抹乾淨個櫃桶。

當我搞掂個書架同櫃桶後，再打開另一個櫃門，發現仲有一個籃……我已經冇氣再發火，我真係唔能夠理解而家啲「年青人」個腦部運作，究竟佢哋知唔知咩叫「有手尾」同「責任感」﹖！亞頭成日話80後係咁，每次我駁佢嘴話我唔係咁時，佢都會話我虛報出生年份，我根本就係80前，哈哈。

也許

17 六月, 2014honeyhinbaby 甜蜜蜜、同事三分親 2 則迴響

喺學校staff common room改改吓卷，突然~~

小肥 (唱)﹕也許 ~~

我 (接力)﹕相戀這條路擠迫的懷抱

小肥﹕吓﹖！我唔係諗緊呢首歌喎。

我﹕咁你諗緊邊首﹖

小肥﹕我諗緊「也許相愛很難」。

亞頭﹕吓﹖！我唔係諗緊呢首歌喎。

小肥﹕咁妳諗緊邊首﹖

亞頭﹕我諗緊「也許當天的癡未完想講的講未完」。

放學後，同拾爺歎下午茶，話佢知發生呢件事。

拾爺﹕吓﹖我諗緊「也許我真的太累也許我要睡一睡」。

我﹕哎呀，要唱出嚟架，你呢首都唔係歌！

拾爺﹕咁我唱出嚟啦 (唱) 「也許我真的太累也許我要睡一睡」……

我﹕……

Wooloomooloo Prime

16 六月, 2014honeyhinbaby 同事三分親、日日有食神 2 則迴響

2.0提議為亞頭慶祝佢嘅結婚紀念日，其實亦只是我哋去食餐好嘅籍口一個，於是一行五人齊齊向Wooloomooloo出發！

餐廳位於The One 21樓，一出lift，就見到幾張大sofa，外望海景，餐廳環境著實唔錯！

行去reception，講低姓名，waitress就帶我哋向前行至走廊盡頭。

再於另一入口進入餐廳，原來餐廳分成兩大區域，一邊應該係for fine dining，另一邊則為bar。

靠窗嘅多為四人座位，我哋一行五人，只可以坐出一排……

大家睇完menu後，就order嘢食，呢到有兩個外籍waitresses，兩位都黑口黑臉，好唔friendly……叫完嘢食，waitress先上麵包﹕

麵包﹕外脆內軟，外面脆得嚟唔係硬嗰隻，整得幾好！但麵包唔夠麵包味……

Jumbo Crab & Mango in a Rice Paper Wrap with Curry Mayonnaise﹕除達人以外，我哋四個都揀咗呢個appetizer！四個都一致讚好！首先，個appetizer用料十足，從相中可見，個卷物一半係crab meat一半係mango，crab meat雖然唔得鮮味，但足以令我呢個懶得自己剝殼，卻又愛別蟹嘅人過足口癮。Mango顏色好靚，食落亦非常ok。但我最愛還是個rice paper，初睇menu，仲以為係越南米卷，點知原來唔係，我唔知呢隻係咩rice paper，佢有啲似蝦餃皮，但又未去到蝦餃皮咁韌，口感好正好特別，少少堅韌，非常好味！

Cream of Baby Pea Soup with Bacon & Croutons﹕達人之選，因為佢對蟹同芒果都敏感……不過，呢個湯佢都大讚好味！

Pan-Seared Lemon Sole Fillet with Broccoli, Mashed Potato & Puttanesca Sauce ($218)﹕2.0同亞頭之選，唔知咩味。

Grilled Australian Rib Eye with Potato Gratin, Zucchini & Morel Mushroom Sauce ($258)﹕我、小肥同達人都揀咗rib eye，雖然呢到嘅牛都係哥哥做緊間公司供應嘅，我同哥哥拎貨，呢個價錢，已經買到好大嚿！所以喺到食，有少少唔抵，但嚟到呢到，又冇理由唔食牛扒架嘛！點知……waitress走嚟同我講塊扒太細，未必做到medium rare，令我覺得更唔抵！道菜一上枱，真係好細塊……同平時哥哥帶番嚟俾我哋大塊大塊咁煎嗰啲相差好遠……不過，食食吓，其實都夠飽嘅。講番塊扒嘅味道，開頭幾啖覺得牛味唔夠，後尾先開始感受到。個人覺得個mushroom sauce好正，creamy得嚟又充滿菇味，而且仲真係有菇喺埋到！但同塊扒唔夾！牛扒沾上mushroom sauce，其牛味完全被個sauce蓋過……配菜方面，車厘茄同脆肉瓜嘅味道都好一般，potato gratin個賣相好靚，面層仲有焗過嘅cheese，好香好正！但整體個potato gratin就過鹹……

Strawberry Pavlova with Chantilly Cream & Orange Sauce﹕我同亞頭之選，唔好味！份量又細，件嘢又冇嚟特別……中伏！

Dark Cherry Tart with Rum Raisin Ice-cream﹕小肥同達人之選，唔知咩味……

Italian Gelato & Sorbet with Crushed Praline﹕2.0之選，我只食過啲crushed praline，味道唔錯！

餐茶我揀咗lemon tea，味道當然冇特別，但可以沖到兩杯幾，夠我慢慢嘆。

埋單$1331，環境好好，食物質素尚好，服務卻有待改善……(其實主要係嗰兩個外籍waitresses唔ok！)我哋五個人十二點八去到，坐到三點先走人，餐廳又唔多人，幾啱gathering。可以同一班傾得埋嘅同事咁樣飲飲食食閒聊一番，我覺得自己好幸福！

評分時間 (午膳標準)﹕
食物：中上
服務：不合格
環境：很好
衛生：很好
價錢：可以接受
總結﹕值得再試

餐廳資料：
Wooloomooloo Prime
尖沙咀彌敦道100號The ONE 21樓
28700087

小南國

12 六月, 2014honeyhinbaby 同事三分親、日日有食神發表留言

小肥老婆帶埋細女嚟同我哋食lunch，小肥請客，去咗小南國。今次gathering主角好明顯係「Hei Hei」，我哋一班auntie都被其笑容冧死。

灌湯生煎包 ($25 / 3個 x 2)﹕好夠熱又多湯汁，生煎包底煎得又脆又香，讚！

相依相伴 (木耳香菌炒素菜) ($88)﹕味道一般，唔明點解會係推介菜式……

上海(薺菜)炒年糕 ($78)﹕味道普通。

叉子鬆 (配叉子燒餅2件) ($78 x 3)﹕肉鬆好好味！唔會過鹹，但個叉子燒餅就唔夠鬆脆……

生拆蟹粉小籠包 ($36 / 3個 x 3)﹕味道唔錯，一向鍾意食蟹粉小籠包，餡味幾足！

上海鹹肉菜炒飯 ($68)﹕雖然表面已泛油光，但食落啲飯仍然未見濕潤……味道偏淡，但我用食剩嘅叉子鬆撈埋嚟食就好正喇！

仲點咗砂窩餛飩雞湯 ($128 / 半份)，但唔記得影相。女俠話呢間分店嘅砂窩餛飩雞湯冇佢之前去另一間咁鹹，同意，個湯唔會過鹹，但卻飲唔到雞味……我只會話個湯唔難飲，但絕對唔好飲，因為基本上佢唔可以稱之為雞湯。餛飩味道亦屬一般。

話說我哋食到咁上下，一隻flies喺張枱到飛嚟飛去，我哋各人努力趕佢走，最終佢都停泊喺食剩嘅一件叉子燒餅上。我ignore小肥嘅唔情願，示意waiter過嚟講述事件，對方拎走我碟嘢後，又隨即放番上枱，原來餐廳只打算換走件叉子燒餅，肉鬆冇得換……其實隻flies都有停泊碟邊，我只係冇講埋出嚟。我以為一間拎得「優質服務」嘅餐廳係唔會小家到只換其中一樣嘢，原來係我錯！我同亞頭見到碟打回頭嘅肉鬆，即時互換眼神，女俠同女副校都即時表示錯愕，但最令人震驚係，我哋四個女人才剛表達對餐廳嘅不滿，小肥卻爆出一句﹕「呢到服務幾好！」我哋四個同一時間以詫異嘅眼神望住佢。佢當然意會自己講錯嘢啦。呢個人都唔知話佢太好人定係要求太低，餐廳肯換叉子燒餅係基本吧，呢到根本就唔應該有flies出現！不過，我哋四個女人想唔到嘅係，餐廳最後俾夠兩件叉子燒餅，算佢小家唔哂啦。

甜品時間，叫咗﹕

上海桂花拉糕 ($30 / 3件)﹕將桂花糖集中中間，食到該處真係甜到癲……但糕嘅部份又過淡……雖然口感堅韌有o趙勁，但味道始終談唔上好。

金絲南瓜餅 ($30 / 3件)﹕三件叫南瓜餅但食唔到南瓜味嘅物體……奶皇味更重！撇除其名字，奶皇味嘅煎餅味道著實唔錯，外面堅韌有o趙口，內裡奶皇又不會過甜，讚！

三大銀行信用卡皆有85折，埋單幾多錢我就唔知喇，但其實都計到嘅。

Kowloon Shangri-La

5 六月, 2014honeyhinbaby 同事三分親、日日有食神 2 則迴響

又到咗一年一度亞頭請食飯嘅日子！今年亞頭繼續大方益街坊，請埋小肥、女俠、女副校同埋師姐一齊去！本來亞頭提議去日航，但由於酒店被包，只能安排坐出面，亞頭最後又係請番我哋去九龍「山卡啦」。

女俠、亞頭同埋師姐先打的去，我同小肥就等埋女副校先再打的。一去到，亞頭佢哋已經食緊，我同小肥因為肚餓，都唔客氣地即時去拎嘢食，我今年冇好似上年咁食咁多，但都出咗去好多轉﹕

Parma ham﹕一睇啲色已經覺得唔靚……就連啲哈蜜瓜都唔夠靚……

腐皮壽司﹕啲壽司飯太硬……

三文魚刺身﹕呢個算係ok。

蟶子﹕都幾好味！

蜆﹕麻麻哋……

煙三文魚﹕唔好食……

Hams﹕好一般……

沙律菜﹕ok。

叉燒﹕擺明唔好食，純粹過吓口癮。

油雞﹕肥到呢~~~

烤雞﹕ok喎！

焗海鮮﹕夠哂熱！味道唔錯！

多春魚﹕鹹咗啲囉……

雞翼﹕燒得唔夠香……

串燒﹕唔夠惹味……

蝦片﹕脆就幾脆，但冇蝦味……

地中海雜菜湯 (唔太記得個名)﹕辣辣哋幾惹味！但都係鹹咗少少。

碗仔翅﹕唔特別好食，但勝在味道唔會太濃，師姐嫌佢冇味，但我覺得剛好。

菠菜芝士意大利雲吞﹕個皮整得好差，好難食！但個餡就幾好味。

龍蝦仔﹕最鍾意酒店開埋俾我，食到海水鹹味，滿足！

雲吞﹕好多粒蝦！好大嚿！

魚皮餃﹕難食！個皮好嚡口！啲餡又少到可憐……

所有甜品都分咗一半俾女副校。

綠茶奶凍﹕好味！不過……綠茶隻色好假……

焦糖燉蛋﹕唔夠滑……

Tiramisu﹕對唔飲酒嘅我嚟講，酒味太濃……

Earl grey chocolate mousse﹕鍾意佢夠苦！

Apple pie﹕一向唔鍾意食apple pie，聽小肥講好味先拎件嚟試，結果我食咗兩啖就放棄，太甜喇！

Haagen diaz 雪糕﹕唔駛多講。

食到咁上下，我要求嚟張大合照，每人手拿一球雪糕，仲要係唔同顏色嘅，亞頭要朱古力味，師姐要雲呢嗱，我要綠茶，小肥要芒果，女副校喺我提議下要夏威夷果仁，女俠就要桑果。本來我捉咗小肥陪我去拎雪糕，原意係一人拎三支，點知佢拎咗兩支就話拎番去先，走咗又遲遲唔番，結果我一人拎四支番位……但張相影出嚟好靚，我好開心呀！

聘珍樓

22 一月, 2014honeyhinbaby 同事三分親、日日有食神發表留言

同同事們嘅團年飯，女俠誠意邀請埋拾爺出席，所以我食得特別開心！

今年團年飯，選址「聘珍樓」，亞頭有ICBC信用卡，可以優惠價$2,288享用「冬日歡聚宴」。

三小品 ~ 蒜泥白肉卷﹕好普通，我寧願食薄薄加一片片嘅蒜泥白肉。

三小品 ~ 宮保蝦丁﹕冇咩點食，不予置評。

太極碧綠忌廉燕窩海皇羹﹕咩味都飲唔到……食呢個嘅時候，我哋因為食唔出係咩，就問有餐牌喺手嘅亞頭，佢做動作叫我哋估頭兩個字，但我同拾爺都唔知佢做緊乜……亞頭話我哋差，再向其他人，女副校竟然估中……但其實我覺得係因為佢兩個熟，正常人應該唔會估得到！亞頭只係雙手分別向前推，拾爺講笑估佢做緊「龜波氣功」囉。