吞噬

30 九月, 2013honeyhinbaby 女王的教室、我們這一家發表留言

十一點幾收到肥仔whatsapp話爸爸入咗院，叫我哋放工探吓佢。即刻打俾奶奶話唔番去食飯，約好拾爺打算放學後就去醫院，點知……拾爺離開學校，我亦準備出發時，大妹whatsapp話爸爸出得院，叫我哋唔駛去。打俾大妹了解情況時，爸爸又打嚟，叫我哋唔好過去，話我去到佢已經走咗，原來大、細妹兩個負責接出院。問咗大妹同爸爸後得知入院經過，原來爸爸頸後腫瘤太大，今朝爆咗少少，搞到又流血又流膿，肥仔陪佢睇急症，醫生檢查後，俾咗消炎藥爸爸食，叫佢一個禮拜後番去覆診，再照CT，到時先可以開始化療個treatment。希望多等一個禮拜，唔會影響爸爸個病情啦。

是晚冇住家飯食……同拾爺行咗新世紀新開嘅一田，本想買餸番去煮，但太多人，又冇咩頭緒煮乜好，最後空手而回，落咗樓下hea食當dinner。我倆都太攰，完全冇mood去enjoy a decent meal，一諗到嚟緊幾日放學都要開會，星期五仲要玩到八點半(我番八點前架！足足工作十二個鐘！)，袋入面有成四疊嘢要改(十．一假期清完後，番學又再收嘢改……沒完沒了……)，仲要執好嚟緊要教個topic嘅exercises，仲要備課同出卷(quizzes, term tests, exams，出完一份又一份，deadline接踵而來……)，就已經覺得好攰……工作完全吞噬咗我倆……

The Time Traveller’s Wife

29 九月, 2013honeyhinbaby 電影兩面睇發表留言

觀畢影片，反而對原著小說更有興趣！原因不在影片十分好看，相反，雖然未看過小說，感覺影片未能拍出原著中男女主角的情感。故事是講述女主角自六歲起便認識男主角，她的男主角早已情根深種，甘願為男主角一生苦等、守候，她對男主角的情，必定源於兩人每次的相聚，可惜影片卻因為時限，只能以一、兩個場景，甚至男、女主角活於相同時空的對白交待，大大削減他們感情之堅定的說服力。影片的賣點是愛情，可短短百多分鐘的影片裡，我卻感受不到其情至真，他們的愛情欠缺那一幕幕的回憶場景作鞏固。

親情本也可以是影片的一大亮點，男主角對母親的感情，其母死後，他與父親的關係變化，女主角與家人(尤其其父)的關係等等。只是影片卻選擇以愛情為主，對電影的親情描寫只以一、兩個場景交待過去。最喜歡影片其一幕是男主角回到母親還未去世之時，他與母親坐於同一車廂的對話，男主角含著淚向母親道出的一句「I love you」，當中的複雜情感，實在讓人想跟著哭。簡單一幕，交待他於母親去世多年，仍未能忘懷彼此間的母子情，叫人感動。

聞說電影的結尾有別於原著小說，前者以男主角死後，女主角仍可遇見不同時空的他，讓人感覺淒美。女主角雖然仍要為男主角的不定期到來而苦候，但人生總算充滿希望。只是，男主角並沒有向女主角事前作出通知，目的是不想女主角再為自己苦等。原著小說則以女主角等待至82歲，才可再與男主角見上一面。女主角於男主角死後，才於信中得知日期，跟電影一樣，男主角提出不希望女主角再等待他的出現。這個結局可避免女主角每早充滿希望的醒來，卻只有失望的睡去。只是……女主角當時只有35歲，苦等47年才能與男主角見上一面，著實可悲。

We’re the Millers

28 九月, 2013honeyhinbaby 電影兩面睇發表留言

從哥哥手中得到換票證兩張，為這個繁忙的星期，來點relax！

心中一早選定電影，這陣子又忙又發生了讓人心煩的事，實在需要一齣讓人輕鬆發笑的電影，早前看過影評，對「We’re the Millers」印象不錯，雖曾聽聞「激戰」好看，可我這刻需要「笑彈」多於觀賞他人的肌肉，需要歡樂多於沉重的氣氛，最後還是選擇前者。

進場前對「We’re the Millers」的期望只是入場歡度兩小時，不需要思考，不需要電影為我帶來任何反思，只想笑，而電影的確做到了。兩小時，全場笑聲此起彼落。其實電影的笑彈不外乎意淫的動作及笑話，個人平時對這些非常抗拒，所以年前非常後悔進場觀看「Ted」，浪費金錢、時間！但這齣「We’re the Millers」的有味笑話卻來得自然，有別於前者為講而講，這當然要歸功編劇的鋪陳。人物本身的背景已經讓人接受他們的日常對話就是這麼低俗，男主角販毒、女主角為脫衣舞孃、另外兩個扮演他們兒女的，都是沒有家庭溫暖的青年，他們不講葬話才怪。

「We’re the Millers」的定位清晰，就是低俗的笑片一齣，沒有說教，亦不會煽情，純娛樂！這是我喜歡此片的其中一個原因。不喜歡的，當然會挑剔影片胡混兩小時，毫無深度。但我卻認為電影種類繁多，總有一些是無目的，只讓人喪笑兩小時吧！畢竟電影的原意是為娛樂，不用每齣都一定要有特別意義。

爸爸

26 九月, 2013honeyhinbaby 我們這一家 6 則迴響

前日喺學校做做吓嘢，細妹打嚟，話陪爸爸覆診後，醫生表示爸爸病情嚴重，要家屬們即時同幾位高級醫生開會，聽後，慌亂嘅我即時衝去校長室請假，但校長唔喺到……搵女副校，差唔多喊出嚟咁交代一切。點知……番到位後，細妹再打嚟話搞錯日期，係翌日開會。於是，又走去搵女副校表示唔駛請假住。

番位check吓timetable，開會時間撞正上堂時間，想叫亞頭幫我頂一堂，因為B&E係我同佢一齊編課程一齊教嘅一科嚟嘅(所以今年真係好忙！)，但亞頭自己都要上堂……佢問我咩事時，我又忍唔住想喊咁交待爸爸嘅事，嚇到小肥即時搵糖要請我食。可能我真係太亂，其實B&E係S.3嘅堂，全班上，搵人同我調堂已經得，但當時我完全冇諗到件事可以咁解決。亞頭好好，仲幫我睇埋邊個同事可以同我調到呢。

放學後，同拾爺講起件事，忍唔住喊，我真係好驚爸爸會有事……拾爺今晚請我食Logon嘅綠茶雪糕。

噚日番學，上哂堂後，小肥、亞頭同我一齊食lunch，我帶飯盒，佢哋就出去買飯番嚟食，小肥買多盒魚肉燒賣俾我加餸，亞頭就買咗盒Häagen-Dazs雪糕(綠茶味)俾我做甜品。雖然佢哋冇講咩，但我知道佢哋用緊另一方式去支持我。三點鐘離開學校，趕去QE，一出地鐵站就見到哥哥，兩個一齊行去醫院，去到只有爸爸一個，三個人坐低傾吓偈，邊聽爸爸講番佢個病情，邊忍住唔喊。之後，兩個妹、妹夫同媽媽都陸續嚟到，大家坐低傾偈，仲有講有笑，好似好輕鬆咁。等咗一個鐘，終於有人叫我哋入去見醫生。

入到去，醫生表示爸爸頸後嘅腫瘤屬惡性，但唔知係咪嚟自佢之前嘅鼻咽癌，因為佢個肺又冇事……佢哋一班醫生話唔可以肯定到……但而家照到頸後嘅腫瘤已經包住咗爸爸嘅大動脈，所以建議做手術切除，手術嘅風險在於唔可以切到大動脈，如果唔係爸爸就會即時中風，佢哋要紮咗爸爸個大動脈，到時爸爸就會癱……佢話因為而家腫瘤包住咗大動脈，但又唔可以割到大動脈，所以到時會有癌細胞剩，醫生會喺大動脈外面放鍍片，用電療嚟電死餘下嘅癌細胞。不過……爸爸以前做過電療，屬外電，而家做更利害嘅內電，對神經有一定影響，好大機會會影響到右手神經，即係右手會癱……因為爸爸頸後腫瘤範圍大，切除後神經外露，要喺身體其他部份連皮連肉咁切一塊出嚟補上頸後。醫生話呢個係大手術，要做全日，但快只能安排到十一月二十五日先做到……成兩個月……我哋都擔心期間爸爸腫瘤會再有變化，醫生都話腫瘤一旦滲入大動脈，就做手術都冇用……所以，呢兩個月，爸爸都要先做兩期化療。醫生開出三個方案俾我哋揀，第一方案係用之前用過嘅藥，但因為爸爸之前敏感，就算醫生話可以再改藥嘅份量，我哋都唔想試。第二方案係試新藥，但要自己俾錢，成個treatment要連五日住院，一萬蚊到。第三個方案都要坐一日醫院，又打針又口服咁，二、三千蚊，成效比第二個差少少。我哋出去商量後，決定要第二個。爸爸其實唔想住院，但我哋堅持要爸爸用最好嘅。媽媽講講吓，突然表示唔想爸爸做手術，細妹話媽媽傻，我知佢擔心爸爸會癱，叫細妹唔好話媽媽，媽媽呢個時候，忍唔住喊咗出嚟，我即時遞上紙巾，爸爸即時安慰媽媽。見到媽媽喊，搞到我又忍唔住喊，當然，我冇媽媽喊到咁誇張，只有哥哥同妹妹佢哋見到我眼紅紅，我唔想俾爸爸知……喺我轉身抹眼淚時，爸爸突然雙眼一紅，忍唔住喊埋一份。我咁大個女，只係喺女麻女麻嘅葬禮時見過爸爸喊，今次係第二次。爸爸一直表現堅強，唔想我哋擔心，細妹話其實爸爸自己都驚，噚日仲要安慰媽媽，而家媽媽一喊，搞到爸爸都忍唔住喊。我覺得爸爸喊，除咗驚，其實都同媽媽有關嘅。見到爸爸喊，搞到大妹又眼紅紅，強忍淚水……

離開醫院，一家人去咗食飯。因為爸爸十一尾做完手術後，仲要留院，原定十二月七日去澳門飲表妹個B餐百日宴嘅計畫要取消，爸爸決定第二次化療前先去睇B，佢哋傾好呢個weekend後。其實我都想join，但我真係行唔開，太多嘢做……

受保護的文章：再見不是朋友

25 九月, 2013honeyhinbaby 同事三分親

天兔

23 九月, 2013honeyhinbaby 議事論事發表留言

天兔嘅到來的確幫輕咗我同一班同事，大家都話抓緊咗呢日假去改嘢同備課。不過，睇到報紙講其他地方都有人傷亡，突然覺得自己想要呢一日假，係好自私嘅行為……對唔住，我唔係想有人受傷，亦覺得颱風下要番工嘅人好慘架，只係……呢個academic year實在太忙！已經每日做到被校工趕先走，番到屋企都仲繼續改嘢，星期六、日都只係改嘢同備課，但時間仍然唔夠用……多一日假，可以清一清工作之餘，又冇額外嘢加上去(如果上咗堂，又忍唔住俾功課架喇……)。

睇新聞見到有唔少人半夜去追風，覺得佢哋真係身在福中不知福，有幾多人連安居之所都冇，佢哋卻有屋企唔番，走去吹風。如果追風當中發生意外，咁點算呢﹖！最離譜係有大人帶埋小朋友去做呢樣嘢，唉……受呢啲「身教」影響，長大後就又一條騎呢漢架喇。

好唔鍾意啲人話個風冇料到，一啲動靜都冇，完全唔明呢種係咩心態！唔通打風打到屋企玻璃碎哂，死人加塌樓先好﹖一滴風都冇就有假，唔係最好咩﹖！(雖然最後大部份人都冇得放。)

屋企中秋飯

22 九月, 2013honeyhinbaby 我們這一家發表留言

遲來嘅屋企中秋飯！

本來媽媽想去Hyatt 18食嘅，但晏晝只剩房間可book，最低消費三千(其實我哋成十個人，呢個價錢應該都meet到！)，夜晚就連房都冇埋，只剩下露天位……最後，都係媽媽自己煮。

話就話中秋飯，但其實同平時差唔多，我哋一班大人都只係圍住小王子而轉。

其實中秋翌日我都有番娘家，因為哥哥帶咗小王子番去，食完飯後，哥哥食雪糕，佢話俾我知小王子唔鍾意食雪糕，仲即時show俾我睇。佢先餵小王子食一小啖，小王子食完，成身打冷陣，哥哥再餵佢時，佢可能feel到啲寒意，隻spoon一到嘴唇邊，已經再打個冷陣，然後扭歪臉唔肯食。今日，我哋將件事講俾大家聽，食完飯後，大家一齊食雪糕月餅時，媽媽餵小王子食咗一啖仔，小王子就重憂之前嘅動作，打冷陣同唔肯食，哈哈，可憐佢成為我哋一班大人嘅捉弄對象。

合江小鎮

19 九月, 2013honeyhinbaby 日日有食神發表留言

那些年嘅中秋節，鍾意同一班朋友一齊過，年紀越長，更珍惜同家人相處嘅時光，中秋節，當然要陪屋企人啦！約咗爸媽同奶奶一齊食飯，餐廳係星期日先book嘅「合江小鎮」。本來以為咁遲book餐廳，應該要搵一輪先book到，點知，喺KC個website到睇到呢間餐廳，上Openrice睇吓，發覺得有得網上訂位，於是試吓訂啦，一訂就訂到，lucky！咁易book到枱係有原因嘅，間餐廳位置比較吊腳……

同爸媽同埋奶奶約好六點半喺灣仔等，打算打的去餐廳，但係……冇的士……打去餐廳求助，對方叫我搭叮叮，話去跑馬地嘅叮叮就啱，搭到去馬場正門落車。點知……見到馬場後，我問司機邊到落，佢第一句就話呢到係跑馬地，好似我上錯車咁……後尾有乘客教我哋總站落車後再搭回頭車……原來要咁複雜……搞到三位長老搭車又要搭嚟搭後，都係我唔好……

拾爺由學校出發，因為遲遲等唔到，行去地鐵站又塞人，佢叫我哋先去餐廳，但結果，我哋兩程叮叮所需嘅時間仲耐過佢由地鐵站行去餐廳囉。

終於，七點四、五個字到達餐廳，入去只有三幾枱客，唔怪得之咁易book到位啦。但餐廳都好好，我喺網上make booking時，講明話有老人家，唔想坐通道位，餐廳真係安排咗一角寧靜嘅位俾我哋。坐低後，見我哋一眾女仕拎scarf出嚟，即刻幫我哋較細個冷氣。

前菜 ($20)

怪味酥腰果 ($20)

大意嘅我，冇留意間餐廳食川．揚菜，好多菜式都帶辣，爸爸都唔食得……我哋儘量點唔辣嘅菜﹕

蒜泥白肉 ($68)﹕賣相精緻，味道唔錯，媽媽喜歡。薄薄嘅豬肉卷成一柱，內有青瓜，感覺清新。

淮揚小籠包 ($52/4件)﹕只有四件，當然三大長老食先啦，剩番一件我叫拾爺食埋佢。爸媽食完都讚好食，力主我哋多叫一籠，結果我都有得食。果然好味！不過，呢隻小籠包嘅包法同鼎泰豐唔同，頂部唔夠厚，我以前者嘅挾去食，結果一挾頂部，湯汁溢出……為求快快飲落肚，無法細賞味道……但湯汁唔錯，餡料亦好味！

外婆紅燒肉 ($118)﹕拾爺至愛！呢道菜個sauce唔錯，用嚟送飯一流！就咁食就鹹咗少少……紅燒肉水準不一，肥膏部份當然冇問題，但媽媽發現層表仲有毛，處理得唔夠乾淨……瘦肉部份就睇彩數，食到有鬆化嘅，亦有嚡口嘅……

鹹蛋黃蝦仁豆腐 ($98)﹕爸爸同奶奶一致讚好！爸爸話覺得啲豆腐好滑！而我，只覺得滑，並未去到好滑。呢道令人膽固醇超標嘅菜式，用嚟送飯又係幾唔錯架！

砂鍋餛飩雞 ($180/例)﹕爸媽都讚餛飩夠滑，我反而注重湯底，雞味唔夠……

蜀府掛爐烤鴨 ($148/半隻)﹕爸爸以為烤鴨係脆皮，點知所有鴨肉都被浸入辣汁內，皮就唔脆，肉都唔嫩，但個汁幾惹味。

高力豆沙 ($44/4件)﹕外層好厚，我prefer薄番少少，面層嘅砂糖唔夠多，亦鋪得唔勻……但個豆沙餡幾好味。

其實我哋本來仲叫咗個成都雜醬麵，但原來帶有麻辣，睇menu時又冇顯示係辣嘅，所以向餐廳反映後就取消咗(媽媽本想就咁算，但我覺得自己唔係無理取鬧，事實上我哋真係以為呢個麵唔辣先點佢嘛！所以堅持要同餐廳反映。)。爸爸之前都食得辣，但化療之後已經唔可以再食辣，麻辣更係受不了。拾爺得知個麵帶辣，食咗一啖都表示太辣，後尾佢仲話個人都麻麻哋添。

成都雜醬麵 ($50/碗)﹕冇食到，但拾爺話好辣。