難得同拾爺一齊放假，一早已經講好要去天后嘅「鮨辰」試吓佢個set lunch。呢間舖頭係我喺某報紙嘅某專欄睇到個作者介紹嘅，佢話自從陳淑莊帶佢去食過一次後，就愛上咗！講到呢到啲sushi同sashimi幾好幾好咁， 上openrice一check，見個分都唔低，不過……都有唔少喊臉……讀讀內裡嘅食評，原來都係不滿呢到價目不清，累人食成幾千蚊dinner。反正我係去食lunch，都唔怕佢誤導我消費，加上只要唔坐bar枱就唔會出事，所以我都未驚過！只要嘢食係正，我都好想去！
餐廳十二點先開門，其中一篇食評講過呢到有時都會有人排吓，所以我搭緊車出去時，已經打定電話去book枱。十二點八到已經去到餐廳，間舖都算易搵。Waitress一嚟就指我哋去坐bar枱，我見仲有order枱冇人坐，就問佢可唔可以坐order枱，好彩佢都俾。
坐低，睇餐牌。我嘅目標十分明確，就係食十件壽司嘅定食，反而係拾爺唔知食乜好。有個 waitress走嚟幫我哋，佢知拾爺唔食生嘢，就介紹佢食豬扒飯或海鰻，話呢到都整得唔錯。拾爺本來鍾情豬扒(我﹖)，但waitress問過今日嘅豬扒飯個部位冇咁靚，於是拾爺就改為要鰻魚飯喇。拾爺唔知要河鰻定海鰻 好，我就幫佢揸主意，要海鰻，貪佢鮮味啲。而我嗰十件sushi，就得waitress之助，知道今日有special嘢揀，即時要咗紙上本來冇嘅牡丹 蝦、帶子同埋鯖魚。另外再要三文魚、甜蝦、熟蝦(呢個俾拾爺嘅！)、oily tuna、海鰻同埋double咗個海膽。手卷就要吞拿魚。
Order完後，waitress好快就上咗個日式蛋。上枱見到個裝蛋嘅食具，覺得都幾精緻，可惜……一打開蓋，見到個蛋起哂泡……雖然食落都算滑，但佢啲泡都唔少，真係掂嘅，就唔應該咁多泡喇，扣分！
等多陣，就上拾爺個海鰻飯，我哋喺到忙緊影相時，就連兩個miso soup都嚟埋。我未有嘢食，就梗係先飲湯啦，個湯好普通……
終於等到我個sushi set上，waitress提我要先食海膽，因為紫菜會好快淋，然後再食海鰻。我當然想快食，但都要影吓相架嘛。佢哋好緊張，見我一影完，就提我好快啲 食。Well， 其實食時，個紫菜都有啲唔脆喇……但我都唔算影咗好耐啫，我估佢啲紫菜都可能會比一般嘅keep脆keep得冇咁耐……評論吓各件sushi先﹕
海膽﹕唔腥，但又唔鮮甜……
海鰻﹕鮮﹖食唔出……只係食咗一塊又薄又冇味又霉嘅嘢……
oily tuna﹕之前有食評激讚佢，搞到我好大期望，以為真係好oily，入口即溶，結果……好失望！同成年前喺「Saiko」食過嘅嗰件真係相差得好遠！人哋真係入口有溶嘅感覺！
三文魚﹕脂肪比例太少……
帶子﹕算係眾多sushi中最好食嘅一件，食到少少鮮味咁啦！
牡丹蝦﹕失望，一啲鮮味都冇……又係嗰句﹕同成年前喺「Saiko」食過嘅嗰隻真係相差得好遠！
甜蝦﹕少少甜，但唔鮮……
鯖魚﹕都有啲腥……
熟蝦﹕睇個樣已經覺得好老，拾爺話得個大字，冇咩味……
手卷﹕普普通通，啲紫菜勁快淋……
飯後有雪糕或餐飲二揀人，我當然要綠茶雪糕啦，仲幫拾爺揀埋芝麻味。雪糕嘛，一般貨色啦！
埋單$385，唔抵食……冇下次！
Eat, Play, Love 