該死的洋蔥

拾爺煮晚飯時，因為切好嘅洋蔥醃眼，於是就將兩個切好嘅洋蔥放出廳，點知呢兩個洋蔥功力深厚到，我喺書房油緊顏色都感受到，就奇怪點解雙眼突然唔舒服，想流眼水咁，仲以為自己今日邊改嘢邊煲劇，改完嘢仲油顏色係用眼過度，原來係嗰兩個洋蔥搞鬼！

諗住合上雙眼休息吓，點知對眼已被攻到又「乸」又痛，眼水不停流！呢頭抹乾眼淚，嗰頭眼睫毛入眼，插正眼角，點整都整唔出嚟……捽又捽唔出，吹又吹唔出，又唔跟住眼淚流出，為眼睛狂灌水都搞唔掂……最後都係用絕招，整濕毛巾，強行黏走，唉……

我的自大老公

拾爺 (唱)﹕你當我是傻瓜吧~~

我﹕你又真係有幾分傻氣嘅！

拾爺﹕我呢啲係英氣，唔係傻氣。

我﹕你真係唔知醜架喎！

拾爺﹕冇醜又點知呢﹖！

連狗都不如……

今日上班six堂，上上吓，窗外有隻狗喺山坡到狂吠 (教室同山坡距離好近，周不時睇到啲人喺到行山、晨運等等。)，由於隻狗越吠越大聲，越吠越起勁，我又唔記得帶咪，把聲開始被蓋過，而同學亦紛紛望向窗邊，有啲甚至過份到企起身去睇隻狗……山坡上，我見到狗主望到呢班應該專心上課嘅同學全部掛住望佢隻狗……當下而諗到人家一定覺得我校學生上課唔專心，佢哋嘅行為完全係影響校譽！我嘗試招番佢哋嘅靈魂番嚟，可惜不得要領，無奈下，唯有爆出﹕「我覺得我自己連狗都不如囉！妳哋個個望住隻狗都唔望我！」班妹即刻笑唔停，完全冇諗過安慰我……有啲仲想再睇狗，我再拋下一句﹕「邊個再望住隻狗，就出嚟同我扮狗！」總算用兇的去收復失地。