同哥哥陪媽媽去養和覆診，媽媽又遲大到……遲到本來想去試嘅餐廳差唔多落場……唯有求其試另一間唔會落場嘅。哥哥話呢間餐廳嘅waffle出名喎。
餐廳裝潢
坐低後，一人叫一個餐，每個餐都包半件waffle。
墨西哥風味芝士腸鑊仔 ($88)﹕哥哥之選，我哋當然有試啦！份量好足！最好食嘅係啲薯仔，又香又脆，因為有好多薯仔，所以呢個餐其實食到人好飽架！
煙三文魚意大利飯 ($86)﹕我同媽媽都揀呢個，味道好一般。
跟餐嘅waffle，之前聽哥哥講話好出名，嫂嫂同細妹都試過讚好，但我覺得一啲都唔好食……唔知係咪因為今次件waffle唔熱，完全唔脆，又唔夠蛋味，令人失望！就連哥哥都話唔得。
埋單$290，我請客。
餐廳資料：
Green Waffle Diner
銅鑼灣百德新街22-36號翡翠明珠廣場1樓10號舖
2880 5123
出到尖咀，唔知食乜好，唔想又食Spaghetti House，決定俾多次機會好時沙嗲。
沙嗲串﹕豬、牛、雞都要，全部都好一般……
海南雞飯﹕雞冇雞味就預咗，但個醬同之前食到嘅已經不再一樣，令人好失望，呢間餐廳，從此要被打入blacklist中。
喇沙﹕好少料，個麵又難食……
埋單$152，唔值！
餐廳資料：
好時沙嗲
尖沙咀麼地道63號好時中心144-148號舖
2739 9808
朝早收到哥哥嘅whatsapp，話爸爸精神不佳，取消前往醫院做物理治療。因為我11點幾先會有堂，所以我朝早好專注咁打緊出年form 3要用嘅school-based materials，出出吓notes，就收到拾爺電話，話哥哥喺whatsapp留言要call白車，我嗰時先check吓部電話，哥哥話爸爸唔太舒服，所以要call白車，但應該冇大問題，因為之前都call過幾次白車，我哋心知爸媽又要喺急症室等好耐先有得上房，哥哥今日只係攞咗半日假，所以我提出一放學就去接更。
隔咗一陣，哥哥喺whatsapp表示爸爸被送入去急救病房，佢當時仲表示應該冇生命危險，點知……我做做吓嘢，就收到哥哥打嚟，叫我即刻打的去醫院，話醫生表示爸爸而家好弱。聽完電話，我即時拔走叉緊電嘅電話，叉電線就咁丟喺枱面，拎袋就往校長室到衝去。一見校長空冇開燈，就衝去搵女副校，邊請假邊忍住淚水，當時同名人都喺女副校間房，佢哋叫我即刻走。
衝出校門，打俾拾爺，叫佢即刻打的去QE，同時發現成條馬路都冇咩車，就打算邊行邊截，然後，我發現原來當時剛好紅燈，所以啲車未駛到嚟，於是，企定定等綠燈，果然有的士，即刻截！
喺的士上，我已經開始喊緊，的士一到急症室，我就衝去搵媽媽 (因為媽媽係跟上白車嘅一人，哥哥都係自己搭車去醫院嘅，佢知爸爸情況，係因為媽媽喊住咁打俾佢。)，但行咗一圈都唔見人，於是打俾媽媽，媽媽講低房號後，我一轉身，就見哥哥喺房門口叫我。衝入房，見到爸爸已經冇咩意識，我同爸爸講自己嚟咗之後，就不停喊。等緊其他人嚟時，媽媽時而走上前，用手輕按爸爸額頭，叫「阿成~~」，睇到我好心酸。哥哥同爸爸講叫佢唔駛擔心肥仔，話我哋幾兄弟姊妹一定會睇住佢。爸爸生前講過仲擔心肥仔，但其實自從肥仔轉職做郵差後，爸爸對佢已經放心不少。
之後，肥仔都趕到，佢當時又係已經眼紅紅，見到亞爸時，忍唔住喊。大妹嚟到時，爸爸嘅意識已經好弱，大妹喊住同亞爸講話自己嚟咗，到細妹嚟到，我覺得亞爸已經冇哂意識……之後，就到妹夫、嫂嫂到嚟，拾爺間學校最遠，所以佢最遲先到。我喊到唔夠紙巾用，要問佢哋攞。哥哥話咁樣係最好，爸爸叫做去得舒服，好過後期cancer入骨，佢會好痛。我哋心裡當然明白，但知道係一回事，傷心又係另一回事。
一男一女嘅護士見我哋到齊，就叫醫生嚟，其時我哋個堂哥亦到場，堂哥做殯葬業嘅，爸爸之前講過後事要俾堂哥搞。醫生向我哋解釋爸爸個情況，原來佢個肝已經壞死……白車嚟到醫院時，爸爸身體已經好弱，醫生知道再做急救都只係用儀器夾硬吊住爸爸條命，加上爸爸之前表示過唔做急救，所以醫生就俾佢舒服啲咁自然去。由於爸爸未上病房，按程序佢要被送入葵涌公眾殮房，然後，警方要調查死因係咪有可疑，有機會要解剖屍體，不過，醫生話爸爸呢個case應該唔會要解剖。同時，醫院方面亦可以酌情處理爸爸個case，由於佢哋本來係幫緊爸爸排版上病房，只係爸爸等緊時，突然病情轉壞，所以佢哋可以照補一張入院紙俾我哋，當爸爸係喺病房離世。我哋只需交$100入阮費，爸爸就可以留喺醫院嘅殮房。醫生同我哋解釋緊情況時，堂哥多次插嘴，話爸爸一定要送去葵涌公眾殮房，完全冇心機去聽醫生講嘢，人家多次表示可以offer我哋當爸爸入院，醫生再三解釋，佢都好似聽唔到咁……後尾，我哋幾個出聲表示想爸爸留喺醫院殮房，堂哥先聽到爸爸唔駛去去葵涌公眾殮房。
醫院方面俾我哋再陪多爸爸一陣，爸爸被推走前，大妹話來世要再做爸爸個女，細妹話要同爸爸喺天家相見，哥哥話一定會睇住肥仔，我同爸爸講，其實好想生個孫俾佢。
爸爸被推走後，我哋就去食lunch，大家喊完一場，食飯時有說有笑，哥哥仲話大家要抽生死籤，睇吓邊個要同媽媽去旅行。但我知道，大家仍然好難過。
食完飯，都放學喇，加上我心情仲未穩定，只要一諗起爸爸，眼淚就失控咁流落嚟，所以我冇番到學校，同拾爺番咗屋企。
夜晚，到奶奶家做節，奶奶問咗我幾句爸爸嘅嘢，我又忍唔住喊，佢安慰我唔好太傷心，知我眼淺，佢都唔敢多提。
哥哥陪爸爸去睇舒緩治療，人家話手腫腳腫係因為血氣唔運行，要long高手腳嚟瞓，血壓低就正常嘅，因為爸爸始終係病人，暫時唔駛轉藥。人家冇要求爸爸入院，即係情況尚算安好，咁我都放心啲。
細妹星期一打去保良局租借電床，非常好彩，局內有一張日本電床，其size比歐美嘅小，剛好夠放於細房中。電床原定喺今朝送至家中，但到我放學番到娘家，張床仲未送到……其時，細妹同妹夫兩個請咗半晝假嘅人都未敢走住，點幾兩點，電床送到，大家企埋一邊，等師傅拆咗細房內嘅碌架床，再按好電床後，大家就去學點操作電床。
為咗方便爸爸之後上落床，我哋臨急臨忙將細房內個書架搬埋出廳，搞到間屋亂成一團……妹夫幫手扶起爸爸坐上大班椅後，就先行離去，其實佢已經遲哂番工……細妹因為屋企太亂，決定唔番工，留喺屋企執一執屋。爸爸食完嘢之後，我就推佢入房，本想自己一個扶爸爸上床，但搞唔掂……媽媽唔放心，一早跟埋入嚟幫手，但我同佢兩個一齊扶爸爸上床，爸爸都只係坐到好邊嘅位，差唔多要冼番落去時，我即時大嗌細妹幫手，三個女人好辛苦叫做推到爸爸坐番上床少少，再由爸爸自慢慢坐番入床中間。好彩電床早送嚟，如果唔係，得媽媽自己一個喺屋企，我真係十萬個唔放心！
今日電床送到家中，我心情輕鬆咗好多，之前一直好怕媽媽自己去扶爸爸時，佢唔夠力，整親自己又會整傷爸爸，我擔心咗好耐，而家有電床，爸爸食嘢放便好多。聽日會去睇舒緩治療，到時爸爸冇得再扭計，手腫腳腫加低血壓，是但一樣唔過關，佢都要入院，唔駛我哋日日擔心，但又唔可以帶佢睇醫生。
番娘家探完爸爸，就同拾爺去食tea，去咗蒲田。之前喺蒲田食過一次lunch同一次dinner，今次就試埋佢個tea。
入座後，只有一張墊枱紙，上面印有tea set，一到tea time，全店只供應呢個set，我同拾爺各要咗一個。
下午茶基本套餐 ($68)﹕包6小碟。
香茅凍﹕味道一般，我嫌佢香茅味太淡……
家常燜筍乾﹕一向唔太好筍，呢個我嫌佢淋得滯……
金湯莧菜﹕普普通通。
水晶豬蹄凍﹕唔講都唔知自己食咗乜……咩味都冇……
興化米粉﹕呢個最好食！個粉軟硬適中，個調味幾唔錯！
紫菜蟹肉豆腐羹﹕根本就係飲紫菜湯……又唔係杰食，唔知點解要叫羹……蟹肉嘛……可能有兩、三條線食過嘅，太幼到咁，食咗落肚都唔知囉。
埋單$149.6，食完兩個都唔飽……
餐廳資料：
莆田
鑽石山龍蟠街3號荷里活廣場2樓214舖
2111 8388
雖然肥仔去咗旅行今晚先番，媽媽都想提前做一做節，感覺佢怕爸爸捱唔到太耐……爸爸自從由醫院番嚟之後，水、腳開始有水腫，我哋勸佢去睇醫生，佢就點都唔肯……
媽媽今日專登去街市買雞，想話一家人坐埋食餐好嘅，嚟一個pre-做節，點知街市個雞檔老闆超冇良心，賣隻爛雞俾媽媽！媽媽話佢揀雞時，個老闆娘懶熱心咁介紹隻雞俾佢，同佢講呢隻靚，媽媽信佢，就俾錢買咗番嚟，點知番到屋企，一打開個袋，就發現隻雞有個位爛開哂！
媽媽見到好嬲，就拎隻雞落去同個老闆娘理論，人家堅持唔退貨，媽媽打嚟，叫我落去斬料，途中我遇到哥哥一家，大家一齊去街市搵媽媽，媽媽好嬲好激動，我去問老闆娘係咪唔退，我哋食咗有事係咪佢負責，佢話佢負責，我心諗連隻雞嘅錢都呃，醫藥費咁甘，佢點負責﹖！同哥哥影低佢間舖頭相時，有個領匯職員企埋一邊，驚我哋搞事，哼，我哋先唔會為咗啲冇商業道德嘅人，做有失身份嘅事。咁樣搵錢法，佢遲早趕走哂自己班客。
媽媽話佢由間舖一開業就有幫襯，對方間唔中都有啲雞唔太靚，好多時佢都算，自己斬走嗰個位就算，但今次真係好唔得，佢先落去嘈，估唔到對方咁衰。其實……媽媽中過咁多次招，點解仲幫趁佢架﹖！街市又唔係只得一檔賣雞……
就係呢間叫「陳寬記雞鴨」嘅檔口，賣隻爛雞俾我媽媽！
是晚，我哋冇雞食，改為食叉燒，媽媽keep起隻雞，話要等星期一去消委會投訴。
後記﹕結果，消委會話媽媽冇單據，不能受理……媽媽去街市要求個老闆娘開番張單俾佢，個老闆娘知媽媽要投訴佢，當然玩嘢話冇單啦，媽媽之前見過佢開單，就當場踢爆佢講大話，佢就話自己本簿用哂……嬲嬲哋，日日行過都叫佢俾單，煩到佢死為止！
放學後，同拾爺一齊去咗上九龍醫院為家屬而設嘅workshop，學習點樣扶爸爸坐好同過輪椅。為咗好好照顧爸爸，姑娘邀請我哋實習時，我主動去試。不過……我真係冇咩信心做到……雖然，我錄影咗姑娘囓示範片段俾家人睇，但……真正自己落手落腳去做又係另一回事……
日月媽嘅生日Tea因為打工達人病咗而改期，本來打算放學後去探爸爸，但九龍醫院今日突然通知我哋爸爸可以出院，佢哋會安排車輛出到爸爸番屋企，於是，本來都打算lunch time探爸爸嘅大妹就約我食飯，我哋食完lunch後，我就去拎passport，再番娘家。番到去，爸爸仲未番到嚟……邊改卷邊同媽媽傾偈，然後，醫院嗰邊打嚟話出車，叫我哋等電話。
等等等，終於等到醫院再打嚟，佢問我哋有冇輪椅，我話有，佢就話會再打嚟。再打嚟時，媽媽聽電話，對方差唔多到，我哋要落樓去接爸爸……我以為醫院會送到爸爸入屋添……落到去，架車已到，我同媽媽推輪椅到車前，兩個護理員就幫手將爸爸由床枱過輪椅上，之後就走咗喇……好彩我番得切嚟陪媽媽，因為醫院打包埋爸爸嘅隨身物品俾我哋，總共兩大袋嘢，有番咁上下重量，如果只得媽媽一個，佢推得爸爸上樓嚟，就拎唔到兩袋嘢，而且兩袋嘢咁重，我都唔想辛苦媽媽去拎。
我哋推爸爸上樓，推到家門，就入屋推張大班椅出嚟，想話叫爸爸起身過凳，點知……爸爸話佢雙腳冇力！爸爸入院前，仲行到幾步，估唔到今次入去瞓咗幾日，佢連企都企唔到……我同媽媽嘗試扶佢過凳，但我哋都唔夠力……想成張輪椅推入屋，但門前有一小級，我哋又唔夠力去抬起成張輪椅……最後，對面屋見到我哋兩個搞唔掂，就出嚟幫手，3個女人一齊枱起張輪椅。
爸爸入屋後表示佢全日只係食咗早餐，當時講緊係下午5點幾……原來等緊大妹晏晝去探佢時買嘢俾佢食，所以佢冇食到醫院提供嘅lunch……我同大妹都以為佢會中午時間番到屋企，所以冇去探爸爸，想唔到爸爸捱咗咁耐肚餓，我聽到之後好心痛……媽媽即刻去沖奶俾爸爸飲。
對於爸爸呢刻行動不便，醫院喺零支援下要佢出院，媽媽忍唔住抱怨咗幾句，佢主要係唔滿意醫院安排不周，但一直想番屋企嘅爸爸聽到就覺得我哋想佢繼續留院，於是佢哋兩個嘈咗幾句……我夾喺中間，完全唔知點樣去協調，只係叫佢哋一人少一句。我唔想幫爸爸話媽媽，因為我唔想媽媽覺得我哋只係顧住爸爸感受，而忽略佢，我亦唔想話爸爸，因為佢個病已經令到佢好辛苦，我明白佢有時會容易燥底。我當下只怪自己冇用，完全唔駛令佢兩個嘅心情變好……
因為我冇同奶奶講唔番去食飯，當時佢已經煮好哂飯，我見佢兩個都冇再講咩，ensure哥哥已經放工趕緊番嚟，就走喇。但我一落樓就打俾哥哥話佢知發生咗件咁嘅事，期間，我係強忍住淚水嘅。
是晚，哥哥話爸爸喺房抽搐，佢初初以為爸爸出事，好驚，後來發現，爸爸喺到喊……原來爸爸覺得自己病咗之後，成日要我哋照顧，覺得自己冇用，害死老婆仔女……我知道之後好唔開心……我哋其實從來冇介意啲咩，我哋知道爸爸唔想住院，一早傾好會添置電床等用品，甚至請看護員幫媽媽手去照顧爸爸，媽媽亦表示想自己照顧爸爸。希望爸爸知道我哋好愛佢，佢唔係冇用，相反，佢好叻，好堅強，捱過咗多個電療同化療療程，仲有大小手術。
本來我同大妹都打算晏晝去探爸爸，但醫院打俾哥哥，話爸爸今日可以出院，醫院會安排車輛將爸爸送到番屋企，大妹就打俾我約我食lunch，揀咗「定食」。
所有set lunch都包salad buffet，不過，salad款式唔多，而且食材好唔吸引……
香蔥伴藍鰭吞拿魚腩蓉小丼 ($95)﹕呢到以藍鰭吞拿嘅菜式最為出名，大妹揀咗藍鰭吞拿魚盛合便當，但我嫌佢嘅藍鰭吞拿魚腩蓉份量太小，所以揀呢個，以為呢個以藍鰭吞拿魚腩蓉為重點，份量會多啲，點知……碗飯同藍鰭吞拿魚腩蓉都係得嗰少少……靠佢一定唔飽肚，所以跟餐有多碗烏冬，就係用嚟塞飽我個肚……藍鰭吞拿魚腩味道好普通，唔係話鮮，根本就乜味都食唔到……如果咁已經係餐廳嘅出名菜，其他嘢，可以一概不試！事實上，跟餐嘅其他嘢，水準都係一般或中下……
埋單$193，免加一，但都唔抵食。
餐廳資料：
定食
尖沙咀厚福街8號H8 6樓
2366 8072
Eat, Play, Love 