每年halloween都會同拾爺去蘭桂芳，今年工作好忙，大家做嘢都做到好攰，真係有想放棄呢個傳統嘅念頭，但最後都係堅持去。堅持去唔係爛玩，而係我想keep住同拾爺之間嘅sweet活動，唔想因為大家一齊耐咗，就呢樣唔做嗰樣唔做，咁樣好易淡架嘛。
今年因為太攰，我哋早早去到，早早走，冇好似之前咁stay喺到影相，但都係企咗一陣，睇吓他人有咩得意打扮，唔知係咪今年太早到，見到嘅「打扮」都唔特別……反而企埋一邊睇嘢時，見證有人想打架，搞到要警察調停。
警察拉開嘈交嘅人後，勸交。
呢個小妹妹好得意，佢好似好愁咁。哈哈，可能唔鍾意我影佢。
全晚我覺得最正，係一個著婚紗，但拎住紅白藍(最衰唔係經典款……)袋嘅中年女人。當佢同其他人一齊影唔知邊個時，我好積極地影佢。
呢個女人真係好正！婚紗襯紅白藍，仲要拎住紮膠花。
離開時，見到有架房車停咗喺馬路邊，一睇架車嘅長度已經知入面坐咗個有錢佬，再望架車嘅texture，覺得好特別。然後，車入面嘅人落車出嚟，個款已經令我覺得佢串到震，忍唔住同拾爺講﹕駛唔駛咁串呀﹖！拾爺叫我望吓個車牌……
IRON MAN，車牌都串過人……
又到咗我哋同芽莊嘅「一期一會」之時！呢排工作辛苦，本想獎勵自己，叫夠四樣嘢，但因為心血來潮，想食樣貴少少，最後因為呢樣嘢貴，就cut咗其他，只係叫咗三樣﹕
濱海伴河內式燒肉 ($60)﹕一直好鍾意食呢到嘅濱海，但今次再食，發覺呢到嘅濱海退步咗好多！雖未至於難食，但真係唔好食……以前塊濱海係密密嘅米粉(﹖)織成，而家呢塊好疏，食落完全冇口感……而且仲好乾好硬……
越式蝦多士 ($56)﹕多士好脆，但面層嘅蝦唔好食……完全食唔出食蝦膠……白白浪費咗我哋一個食好嘢嘅quota……
椰青扣花腩肉 ($120)﹕仍然好好味！上次食時已經好鍾意，今次再食，學精咗，冇再叫撈檬，嗌咗個飯，用椰青汁嚟撈飯食。花腩肉面層又肥又淋，好好味，底層有軟骨，夠o趙勁！
埋單$273，雖然三個菜入面有兩個唔太得，但仍然大滿足！
好耐冇下廚，難得網上搵到我有興趣嘅食譜，週日來個廚樂無窮。
泡菜亞給
食譜來源：丁丁の生活物語
材料：
油揚一包 (原食譜﹕油豆腐6塊)
韓式泡菜一小樽 (原食譜﹕半碗)
粉絲兩札
墨魚膠一包 (原食譜﹕魚漿)
做法：
1. 粉絲用水浸軟，壢乾水份後切細，再拌入切細嘅韓式泡菜。
2. 油揚用刀切半 (我買嘅係三大塊一pack嘅油揚，所以切半，內裡已經空心。原食譜則將油豆腐對切開成三角形，然後用湯匙將裡面的豆腐挖出。)
3. 將拌入泡菜嘅粉絲塞入油揚內，用墨魚膠封住口。
已封口嘅亞給
4. 蒸約15分鐘，即成。
蒸熟後嘅亞給
拾爺想試試煎後嘅亞給，所以拎咗一半去煎。
食評﹕味道唔錯，略嫌粉絲乾咗少少。煎咗嘅亞給，味道有啲似腐皮卷……
改善建議﹕亞給封口前加入少許雞湯。
除咗亞給，其實仲煮咗韓式辣燉雞，但賣相一般……不過味道ok。
噚日上網無意中發現咗一道幾有趣嘅菜式，本來想今日煮俾拾爺食嘅，話哂我都好耐冇下廚喇，點知……拾爺唔俾……佢噚日喺Piago買咗餸，打算今晚煮西餐俾我食。我當然喜歡食拾爺煮嘅嘢啦，但我難得地手痕喎……拾爺又大賣關子，唔肯講俾我知今晚食乜……
噚晚太夜瞓，搞到今朝十一點先起身，好晏先食早餐，所以我哋亦好晏先食lunch。今日嘅lunch(其實可以叫tea，因為成三點半先食……)又係salad，但拾爺加多咗牛油果同開心果，仲烘咗塊麵包加入去，好味到呢！
四點幾出發去醫阮探爸爸，拾爺因為要改嘢同準備晚飯，所以冇與我同行。去到醫院，細妹已到，三父女閒聊一陣，向爸爸提及小王子噚晚晚飯嘅嘢，爸爸邊聽邊笑，乘機叫我生番個，話我奶奶恨，佢亦恨……細妹幫我打完場，話我身子差，叫爸爸寄望大妹幫佢做公公。
探完爸爸就番屋企，改咗陣嘢，拾爺亦煮好飯，謎底終於揭開，原來拾爺煮龍蝦！
個risotto湯底，拾爺係用龍蝦、蘑菇同魚乾去煮，味道一流！飯入面又有已拆嘅龍蝦肉，啱哂我呢個懶鬼！呢道菜，每一啖都充滿幸福！
探完爸爸後，一家人去咗九龍城開餐！爸爸之前讚過「江南美廚」啲嘢好食，話仲好食過「合江小鎮」，我同拾爺當然要睇吓係咪真係咁好啦！
餐廳環境唔錯，我哋九個大人加一個BB獲安排喺玻璃房內用餐，坐得幾舒服！只係……洗手間太少廁格……
唔記得影餐前小食，九個人，有三小碟前菜(每碟$10)，其中兩碟係花生，一碟係菜莆。我一向鍾意食菜莆，呢碟醃得唔錯，唔怕太鹹，我都食咗唔少，如果將其餘兩碟花生換埋做菜莆就好喇，嘻。
叫咗以下嘅嘢﹕
砂窩雲吞雞 ($108/半隻)﹕掛住同小王子玩，只記得影雞，唔記得影碗湯添……碗湯味道普通，飲唔到咩雞味，雲吞亦唔見得好滑……食過合江小鎮嘅雲吞，更覺其他地方做嘅只係一般水準……
花彫醉雞 ($50)﹕酒味頗重，但又唔會覺得好苦，算係唔錯，但食過翔龍嘅醉雞後，呢到又被比下去了……因為人家無論酒味定雞隻嘅嫩滑度都較佳。
雞絲粉皮 ($48)﹕味道ok，其實呢道菜好難整得難食。
鎮江肴肉 ($48)﹕一睇賣相已經扣哂分，啫喱部份完全唔得晶瑩剔透，食落感覺好實……
蒜泥白肉 ($48)﹕睇落去好似好多咁，其實下層鋪滿粉皮。至於味道，只屬普通。
南翔小籠包 ($28)﹕叫咗兩籠，味道一般，我那一件唔知點解一早已經被刺穿，所以冇乜湯汁可言……但只談餡肉，呢到絕對比唔上合江小鎮。其實，好多地方嘅小籠包都做得唔及合江小鎮。
擔擔麵 ($30)﹕叫咗一碗唔辣同一碗中辣，唔太食得辣嘅我，完全唔敢掂中辣嗰碗，只食唔辣。呢碗擔擔麵係我食過最難食嘅！首先，我唔知正宗擔擔麵應該係點，但我未食過咁粗嘅擔擔麵，我真係忍唔住要對嘅正宗式存疑。其次，啲麵煮得好鬼淋，淋到有啲過份，加上啲麵又粗，好似食緊一pat嘢落肚咁……就連個湯底都好一般，呢碗嘢收成$30，絕對唔值！
蒸銀絲卷 ($18)﹕叫俾小王子食嘅，我冇食過，不予置評喇。
上海粗炒 ($62)﹕冇食到，所以又係不予置評喇。
茄汁蝦仁鍋巴 (其實唔太記得個名，更加唔知價……)﹕鍋巴整得好脆，我細佬好鍾意食，我就因為個人口味，唔太喜歡佢炸到萬年油味都食到咁滯……至於個sauce，sorry，唔係我杯茶，我唔覺得好食……
樟茶鴨 ($98/半隻)﹕爸爸激讚嘅一道菜，的確呢到嘅樟茶鴨唔會好似其他餐廳咁整到乾哂柴，鴨肉juicy之餘，又唔會又淋又霉，有咬口得嚟又不會韌，口感一流！只係……作為樟茶鴨，佢嘅茶味卻嚴重不足！唔好提食落冇茶味，反正好多餐廳都係聞到食唔到，呢到就慘到連聞都唔太聞到茶味……嚴格嚟講，佢都唔太算係樟茶鴨喎！
雲腿扒津白 ($78)﹕Menu明明影咗八塊厚切雲腿，但上枱只有三小塊，仲要係薄切……味道就正常啦！
上海菜飯 ($20)﹕叫咗四碗，雖然多油到咩咁，但我都食哂成碗，冇辦法，我一向愛吃菜飯。
豆沙鍋餅 ($30)﹕我同拾爺都好唔buy佢個皮！又煎又炸後，唔脆之餘，仲要又厚又硬……
高力豆沙香蕉 ($32)﹕味道唔錯，好夠熱，又唔會太甜。
小心流沙包 ($24)﹕果然好流，但唔係流沙，係流水……睇相以為好足料，其實麵包皮好厚，咁都算，講明係流沙，但食落好水囉……唔夠「傑」，唔夠沙喎……><
埋單$1153，我同拾爺都唔明點解爸爸上次食完激讚，話呢到啲嘢食好過合江小鎮，論環境，論服務，論食物質素，論性價比，點都係後者勝。
P.S. 一去到餐廳，我已經嘈住要同小王子坐，因為我太耐冇見佢喇！聽佢哋講，小王子星期三晚表演過「飛吻」俾佢哋睇，仲要扭緊計時叫佢飛吻，佢會即刻唔扭，飛咗吻先，再繼續扭計，好好笑。但個衰仔今日唔飛吻囉……叫極都唔郁，係好後期先飛一次咁大把……我哋間房個ceiling有塊鏡，會睇到轉盤上嘅食物，我叫小王子向上望，佢見到啲嘢轉，好開心，手仔轉圈，把口就呼呼聲，想要話俾我哋知上面有嘢轉，因為佢唔識講嘢，所以只能夠呼，好鬼得意。
P.P.S. 小王子仍然好為食，我呢頭俾條粉皮佢揸喺手食，佢嗰頭就拍我隻手想再要……但明明佢手上嘅粉皮未食哂……
P.P.P.S. 小王子而家已經行得好穩陣喇！仲因為行得太穩，唔俾人抱……不過，行到攰時，就扭計要抱……食完飯後，哥哥叫我哋一齊行，睇吓小王子會唔會死跟，其實小王 子當時已經攰到唔想行，但見到自己爸爸越行越遠，唯有死跟，哥哥貪玩，越行越快，搞到個仔一路跟住行，一路喊……好殘忍，但好好笑，哈哈。
拾爺朝早要帶學生去賣旗，我八點半起身後，食完早餐，玩吓電腦、改吓嘢，十一點到就落會所做運動。先做step up機(其實我真係唔知部嘢叫咩名……)，半個鐘後，因為跑步機都有人用緊，就去踩單車，踩咗唔夠十分鐘，就有跑步機用，快快去跑番十五分鐘，跟住夠鐘要走人……
番屋企洗頭沖涼後，開始肚餓，打俾拾爺，本想叫佢買豬肉片番嚟，等我快快煮個kimchi鍋，但佢叫我等埋佢快嚟先……原來拾爺賣旗後，去咗Piago shopping，買咗兩大盒salad菜番嚟，yeah！Piago嘅salad菜好抵食，三十幾蚊一大盒，夠我哋兩個人食！相反，Market place同Taste由四十幾蚊賣到而家五十幾，貴到冇朋友！如果我屋企附近有間Piago就好喇，我可以salad菜當lunch或dinner架！
食飽飽，又再開行turbo改嘢，改一疊test，改咗我幾個鐘都未改完……班妹成績唔太得……
五點半到，出發去醫院探爸爸，佢今日精神好咗好多！腸炎情況受到控制，已經唔痛。但雙手之前插針吊鹽水都失敗，搞到非常腫脹，見到就戥佢辛苦……醫院仲曾經想幫爸爸插針喺頸部，但爸爸真係痛到受唔到，所以而家插緊喺腳……希望爸爸快快好番！爸爸話想做完手術後，成家人去台灣旅行。而家，我哋只希望佢身體狀況可以撐得住，唔需要延期做手術。
拾爺整損咗左手無名指，搞到嗰隻手指嘅骨位附近脹咗，每次都痛住咁帶戒指，極度困難咁除戒指，我叫佢唔好帶住，佢又唔想……今日同佢出街，佢又嘗試帶上(我倆一番屋企就除戒指，出門口前先帶架。)，可惜失敗……之後，佢竟然將戒指帶上尾指到！！！我即時喝住佢，佢連自己衰喺邊都唔知，仲話想睇吓其他手指係咪都大隻咗……我同佢講帶尾指係代表離婚，問佢係咪要同我離婚，佢先知我咁大反應嘅原因，即時除番隻戒指出嚟。唉……求、定、結、離，細細個就聽架啦！
同拾爺探完爸爸，就去搵食，上Openrice見到Dimpal Fusion & Pizza House嘅評分係110個笑臉對3個喊臉，見佢咁高評價，就決定去試吓。
去到餐廳門口，見到有唔少人等緊位，waitress打緊電話confirm人客嘅訂位，見到張list都幾長，餐廳似乎幾受歡迎。我同拾爺得兩個人，餐廳咁啱有位，就放我哋入去，以為自己好彩，原來揀著呢間餐廳開飯係不幸……
一入餐廳，見到所有位都好迫，餐廳用盡每一吋空間去擺位，完全唔理會客人坐得舒唔舒服！啲座位之密，係連waitress行入去落訂同上菜都有困難，明白小店要多做生意生存，但睇到menu上嘅嘢食價錢，我同拾爺都覺得店主只想賺到盡，對煮食毫無誠意。Menu內嘅菜式大都要接近一百蚊，兩個人嚟食，每人點一樣，都差唔多二百蚊埋單，以呢個價錢，我期望餐廳環境會好啲，唔需要裝修十分雅緻，但起碼要坐得舒服。我同拾爺都覺得，去大家樂食飯，仲舒服過呢到！最最離譜係，坐隔離嗰六個人被安排擠進一張四人枱，真心覺得餐廳好無良，錢是要賺到盡！因為呢個咁無良嘅安排，隔離個男人手踭長期進入我個進餐範圍……我係一個好怕同人有身體接觸嘅人，更加唔鍾意人家同我距離太近，個男人成日郁身郁勢咁同人傾偈，食嘢時手踭又撐開哂，佢嗰枱上菜時，更成個人傾側過嚟，我明白佢身不由己，所以都冇出聲，但我成日要避開佢，真係食得好辛苦……如果呢到收得平，啲嘢好好食，我都可以忍，但呢到係非一般嘅收費，一般嘅食物質素，同埋差劣嘅飲食環境，我真係接受唔到囉！
只係要咗兩樣嘢，唔想多花一分一毫喺呢間咁嘅餐廳到，更加唔想多坐一會。
Four seasons pizza ($99)﹕未至於難食，但絕對唔係好食！個餅底做得好差，唔脆，作為薄批，佢又唔薄，咬落去有啲食餅乾咁……
BBQ Babyback Ribs ($98/半份)﹕先講個ribs，做得唔韌，但未去到好淋，食落有少少嚡口，但最差係佢燒得太濃，面層有炭，食落有濃味……就連個薯角都係太濃，唔好食……
埋單$197，唔值！完全唔能夠理解佢得到咁多笑臉嘅原因……
一家人探完爸爸後，就去泰屋開餐。記得泰屋新開時，因為成日派coupon，幫襯會送多碟菜，我同拾爺都去過幾次。呢幾年都冇再去過，記得兩年前爸爸因為流鼻血入院，我哋幾兄弟姊妹探完爸爸想去呢到開餐，當時餐廳係Openrice嘅開飯熱點，坐滿哂人，仲有好多人等位，我哋因為冇book位，唯有改去第二到食，想唔到，兩年後嘅今天，我即日訂枱都book到，去到仲要有好多位剩……此情此景已經話到我知呢到嘅食物質素如何了。
叫咗以下嘅嘢﹕
冬蔭公鮮蝦湯 ($88/例)﹕怕辣嘅我都飲到，令到其他一眾吃得辣之人覺得佢唔夠正宗。雖然我難得地飲到，但我都嫌佢毫無鮮味可言……唔ok！><
印尼沙嗲 ($72/半打)﹕哥哥order嘅，豬同雞各要咗半打，先食豬肉，又乾又嚡，仲要冇嚟豬味，差到不得了！雞叫做好少少，因為唔嚡，但一樣係又乾又冇雞味……兩碟沙嗲都唔熱……以$12一串嘅價錢，可謂非常唔值！應該咁講，$1我都唔會買嚟食，差差差！
馬拉盞炒通菜 ($68)﹕我曾經好鍾意食呢到嘅馬拉盞炒通菜，但今日再食，完全食唔番當年嘅水準，令人極之失望！份量少，馬拉盞味唔夠，啲菜又唔得新鮮……
清邁鐵板蠔仔蛋 (七十幾蚊)﹕想唔到呢碟嘢係最夠份量同最好味……但其實清邁係咪真係有呢道菜﹖
泰式炸蝦餅 ($75/4件)﹕夠熱，味道ok，起碼冇其他嘢咁差。不過，蝦肉唔夠多……
原個菠蘿海鮮炒飯 ($88)﹕完全唔值$88，啲料又少，飯又爛……未去到難食，但絕對唔好食同唔抵食……
燒魷魚筒 (七十幾蚊)﹕味道一般。
黃咖哩牛筋腩 ($85)﹕極少牛筋，其實我唔見有添……份量好少，牛腩丁屎咁細……啲咖哩用嚟點蒜蓉包好鹹……後尾我哋再叫naan，我冇食，但有食嘅個個都讚點naan好食，所以，我哋叫完原味，再嚟多個洋蔥味嘅。
蒜蓉包 (唔知價……)﹕正常味道。
除咗naan，其實我哋都有叫飯，但唔知點解啲飯遲遲都上唔到……我哋前後催咗三次，最後，最遲order嘅naan都到，啲飯先送到……因為當時我個胃唔太舒服，所以冇為naan同啲飯影相，啲飯裝到好鬼核突，我都未見過有餐廳賣嘅飯核突得過佢，完全係倒人胃口……
埋單$929.6，呢間餐廳從此會消失喺我哋嘅開飯名單中。
小王子今日面試pre-nursery，可惜表現麻麻……聽嫂嫂講，去到見到好多BB，佢哋本來係11:45in嘅，但就一等再等，等到小王子瞓著咗，學校先叫佢個名……可憐小王子被叫醒後再接受一連串提問。小王子一向只愛吃同大叫，基本上乜都唔識……老師砌一次積木佢睇，拆散後叫佢再砌，佢唔識……老師叫佢飛吻，佢唔曉……老師叫佢去攬吓爸爸，佢發呆……老師叫佢去攬吓媽媽，佢又唔明……老師問佢蘋果同香蕉佢鍾意邊樣，佢求其拎咗香蕉(其實佢聽唔明，著得拎只因為食……)，可幸老師拎番隻蕉時，佢冇大喊大叫(平時喺佢手中拎走食物，佢一定喊！)。臨走時，佢總算識得同老師玩give five，只係叫佢give five to 爸爸同媽媽，佢又唔郁……
嫂嫂同哥哥都覺得小王子一定入唔到，不過，嫂嫂好樂觀，話入唔到就慳番四千。其實，小王子係眾多interview嘅BB中最細架，因為學校講明只收到八月尾出生嘅BB，但小王子係九月中先出世，咁佢細過其他BB，發展一定係慢啲架！大小王子半年嘅表姐仔都有得in，表姐仔乜都識哂呢。所以，小王子今年唔得，就等下年啦。
Eat, Play, Love 