富記

噚晚飽到個胃頂住哂，瞓得好差……

今朝就仲飽到早餐都唔駛食！不過……奶奶為我預備咗個大lunch box，唔想嘥咗佢一番心機，點都塞落口。但最後都係倒咗少少……

夜晚又約咗打工達人、精明眼同國泰食dinner！因為好鬼飽，所以我要求唔食西餐食中餐，四個人叫三個小菜就夠嘛。我哋去咗富記食飯，叫咗﹕

泰山五味骨﹕味精重，但又確係好野味！不過成六十幾七十蚊煲，先得嗰幾件骨……

金銀蛋浸時蔬﹕嘩，啲菜老過我亞媽呀！一睇啲色就覺得係用嚟煲完湯再拎嚟當餸食嗰隻！

吱吱喳喳炒飯﹕好鹹嘅疑似糯米飯……

踏雪尋梅﹕其實係蛋白入面撈咗啲strawberries同mango，食落又鹹又甜又酸咁，蛋白唔算滑，但成碟餸都叫開胃！

整晚話題不斷，又講吓工作又講吓感情生活，又講吓旅行，仲講埋儲錢問 題。雖然一向都知精明眼有錢，但估唔到佢係有錢到手揸三間屋收租(另外自住一間)，佢老公又手揸三間。最好嘢係，佢哋都唔係靠屋企，而係自己俾首期自己供！ 大家同年，估唔到人哋已經咁成功！如果我好似佢哋咁識諗，早幾年就買樓嘅話，我哋我都可以咁happy……可惜，當時個ex又話唔要買樓，佢屋企又有，所以我一直都唔會諗投資呢樣嘢……精明眼同我講，佢老公五、六年前用廿幾萬買番嚟嘅一間舊樓，而家有人出價二百幾萬收購添喇！佢哋揸嘅都係西環樓，而家嗰區啲樓升到癲呀！唔怪得呢兩公婆成日周圍去旅行啦！嚟緊又去美國喇。

聽到他人成功嘅故事，更警惕我要努力儲錢，手作嘅材料工具要審慎購買(因為已經買得太多喇……)，為我哋第二層樓努力！(哈哈，夜了，又係時間發夢了！)

都會海逸酒店主自助餐

今日亞頭請食飯！

十二點鬆啲，我、亞頭、小肥同埋好幫手四個人一齊打的去都會海逸食buffet！

呢排只要手持Openrice coupon，四位以上就有八折，每人二百蚊都唔駛，食物種類都ok多架！尤其我鍾意食ham，嗰到都有唔少選擇！除咗ham，仲有好多cheese食，我隻隻都試咗少少呢，肥死！

之前打去book位，佢話要我哋坐門 口位，我叫佢哋儘量安排番我哋坐入面，到最後一刻嘅confirmation，佢哋都仲係話要坐lobby位……點知，去到又俾我哋坐番入去喎，哈哈！原 來佢哋話有二百人hold party，係某小學嘅畢業餐，我哋成餐飯都係同呢啲小學雞一齊食。班小學雞就只會排隊拎薯條、甜品同雪糕，所以我哋主攻其他嘢先，等佢哋走咗先去拎 dessert同ice-cream。

全枱人得我一個食生蠔……所以我只order咗兩隻，不過唔太好味……

食食食，食到兩點九走人。四個人數我食量最驚人，就連雪糕都食咗六球，佢哋都被我嚇親……

Ham唔係好好食，但我係一個勁愛食ham嘅人，所以每次都會食好多！

每隻cheese都有試，但食唔哂……我怕會滯同飽死……

部份甜品同好幫手一齊share架！

食咗兩round雪糕，有我至愛嘅夏威夷果仁，剩係呢隻味，我已經食咗三球喇！

餐buffet都未落格，七點鐘又同三位媽媽去霞飛開餐。

除咗叫番上次食過覺得好正嘅干貝蘿蔔絲酥同鮮肉小籠包之後，仲叫咗以下幾樣﹕

雞絲粉皮﹕普通

馬蘭頭百葉卷﹕我呢世都唔會再食任何同馬蘭頭有關嘅嘢，啲草真係好難食！

招牌擔擔麵﹕冇食過，見到都飽……

鮮肉生煎饅頭﹕OK喎，我諗如果我唔係飽到嘔嘅話，會覺得超好味囉！

今日食得太多嘢，好滯……

雷門

睇到blog 友DnA其中一篇post，講到雷門嘅京蔥吞拿魚腩飯咁正，見到張相又好似幾唔錯咁，於是今日專登叫奶奶唔係幫我整lunch box，要去豪吓，哈哈！(成$68一個lunch，我難得學人富貴吓……)

坐低後，雖然睇到餐牌有其他更平又幾吸引嘅餐，但信DnA，都係叫京蔥吞拿魚腩飯，點知……

睇到上面嘅相，大家應該都估到出事啦！人哋嘅京蔥吞拿魚腩飯明明係搞爛嘅吞拿魚，點解我嗰碗會係一塊塊架﹖！我不嬲都唔鍾意呢種食法架！激死！塊塊魚都冇嚟魚味，仲要食我$68，我覺得自己好蠢，游入嚟俾人劏！

杯嘢飲明明話係芒果乳酸，但就加埋梳打，不倫不類！我飲咗一半就放棄！

杯自家製芒果布甸就仲死，有怪味！我食咗幾啖，唔想浪費自己個胃嘅quota，放棄again！

P.S. 噚晚同拾爺因為Amsterdam嘅住房問題，搞到好夜先瞓。想book嘅B&B，唔係冇位，就係唔覆人……於是，拾爺努力搵到比較平嘅酒店，雖 然地點唔算太方便，但仲平過B&B(住B&B都要九十幾蚊歐羅起，the world is crazy！)，當然要快快confirm啦！點知……差比錢一步，拾爺張新卡竟然有per transaction嘅limit，而且個limit仲要係少到得一千！OMG，喺我哋未嚟得切作出反應時，個webpage幫我哋中止咗個交易……想 再用另一張卡俾錢，但hotel嗰邊又唔俾我哋改payment資料……叫拾爺check吓email，佢又confirm咗我哋個booking喎， 哈！

好喇，諗住一切嘢瞓醒一瞓先再諗啦！拾爺好乖地自動自覺打去銀行問吓 有冇過到數，冇，好彩！佢亦send咗封email叫hotel幫佢hold房，hotel都肯，唔錯！但……點解呢一切要係喺我收到其中一間地點非常方 便嘅B&B嘅回覆前發生﹖難得間B&B都係收九十五蚊歐羅一晚(不過唔包早餐，亦未計5%稅。)，又有位……算，佢貴過間酒店，當慳番啲 錢啦！