Gastrobox

為打工達人慶生，日月媽揀咗呢個得gimmick而冇實力嘅餐廳……

餐廳本身好細，得幾張枱，餐廳佈局好奇怪，呈U形……所以我哋坐門口已經叫坐得闊落……

點咗一個一人餐、一個前菜同一個pasta。

煙三文魚凱撒沙律(跟餐)﹕冇食到塊煙三文魚，至於個沙律，冇咩特別。

是日餐湯 (跟餐)﹕其實我唔係好飲到佢係南瓜湯定係甘荀湯，因為個湯冇咩味……

英式蘋果酒炸蠔 ($118)﹕好一般……個蠔唔靚，薯條又唔脆……

鵝肝菠菜意大利雲吞 (188)﹕全晚最正常嘅一道菜，雖然唔算好食，鵝肝碎上，過熟係意料中事，雲吞餡料係芝士，份量尚算ok，雲吞皮有些微過濕，但整體相比起其他dishes，已經叫好。

青檸帶子百爵茶意大利飯 (連餐$258)﹕中伏！隻味好怪！帶子得3粒，但完全唔好食……

朱古力慕絲蛋糕﹕只要喺facebook like呢間餐廳嘅page就有甜品送，一like一件，因為日月媽打嚟book枱時已經講咗係為朋友慶生，所以餐廳一早畫好碟。只有……食客唔能夠要求畫咩公仔，之前上網明明見到Minions，嚟到只畫朵花……就算唔俾人要求，個差異都唔好咁大好喎！

餐廳資料：

Gastrobox

尖沙咀金馬倫道33號 The Cameron 1樓101號舖

23698383

 

嘉兵衛

走入元朗覓食，揀咗嘉兵衛嚟試，冇book位下，要等成個鐘……

名古屋風味雞翼 (黑胡椒蒜茸風味) ($49): 味道一般，價錢偏貴……

鹿兒島產吉列黑豚芝士定食 ($168): 拾爺之選，平平無奇，係個麵豉湯好清甜，令人飲到停唔到口。

滑蛋豬扒定食 ($88): 本來我只要滑蛋豬扒飯，想話慳吓錢，但飲過拾爺嘅麵豉湯後，即刻加錢變定食！個麵豉湯好甜，好味！至於個滑蛋豬扒飯，味道一般，豬扒唔算juicy，但唔會乾，冇網上啲人評到咁好食囉。

餐廳資料﹕

嘉兵衛

元朗馬田路38號怡豐花園地下5號舖 Shop 5, G/F, Y

23432023

家賀屋刺身壽司專門店

約咗舊生食lunch，本來想去試吓築地，但去到覺得價錢同環境唔太match，於是即刻上Openrice做吓research，最後改去家賀屋刺身壽司專門店開餐。

去到已經點半過後，餐廳好多吉枱，但個waitress就要我哋坐喺一張黐住隔離嘅枱……

我點咗一個蔥吞拿魚腩丼定食，舊生就食關東煮手打烏冬配唐揚嫩雞，另外我哋仲叫咗8件sushi。

蔥吞拿魚腩丼定食 ($108)﹕沙律好一般，啲菜唔新鮮，麵豉湯比我想像中好，以為會好鹹，但又唔怕鹹喎！蔥吞拿魚腩味道一般，唔太食到鮮味，但份量好足！

關東煮手打烏冬配唐揚嫩雞 ($55)﹕我只係食過件雞，冇咩特別。

壽司 (每件$10)﹕4款壽司分別為三文魚腩、劍魚腩、油甘魚同埋火炙安格斯牛肉，餐廳並冇將壽司由淡至濃味排序而放，感覺好唔pro……壽司全部都唔新鮮，當然，$10係唔可以要求咁多嘅。

埋單$267，試一次就夠。

餐廳資料

家賀屋刺身壽司專門店

灣仔灣仔道83號1樓

28366466

 

 

 

 

Be a 有良心的accounting student

話說我每年都會要求班six join某機構搞嘅mock exam，始終佢哋未出去考過公開考試，俾錢去感受吓個氣氛，加若然佢哋生性，well prepare for the exam，咁都叫間接迫佢哋溫書，對佢哋嚟講，點都有利！噚日，亞頭上完佢班six堂，拎咗份question paper番嚟睇，我第一個反應就係，我班妹冇人拎俾我！忍唔住同亞頭呻﹕「點解妳班學生咁好，年年都有人拎番嚟俾妳嘅。」(當時即時諗起舊年班six又係考完冇拎番嚟俾我，但亞頭嗰班有！)亞頭即時得戚地道﹕「因為我同佢哋關係好囉！」

今日上堂，有個妹一坐低，第一時間同我講﹕「我要投訴個mock呀……」未待佢講完，我已經忍唔住連珠砲發佢哋冇一個帶份question paper番嚟俾我。佢哋全部即刻靜哂唔敢出聲，但總有唔知死嘅學生仲提及我舊年向佢哋呻過佢哋上屆師姐冇人帶DSE question paper番嚟一事，一提呢件事，我更嬲！即係我已經講過我唔滿意佢哋唔帶question paper番嚟，而佢哋明知我唔滿意，但仍然唔做！嬲嬲哋，我下令全班聽日都要帶番本question paper番嚟放枱面，唔記得帶要手抄一本俾我！有同學聽到後，即時叫隔離位提佢帶question paper。就喺大家都feel到我好嬲時，突然有同學話有人有帶，因為其中一班嘅同學頭先要做中文科嘅練習，要遲入課室，所以佢哋未知我為何大發雷霆，隔離位講佢哋知後，其中一位同學就表示有帶，之後，佢喺folder到拎咗兩份本question paper出嚟，全班即時開心喝采，感激佢救咗大家一命！

之後，有同學提起DSE question paper，我即時表示要佢哋帶番嚟俾我，有同學即刻舉薦他人。我仍然為著佢哋冇諗過帶份question paper俾我而生氣，我同佢哋講決定嚟緊上five嘅堂，每堂都同班five呻一次佢哋嘅師姐幾咁無情，唔帶question paper俾我，務求潛移默化佢哋一年後識得帶份question paper俾我。然後，諗諗吓，我決定之後嘅日子，每日都向班six吐嘈一吓。我喺每班都搵咗位同學負責幫我寫上「Be a 有良心的 accounting student, remember to bring the DSE question paper to Ms Lau after the examination」，我同佢哋講將會喺每班安插個spy去ensure佢哋有寫呢句sentence上黑板呢！

拾爺的奸計

今日收到同事送嘅日本手信，朱古力一排，包裝非常精美！拎番屋企後，向來對零食冇興趣嘅拾爺見到後，竟然拋出一句﹕「妳都食唔到架啦！」，之後奸笑行開。

我終於知道點解拾爺要我去箍牙喇！佢根本就係想謀哂我啲嘢食！

女俠送我嘅聖誕禮物– 無花果乾，我已經轉贈俾佢，因為女俠買時根本就知合佢胃口，禮物轉贈一刻，拾爺已經開心到不得了。我乘機叫佢唔好打小肥送我嘅茶葉主意，但佢表明唔打算放過我愛喝嘅Earl Grey……(前年另一同事送我時，佢飲哂咁滯……後來同事知道，再送我一盒。)小潘潘送我嘅蜜糖我都已經作最壞打算，會被佢拎去飲……我同佢講，今年收到嘅禮物大部份都為佢而設，只有亞頭送我嘅mask，先稍為安全，點知……佢竟然話佢都用得……

呢個老公好過份！