去莎樂美餐廳食lunch，間餐廳好暗……我哋上咗樓上坐卡位，好快咁叫咗兩個鐵板餐，我要日本帶子伴美國雞扒(配白菌蒜茸汁)，拾爺就要串燒大蝦伴莎地亞什扒(配肉汁)，餐湯就各要一個，即羅宋湯同周打魚湯。
侍應先上麵包同餐湯﹕
其實對麵包冇咩印象，應該都係普通貨，又唔係熱騰騰咁出囉！紅、白湯，前者係呢到嘅名菜之一，辣辣哋，但唔特別，唔明點解會係名菜……後者就鹹到死……兩碗湯都令人好想飲水！
主菜上場﹕
兩份主菜，份量十足！自問大食嘅我，都真係食唔哂……其實個餐加錢可以加飯或意粉，好 彩我精明冇加到，如果唔係就係嘥錢！我碟雞扒有兩大塊，拾爺碟什扒就有豬扒同雞扒。兩人share嚟食，有成三塊扒係雞……笨咗！其實個扒餐只可以話抵 食，因為真係好大份，但就唔會覺得好食！雞扒係雪扒都預咗，但個雪味重到毫無雞味可言……豬扒個情況都唔好得過雞扒……我冇食到大蝦，但個帶子就一啲都唔 好味……成個餐好重口味，我同拾爺食完，好口渴！離開餐廳去行街時，差啲渴死荃灣！
甜品冇得揀，全部都朱古力雪糕！
埋單$106，應該唔會再番嚟幫襯！
同奶奶預祝生日。
叫咗以下幾樣﹕
芝士釀焗鮮蟹蓋 ($148) — 其實用芝士焗絕對浪費咗個菜，因為咁樣好難食到蟹肉嘅鮮味！又或者，啲蟹根本唔鮮啦！點都好，呢個菜我都幾鍾意，因為我本身好鍾意食蟹，但又唔鍾意自己拆肉，呢個菜將拆咗出嚟嘅蟹肉釀入蟹蓋再用芝士鋪面拎去焗，絕對係食廚子嘅拆肉工夫。價錢係貴咗啲，但真係啖啖肉架！我哋叫咗兩隻，兩個人share一隻， 都好夠囉，因為芝士好滯架！一人一隻就唔駛再食嘢喇……
金不換牛油焗中蝦 (特價$209) — 平時好怕食要自己剝殼嘅海鮮，但呢碟蝦就已經隻隻都界咗一刀，方便食客用口咬開個殼，都算食得幾舒服。只係……本身唔特別好金不換，呢碟菜只覺得平平無奇，但收費高達二百幾蚊，感覺唔抵！雖然，啲蝦都幾彈牙！
龍皇披金甲($438) — 蝦頭加龍躉，龍躉肉加入蝦膠再油泡，入口彈芽，油而不膩，口感特別。蝦頭都有炸過，不過入面嘅蝦膏唔算好多。
松露金鏤衣 ($298) — 味道偏鹹，對於一向淡口味嘅我哋嚟講，實在有啲受唔住……不過，呢一件件用免治雞肉整成嘅肉磚又確係幾特別！食落啲肉唔會好散，唔講仲以為係成件雞咁上！ 我、拾爺同奶奶一人食完一件後，姑仔先食，佢一食就起咗塊雞皮出嚟，我哋嗰時先知原來每塊雞個底都係雞皮！我再挾起一件，試吓只食雞皮，發覺好鬼爽口，唔 怪得我哋三個都食唔出啦！呢道菜其實真係幾特別，不過如果食唔到太濃味嘅，就唔多適合喇！
明閣鮑魚粒炒飯 ($258) — 全晚最淡味嘅一道菜，非常合我哋口味！
燉奶唔滑，楊枝金露入面嘅柚肉苦嘅……不過啲西米幾特別，硬硬哋！
埋單$1,760。
朝 早，亞頭冇去醫院，佢話auntie一早被推咗入手術室，有排都未出到嚟，去到醫院都只有呆等，所以唔去喇。我哋叮番熱噚晚啲剩餸，食完，亞頭就陪我去買 Coach袋。行去商場時，我指俾亞頭睇嗰間DAVIDsTEA嘅所在位置，笑佢同我經過咁多次，都唔識帶我嚟買茶葉，佢話佢真係睇唔出呢間係賣茶葉嘅地 方……咁又真係幾唔似嘅，哈哈。
行 到去間商場，叫The Bay，我哋先行一圈，睇吓有冇嘢啱，呢到都有啲減價貨，但都唔係我杯茶，亞頭都睇唔啱嘢，就陪我去買個袋喇。臨俾錢前，我問佢哋有冇得退稅，佢哋知我係 遊客後，就叫我俾本passport佢，之後佢哋offer咗個85折俾我呀！嘩！亞頭一知有85折，就好積極咁行多一圈，但都係睇唔啱嘢。有咗呢個85 折，個人都心情開朗啲，雖然都係要二千幾，但慳咗二百幾蚊，點都覺得開心嘅。
離開The Bay，亞頭話點都要我食吓呢到嘅包，於是就去咗Tim Hortons到，買咗佢至愛嘅Boston Cream Doughnut，原來呢到啲doughnut好平架，一蚊加紙都唔駛！早知我之前就唔捱餓捱嗰啲長麵包啦，買doughnut食都夠飽！
(亞頭果然冇介紹錯，係幾好食架喎！)
之後，我哋慢慢行番屋企，拎行李，去機場喇。
我 哋將行李拎到停車場，看更一早準備好車，之後就車我哋去機場。到機場後，亞頭就俾錢佢，然後我哋就去check in喇。之前我一直驚行李超重(因為CX好搞笑，佢係每個喼唔可以過20kg，但就不限喼嘅數量。)，所以亞頭就借出一個中喼俾我分散重量喇。亦因為咁， 我成功過關。
入閘後，我哋又去搵lounge喇，亞頭講得啱，香港嘅lounge供應嘅食物真係叫唔錯架喇！
同亞頭等上機時又傾吓偈，佢提到自己哥哥點對個大仔時，忍唔住講到喊……唉，我都覺得佢哥哥對個仔太harsh喇，希望個小朋友唔會心理唔平衡啦！
上機前，去洗手間，有以下有趣發現﹕
(我知有人去洗手間都會用電話嘅，但其實咁樣好唔衛生……)
好！上機喇，今程機15個鐘，冇cut到時間……我不斷睇戲，都有恰吓，但瞓得唔好……但好慘，前面個人將將凳推後，我睇得好辛苦……呢程我完成埋套The Descendants佢，仲睇咗Midnight in Paris同My Week With Marilyn，睇In Time時，睇到好緊張，就喺剩番最後17分鐘時，部機要準備landing，冇得睇……
呢程機landing時，會喺香港14號夜晚，我估自己番到去都未必有胃口食嘢，所以落機前，整多個杯麵！
人生叫做到過吓加拿大啦！但再嚟嘅機會應該唔大喇……都係要用咁多錢，我鍾情歐洲多好多！
(嚟咗咁多日，都冇影過亞頭屋企大廈環境添！)
我要去嘅商場其實就喺正第一日亞頭帶我去嘅商場隔離，所以又見到Old City Hall！
離 開supermarket，突然見到一間裝修新潮嘅茶葉舖，yeah~~即時入去，一入去就有人俾杯茶我飲，係古古力味。之後，搵到staff sell我， 我問佢有冇Maple tea，佢話有，就俾咗罐我聞。外國人真係好得意，叫人聞吓就知道味道﹖都係中國好，有得試！聞完後，我覺得應該都幾甜……問佢幾多錢，100 gram要CAD$30﹖好貴呀！
買到茶葉，心情極佳！想像吓拾爺收到禮物後嘅開心樣，已經好心甜喇！離開呢個商場，靠頭先嘅記憶，沿路行番去之前嘅商場 (可靠過要我睇地圖，哈！)。運吉嘅我，又去咗Marriott hotel個lobby到hea時間。
雖 然時間尚早，但實在冇嘢可以再行，所以我決定番亞頭家喇。沿路番去影吓相，同埋格咗檔最平嘅熱狗檔買sausage (CAD $3.5)食！亞頭話佢當年同佢hubby仲係學生時，就係兩個人share一個sausage包當lunch架喇！我揀咗Italian sausage，好辣……
個sausage其實係個late lunch嚟架喇！因為當時已經成三點幾，接近四點。我一早就肚餓，但好多地方啲嘢食都賣得貴……忍到呢一刻，先捨得用CAD $3.5買個包食咋！
食 完個包，辣到呢……咁啱過幾步就見到有DAVIDsTEA，於是入去show張coupon同佢講想飲免費茶，點知個staff講句﹕sure，就俾張杯 試飲嘅細杯茶我……算啦，反正佢冇拎我張coupon，我又有嘢飲解渴。呢條路之前同亞頭行咗幾次，點解佢冇帶過我入嚟﹖！我一直都話要買茶俾拾爺，佢就 陪我去supermarket睇，但點解唔帶我嚟呢間茶葉舖呢﹖！(事後，佢話佢都唔會有間咁嘅嘢……)
番到亞頭家，uncle番咗嚟，佢噚晚成晚陪住auntie，而家番嚟沖個涼，食少少嘢，就又去接亞頭更。喺亞頭屋企睇電視，睇咗少少「犀利人妻」，好耐之前聽過呢套劇，但冇睇過，正奇怪第三者叫男主角做姐夫，連自己家姐個老公都搞時，原來係表姐夫！
喺 亞頭家呆到五點幾，亞頭番嚟，接埋我出去，今晚佢約咗皇兒食飯。去食飯地點前，亞頭先陪我去買花旗參。奶奶同爸爸都話要花旗參做手信，我又唔太識呢啲嘢， 亞頭就幫我問咗uncle同auntie，再帶我去一間叫「大山行」囓舖頭買。入到去，個亞姐初初介紹埋啲八百幾蚊(講緊係加幣)嘅花旗參俾我哋，亞頭有 感勢色唔對，就即時開佢爸爸個名，亞姐知係熟人介紹，就改為叫我買一盒盒禮盒裝嘅半野生參，佢話半野生即係野生種但人種咁解。而家買一送一，我就要咗兩 盒，叫佢幫我揀啲大粒啲嘅。佢果然幫我撈底搵咗兩盒望落粒粒都大嘅花旗參，埋單CAD $110。臨走前，佢哋仲俾咗一人一杯參水我哋飲，又送我哋參糖。不過，亞姐俾參糖都俾得好唔願意，我指俾我時。因為佢識亞頭個爸爸，所以好熱情咁俾亞 頭，到俾我時，佢先俾一粒，然後諗咗一陣，就又俾多粒……其實……我都唔食參糖嘅，佢俾唔俾我都冇所謂，所以，可唔可以唔好搞到好似蝕咗俾我咁﹖！又或者 係，好似我迫佢送俾我咁……
要去多一趟醫院，我見都跟埋嚟醫院就話上埋去探auntie，但亞頭都係唔俾，叫我喺lobby等佢……喺 lobby行咗陣Shoppers，人家夠六點就趕我出嚟……唯有坐喺sofa上吓網啦。點知，坐坐吓，有個伯伯突然坐我隔離，仲問我攞錢，嚇到我即刻走 開。後尾見佢又係咁坐其他旁，向人討錢，不過其他人就只係擰歪臉，伯伯就冇癮走咗喇。
等 到亞頭落嚟，我講番件事俾佢知，佢話呢到係好多奇奇怪怪嘅人……之後，佢本來想先帶我去餐廳坐低，佢同皇兒去咗銀行搞基金嘢，先再番嚟join我。但叫我 一個人傻更更咁坐，好odd啫，所以我話寧願跟埋去。終於去到銀行，亞頭同皇兒就就住基金嘢同銀行個staff傾，我就坐埋一邊玩電話。搞掂哂啲嘢後，我 哋就去食飯喇。今晚食……上海菜……點解最後一晚，都唔係食啲同加拿大有關嘅菜式……
(蒜蓉油墨菜﹕真係好少餐廳咁樣整油墨菜……)
三個人叫咗咁多嘢食，當然係唔哂啦！有剩我同亞頭打包做聽日早餐。呢餐唔記得食咗幾多錢，不過我提議同亞頭請番皇兒，佢上次請我哋嗰餐其實仲貴……
夜晚，同拾爺傾電話，佢睇過我send俾佢Coach個袋張相，都話個袋靚，叫我買！仲話送俾我添，嘻！
(早餐仍然係捱麵包，不過，有最後一罐罐頭送麵包食。)
集合前，匆匆影吓酒店啲lift，但影唔切個lobby……
今日我又坐番前排，同一個強國男人一齊坐……好彩，佢唔係暴發戶型，亦唔係老粗，佢係上海人，都算斯文嘅。但佢間唔中會問吓我嘢，我其實唔想講嘢……叫我講國語仲慘過叫我講英文(我英文都已經唔係好架啦！)……
導遊話今日冇咩行程，主要係搭番車番去，途中只有一個景點，就係遊千島湖。所以，今日真係名符其實嘅全日坐……
我哋會先坐兩個幾鐘車去食lunch先，join咗伙食嘅團友慘喇，呢頭食完早餐，十一點鬆啲就叫佢哋食自助午餐……食lunch前，途經一個地方，司機見有時間，就轉車入去停低俾我哋去影相。
(我唔記得呢個建築物有咩來頭喇，但就覺得佢好得意，好似話好難起到架喎。)
喺到影咗一陣相，就真係上車坐坐坐，坐到食lunch時間。我冇join到呢個lunch，但今次個地點四周都冇咩嘢俾我影相，所以我都係stay喺個商場入面，行吓啲舖頭。好彩，個商場都有洗手間俾我去啫。
(喺商場無無聊聊，咩都影一餐。)
團友食完lunch，我哋又要坐成三個鐘頭車去遊湖。期間導遊都有播吓片，我就……瞓覺囉。哈哈。今日天氣唔多好，時而落毛毛細雨，時而傾盤大雨。同一條公路上，呢一截落大雨，到下一截又會突然陽光普照。我心中只希望去到遊湖時唔好落雨，如果唔係，靚景都變頹嘢……
三點多，終於到遊湖景點！
(我問導遊可唔可以去洗手間，佢叫我上船先去。後來上到船，發現個洗手間又細又污糟又臭，我冇去到！落船第一個跑去洗手間，之後……最後一個上車……但呢個洗手間好好多！格數多，又乾淨！)
落車後，天色好暗……我哋每人獲派一張藍色飛，然後自己行去碼頭，上船前，船公司嘅人會撕去其中一截。
遊 完湖，旅程真係到尾聲喇。我哋驅車前進，番去Toronto喇！因為downtown距離遠，所以係第三站先到，導遊仲要喺我早一站落車……到 downtown喇，香港母子同我一齊落車。佢哋之前話佢個朋友未必得閒嚟接佢，仲問我一唔一齊食dinner，但我已經好攰，想早啲番上去。一落車，佢 個friend就已經喺到等佢哋喇，同佢哋say完goodbye後，我就自己上樓。
上 到去，亞頭開門俾我。佢好驚訝我自己上咗嚟，原來佢諗住一陣落去接我架，佢冇諗過我會早咗番。其實當時都唔早喇，差唔多八點……我見間屋冇咩人氣，就問亞 頭uncle同auntie喺邊，原來auntie早兩日個心唔舒服，入咗醫院……呢一、兩日做咗body check，等緊報告，可能要做手術。聽到之後，我個心都好唔舒服，希望auntie冇事啦。
亞頭問我去唔去食dinner，其實我都冇咩胃口，所以就唔去喇。佢晏晝買咗越南包未食哂，所以就食埋佢當dinner。
是晚，快快沖完涼就上床瞓喇。
仍然係嗰條長麵包，配吞拿魚罐頭！今次試另一隻味，但我覺得噚晚嗰隻lemon & pepper好味啲！(初初亞頭仲話lemon加pepper呢個配搭怪怪哋，唔係呀，幾好食架！)
食完就落樓喇，原來我係最後一個，其他人都好早落咗嚟……因為佢哋要出去食早餐嘛！
今 日被安排坐後面，四十幾號……又係坐對母子隔離，不過今日我可以自己一個人坐，唔駛同人一齊坐。導遊本來安排咗兩個都係自己一人join團嘅男人一齊坐， 但佢哋覺得迫，反正後面仲有空位，其中一個就行咗去後面坐喇。上車後，我哋都討論緊噚日坐我哋附近嘅一個強人，因為佢噚日不斷咳、打噴嚏同lur痰，好噁 心！佢啲行徑就連導遊都側目！不過，導遊話佢應該係花粉症，所以對母子個媽媽俾咗粒藥佢，等佢唔好咳得咁利害。媽媽話佢覺得嗰個人好污糟，見到佢啲分泌物 真係好可怕。我求神拜佛佢唔好再坐我附近，點知……佢今日坐我後面……仲恐怖過噚日坐前面呀！
去Sheraton接埋其他團友，我哋就出發去聖約瑟大教堂，入場費為CAD$3。不過，今日天氣唔好，顯得個教堂都陰森啲……旅遊車一嚟就車咗我哋上去，唔駛行樓梯。落車首先見到教堂旁邊嘅建築物﹕
跟住導遊入教堂，聽吓佢講解，影吓相咁。其實去過兩次歐洲，已經見識過好多教堂，尤其去過Rome嘅聖彼得大教堂，更加覺得其他教堂不外如是……
(間間教堂都有嘅燭台，信眾歡迎放低CAD$0.5，點支蠟燭。)
行完第一層，就搭電梯上第二層喇！雖然我參觀過唔少教堂，但要搭電梯嘅，絕對唔多！
(第二層擺放咗某位德高望重嘅神職人員臨終前所住醫院嘅傢俱。)
呢間教堂最激嘅係，收藏咗Brother Andre個心﹕
據導遊所講，呢個心曾經被偷，教堂亦遭勒索去贈回，好彩最後警方都破到案！此後，教堂就為個心擺放之處安裝鐵閘，免得再成為偷心賊嘅獵物。
第二層都有望彌撒嘅地方﹕
之後，導遊就俾我哋自由活動，十五分鐘時間，佢話可以留喺到影相，又或者行出去參觀旁邊一個小教堂，可唔係，可以行落山下，影成個教堂嘅全look。貪心嘅我，決定做齊三樣嘢！喺入嚟呢到時，我已經影哂我想影嘅嘢，所以導遊一話自由活動，我係第一個衝出去搵小教堂！
(留意教堂左面有樓梯可以上二樓架！)
(小教堂底層)
然後好快咁衝落我哋頭先嘅落車點，再影﹕
望望錶，有時間剩，加上見到有團友行緊落山，我決定極速跑落去影相！
影完，即刻跑樓梯，上番去集合。本來想去洗手間架，但導遊話下個景點都有，十分鐘車站，咁我就乖乖上車去喇。
下個景點係參照Paris嘅聖母院大教堂而建嘅教堂，入場費CAD$5。導遊話可以自由選擇入唔入去，不過如果冇咩參觀過教堂嘅，入一入去都無妨。去過真正聖母院大教堂嘅我唔打算入場參觀，真嘅都唔駛錢，點解要俾錢去個假嘅呢﹖！
旅 遊巴喺某個位停車，我哋全部人要落車跟住導遊行上去，再過條馬路先到呢個假嘅聖母院大教堂。導遊安排團友逐個逐個入去後，見到我仲企喺到，就問我一場嚟到 點解唔入去，我話﹕吓﹖我去過真嗰間聖母院大教堂喇喎！導遊聽後，就冇我咁好氣地揚手叫我走，夠鐘自己番去旅遊車集合。問題係，我等佢咁耐只係想去過洗手 間咋！佢叫我去番頭先落車處嗰間Starbucks到去洗手間……因為唔知下個景點係乜同幾時去，唯有硬住頭皮咁行入人哋Starbucks，唔幫襯但用人哋個洗手間啦。去完出嚟，見到坐我後面狂lur痰嗰位先生同佢另一半，原來佢哋都冇入去參觀，改為嚟呢到嘅洗手間。不過，人哋有幫襯……(強國人有錢嘛！我呢啲港燦冇得比……)其實，我頭先行落嚟，都見到有其他團友冇入到去，只係喺教堂出面影相。我當然都有影啦！
因為冇咩嘢做，所以離開Starbucks就周圍行逛。又由於時間尚早，好多舖頭都未開門……但係，我發現咗佢﹕
夠鐘，我就行番去Starbucks到集合。下一個景點係我冇參加嘅參觀奧運會舊址，我對呢類建築興趣不大！不過……導遊而家先講我哋除咗參觀奧 運會舊址，仲會入一個生態館。生態館分幾部份，入面會有珍貴嘅動物睇。之前都冇人講過會有生態館，我對呢個有興趣喎。於是……當大家入哂場參觀生態館後， 導遊叫我自己逛吓，我就話想入生態館，不過只係生態館。佢幫我問咗價錢後，就叫我入去，錢遲啲先同我計。其他人只有45分鐘行生態館，跟住要集合去隔離個奧運會舊址，我就用哂所有時間行生態館。
第一個展館係熱帶雨林，一入去，我就要除羽絨，呢到會set番真正熱帶雨林嘅溫度，所以好熱！
行到某個位，見到以下呢隻動物，佢游水個樣好得意，搞到我不斷影佢，甚至錄影埋佢游水片段添！嗰對香港母子咁啱喺到，個仔同我就一齊捕住隻嘢出嚟，一個影相一個錄影。
啲企鵝仔真係好得意呀！我stay咗喺到好耐，影吓相，睇吓企鵝！
最後一個館，冇「動」物，全部係死物，冇咩心機睇……
正想離開呢個生態館，出出面影相時，突然醒起導遊明明話呢到有藍色嘅鸚鵡，講到好珍貴架喎！但我頭先都見唔到……唔甘心，再入tropical forest個館！
可惜……都係搵唔到……反而見到呢隻嘢﹕
行上我哋條行人路，想點呀﹖！
搵唔到藍色鸚鵡，雖然唔甘心，但都要走喇。出去後，喺souvenir shop行咗一圈，想買頭先覺得好得意嘅嗰隻動物嘅公仔，但價錢有啲貴……掙扎咗好耐，最後都係唔買喇！加幣唔係剩番好多，仲有幾日要過活架！要慳！
出生態館後，第一時間去集合地點，睇吓架旅遊巴嚟咗未，因為我部相機冇電，我漏咗粒電喺喼……好彩架車喺到，司機亦好好人，幫我拎個喼出嚟，等我可以換電！換好電，見仲有時間，於是走去影吓個奧運舊址外貌。
以上兩張我係跑番去生態館個入口到影過去架！跑到我索哂氣……影完又要跑番去旅遊巴到，怕遲咗去集合，點知……佢哋到咗集合時間都未到……於是……我又走咗去另一邊影個奧運舊址全look﹕
等咗一陣，團友們先慢慢行嚟……之後，我哋就出發去食lunch。佢哋又係食自助餐，我又係食西北風！
當團友行入餐廳時，我就自己周圍行吓。然後，俾我發現咗佢﹕
跟住呢堆「草」(我鍾意咁叫！)行，行吓行吓，發現咗一個山坡公園，好寧靜！配合埋個陰天，有啲荒涼感，好好feel！
食完lunch，就向另一城市– Quebec City出發！Quebec City係一個充滿濃郁歐陸色彩的城市，呢個city嘅人主要講法語，據遵遊講，入面嘅商店同餐廳都係以法文為主要溝通用語，所以，我今晚個dinner 就join團喇！由食lunch嘅地方，到Quebec古城，車程成四個鐘，我瞓吓，望吓風景，睇吓導遊播碟咁打發時間。
車 子入城期間，導遊就開始講今晚住宿。原來今晚大家又瞓唔同酒店，而且仲係三間咁多！俾得最多團費嘅住古堡酒店，跟住就係Hilton，然後就係我住嘅不知 名酒店……我住嗰間當然係同導遊一樣嘅，因為係最平架嘛！架車入城冇耐，導遊就指咗我今晚會瞓嘅酒店俾我哋睇，然後行一段路先到Hilton，再行入啲就 到古堡。我已經估到今晚會再夜啲先可以番酒店，因為噚晚只有兩間，兩間相差一條街，當第一間嘅人分好哂房，架車都只係行一陣就到我住嘅酒店。但今晚……要 先去兩間酒店，再到我住嗰間要行咁遠，一定會晏……而且……聽日應該要更早起身呢，唉……
架車喺古堡酒店門口停低，唔係俾住嘅人去check in，而係間酒店正正座落於Quebec City嘅舊城區。
舊 城區分上城同下城，導遊俾我哋自己揀自由活動，又或者跟住佢行。佢話自己行可以去吓古堡酒店後一個炮台睇睇，又或者喺上城區嘅街道感受吓呢到嘅歐陸文化， 再唔係就行落下面下城區行吓都得！我自己一支公唔知頭唔知路，當然跟佢行啦！我哋一行人先落下城區。由上城區落下城區其實只係行吓樓梯，對年青一輩絕對唔 係問題，就算係人到中年都ok！但呢條短短小路，都設有纜車上落……我初初以為係就番老人家啦！到行落下城時，我哋見到沿路商舖前都有扶手，導遊話到冬天 呢到落雪可以落到好厚，啲人要捉實扶手去行，我先覺得纜車嘅安裝其實係方面人們冬天落下城區嘅。
(沿住樓梯落下城時，睇到嘅下城景貌。)
(導遊話呢到嘅商舖招牌，各具特色，設計上係全部唔一樣架！)
(導遊話係真架！好恐怖！擺條屍出嚟！)
(呢到嘅街道，無論係用料定設計，都同Toronto其他城市好唔同！真係令人彷如置身歐洲當中！突然好想再去歐洲！)
(行吓行吓，就嚟到喺歐洲經常見到嘅廣場！不過，呢個真係好細！)
(教堂)
導 遊帶領我哋行經小廣場後，就嚟到呢幅油畫前解散。新屎坑嘅港人同國強人，紛紛擁上牆前，誓要佔番一個有利位置影相……但其實當時嘅人之多，根本點影都係影 埋好多會行會郁嘅佈景版……當大家都影完後，又一同四散……我同對母子就等到佢哋影夠影飽散水後，就慢慢影哂成幅冇人喺前面「揚來揚去」嘅油畫！
(對母子個仔同我講我先發現，油畫同屋簷係match番架！勁！)
除 咗周圍行同影相，我哋都有入到啲商舖。其中一間係賣玻璃製品嘅，入面啲嘢有啲都幾靚，不過唔係我杯茶。但母子媽媽就好鍾意，又話呢個好，又話嗰個靚，心大 心細好想買。當佢睇中一個碟後，就叫我幫佢問吓隻碟用嚟做乜，原來佢睇中嘅係用嚟放cheese嘅碟！但係……佢想用嚟切生果……我真係驚佢會一劈就劈爛 咗呢隻價值港幣三百五嘅玻璃碟呢！就連店員(佢講流利英語囉！導遊又話呢到嘅店員只會講法語！)都唔敢擔保隻碟可以受到切生果嘅力……
雖然用嚟切生果係危險，但母子媽媽太鍾意隻碟，所以都係買咗。陪佢俾錢講價時，俾我喺counter到發現隻條幾靚嘅頸錬(CAD$35)，個吊嘴係藍色水晶，好襯我條pomp dress，於是……我都衰埋，忍唔住買咗……陪一陪人，自己又唔見CAD$40.24(連稅)，唉……母子媽媽好興奮，佢覺得大家都買到心頭好，係好事，其實我好肉赤……因為我啲加幣已經買少見少……
母子媽媽好鍾意間舖頭，於是提議我哋喺到嚟張大合照﹕
店員哥哥超nice，細心答問題，又會同我哋傾吓其他嘢，仲幫我哋揸機影相！我當然要同佢影番張合照啦！
最後，當然唔少得舖頭門前留念！
(仍然身處下城，俾條纜車軌大家睇，同埋相中可見，時至四月，積雪仲未溶哂！可見呢到嘅雪係幾咁厚！)
(仲喺下城，途經嘅其中一幅酒畫！)
上番上城後，我哋就一齊去搵粒彈，終於﹕
(雖然呢個係一個傳言，但都要影吓相！)
影完粒彈，就行番去古堡酒店集合！呢個時候，天色好咗好多！
我哋見仲有時間，於是就行去古堡酒店後面，搵吓個炮台！原來要去炮台，仲要行一段樓梯……行唔切喇，唯有影吓其他嘢啦！
夠鐘集合，所有團友上車後，我哋就去今晚嘅用餐地點﹕
之 前join團時，個agent明明話係法國餐！點知導遊(而家)介紹時，就話唔好諗住係食法國餐，法國餐邊有咁平(嗱嗱嗱，法國餐係冇咁平，但呢餐佢都收 咗唔少錢架！)，呢餐其實係Quebec餐……感覺被騙……尤其落車後，沿路嘅餐廳都有英文menu，更加覺得唔join團，自己周圍食好過！
跟大隊一齊入餐廳，個場被我哋包咗咁滯！我哋四人組，當然係坐埋一齊啦！
喺旅遊巴時，導遊一早俾咗我哋每人一張紙，方面一陣俾waiter上菜用。其實噚日導遊收錢時，已經問明我哋要咩餐，要龍蝦就要加多CAD$6，雖然我都見人點，但大部份人都好似我咁要牛扒！
先嚟麵包，唔特別好食……
麵包係任食架！導遊話試過有人食咗四個，唔係因為佢貪心，亦唔係因為麵包好食，只係餐廳上菜太慢，人家餓慌咗，先會食咁多。最後，因為食得太多麵包，食唔落加錢upgrade嘅龍蝦餐呢！真係慘……
我哋今次好彩，嘢食唔會上得慢。麵包嚟咗冇耐，就上頭盤喇。
肝醬得個凍字，冇咩味……啲菜……睇個樣就知唔新鮮啦！
到個湯喇！呢個湯就犀利喇！飲完都唔知自己飲緊咩湯，因為佢咩味都冇……
食完頭盤，飲埋湯，都等咗一段時間，主菜先陸續上枱……（即係我哋咁多人一齊食，有啲人食先，有啲人等到人哋就嚟食哂先有得囉！）
主菜一樣嘅難食！先講個牛扒，細塊到我食完都唔覺得自己有食過嘢……牛味唔夠，更唔係好講個廚可以鎖住肉汁……佢唔乾到變牛肉干，我已經好慶幸！意粉，又一難食之作！乾到好似食橡根咁……我要不停用牛扒啲汁去撈濕佢嚟食……配菜就更加係又唔新鮮又冇嚟味道可言啦！
餐廳上埋甜品，我哋就出去行吓喇！
整體嚟講，呢餐係一個disaster！俾咁多錢食垃圾！算！我當啲錢係用嚟買一個供應晚餐俾我嘅室內地方，等我可以同團友傾吓偈，唔駛再一支公游嚟游去，同埋捱麵包。我哋傾到該位成日咳同lur痰嘅強國人時，我忍唔住叫咗佢做「痰」先生！母子媽媽以為佢真係姓「譚」，反而佢個仔一聽就聽得出我玩緊咩，佢哋母子二人都話我唔似教書……因為太玩得。其實……比起我某啲舊同事，我真係唔算啲咩架喇！
(離開餐前再影！)
行出餐廳，發現咗佢﹕
Well，呢餐真係賣呢個價嘅話，我寧願捱麵包，都唔要被人鑿！！！
慢慢行去旅遊巴時，影吓呢到個古城牆，據說係北美唯一保持得最完整架喇！
上車後，雖然架車明明最近Hilton hotel，但旅巴仍然係先去古堡酒店，放低俾得最多錢嘅四位尊貴客戶先！然後，再駛番去Hilton hotel，導遊仲叫住呢間酒店嘅團友可以夜晚自己出嚟行，因為呢到治安好好，從來都冇發生命案。最後，俾得最少錢嘅團友包括我啦，先可以去我哋嗰間離城 遠遠嘅酒店。導遊介紹我哋間酒店時，仲話對面有大型商場，可以去買吓嘢。哼！商場收九點，我哋架車去到酒店都過咗八點九啦，行乜鬼商場﹖！第二朝又要最早 一批咁起身上車，你俾十間商場喺我哋附近，我哋都冇福去行架啦！
今晚間酒店冇咁靚……我煲唔到水飲添……
出到去將行李交俾司機，我就上車喇。亞頭頭也不回地走喇，反而係佢daddy唔太放心，再三叮囑我小心先離開。
噚晚導遊打過電話嚟亞頭屋企，講低我個上車點連埋我會有三人上車，我坐9號位，導遊會喺下一個站先上車。呢到都幾得意，導遊唔係一開始就喺到，坐位又會安排好哂，仲會日日轉，咁係幾公平嘅，不過有啲麻煩囉。
上咗車後喺到等，偷聽到司機係日本人，過咗六點三，另外兩個人仲未上車，司機打俾導遊問點算，好彩過咗一陣，就有對母子上車喇。佢哋係香港人嚟架，話一早到咗，但睇唔到架旅遊巴喎……而且，佢哋噚晚收唔到電話，連自己坐邊都唔知……
司機數齊人就開車，到下一站已經係半個鐘之後嘅事，呢個站(萬錦商場)上多咗好多人，原來大部份移居Toronto嘅華人都住喺uptown！導遊亦喺呢個時候上車。之後，再去埋最後一站，接多幾個人，架車就向加東出發！呢個站有人坐我隔離，係個男人……唔鍾意……
導 遊先自我介紹，再講吓呢幾日嘅行程安排，同提醒我哋每日座位都會唔同。另外，旅遊巴嘅洗手間唔可以用，因為洗手間冇沖水設備，只有用化學物分解我哋嘅排泄 物，呢個係三日行程，如果有人用洗手間，臭味就會跟足三日……反正景點都會有洗手間，導遊叫我哋盡可能等到到達景點時先去。呢架旅巴有樣嘢幾好，就係有 wifi同埋可以叉電，咁樣我就可以成日上facebook update拾爺我嘅情況喇，唔識打貴到死嘅長途電話喇！
導遊之後就有關景 點參觀同膳食安排嘅收費作講解。佢話可以跟團包餐，包三日午餐同一晚晚餐，早餐同今晚嘅晚餐就唔包，包餐主要食自助餐，另外唔包入場費嘅景點有皇家鑄幣 廠、國家文明博物館、奧運會舊址同埋千島湖嘅遊船。唔記得收費幾多喇，總之就過百喇，反正我都唔會全部跟！導遊走嚟時，我同佢講唔想跟餐，亦唔會全部景點 都入去，佢就轉頭先再處理我。其實我想餐餐都唔跟佢食，不過，諗到一去到法語區，自己會變啞巴，同埋我會食幾餐麵包，實在應該俾番餐好嘅自己食，所以決定 跟佢食一餐dinner，另外景點只會去國家文明博物館同遊千島湖。收費CAD$65。
前往第一景點需時，導遊邊播放Mr Bean，邊著我哋休息。估唔到呢套被國際台播到爛嘅片仍有捧場客，啲人笑到嘈住我瞓……
當旅遊巴駛入Kingston時，導遊開始介紹呢個city，車子仲經過加拿大第一任總理麥當勞先生嘅故居，不過，我哋只可以喺車上睇，唔可以落車……
然後，到達以前嘅火車站後，我哋先可以落車影吓相。火車站對面係舊city hall，冇得入場參觀，只可以繞到佢後面去一去洗手間……
自 己一個行，其實都幾驚……原本以為唔跟團一齊食嘢，就無選擇可言，所以我買定麵包同罐頭，點知……原來餐廳隔離仲有其他選擇！有supermarket、 有Subway等等，我見都有情侶唔跟團一齊食，去咗Subway開餐。Subway啲嘢食都唔算貴，最平CAD$3、$4就有個sandwich喇！
行完supermarket同租碟舖，悶悶哋，決定自己行遠少少。離開停車場，過馬路到對面，沿住個湖向前行，細膽嘅我其實一步一驚心！感覺後面有人迫近，回頭一望，原來係個黑人跑緊步，我急步向前，直至行近有人睇到我嘅地方先放慢腳步，身處異地，危機意識都係強啲好！
行 近湖邊，呢度影吓，嗰到影吓，成個人開心哂！見到有好多雀仔喺草地覓食，突然記起自己都有麵包，於是喺背囊拎出麵包，扯下一小塊，再放好麵包，拉好背囊拉 錬，小心翼翼咁行去雀仔群，然後用力一拋，拋出部分麵包，當一、兩雀發現有嘢食向前啄時，其他雀仔亦不甘後人，越聚越多雀仔，我後退幾步後，又再拋出，然 後，食唔到第一批麵包嘅雀仔，改為食新呢一批，跟住……可怕嘅事情發生……有雀仔啄唔到麵包，卻聰明地發現我呢個來源，於是佢向我方向蹦跳過嚟，仲越迫越 近，我往後退，佢又再趨前，仲引到其他雀仔都係咁……我見佢哋由跳到飛幾步，發現個勢唔太對路，於是就拔足狂奔，好不容易先賣甩批為食雀！人餵雀我餵雀， 餵到落荒而逃，我都算「火羅」喇……離開湖邊前先睇到有牌叫人唔好餵雀……如果頭先睇到，我一定唔會咁做架！
番上車，打開噚晚亞頭媽咪俾我嘅一袋零食，有糖有我之前食過讚好嘅脆脆，仲有一支白花油！好感動~~其實我只係佢女兒嘅一個同事……
(繞到建築物後面，可以望到對岸嘅國家文明博物館！)
一 個人旅行有樣唔太好嘅嘢，就係只可以影景，好難幫自己影相……雖然同團都有三位男士係自己一個人，佢哋又真係會叫人幫手揸機，但我唔會主動叫人幫。不過， 通常我幫完佢哋，佢哋都會幫番我(但有啲情侶好唔識do，叫完妳幫手就走咗去！)，只係……影唔到我想要嘅嘢……都係拾爺最好，最知我心意！有時我好唔明 究竟係人哋對影相冇要求，定係反正唔係自己嘅，所以咁求其，影咁大塊地做咩﹖可唔可以影多啲我想要嘅建築物﹖！
離開國會山，旅遊巴駛往首都另一部份 — 荷爾市，我哋先進入國家文明博物館參觀。
導遊先帶我哋由basement入內，由staff先喺我哋手上蓋章，然後每人拎一份地圖，就跟住導遊上ground floor參觀。
(我隻dry爆嘅手曝光添！我有晚晚搽hand cream架！但呢到啲天氣真係dry到呢……)
導遊俾我哋選擇可以先跟隨佢隨意走走，佢會略作介紹，然後再俾時間我哋自由參觀，又或者一開始就自己周圍行都得。我同大部份團友都選擇前者！反正咩都唔識，聽吓人講都好嘅！
Ground floor主要講吓有關印第安人嘅歷史。
(呢個雕塑入面，唔同嘅人物/ 動物代表唔同嘅嘢，但我已經唔記佢哋代表啲乜lu……)
係咁易行完第一層，途經主要為兒童樂園嘅第二層，但我哋冇行到。
第三層主要講述加拿大百多年歷史，導遊話走進第三層就好似走進一個時光隧道一樣！
用半個鐘頭時間去睇、影同行第三層，之後就衝番落去ground floor，為的就係要影吓博物館個外殼！呢個係導遊極力推介嘅！搭電梯落去時，抓緊時間影低賣飛嘅counter上蓋！呢幕係記錄古時嘅加國人用我都唔記得係鯨魚定鯊魚定海豚骨照明！
剩番三個字時間，衝出博物館，先到後面影番對岸嘅國會山！
之後再影博物館正面，導遊話一定要影，因為好多人話博物館嘅正面似……
人樣喎！
離開博物館，我哋去到皇家鑄幣廠！不過，我冇俾錢參加，因為對呢啲地方冇興趣，CAD$6都嫌多！本來我係要落車呆等嘅，但因為落雨關係，導遊就叫我留喺車上等喇。我趁呢個時候食吓麵包。時間係下午四點幾，我而家先食第一餐，不過……都只係一塊麵包。
團友參觀完畢番嚟，我隔離位同我講，我唔去係明智之舉，因為今日錢幣廠好多人都冇番工，Good Friday之後仲有假，所以入到去都冇咩嘢睇喎。
之後，旅遊巴就駛去加國第二大城市 — Montreal，今晚我哋會喺嗰到留宿。導遊呢個時候同我哋講我哋會分別住喺兩間酒店，呢個時候我先知原來有啲人報團時有得揀酒店住，但我報時，完全冇人同我講過……當我知道我自己同導遊住同一酒店時，我就知道我報團個價應該係最平嗰隻！雖然，我都想住Sheraton，但……我更想用少啲錢，哈！同導遊住一樣嘅酒店好處係可以搵到佢，唔駛打電話！唔好處就係遲過人番酒店休息，但第二朝又要早過人起身……不過，只差15分鐘就算啦！
導遊話酒店門匙有時short short哋，真係開唔到門，就要落lobby換，估唔到我係唯一中招架……拖住行李論論盡盡，再用超唔得嘅英文同人講，最後換嚟兩張處理過嘅門匙卡，結果都係一張work一張唔work囉！
(酒店大堂，都幾乾淨整潔嘅！)
終於入到房間，感動！一個人住雙人房真係好嘥……同埋好貴！如果有人share，我呢個trip就平好多喇！不過，自己一個人又有好處嘅，冇人同我爭浴室！
快快放低行李，檢查房間嘅供水設施同熱水系統後，我就孭個袋仔，以輕便裝束到外走走。
頭 先架車轉入酒店前，導遊指過一個教堂，話係仿St Peter’s Church嘅，雖然真係正嘅St Peter’s Church我已經去過，但嚟到呢到，又冇特別嘢做，又唔駛用錢，去影吓相都無仿啫！雖然時間已經係晚上七點半，但個天仲好光，所以自己一個人行都唔算好 驚！
影完教堂，我行咗一陣酒店附近嘅大街，嗰到仲有啲商店未閂，不過大部份都係餐廳。我見到部份團友喺到嘆緊晚餐呢！由於天色開始昏暗，一個女子走在街上，雖然我唔係十分靚女，但都怕有危險，所以都係快快番酒店算喇！
番到酒店，終於可以開餐！是晚晚餐﹕
個橙都係亞頭屋企人要我帶架！我拎咗兩個，今晚同聽晚都有飯後果！一個人坐喺酒店食呢啲嘢都覺得自己好慘……鬼叫自己之前駛得太盡咩﹖！其實，呢啲嘢食又唔算差，慘，係因為得番自己一個人……如果呢個時候，拾爺喺身邊陪我一齊食，就算食齋包，我都會好開心！
起身後，一直喺亞頭家中hea，因為要等夠鐘先有早餐食……開 facebook收到拾爺send俾我嘅message！拾爺本身冇facebook account架，因為我講過自己會喺facebook update嘢，佢有facebook嘅話，會更容易知道我啲嘢。唔駛吓吓等電話。想唔到拾爺為我呢句說話，走去開facebook，仲send message俾我，感動~~
今日亞頭帶我去食越南粉……嚟到加國食越南嘢……仲要係當早餐食……我都真係忍唔住要問亞頭點解會作此安排……佢覺得完全冇問題，成日以加國係multi-national country嚟應酬我……
坐低一睇餐牌，嚇死！又係幾蚊加紙一碗嘢，呢啲價錢喺香港可以食dinner添喇……最後，我哋各自叫咗一碗生牛肉湯河！索價CAD$8，碗粉其實好普通……呢個早餐都真係好貴！
食緊早餐時，亞頭個friend「皇兒」打嚟，呢個長居加國嘅香港人，已經完全融入當地，瞓到十一點幾先起身……「皇兒」住喺uptown，今日會落嚟 downtown搵頁亞頭食飯，亞頭因為應承拾爺要照顧我，所以要帶埋我去同朋友聚舊。點知，原來佢哋只約咗今日見面，冇約實時間……所以，當亞頭得知佢 呢個friend剛剛先起身，就話冇兩點佢個friend都未嚟到……
(味千拉麵開到嚟加國！)
番到亞頭家，佢父母知道「皇兒」有排都未落到嚟，就叫我哋去買牛奶，我亦順便睇吓有咩嘢食可以買定，聽日跟團時，唔跟大伙食飯，自己都有嘢落肚。
去到Shoppers，亞頭就去拎奶，我就睇吓有咩買。超市啲嘢都唔算平，呢到嘅物價指數真係好高！最後，我買咗一條方包，減價後CAD$1.99，兩罐tuna(各CAD$1.89)同一罐腸仔罐頭(CAD$2.29)，豪氣咗咁多日，呢三日行程，我都要慳慳慳！呢到夠我三日早餐，甚至係lunch都可以唔跟導遊食架喇！
番到亞頭家，繼續呆等……亞頭搵摷番佢啲陳年卡拉ok碟出嚟播俾我聽。嘩，佢細個都幾富貴，幾百蚊嘅碟佢都買唔少！屋企仲有卡拉ok機！而家都絕哂種囉！聽番劉華、吳倩蓮(有幾多記得/知道佢唱過歌呢﹖)啲歌，睇番佢哋以前個look，真係好好笑。
呆等到點幾兩點，亞頭決定同我出去行住等佢個friend。行緊街時，亞頭終於收到「皇兒」到達downtown嘅來電通知，我哋相約某個地方meet up，可惜……亞頭搵緊都搵唔到「皇兒」所講嘅位置……好彩最後「皇兒」識嚟搵我哋。亞頭一見「皇兒」，成個人唔同哂，表現雀躍！咁又係，「皇兒」係佢舊同學，大家係平輩，但佢係我上司，就算我哋有時玩得幾癲都好，某啲位佢點都要保持讓我敬重嘅一面。
(行去會合「皇兒」時途經嘅體育館。)
(是日天陰……)
(雖然我冇興趣上呢個Toronto地標，但路過門口點都要影番張相，證明自己曾經到此門口一遊！)
「皇兒」本想同我哋去某間餐廳食嘢，但去到先發現是日休息……(星期日嘛……)，於是我哋求其搵間cafe坐低就算。揀咗Second Cup。亞頭話「皇兒」遲大到，所以要佢請，其實亞頭都係講吓笑，但「皇兒」覺得冇所謂，所以益咗我呢個外人！
(嚟到楓葉國，當然要試試呢到嘅Maple tea啦！)
(以上三張相攝於多倫多一間歷史悠久但我忘卻名字嘅酒店，但入面真係好grand！)
(洗手間嘅活動shelf，俾如廁人仕放嘢！)
(原來呢到都可以租單車踩架！)
行咗個幾鐘，終於到達目的地！原來我哋係去The Keg！我奇怪呢間明明係連鎖餐廳，之前仲經過過其中一間添，點解我哋唔去其他，要千里迢迢，食咁耐北風嚟呢﹖！
呢間分店由mansion改建而成，內裡裝修都同其他分店唔一樣，不過價錢，卻係一樣架！其 實「皇兒」最初係想帶我同亞頭去一樣好特別嘅餐廳食dinner，但因為間餐廳真係太特別喇，我同亞頭都唔想去試……所以先改嚟呢到。間餐廳點特別﹖就係 全店都好黑，黑到好似無記個遊戲節目「五覺大戰」咁，伸手不見五指，我哋入到去，只能像盲人一樣，靠waiters帶位，聽人講有咩食，點菜後至上菜都係 盲摸摸咁食。我實在唔想連自己食咩都睇唔到就放落口，亞頭咁揀飲摘食就更加唔想去，所以「皇兒」就改為揀咗呢間餐廳喇！
我哋三個睇完menu後，決定叫一個starter同兩份main。
嘢飲未到，我先去洗手間。(係，又去……)洗手間喺二樓，好靚！所以，我第二次再去時，帶埋相機去影相﹕
(呢個係上一層樓梯後，俾人休息嘅一角，好靚！)
講完餐廳環境，到嘢食喇！
Waitress先上麵包，普通！
之後上starter！
Starter我哋要咗個Crab Cake (CAD$12.95)，Crab Cake上枱時唔算好熱，但就暖暖哋可以即刻食。雖然唔算係上佳之品，但都食到啖啖蟹肉，收呢個價，俾番咁上下料，算係良心之作！
跟sirloins個main嘅salad都同一時間上埋！
個菜唔算好新鮮，不過都未至於難食，加埋toppings上去食，口感尚算豐富。
之後，就兩個main一齊上！
(Prime ribs，又係一般，有啲乾……)
兩個扒都各收廿幾蚊加紙，一啲都唔平，但水準真係好一般，比起前晚喺Waterfall食到嘅，相差得遠……當然後者收費會更高，但其實都唔算貴好多，與求嘥廿幾蚊喺到食，我會寧願俾多少少去食好啲嘅！當然，今晚喺到食我都食得好開心，因為個環境都值回不少票價！
雖然我兩位同伴都食唔哂個main，但佢哋仍然要叫甜品……女人，就係嗌飽都仲要食dessert架喇！
我哋要咗個Sweet Mints (CAD$6.95)，入面有三樣嘢﹕
Fudge Brownie ~ 略甜，我比較欣賞隔離球雪糕！
Passion Brulee ~ 都係略甜，加拿大人真係嗜甜！
Butter Tart ~ 我接受唔到呢隻味，唔識形容，只覺得怪！><
呢餐又係「皇兒」請客，佢仲話﹕好平之嘛，食得幾多錢呀﹖！嘩，好豪氣！對我嚟講，呢餐一啲都唔平！食人餐咁貴嘅，我好唔好意思……佢請亞頭就話係因為佢每次番香港，我亞頭都請佢食飯啫，但我呢﹖我哋今日先識架咋……
離開餐廳，天仲好光……想睇吓夜晚間大宅餐廳開哂燈照住係咩樣都唔得添……聽「皇兒」講，都幾靚架！我哋三人一齊行去搭車，我又影吓沿路風光！
先搭subway再轉巴士。
今晚早啲瞓，聽朝六點出門口，展開一人跟團旅行喇！好緊張！
是 晚打俾拾爺同佢講聽日要去加東旅行，可能收唔到電話，未必能夠打俾佢。拾爺問我係咪亞頭一家都去……我唔想講大話，唯有坦白只有自己一個去……(本來仲想 先斬後湊，去完番嚟先同佢講……)拾爺冇鬧我，只著我事事小心。幾驚佢叫我撻訂都唔准上車呀！講嘢俾拾爺知，成個人安落哂！我之前幾日其實都好內疚，我都 係唔慣呃拾爺架喇……
朝早六點幾時，我同亞頭都醒咗，唔太想起身，兩個人喺張床到傾計。傾到咁上下先起身梳洗，再落樓食早餐。
落到去，早餐區人山人海！好彩亞頭屋企人一早落咗嚟食早餐，我哋先不至於要等位。呢間酒店嘅早餐唔算豐富，但又未至於慘到冇啖好食。如果要同去歐洲時嘅酒店比，Paris同Leiden 嗰兩間嘅breakfast buffet豐富好多！！！因為唔知今日行程係點，回程又要搭好耐車，所以我呢餐食得好飽！食咗蛋、兩、三條腸仔、亞Da幫我整嘅夾餅、yoghurt同 埋生果。Yoghurt食咗都有兩、三杯，當初嚟到，諗住yoghurt會好平，好似歐洲咁，可以大桶大桶咁食，點知都唔係嘅……所以，今次難得有任食 嘅，我仲唔食番夠本﹖！
食飽，番上房執行李，又陪亞拔玩多次彈床後，就check out喇！我哋先載亞頭亞嗲同媽咪去casino，我又係同兩個小朋友同車，亞拔又不斷問問題，問到佢亞嗲同家姐都忍唔住話佢煩。然後，亞Da話要去 Marineland，亞拔又跟住佢家姐講……兩個小魔怪不斷講﹕我要去Marineland！我要去Marineland！我要去Marineland！如果呢兩個小朋友係我嘅，而佢哋又日日咁轟炸我，我諗我會癲！
放低兩位長老後，亞頭家姐同姐夫開車駛近Niagara Falls嘅觀賞地點，但因為沿路冇位泊車，我只能遠望……好彩，佢哋再兜番轉頭，搵到個偷雞位俾我落車。亞頭亦跟住落車幫我影吓相。為免亞頭家姐同姐夫會被人抄牌，我好快咁望兩眼就上番車喇，反正呢個點都唔太近個Falls。然後，架車再行前啲，亞頭家姐同姐夫又再一次偷雞俾我落車，今次真係可以近距離感受個Falls喇！亞頭同亞Da都有落車陪我。雖然，我都只係隔住個欄杆去觀賞個Falls，未去到坐船經過佢，但已經好感受到佢個氣勢，同大自然嘅力量！未行到去欄 杆邊，已經成身濕哂，啲水氣勁到有人要買雨褸去擋！望住一個又一個瀑布，嗰種震撼恕我冇足夠墨水去形容。我覺得去得Toronto，可以唔上CN Tower，但唔可以唔嚟睇呢個Falls。(個人一向較喜愛大自然景色，對人造景點感覺麻麻……)真係好想拾爺喺我身邊，同我一齊分享呢一刻！
(小女子攝影技術太差，未能拍攝瀑布美景……近距離觀賞靚好多！另外，大家睇相都知當時水氣有幾大呢﹖！)
睇完個Falls，影夠相後，我哋就喺番落車點等亞頭家姐同姐夫兜完圈後嚟接我哋。之後，佢哋就車我去Micheal’s！！！超興奮！終於可以去呢個手作王國朝聖！
其實之前亞頭都幫我上網check過Micheal’s嘅位置，但佢都位處得幾偏僻……好難搭公車去到……好彩，佢家姐再幫我哋check時，發現呢頭有間，於是喺酒店print好地圖，就車我去喇！架車行緊去Micheal’s，電台播緊多倫多十大懸案 — 張東岳綁架案。案件以廣播劇形式表達，警察正向受害女童父母嘅租客問話。問問吓，開始懷疑租客個男性朋友，聽到最緊張時，到站，亞頭姐夫停車熄匙……好彩佢都話我知嗰個男性朋友 — 陳敏就係兇手，佢仲只為咗加紙兩萬蚊去殺人……
懷著興奮嘅心情步入Micheal’s， 呢到真係好大！好多手作工具賣！！！可惜……啲嘢好貴！仲貴過我喺香港上網連俾運費咁買番嚟！好多嘢想買，但好多嘢都買唔落手……估唔到我抱咁大希望嚟， 會係咁失望地走……不過，我都唔係完全冇買到嘢嘅，正價嘅買唔落手，我唯有向減價貨埋手！買咗trimmer、crop a die、stickers、charms、ink pads、block同埋閃粉。埋單時睇到過兩日嚟買嘢，連同網上download嘅coupon有折！！！可惜，所有嘅Micheal’s都咁隔涉，我冇可能再嚟架喇！所以，明知呢刻買會貴啲，都冇辦法……平過喺香港買就算喇！不過，最唔抵係，有教師證都有九折！但我冇帶嚟加拿大……
離開Micheal’s， 我哋又去多次outlet！我同亞頭又入去Coach！今日早咗，人都少啲，好快排到。我想再買噚日個銀包，於是好努力咁搵，真係俾我搵到。買多兩個，一 個自用，呢一個可以俾奶奶揀要銀包定手袋！再逛吓，見啲太陽眼鏡幾型，又忍唔住要咗一副。亞頭將噚日三揀二後放棄咗嘅袋重新攞上手去俾錢。哈哈，佢自己都 話都唔知點解噚日要揀餐死喇！
離開Coach，亞頭家姐同姐夫就去食嘢，我哋兩個就去另一個戰場血拼！入咗Coach嘅男仕部！噚日嚟得 太匆忙，都唔知有另一間Coach賣男仔嘢。喺入面行咗一圈，俾我見到一個幾唔錯嘅袋，可以送俾拾爺！望吓個價錢，完全可以接受！開心到死！真係開心過自 己買到嘢！亞頭本來係陪我買嘢架，但佢又突然見到條令佢傾心嘅黑色頸巾，於是，佢急急搵家姐簽卡(幫佢家姐儲分！)，我哋兩個購物狂又買多一袋走喇！
之 後行埋Guess，但冇買嘢，我哋就去咗join佢姐夫同埋亞Da&亞拔。亞頭家姐同亞頭去接佢哋父母，我哋就喺food court等佢哋。等緊亞頭佢哋番嚟時，陪兩位小朋友玩。陪亞Da玩過三關，又陪亞拔玩車車，之後推吓亞拔架兒童車，氹到佢勁開心。然後，亞Da想去洗手 間，亞頭姐夫拜託我幫手，呢個當然冇問題啦！但亞拔知道我哋要去洗手間後，竟然又話要去……呢個就好大問題喇！佢得兩歲，唔識自己去，但我更加唔識幫佢 去……
等到亞頭家姐嚟到接手，我先上車。原來亞拔已經「賴」濕褲子……回程時，兩個小朋友又要同我同車，但大嗰個要媽媽揸，細嗰個又話要爸爸揸車……其實都唔係第一次架喇！最後，因為車嘅型號問題，由亞頭家姐開車。
出 車後，亞拔又開始狂姨姨我，問我嘢。但問問吓，佢瞓著咗……然後，到我瞓著埋……醒番時，原來亞Da都瞓緊覺。亞頭家姐叫我幫手打電話俾亞頭，睇吓佢哋位 置喺邊。收線後，佢同我講，頭先亞頭佢哋打過幾次嚟，但因為我哋瞓哂覺，冇人幫到佢聽電話……原來加國因為啲人揸車時成日做其他嘢(有人試過畫眼線添 呀！)，所以立例連電話都唔俾講！(應該話冇用hand free就唔講得！)因為我緊接住亞拔瞓咗，之後連亞Da都瞓埋，所以頭先miss咗亞頭佢哋好多個call喇！估唔到平時都算醒瞓嘅我，會攰到連電話響 都聽唔到……
番到亞頭喺downtown的家，我哋放好嘢後，就去喜來堡食dinner。去番第一晚嗰間酒樓開餐，今餐亞頭亞爹請，因為佢喺賭場贏咗錢呀！佢好開心，用CAD$0.25贏CAD$90。所以呢餐食咗幾多錢我就唔知喇……只知道兩個小朋友好鍾意食炒麵，亞Da一個人食咗六碗！
食完飯，亞頭帶我兜圈睇CN Tower個夜景，佢話費時一陣上去到，兩個小朋友唔捨得我，有排搞喎。
今日同亞頭一家去Niagra Falls，好興奮！
噚晚十點幾瞓，朝早又係五點幾醒咗，喺張床到典咗一個鐘到又再瞓番。
八點半起身，亞頭今日唔跟父母飲早茶，佢話要帶我去食港式早餐！其實……嚟到加拿大，我想食西餐多啲。噚日陪佢聚天倫，飲早茶就話冇相干，但今日只得我倆，點解我要搭十幾個鐘飛機嚟食香港周圍都有嘅嘢﹖！真係俾亞頭玩死！
九點二出發去食早餐，入到其中一間播緊啲out到爆嘅陳慧琳陳年舊歌嘅茶餐廳，叫咗兩個早餐。我要煙肉雙蛋飲檸茶，亞頭就要腸仔雙蛋加叉燒通粉，飲檸水。呢到飲杯華田都要加CAD$0.5，好貴！埋單CAD$10，喺香港可以食lunch喇！
(睇相就知啲煙肉唔好食啦！真係好掛住香港平得多嘅早餐呀！)
呢 個早餐都食得好急趕！因為亞頭亞嗲叫我哋要九點九番到屋企，隨時出發！(等亞頭家姐同姐夫揸車嚟接我哋！)其實，亞頭好清楚佢家姐唔會咁早嚟，一嚟佢姐夫 不嬲係慢板人，二嚟佢姐夫噚日開始病咗，所以佢家姐一早話會遲啲出發！奈何亞頭亞嗲係心急人仕，預乜都要預早啲，為免佢奪命追魂call爆我哋機，我哋都 盡趕番去。
番到屋企，十點鐘，但亞頭父母都未番嚟……當佢亞嗲番到嚟時，就同我哋講唔好意思。之後，就喺到呆等……等亞頭嘅家姐、姐夫嚟 車我哋。等到咁上下，亞頭打俾佢家姐，原來佢哋塞車中……今日係Good Friday，佢哋有long weekend，所以好多人都揸車去玩，交通大擠塞！等到十二點幾一點，終於等到我哋嘅「柴可夫」喇！好嘢！可以出發！
我同亞頭坐姐夫 車，同車仲有亞頭嘅姨甥女亞Da。亞Da今年六歲，亞頭初初介紹我哋認識時，叫佢嗌我做米姨姨(我真係唔多想被人叫姨姨囉！我而家行出街，啲媽媽們教嘅或 者小朋友自己，都係叫我姐姐架咋！我唔理係佢哋有善心，定係我個樣都仲呃到人，我可是好enjoy被叫姐姐的啊！)，佢仲表現得好怕醜。但一程車嘅時間過 後，佢已經好黐我！呢位喺加國長大嘅小朋友，英文流利到不得了，我呢啲英文有限公司，加上成日唔聽人講嘢嘅性格，有時真係唔明佢講乜……好彩，佢聽得明中 文，亦會講，叫做就吓我啦，哈哈。
搭咗個幾兩個鐘車，終於到達Niagara喇！我哋先去酒店settle down。酒店唔喺Niagara downtown，而係喺火車站附近。原來搭火車都嚟到嘅，咁第時有機會再同拾爺嚟，我都可以帶佢嚟呢到喇！
我哋住嘅酒店叫Hampton Inn，係Hilton旗下較平嘅選擇。本來亞頭家姐想book Hilton架！但佢姐夫發現Hilton唔包早餐、冇得上網又唔包parking，仲要每間房未計稅已經要CAD$300，相反，呢到乜都包之餘，每間房未計稅都係CAD$99，我哋當然轉軑啦！
亞頭媽咪落車後唔舒服，頭暈作嘔，懷疑係朝早飲茶時曳曳，食咗豬紅，搞到腸胃出現問題！我哋一干人喺lobby幫佢搽油、按肚，希望佢會舒服啲。亞頭叫我哋先帶啲小朋友(亞Da有個兩歲嘅細佬，叫亞拔，長有一對兜風耳，非常可愛！)上房，佢同佢家姐留喺lobby照顧伯母。
拎行李上房，亂分房嘅情況下，我同亞頭間房竟然可以通去亞頭家姐佢哋間房。呢到每間房個房牌都有張相架！張張都唔一樣架！
入房，放低行李後，指定動作 — 影相！
之後，亞頭同佢家姐陪埋伯母上嚟喇。佢哋覺得相連房安排世伯伯母同亞頭家姐姐夫一家好啲，所以我要搬房去喇！然後……就係喺房到呆等，無無聊聊，影吓窗外風景﹕
等到三點半到，亞頭番嚟話可以出去喇。佢不斷同我講唔好意思，其實係我黐佢哋嚟玩，我咁打搞都未講唔好意思，佢就調番轉咁同我講，搞到我真係唔好意思……
出發前，亞頭家姐喺我哋聽日食早餐嘅地方，沖朱古力飲。我雖然都想飲，但又怕一陣搵唔到洗手間(我個人比較直腸直肚！)，所以有得睇冇得飲……
出 車喇！今次亞Da主動要同我同車！我哋一齊坐亞頭姐夫車，亞頭就跟佢家姐車。車子駛離酒店後，行咗一陣就入到Niagara downtown喇，呢到好熱鬧，好多shops，好多tourists，我好想落車行番一圈呢！不過，架車冇停低嘅意慾，原本以為會先去Niagara Falls架，因為亞頭話過佢家姐想我日、夜景都睇到，點知原來我哋係先去outlet呀！
一 落車，亞頭同我就做先頭部隊，去排隊先！亞頭家姐同姐夫就泊好車，再帶埋兩個小朋友嚟。亞頭家姐話出面又要排，俾錢時又要排，所以一陣入到去，佢會先同我 哋排俾錢條隊，叫我哋慢慢揀喎。等咗幾個字，終於入到去喇！不過……入面啲嘢唔太啱我……想幫拾爺搵袋，但呢到冇男裝……行咗一圈，都冇嘢揀得落手……反 而亞頭就一袋二袋！我問佢點解睇中咁多，佢竟然話手上嘅嘢冇樣啱，只係求其拎啲嘢上手……咁都得﹖！
再細心行一圈，終於搵到一個漆皮紅色 袋，價錢ok，個款ok，可以用嚟送俾奶奶喇！再搵吓，見到一個漆皮紫色長銀包都唔錯，價錢好相宜添！媽媽用開長銀包，呢個應該幾啱使！之後，見到人拎住 個黑色暗花logo袋，好似幾實用，個款都唔係好女性化啫，唔知拾爺用唔用呢﹖於是，等到有人放低，又拿上手！
行夠，就去搵亞頭。原來佢 已經同佢家姐閃埋一邊，將所有攞上手嘅嘢攤哂出嚟慢慢揀……再望望四周，原來呢到啲人全部都係咁樣買嘢架！噢，我呢種真係睇啱先拎嘅，輸人九條街喇……唔 怪得執唔到好嘢啦！亞頭揀緊時，我見到佢姐夫百無聊賴，感到非常抱歉。人哋真係特登車我哋入嚟，陪我哋買嘢……
亞頭揀好袋後(佢買咗兩個俾自己，好豪！相反，我買嘅都唔係俾自己……)，我哋就去排隊喇。就到我時，見到cashier有啲鎖匙扣都幾靚，掙扎緊買唔買時，亞頭又已經拎咗一個去俾錢喇。於是，碌完卡買嗰三個袋/銀包後，我又要多兩個鎖匙扣，今次俾cash。
離開Coach，兩個小朋友要去洗手間，亞頭同佢家姓姐夫就齊齊搵洗手間，我想入Tommy Hilfiger，亞頭叫我自己行住先，一陣再嚟join我。行入Tommy Hilfiger，第一時間唔係去女裝，而係去睇polo shirt，想買件俾拾爺！但係……得淨色……拾爺對衣著一向講究，我怕買唔啱佢鍾意嘅色……睇睇價錢，都算抵，港紙二百五到。係Sogo thankful week時嘅大減價價錢！不過，我最後都冇買到，因為唔想買咗番去後，拾爺唔著……
行 去女裝睇嘢，睇中咗對鞋，圓頭平底，shocking pink同白橫條pattern，索價CAD$50(未計稅！)！有啲貴……雖然係名牌啫，著上鞋，人哋鬼知係名牌咩！(我好膚淺，覺得買得名牌，就要俾 人知係名牌，如果唔係買嚟做咩﹖！哈哈，不過，其實我本身好少買名牌，反正我都唔在乎他人嘅睇法，我就係窮！唔會扮有錢人！)行開咗，但又心思思，番轉頭 拎嚟試吓。反正平時一對Jelly Beans都要咁上下錢，難得嚟到呢到，買吓嘢俾自己都好呀！Coach已經冇我份，咁就獎自己一對Tommy Hilfiger嘅鞋啦！揀好鞋後，見到亞頭已經神不知鬼不覺地入咗嚟之餘，仲手執幾條裙去試。其中一條係鮮黃色，好sharp！我呢個愛黃之人，一見傾 心，即時問佢喺邊到拎。然後匆匆拎番條去試！亞頭一向不好呢類咁sharp嘅color，所以我都忍唔住問佢點解會揀，原來佢試個size，佢鍾情嘅係深 藍色。
排隊等試衫時，間舖嘅燈閃咗兩吓，然後就有廣播話舖頭六點要閂喇。望一望錶，五點九。到我試衫時，個sales又拍門提我哋試快 啲……我同亞頭最後都買咗呢條同款唔同色嘅裙(CAD$49)。而佢又額外買多條深藍色裙，我就多一對鞋。佢同佢家姐一早幫我排緊俾錢條隊，亞頭叫我可以 先出去，我就順便去個洗手間，然後，等齊人，開車番酒店接亞頭父母去食dinner喇！
回程時，我都係跟亞頭姐夫車，不過，今次同車除咗 亞Da，仲有亞拔。亞拔呢個小朋友好有趣，佢太鍾意我同佢玩「彈床」，於是，成程車不斷姨姨我，要我同佢再玩「彈床」。不斷嘅意思係，每隔一陣，佢就會叫 我，我應佢之後，佢就會話﹕一陣番去，我要玩彈床。我答佢好之後，佢又會再叫我，然後又重覆同一句說話。如是者，我都唔知聽咗幾多次，直至我哋番到酒店。
本來亞頭同我講原來去食西餐嘅計畫要改為食番中餐，因為佢媽咪唔舒服。失望總有小小，伯母身體緊要，食西餐呢啲嘢，去加國邊到食都一樣架啫！但當我哋齊人出發時，亞頭家姐話照原定計畫，佢話伯母話自己ok，同埋佢都想食西餐。總覺得伯母係因為我，先話去食西餐……
出發去餐廳，我又係坐亞頭姐夫車，同車仍然係亞Da與亞拔。由於餐廳係由亞頭家姐book嘅，就連亞頭姐夫都唔知去邊，所以我哋架車只能跟在後面。開車冇幾耐，亞拔呢個問題BB又出動喇！佢不停問亞頭姐夫去邊，亞頭姐夫答佢唔知，隔一陣，佢又再問過……然後，出到Niagara downtown後，亞頭姐夫開始唔耐煩，講咗句﹕你亞媽都唔知去邊！亞拔即時變身成為錄音機，不停問﹕媽去邊﹖亞頭姐夫答佢唔知，佢都仲係隔一陣問一次。然後，當架車喺啲Casino附近兜圈時，亞頭姐夫就話﹕佢仲乜嚟呢到呀﹖！亞拔即時答﹕媽話嚟呢到！然後又突然問﹕媽點解嚟呢到呀﹖激到亞頭姐夫都忍唔住話佢﹕你頭先又話媽話嚟呢到﹖！而家又問點解佢嚟呢到！聽到佢哋嘅對話真係好好笑！亞拔呢個小朋友都唔知被人話，仍然keep住呢兩句，直到架車駛入Hiton hotel。
(亞頭姐夫話呢個公仔所代表嘅人物將會喺Niagara Falls上面行鋼線喎！)
兩架車喺停車場入口停低，亞頭家姐打去餐廳問佢哋仲有冇hold枱俾我哋，原來亞頭家姐本來book咗六點半，但而家已經差唔多七點半喇！好彩，餐廳俾到枱我哋，咁我哋就即時落車，酒店啲人幫我哋泊車，我哋就直上33樓喇！
估唔到亞頭家姐book咗Hilton hotel嘅33樓餐廳 — The Watermark食飯，好豪呀！
高 級餐廳喺香港都叫有機會踏足吓，但呢一間真係唔同，因為……今晚可以對住個Niagara Falls食飯呀！！！原來呢個就係亞頭家姐話要俾我睇到夜晚嘅Falls嘅方法！睇到個Falls，真係興奮到好想大叫、跳起，甚至係打俾拾爺！好想同 拾爺分享呢到嘅一切一切！我發覺我真係唔可以再丟低拾爺一個跟人去旅行，因為所有開心同唔開心嘅嘢，我都最想同拾爺分享！(噢，亞爸亞媽對唔住喇，生女啦 生女啦，女生外向，哈哈！)
我哋人太多，所以冇得坐靠窗位……(嗰啲多數係二人枱。)不過，算啦！睇到個Falls已經令人好興奮架喇！
坐低後，大家就忙住睇menu點嘢食。我太興奮，冇咩心機去睇，反正樣樣都貴架啦，哈哈！初時以為大家share，點知佢哋prefer各叫各，咁我就搵埋亞頭一齊叫個二人餐算喇。
叫完餐後，捉咗亞Da陪我四圍影﹕
影完相，番去乖乖坐低食麵包﹕
(個牛油整到成個雪糕咁！)
個three course meal我揀咗﹕
1. Tomato Basil Consomme ~ 少辣，頗開胃，但唔特別……
2. Double Roasted Prime Rib ~ 因為之前排住去影相，求其揀咗個ribs，初初仲以為係spare ribs，點知原來係肉眼扒！好開心！嚟到加國，終於有機會食牛扒！呢個扒整得唔錯，當然未去到好juicy，但整得好食過歐洲啲餐廳，起碼佢唔怕「嚡」 啦！而且，佢份量十足！大食如我，勉強食哂個扒後，食唔哂啲配菜喇……
(餐廳環境昏暗，連部S90都抗衡唔到，呢張要開閃燈……)
3. White Chocolate Raspberry Mousse ~ 本身唔太好white chocolate，因為怕佢太甜……但呢個mousse好正，唔會過甜！配埋令人開胃嘅raspberry，真係食多個都仲得呀！
亞頭揀咗以下幾樣﹕
1. Classic Caesar Salad ~ 亞頭俾咗少少我食，都幾開胃！我鍾意食呢個多過飲自己個湯……
2. Grilled Chicken Supreme ~ 冇食到，因為自己份牛扒都已經大份到食唔哂，所以都唔貪食人哋嗰份喇！
(大家睇吓，啲露筍嘅size唔細架！)
3. Chocolate Caramel Cheesecake ~ 亞頭同咗佢亞嗲share，佢哋話呢個dessert都唔錯！
(我哋個個初時以為外層係張花紙，點知原來係朱古力嚟架！)
食飽飽，同亞Da一齊去洗手間。呢到果然係高級餐廳，就連洗手間都裝修得好企理！
就連水龍頭嘅出水方式，都以falls為題﹕
(亞Da對手！)
開開心心過咗一個晚上，亞頭媽咪問我開唔開心，我話好開心，佢聽到就笑哂話我係開心果，成日都笑。其實，係佢哋帶呢啲歡樂俾我架！我真係好多謝佢哋咁熱情嘅招呼！(唔好誤會，呢餐我自己出番錢架！)
回 程，兩個小朋友都話要同我同車，亞Da話要同我坐，但小朋友唔可以坐前排，所以佢都係同亞拔坐，我就同亞頭姐夫坐前排。回程路上，亞拔又發功！不斷問我﹕ 一陣番去，去妳到定我到﹖(佢又想玩彈床……)我不斷答佢﹕你番你嗰到，我番我嗰到。如是者，佢問咗N次，我答咗N次後，我講笑話要數吓佢問咗我幾多次， 亞Da聽到後真係幫我數，5次！(講緊係中途數起！)
番到酒店，亞頭因為頭先間餐廳嘅昏暗燈光，搞到好眼瞓。我讓佢沖涼先，自己就上吓網同埋影吓今日啲戰利品。
Eat, Play, Love 