一早出發去Kasteel De Haar!又係天陰陰……算啦!去古堡,天陰就當係增加嗰種詭異嘅氣氛啦!
先搭火車去Vleuten(共€14.6)!要喺Worden轉車,去到Worden站,諗住問吓人有冇去錯platform啦,但啲婆婆伯伯都好似唔係好識咁,仲點我哋……好彩,拾爺覺得佢哋信唔過,最後我哋冇信佢哋,靠自己,成功到達Vleuten。
一 到站,就即刻搵bus stop,我哋要搭127號巴士,點知……去到先發現我原先查好咗嘅巴士班次係錯架!我以為十一點幾會有車,點知星期日第一班車係十二點四!我哋又預鬆咗 時間嚟,而家先係十點幾,仲有兩個鐘先有車……呢個車站又係細站,附近空曠到死,都冇嘢行,唯有每人俾多€2先去Utrecht行吓先啦……
之前搭親火車都冇俾人check過飛,真係有唔買飛嘅衝動!不過,我同拾爺都係怕死之人,雖然只係兩個站,但都唔想提心吊膽咁搭,加上今朝真係有人 check飛嚟,所以都係做個好旅客啦!(不過,呢程又冇俾人check喎!)
去到Utrecht,先上商場睇吓洗手間幾多錢,點知……星期天嘅早上,講緊嘅係十一點幾喇,大部分嘅舖頭唔係未開,就係唔開,估唔到連商場洗手間都唔開……
行出去搵VVV,途經麥記,竟然要俾錢……€0.25,去!雖然冇人守門口,但因為時間尚早,好少客,好難走數……我先去咗,出到嚟有條鬼佬昅住哂,OkOk,俾錢囉,反正啲1euro(即€0.01)都用唔到嘅,俾哂出去!
行去VVV嘅途上,發現咗佢﹕
拾爺話呢啲係路邊公廁,男士專用!我問拾爺敢唔敢用,佢話唔制喎!
今日差唔多所有舖頭都冇開門,就連餐廳都唔開……喺歐洲打工真歎!
去到VVV,發現連佢都未開……好彩之前喺火車站問路時,個職員俾咗張地圖我哋啫,我哋可以自己搵景點!
跟 住地圖,先去Miffy museum!其實之前唔打算去架!但嚟到呢到乜鬼都未開,就入吓去啦!喺Central museum到買飛,拾爺去到第一時間同個staff講﹕I would like to buy 2 tickets for the Muffy museum.我即時幫佢補鑊﹕Miffy!呢個拾爺呀!之前同佢講咗好多次隻公仔叫Miffy,佢就死都要叫人做Muffy。好啦!玩啦!玩到失禮街坊 喇!講番個入場費時,之前上網查過,明明係€8,而家變咗€9……雖然話可以入埋Central museum,但我都冇興趣……
Miffy museum主力做本地家長同日本客生意!不過……呢到都幾呃錢,冇乜嘢睇。呢處根本就係一個室內兒童遊樂場!成堆小朋友喺到睇故事書,玩玩具,砌拼圖同油顏色。
我其實都冇乜心機留喺到,因為睇到出面陽光普照,好想出去影相!我怕會好似噚日咁,陽光只係出現一陣,跟住又消失……
行完之後,去souvenir shop買嘢,買多一隻拾爺舊年喺英國買俾我嘅Miffy公仔(€7.95),拾爺送我嘅係粉紅色衫仔嘅,我今次就買埋隻藍色衫仔嘅,拾爺幫佢改咗個名叫Moffy。我仲買咗件tee,原價€24.95,現特價€15。
(哈哈,其實我今次帶咗Muffy<粉紅色嗰隻,拾爺幫佢改嘅名!>回鄉架!估唔到,仲順便幫佢搵埋老公添,hehe。)
過對面間Central museum行,正苦惱緊行唔行呢間museum。因為,行呢到會趕唔切搭兩點四班巴士去古堡,改搭三點四班車又可能入唔到古堡參觀……唔知點算時,有個職員走嚟叫我哋要store背囊,咁麻煩……我哋決定唔睇,走人!
趕 搭火車前,喺車站嘅便利店到匆匆買咗兩盒salad做lunch,用十二分鐘時間KO咗佢。同拾爺講好各有各食唔share,點知佢突然俾咗塊我以為係蛋 白嘅嘢我食,咬下呢塊原來係羊奶芝士嘅一刻,上一秒鐘心甜拾爺對我嘅痛錫感覺即刻冇唒!塊芝士真係羶到冇朋友!即刻投訴拾爺整啲咁嘅嘢我歎,點知佢話: 「就係羶先俾妳食,妳受得住呀嘛!」枉我仲以為佢錫我,將啲好嘅嘢益我添……(不過,公道嗰句﹕拾爺平時真係錫住我架!食親士多啤梨都會俾哂啲深色嘅我 食。)
一落火車,我哋就即時追車,趕到死死吓去到,個司機仲未上車……望一望個班次牌,暗叫好彩,原來拾爺之前記錯咗,今日唔係一個鐘一班車,係兩個鐘呀!如果我哋行埋個Central museum先過嚟,除咗要呆等一個鐘之外,仲會趕唔切入古堡添呀!
等司機上車時,之前同我哋一齊搭lift離開車站個女人,施施然行嚟,拾爺問佢係咪都係去古堡,佢話自己係住附近,知道架車會等到火車走咗先開車,所以一啲都唔急。咁佢之前明知我哋追車,又唔講?!
呢架127係部細van,全車得三個客,個女人落車後,好似成架車俾我哋包咗咁!車程大概十分鐘,但車費已經要€2.4!
落車一直向前走,沿途啲屋都好靚!仲有大片草地,加埋個藍天,令人心情愉快呀!
行到某條分叉路,唔知向左走好,定向右好,咁啱有人跑步經過,問一問路先知我哋行錯咗……不過,錯咗都唔係壞事,起碼可以喺片大草地上影相呀!
終於行到Kasteel De Haar附近,陽光下嘅Kasteel De Haar被大片草地同河水包圍,真係好靚!令到本來唔打算入去參觀嘅我改變初衷(拾爺睇人啲blog,話個tour係講dutch 架!)€9.5一個就€9.5啦!買咗四點場嘅guided tour(一定要參加guided tour先入到去,唔可以自行進場……),好彩有英文嘅audio guide。
講講呢個Kasteel De Haar嘅background information啦!呢個古堡係Van Zuylen van Nijevelt van de Haar家族所擁有嘅,19世紀末重新粉飾過後,主人Baron Etienne同家族成員每年都會由世界各地飛到呢個古堡,喺呢個地方逗留一個月咁耐,而時間,通常為九月。佢哋亦會邀請世界各地嘅知名人物作客,同佢哋 一齊歡度九月。Baron Etienne 同 baroness Hélène喺世界搜羅咗唔少藝術精品,全都擺哂喺個古堡之內,令到呢個古堡裡裡外外都咁瑰麗堂皇!我哋參加嘅guided tour,主要係介紹古堡嘅工作人員點樣去籌備呢個九月party。
未夠鐘入Kasteel De Haar,先喺出面影吓相先。難得天氣咁好,拾爺竟然恰眼瞓……叫佢幫我揸機,佢都呆呆滯滯咁,平時我唔想影相,佢又要企定定俾佢影……到我mood到想影,佢又唔想影……叫佢做model,佢仲一口拒絕添呀!合照都say no……但偷影佢又好精神喎!
三點十嘅時候,我哋就入去Kasteel De Haar內個basement到集合,然後跟個staff一齊深入Kasteel De Haar。入面唔俾影相……
入到去,有人俾咗我同拾爺一人一個audio guide,之後大家一齊睇咗條有關呢個古堡歷史嘅片。不過,條片用dutch介紹,完全唔知佢講乜……
睇完片,就跟住個staff入唔同嘅房間,個staff每間房都會作詳盡介紹,我見佢講到七情上面,鬼馬非常,啲人成日哈哈大笑,佢應該都幾風趣!可惜……我一句都聽唔明……每入一間房,就係搵接收器用audio guide聽介紹。
呢個Kasteel De Haar有250間房,我哋個tour得嗰一個鐘,當然唔係入哂咁多間啦!只係入咗啲比較重要嘅房間,例如位於basement嘅廚房,每年廚師都要早啲入嚟,為古堡主人個九月宴客早作準備。廚房溫度必須保持某個度數,以確保食物水準,不過係幾多度就冇提喇,佢只係話好熱!
上 樓後,我哋到達dining room,間房當然grand爆啦!內有長枱一張,主人家會坐喺正中,即男女主人面對面咁坐喺餐枱中間位(注﹕唔係主席位喎!),其他人客則按地位坐主人 家兩旁,地位越低嘅就坐得越遠。每道菜都會由basement個廚房搭lift送上嚟,waiters會搖鈴去叫菜。
之後,我哋出咗個hall到,呢度嘅function好似lobby咁,晚飯前客人都會聚集於此,等候入座。
穿過hall,我哋到過secretary嘅工作室(前身係書房),賓客飯後嘅耍樂房間,喺嗰度佢哋會玩card games,摸吓酒杯底,食吓古古力咁。女士們又會到隔離房扮吓靚。
女主人間房好典雅,最正係佢個浴室,浴缸座咗落地底,洗手盆用特別物料去做,每次用完都要清潔,呢啲就係有錢嘅表現喇!
最後一間房,我覺得係主人房,但聽audio guide講,佢係話father & son room。呢間房最珍貴之處在於佢喺過去嗰一百年都冇向外開放。
完 咗個tour,出去影多幾張相,就走人喇。因為我哋係尾場,所以走時都冇乜人,我哋搵路出去時,跟人行,點知道門鎖咗,變成此路不通……自己去闖咩,遇着 個大閘,推極都推唔郁,後尾有家人跟住我哋嘅,個老婆就指指個sign,老公就press個掣開閘門。佢哋雖然知我哋係「外國人」,唔識睇Dutch,但 都忍唔住笑我哋話要先press掣,如果唔係,點都開唔到道閘喎……
離開Kasteel De Haar,向車站急行。為嘅係要趕上六點零一分嗰班巴士,miss咗呢班,就要等多兩個鐘架喇!雖然車程好短,但喺欠缺地圖下嘅情形,我哋係冇可能自己行去火車站架!
是晚又係食「貧」,買咗salad同yoghurt,今次,我同拾爺一人一桶500ml,佢買honey味,我買chocolate。我同拾爺初初都以為 chocolate係成桶yoghurt都係啡色咁嘅,點知原來係入面撈啲chocolate chips,都幾得意呀!除咗呢兩樣,當然亦唔少得每日一果啦!今晚又食strawberry。