Category Archives: 他與她的事情
「迎海‧星灣」買賣實錄
國泰抽「迎海‧星灣」，抽到239號籌，我同拾爺最前嘅number也不過是969……因為我同拾爺都未見識過買一手樓嘅情況，於是就向國泰提出「湊熱鬧」嘅要求，國泰同佢先生都好好人，俾我哋跟埋去睇吓嘢。不過我一早講明，去到唔會俾任何意見。始終而家係買幾百萬嘅樓，而唔係買棵菜，一陣令到人哋做錯決定，就無謂啦。
五點到去到IFC，國泰同佢先生仲有佢媽咪已經排緊隊。原來所有抽到前號嘅準買家都會五點到場，然後就按號碼順序排隊。我哋喺lobby到排咗超過半個鐘後，就有人嗌到包括國泰嘅number以內嘅號碼，跟住職員搭lift，上一個大hall入面，自行搵位坐，再等叫number。國泰個agent話呢到叫A區，一陣仲有B、C兩區要入。
喺hall入面已經坐咗好多人，我哋搵唔到位一齊坐，只好分開坐。等等等，等到悶時，見到發展商擺哂嘢食陣，於是就去排隊拎嘢食，有煙三文魚卷、鵝肝醬多士、香腸、碗仔翅、乾燒伊麵等等。排隊食嘢嗰陣，聽到後面一對couple傾揀咩單位，佢哋aim at 5樓同3樓嘅最細單位，如果冇咩就走人，聽到佢哋仲打算做9成按揭。其實，嗰幾個單位，價錢唔平(雖然已經係全場最平)，要成接近五百萬，但景觀好差！如果要成五百萬，我寧願揀啲舊嘅屋苑，但高層啲同有靚啲嘅景。但人人鍾意嘅嘢唔同，可能人哋鍾情新樓加大型會所。
終於等到職員嗌國泰個number，我同拾爺都想跟入去B區，但國泰嘅媽媽同佢亞姨就好似冇意慾去郁，我同拾爺就決定唔等佢哋，先行去會合國泰，點知佢哋又好快就入咗B區……我同拾爺決定問一問啲staff俾唔俾我哋入去會合朋友，佢哋又俾喎！於是，我哋叫埋國泰嘅媽媽同佢亞姨一齊入去。入到去，先發現B區係一條好窄嘅長廊，冇凳坐，個個都企哂喺到一路睇住部顯示賣剩單位嘅大電視，一路等叫自己個籌。國泰嘅媽媽同佢亞姨一見到冇位坐，就選擇出番去坐住等佢哋。我同拾爺就當然留低睇嘢啦！
國泰同我講佢嘅心水單位只剩下32F，點知……話口未完，32F已被他人買下……國泰即時表現失望，佢個agent一知佢哋所有心水單位都冇哂後，即時勁sell佢哋買海景單位，但海景單位唔係佢哋個budget以內，所以國泰老公好快就reject咗個agent。Agent於是再發功，sell佢哋買特色單位，但特色單位都唔係佢哋杯茶……佢兩個諗緊走唔走好，agent怕會冇咗單生意，當然叫佢哋入咗C區(揀樓區)先。
終於叫到國泰個籌，我哋四個跟住agent入去，恕我孤陋寡聞，一直以為買一手樓，得到嘅待遇會比較尊貴，發展商叫完number，我哋會被安排坐喺counter對住部電腦，舒舒服服咁揀單位。點知……入到去，我哋被引領到只得國泰agent所屬公司嘅職員圍住嘅長枱，然後，四、五個該agent公司職員一人一句，不停游說佢哋買特色單位。國泰兩公婆根本就冇打算買特色單位，但難得抽到前啲嘅籌，可以再做業主，又唔捨得拂袖而去。我同拾爺企企吓，被幾個該公司嘅agent撞開，佢哋又帶其他客入嚟揀單位，為求儘快sell嘢，不惜撞開我哋……好‧討‧厭！
我同拾爺企埋一、二邊，等國泰佢哋揀樓，我見班agents好aggressive，不停叫佢哋買特色單位，又話靚又話保值，完全係chur到個客爆咁滯，令人冇時間去思考。我雖然講過唔會俾意見國泰，但見啲agent嘅selling technique咁離譜，忍唔住趁國泰望向我時，大叫一句﹕「冷靜啲呀！」。國泰一早已被包圍佢嘅agents煩到想走，一見到我呢個熟人喺到，就即時推開其他人，走番嚟我身邊。我真係明佢喺入面有幾不安，班agents真係好狼，令到人好迷失！國泰老公見到老婆行開咗，佢又走埋出嚟，當然，佢哋個agent又跟埋出嚟，想繼續sell啦。我唔理個agent，只係問佢哋，佢哋要買嘅單位方向係面向馬鐵站，一個咁嘅景觀有冇需要俾多一嚿錢要個超廣角露台或者水晶玻璃屋嘅style。國泰老公話價錢其實冇多到，只係房間間隔唔同，本來兩房半嘅單位，變成特色單位後，只得一房。其實咁樣已經係變相多咗錢，因為佢哋原本就係想要兩房半，如果買咗呢個，就要自己另外俾錢間房，佢哋當初揀呢到，就係貪佢裝修好哂，唔駛再駛多筆。我都未及表達意見，個agent就話間房幾百蚊就搞掂……我唔熟價，但覺得幾百蚊唔會搞得掂囉，個agent就係隨口噏當秘笈！仍然拿唔定主意時，agent話可以先要咗個單位，再入另一邊坐時慢慢諗清楚，真係唔要，可以無條件掟番個單位出嚟。我confirm而家話要個單位係冇任何法律責任之後，佢哋就say yes。點知，呢個時候，有一個佢哋張list上嘅心水單位被人掟番出嚟，佢哋即時要咗該單位。國泰開心到即刻攬住我。
Confirm咗個單位後，我哋就行入去搵位坐，但冇……企喺到時，國泰老公已經喺到盤算緊啲首期、厘印。原來佢哋而家要咗嘅單位，價錢仲貴過上一層，因為佢哋個樓底高啲，有11呎。拾爺問agent普通嘅樓底幾高，agent故意唔用呎去講，只用cm代替，但拾爺心水清，一計就發現兩者相差好少 – 15cm，但呢少少嘅相差，卻要付出20萬嘅代價。拾爺暗叫唔抵，我當然知道，但我哋都冇出聲。由confirm買個單位，到得知呎吋，其實有足夠時間去冷靜，以我所認識嘅國泰老公，佢應該已經意識到呢一點。我知佢哋兩個都想上番車，所以寧願俾多少少，都唔想錯失再做業主嘅機會。既然係咁，我哋作為旁人就無謂多事。
大家等叫number時，有一中銀職員approach我哋，國泰老公就乘機問一問按揭事宜，我亦聽一聽學吓嘢。經該職員提醒，我發覺自己同國泰老公一樣，誤以為銀行貸款係以折扣後嘅樓價計算，原來銀行會連發展商回贈嘅厘印都扣埋先計，好彩國泰老公為人穩陣，預留一筆錢作後備，揀樓時，冇用盡家財嚟俾首期，如果唔係，真係唔知去邊到再搵多筆錢去填數……
等咗好耐，發展商仍然未嗌國泰揀咗嘅單位去簽臨約，諗到有人會喺呢個等緊嘅時間反悔而掟番個單位出嚟，我就問agent可唔可以出番去執死雞，agent話唔得。其實，我覺得一定得！佢只係唔想節外生枝啫！而家諗番，國泰可以一人買三個單位架嘛，我哋其實可以喺未簽臨約前，邊hold住一個，邊出去等執死雞添呀！
等到咁上下，聽到全場拍掌，原來所有單位皆賣出。
八點半，仲未到國泰簽約，佢媽媽同亞姨已經走咗，我同拾爺都等唔到咁夜，亦先行離開。後尾whatsapp國泰先知，佢哋差唔多十點先簽約，由五點鐘嚟排隊，等到十點先簽約，足足用咗5個鐘，真係好折磨人！
今日真係學咗好多嘢！其實，我覺得政府監管基金買賣，規定要有21日冷靜期嘅同時，係咪都應該考慮規管埋一手樓買賣嘅冷靜期呢﹖！我覺得一手樓買賣個銷售方式，更易令人做錯決定！
為何又是這樣錯﹖！
又去Full / Half到開餐！又係食lunch，結果，個餐牌都一樣……
今次約咗亞柑、亞桔同闊太，四個人，四個餐，四個starter每款要一個，分別係Ceasar salad、虎蝦雞尾酒汁沙律、蕃茄忌廉湯同埋耶菜花湯。Main dishes要咗上次食唔到嘅千層麵，同埋再食多次嘅虎蝦天使麵同埋有機意大利飯‧黑松露菌，今次仲叫咗個貴啲嘅烤澳洲雪花西冷。飲品依然係ginger bread coffee同ginger lemon honey。
四款前菜我哋一致認為個蕃茄忌廉湯最好飲！另一款湯就淡得滯，好似飲水咁……兩個沙律唔係唔好味，但冇咩特別……
上次飲恨食唔到嘅千層麵令我大失所望！好鹹！反而個烤澳洲雪花西冷有驚喜！我哋四個都覺得good！通常炭燒或者烤牛扒都會好乾，甚至會覺得「嚡」！但呢塊唔怕，啲肉好「淋」，肉汁雖然唔可以話好juicy，但冇被完全流失，食落唔覺得好乾。虎蝦天使麵同埋有機意大利飯‧黑松露菌同上次一樣，都係不過不失之作。
大家閒聊兩個半鐘，點半坐到差唔多四點先走。本來想加錢食埋個dessert，點知賣哂……到餐飲上枱時，亞柑同亞桔明明係要ginger bread coffee，但就只有coffee冇ginger bread，我出聲問，個waiter先話冇哂……service真差！
成餐飯，我都極到忍耐，完全冇質問過亞柑任何嘢，但其實話題去到某啲位，我真係忍得好辛苦唔去串去！我覺得亞柑可能知道我已經知道咗佢又同埋亞田一齊單嘢， 但佢唔出聲，我就繼續扮唔知。揭穿佢又點呀﹖唔通佢就真係唔會中番個頭埋去咩﹖！學亞桔話齋，做埋做埋咁多嘢，搞到自己成個三姑六婆咁要去阻撓佢哋偉大嘅 愛情，真係自討沒趣！佢咁大個人，要為自己每一個決定去負責！所以，從今以後，亞田再一腳踏幾條船(如果佢有咁嘅能耐嘅話)，又或者佢變心，飛咗亞柑，又或者佢娶完亞柑再出去「滾」，我都唔會再理！其實上次亞柑死唔切咁同埋佢一齊，我已經對佢哋嘅事不聞不問，係亞柑暑假打嚟時主動報告分手同佢哋三個嘅千絲 萬縷嘅關係。當時我以為佢真係會醒，作為朋友，當然要俾啲精神支持佢啦！點估到，個男嘅被揭穿謊話連篇後，知道冇可能再腳踏兩條船時，都係揀咗另一方去求 婚而唔係要亞柑，亞柑都仲可以當冇事發生過，唔介意自己只係因為人哋放手，個男嘅冇得揀先揀自己而同埋個賤man喺番埋一齊。反正，只要呢個賤man肯講幾句好聽嘅說話，亞柑又會愛到死心塌地。既然當事人唔介意佢個男友呢頭攪住第二個女人親熱，嗰頭又同自己卿卿我我，咁我呢個外人咁多事做乜﹖！呢啲咁「偉 大」嘅愛情，我真係呢世都唔會明。男嘅就博愛，女嘅就盲目去愛。現實嘅我，從來都唔會相信自己係電影故事嘅女主角，以為自己就係可以改變男方嘅the one。不過，呢個世界係會有好多愛做夢嘅女性，以為個男之前有幾花弗都好，自己一定可以成為佢最後同唯一一個。唉……可悲可悲……
我知亞柑已經唔再常睇我呢個blog，所以都’no fear’地寫到咁白！不過就算佢睇到，我都唔介意俾佢知道我寫過啲咁嘅嘢。係！啲咁刻薄嘅說話係作為朋友嘅我寫嘅！因為，朋友唔可以盲目支持友人嘅決 定！我唔想講佢想聽嘅說話，我想俾佢睇到現實係點！現實係個男嘅只會覺得個女永遠唔會飛出自己掌心！做到幾錯都好，say吓sorry，講啲好聽嘅說話， 買份早餐，搞掂！想同妳好時咪氹吓妳囉，食番住妳後，第時想搵第二個咪又再對妳呼之則來揮之則去囉！他日搵到個更鍾意，再同佢一生一世嘅，飛埋妳都得呀！ 搵唔到嘅，都可以娶妳架！反正娶完番嚟，都可以出去偷食嘅。結婚前偷食妳都原諒啦，婚後都只會啞忍嘅啫。
我唔係完全唔信浪子回頭呢樣嘢，但當一個男人被發現不忠，仍然滿口謊言，繼續一腳踏兩船，企圖享齊人之福時，佢有咩誠意去改過﹖拍拖一年都冇就已經咁花心， 結婚後點算﹖對於偷食過嘅伴侶，另一半一定會比之前多疑，擔憂之下嘅快樂真係會開心咩﹖與其窮一生去擔驚受怕，去猜度對方，不如揮慧劍，活出精彩人生！
會過去的
一早陪爸媽同奶奶飲茶！呢個組合係咪好正呢﹖！話說奶奶知道我今日陪爸爸覆診，問我哋去唔去飲茶，話要join埋喎。原來我同拾爺去咗旅行期間，奶奶都打過幾次電話去我娘家，慰問爸爸情況。本來佢話要去探我亞爸架！但媽媽就提議爸爸好番啲一齊飲茶，於是，奶奶就嚟埋喇！
唔想次次都去譚魚頭，所以今次揀咗龍皇！媽媽繼續其一貫嘅遲到作風……原本以為氣氛會幾odd，但都ok！
飲完茶，就陪我家兩老去QE。應該係一點半嘅診症，要等到兩半點先嗌名……之後仲要等多陣先入到房睇……姑娘嗌爸爸做亞伯嘅嗰一刻，突然覺得爸爸真係老喇……其實今朝喺地鐵站見到佢帶住頂帽，因為電療令整個人消瘦哂後，都覺得佢好似個亞伯……
入到醫生房，睇到爸爸對醫生說話嘅回應，更加覺得佢老喇，好似冇以前咁醒喇……媽媽就一向都笨笨哋嘅，我喺到諗，如果冇咗我哋一班仔女去陪佢哋睇醫生，佢哋會唔會搞唔清楚自己個病呢﹖
自問一向冇乜孝生，陪男友、老公嘅時間多過家人，大家都唔係唔知我少番娘家……但而家嘅我，真係覺得要多啲陪吓兩老！所以，我同拾爺會每個禮拜六都番娘家食飯！
三點半離開QE，行去尖咀，約咗亞柑、亞桔同闊太去Kitchen M食tea。點咗兩個cake set、一個小食拼盤同pizza！嘢食就唔係特別好食(choco cake係最正咁囉！)……但環境唔錯，係同朋友坐底飲杯嘢嘅好地方！
席間，亞柑講番佢同亞田再度分手嘅由 來。係！佢又同亞田復合咗……上次分手後一個月，佢已經偷偷同番亞田一齊，唔敢俾我哋一班好友知！不過……我哋其實都估到，只係……當佢親口講時，我都係 好嬲！嬲到……冇再理佢啲感情事。我覺得，作為朋友，我已經無能為力喇！既然佢係都要同呢個賤男一齊，咁大個人，就應該為自己嘅行為負責！就算再受傷害， 都冇資格要人安慰喇！雖然，我咁做同咁諗都幾衰，但我真係好嬲呀！一方面，我覺得做朋友應該以佢開心為大前題(呢個都係我之前做佢軍師，希望佢感情順利嘅 原因。)，但另一方面，我真係好失望！亦覺得佢根本就有事就搵friend，冇事就搵男友咁，好過份！所以……其實呢幾個月，我都唔太開心，內心不停掙 扎，好想問吓佢亞田仲有冇蝦佢，但又唔想再理佢……
直至旅行番嚟，佢打俾我約食 tea(為嘅係同我慶生！)，定咗時間後，佢就話分咗手。初時，我仲好冷淡表示﹕又分呀！佢話今次係真時，我仲話﹕妳上次都係咁講架啦！後尾知道係個男嘅 劈腿，我仍然認為亞柑會原諒佢架！不過，亞桔呢個暑假真係幫咗佢好多，不時提佢不能心軟(亞柑成日話掛住人，想去搵人……)，有時甚至鬧佢！需知道亞桔一 向和善，係唔鬧人嘅女生嚟架！亦要多謝個男嘅，毫無誠意，亞柑先到而家都堅持到咋！
Tea後，得番我同亞桔時，我表示仍 然擔心亞柑又會中番個頭埋去受苦(如果佢上次堅持啲，今次就唔會傷得咁重……有時我真係覺得性格決定命運，佢就係嗰種死不放手嘅人，每次都要被人傷到體無 完膚，然後人家頭也不回時，佢先慢慢認命……唉，何苦呢﹖)，亞桔話個男嘅都冇意思復合，應該冇問題。但我只怕個男嘅玩厭新女後，又番嚟撩亞柑咋！原來亞 柑喺自己都唔知道嘅情況下做咗人第三者……今次個小三原來係亞田個ex，當初亞田變心鍾意咗亞柑，佢話拖拉一段時間後先同個ex分開(不過亞柑而家諗番， 話懷疑佢從來都係三人行，因為有時亞柑想見亞田，亞田會用好多籍口唔見佢……)。所以，我唔排除啲人對個ex or小三啦，失去興趣後，又想搵番亞柑。怕只怕呢個容易受氹嘅亞柑，又再受騙……(據稱呢個亞田好識講嘢！But我聽到人哋覆述佢講過嘅說話，只覺得佢係 白痴仔一名！)
真係唔明，點解呢種世紀賤男會有人吼，唔理個ex(小三)係真心鍾意塊田，定係想報復(我哋懷疑佢做過啲小動作，如果唔係亞柑仍然唔知發生咩事呀！聽到呢到，我覺得自己好似睇緊「我的最愛」咁呀！)，我都要多謝佢救咗我個friend！但同時覺得佢好變態！
雖然咁諗好似好衰，但其實聽到佢分手一刻，我係開心架！因為，我覺得我個friend終於(有機會)可以去尋找真正屬於佢嘅幸福喇！希望佢記得數年前所受情傷，都有痊癒嘅一日，今日嘅苦一樣總會過去啦！
Eat, Play, Love 