Kitchen 65

晏晝去咗伴郎屋企玩，甜點天后教三位男仕打台灣牌，我同杏仁、拾爺同埋伴郎女友打Wii。不過……隔離打牌嘅真係好好笑，甜點天后教打牌教到好激動，佢話辛苦過補課，仲大大聲提佢哋打台灣牌要好靜，佢哋當然靜唔到啦，睇佢哋打牌都笑料百出！

五點半，我同拾爺就走喇。出QE探爸爸，上去前買咗個壽包俾佢，估唔到佢真係食！開心！

探完爸爸，就去咗美麗華間Kitchen 65開餐！

叫咗個海南雞飯套餐，加咗$8要雞脾，同埋巴東牛肉，再加一碗油飯。前者就算已揀雞脾啲雞肉都仲唔夠淋，後者竟然用牛展！好奇怪……一餐平平無奇嘅dinner都食咗我哋成百七蚊，而且食完都唔覺飽，越嚟越覺得其實Spaghetti House真係唔算貴！

P.S. 隔離枱有家人都幾騎呢！首先，個老爺問人肉蟹係咩蟹，個waiter話用斯里蘭卡蟹，佢就叫人落少少黑椒去煮，但唔要辣！個waiter答佢黑椒都會有少 少辣架！跟住個仔就話改用咖哩。個waiter就同佢講呢度用馬拉咖哩，都係辣架！(呢間係馬拉菜餐廳嚟架！)到個新抱喇，佢問人啲炒蘿蔔糕會唔會好濕一 pat pat咁，waiter答佢蘿蔔糕係一粒粒嘅，佢就話怕會甜，waiter就話可以叫廚房唔好煮得咁甜。之後，佢又要個椒鹽豆腐，少油……Oh my god！Waiter呆一呆，同佢講﹕椒鹽豆腐係炸架喎小姐。嘩，我勁想笑出嚟！之後，上菜喇。個老爺又叫waiter，問佢自己有冇叫肉骨茶，叫人唔好 咁快上，十分鐘之後先好上喎。真心覺得，做呢家人生意真係好煩！

The Mistral

奶奶生日，一早已經喺報紙到睇中咗間意大利餐廳 — The Mistral，仲揚言五百蚊一位都唔係貴，我哋做兒媳嘅明知五百蚊一位落唔到樓，但面對講多兩句即黑面嘅奶奶又點敢拒絕﹖拾爺一早book咗位，奶奶聽 後雖然話其實都唔係太鍾意，只係無意見到，但我覺得如果去一間俾呢間收費平嘅，佢多少一定會唔鍾意，反正都係一年一次，豪一豪佢啦！

姑仔眼發炎嚟唔到，四人行變三人行。七點準時到達，餐廳只有一枱人，估唔到公眾假期都咁少客。後嚟坐耐咗都多番幾枱，但相比咁大間餐廳，人數仍然係少。

坐低後，waiter拎咗盤麵包嚟，每人面前放一碟點麵包用嘅醬，每碟有三樣嘢點，但我點嚟點去都係綠色醬，因為橄欖同蒜頭都唔係我杯茶！

啲grissini雖不至於好好食，但外脆之餘內又唔怕好似出面一般餐廳咁硬到可以扑頭，算係幾好架喇！不過，都係做唔到外脆內軟……要食正嘅grissini，可能真係如拾爺所講，要去Grissini至得！

是晚菜式，全由拾爺話事﹕

先嚟拾爺每到意大利餐廳必點嘅Mozzarella cheese，我成日覺得食呢樣唔駛去餐廳叫，自己去買都得啦，但拾爺喜歡，就由得佢啦！不過，我遲啲都會問哥哥間公司有冇得賣，有嘅話就買啲番嚟塞住拾爺個口，食到佢唔想再食，哈哈！

另一樣appetizer，有我鍾意食嘅ham，加waitress話係另一樣但拾爺話都係Mozzarella cheese嘅cheese。Well, 你問我嘅話，我都覺得佢哋冇咩分別，哈哈！

再叫咗個pizza，Openrice啲人話呢度嘅pizza出名，果然名不虛傳！Pizza薄得嚟夠脆，個蕃茄醬又夠開胃，加埋塊ham，簡直係perfect！唔會食到人覺得又滯又漏，就係呢塊pizza已經值得嚟食！

Pasta要咗以下兩樣(真係睇相都知佢份量少，佢哋上枱時，我哋三個都嚇呆咗呢！)﹕

1. Pappardelle燴野豬肉 — 個粉咬落去話彈又唔算好彈，我反面覺得好「麵粉」，坦白講，個口感唔係我杯茶。野豬肉嘛，我同奶奶都覺得似食牛肉多啲。

2. 千層麵 — 好食！雖然有少少鹹，但我好鍾意個sauce！而且佢焗到個麵好乾，食到啲乾哂水嘅肉粒時，反而覺得幾match。相比起Osteria個千層麵，我更愛呢一個！

雖然我哋三個已經又滯又飽，但奶奶生日，點都要有所表示！所以我同拾爺就叫咗個甜品，為嘅就係佢哋寫上Happy Birthday二字再加一支candle！

呢個就係waitress大力推介，餐廳嘅招牌dessert — La torta di cloccolato！甜到呢！我哋三個人share呢件細小無比嘅cake都嫌太多！(因為真係好漏……)

食後，我忍唔住爆出一句﹕咁細件收人$118﹖！出面幾十蚊有交易喇！奶奶聽到後，忍唔住笑。咁係呀嘛，如果好好食就話啫，但我覺得好普通……

埋單前問句有冇咩credit card有折，估唔到真係有！而且仲要係八折，gd！最後千三有找，還好！

P.S. 餐廳冇水供應，奶奶要咗杯橙汁($55)，我同拾爺就share咗枝水($80)。