原來是美男

煲緊劇時 ~~

拾爺﹕睇緊咩呀﹖

我﹕原來是美男

拾爺﹕睇我咪得囉，駛乜睇電視。

我﹕……

拾爺的奸計

今日收到同事送嘅日本手信，朱古力一排，包裝非常精美！拎番屋企後，向來對零食冇興趣嘅拾爺見到後，竟然拋出一句﹕「妳都食唔到架啦！」，之後奸笑行開。

我終於知道點解拾爺要我去箍牙喇！佢根本就係想謀哂我啲嘢食！

女俠送我嘅聖誕禮物– 無花果乾，我已經轉贈俾佢，因為女俠買時根本就知合佢胃口，禮物轉贈一刻，拾爺已經開心到不得了。我乘機叫佢唔好打小肥送我嘅茶葉主意，但佢表明唔打算放過我愛喝嘅Earl Grey……(前年另一同事送我時，佢飲哂咁滯……後來同事知道，再送我一盒。)小潘潘送我嘅蜜糖我都已經作最壞打算，會被佢拎去飲……我同佢講，今年收到嘅禮物大部份都為佢而設，只有亞頭送我嘅mask，先稍為安全，點知……佢竟然話佢都用得……

呢個老公好過份！

我不要你病！

上星期三，同爸媽同埋奶奶食完飯後，就同拾爺去銀行開戶口，拾爺喺銀行到坐坐吓，就不停話個pat pat位痛，以為佢噚晚趴地吸塵拉親吓，休息一晚會冇事，點知……佢翌日痛到番唔到學……睇中醫嘅骨科，話佢髋骨移位……睇完醫生，拾爺回家休息。我放學後番到屋企，拾爺就扭哂計話自己坐又痛，企又攰，只能瞓，搞到我甚為心痛！傍晚時份，當我準備煮飯時，拾爺突然表示好唔舒服，pat pat位越嚟越痛之餘，個人仲好熱，於是我同佢探熱，超過100度，發埋燒……即刻搵粒止痛退燒藥俾佢食，食完止痛藥，拾爺唔單止退燒，仲開始冇咁痛。不過……因為之前拾爺喺我煮飯途中，突然叫停我去照顧佢，搞到我唔記得撳電飯煲制，當晚只有餸，冇飯食……

星期五，拾爺仍然番唔到學，隻腳提唔起，著褲著襪都有困難……再去睇中醫骨科，我放學後去接佢，同醫師講佢噚日被推完更痛，醫師聽完就算。結果，下午拾爺再發燒，佢到樓下診所睇醫生，本來係睇發燒情況，但醫生見佢行路要就住，就問佢咩事，拾爺如實告之，醫生一按佢髋骨位，發覺拾爺唔痛，就表示佢係筋發炎，而非骨移位。

拾爺食完醫生開嘅消炎藥後，冇再發燒，pat pat位亦冇咁痛，隻腳可以提番起。但為求安心，我今日都陪佢去咗睇Dr Lam，經Dr Lam診斷，拾爺係四頭肌肌肉撕碣，原因係佢兩年前同人做兄弟，要彎身入門時唔小心跌咗落地，雖然當時佢唔痛，但嗰一跌其實已整傷，如今趴地吸塵拉一拉，就trigger咗個舊患。其實我當年睇video見佢跌親已經好心痛，有叫佢去睇醫生，佢又唔聽……Dr Lam幫拾爺鬆骨，再針傷患等佢自己復完。就這樣，盛惠$3500。

呢幾日拾爺病咗，頭一、兩日，佢都照顧唔到我，但自理能力欠奉嘅我，仍然係依賴住佢……當拾爺休息時，我都係邊笨手笨腳咁做家務，邊問佢點做……拾爺食咗止痛藥冇咁辛苦時，甚至帶病幫我做家務……其實，我覺得自己好差，完全幫唔到手……而拾爺就為自己病咗照顧唔到我而擔心第時佢真係照顧唔到我時，唔知我可以點算……

我唔要拾爺病呀！見到佢咁痛，我好心痛呀！我又唔識照顧佢……就連照顧自己都搞唔掂，搞到佢病咗仲要為我操心……我情願病嘅係我自己……

我愛google map！我更愛拾爺！

聽日娘家約咗個遠房親戚飲茶，要殺入石蘺，我唔識路……拾爺聽日有事，陪唔到我去……但係……每次我要去陌生嘅地方，拾爺唔係會陪我去，就係會教我去！今次當然唔會例外！拾爺上網查好搭咩車，喺邊個站落，仲用google map同我用對眼行一次由落車點到目的地條路添！我愛google map！我更愛拾爺！

愛心料理

食拾爺煮嘅嘢，係天底下最幸福嘅事情之一！

青衣沙律﹕拾爺話大部份嘅材料都購自青衣嘅Taste，所以要叫青衣沙律。

三文魚意大利飯﹕拾爺嘅意大利飯從來都係冇得輸架！佢話啲三文魚挑咗好耐骨，雖然我食時仲食到好多骨，但拾爺嘅心意已經蓋過一切！

拾爺的星期天主煮

全茄宴

拾爺的全茄宴﹕

芝士煎車厘茄

香煎羊扒配自家製紅莓醬

鮮茄意大利飯

201314

喺facebook睇到有人畫圖，90後嘅人噚晚會出街倒數，80後嘅會在家睇電視倒數，70後就會一早大覺瞓。好多人都表示準，但我同拾爺係70後動作，但我哋唔係70後喎！！！其實點慶祝都唔緊要，最緊要係自己重視嘅人喺身邊，就算唔喺，佢哋都健在！

好耐冇飲拾爺煲嘅湯喇，今日當我好努力喺書房打notes嘅時候，拾爺就喺廚房努力，之後就捧出蕃茄魚湯，嘩，幸福！

夜晚，拾爺又再下廚，雖然噚日先食完鴨肝，但拾爺話今日係元旦日，所以又再食多次！

香煎鴨肝配青蘋果蓉﹕拾爺嘅煎鴨肝技術真係越嚟越好！外熱內溶，正正正！

除咗鴨肝，當然唔少得佢嘅拿手risotto啦！

露筍魷魚意大利飯

聖誕食咗六道菜，食到大家爆肚……今日食完拾爺嘅兩道，再加我嘅Vanilla Mousse Cake作dessert，三道菜，剛好！

車厘茄

屋企太多車厘茄，今日喺Amore  di  Italian  Restaurant 食到嘅tomato sauce太好味，拾爺要嚟個山寨版！

晏晝食太多，夜晚要light番啲！仍然要繼續清屋企嘅車厘茄，哈哈！

掃毒

噚晚番屋企途經Taste，見到好多車厘茄減價，我哋屋企雖然仲有貨，但都忍唔住買咗四包，今日去到Taste，又有減價貨，難抵誘惑，再嚟三包，搞到啲車厘茄食極都食唔完，哈哈！

拾爺又發揮佢嘅愛煮意，呢份早餐正呀！

去睇十二點九場嘅掃毒，因為有換票證！呢套戲之前聽日月媽講前半段唔好睇，後半段先精彩，但肥仔就話前半段好過後半段……睇完，我覺得成套都唔好睇！陳木勝都係focus番佢嘅打打殺殺啦，講兄弟情完全唔係佢嗰瓣，好多場景都好突兀……明明要爆嘅時候，張家輝又九唔搭八地講笑，唔知佢想點……不過，學肥仔話齋，打還打，都要合情合理，三個人殺一隊兵，呢啲80年代嘅英雄主意已經唔啱我哋呢個年代喇！呢套戲真係唔駛錢先入去睇吓槍戰，要錢我先唔睇！

睇完戲，番屋企開餐！今朝唔係食咗好多嘢，有啲肚餓，拾爺買咗沙律菜整沙律！

之後就到我整Vanilla Mousse Cake，再交個場俾拾爺整dinner。