Monthly Archives: 十一月 2013
南瓜湯
約咗個舊生食飯，本來係我請佢嘅，因為佢之前成日買貴cake番嚟請我同小肥佢哋食，點知……間餐廳唔收credit card，我哋身上都唔夠錢，食食吓飯，佢要出去撳錢(因為佢間銀行嘅提款機近啲)……食完飯，我哋又好似以前咁，極速狂奔番去學校。
放學後探爸爸，途中遇到細妹，三個人一齊行，預咗只有兩個先可以入到去，點知……去到quota冇哂！！！原來媽媽同姑媽都到咗！細妹打俾爸爸，本來係叫媽媽出嚟，但最後佢同姑媽一齊出嚟，姑媽一見我哋就問我哋啲湯有冇加藥材，聽得得哋一頭霧水。不過好快我已經知發生咩事，果然！細妹打俾爸爸時，爸爸同佢哋講我同「南瓜湯」到咗，所以姑媽以為我帶咗湯嚟，佢唔知道我哋全家都叫拾爺做「南瓜湯」！姑媽一向唔鍾意改花名呢回事，以前我哋一班親戚都會叫我細佬做「老鼠仔」，因為佢鼠年出世，唯獨姑媽覺得咁樣叫唔好聽，佢堅持叫我細佬個名！不過，到而家，一直只有佢叫我細佬個名，哈哈，我細佬仍然係被叫作「老鼠仔」。
同爸爸傾咗一陣，佢就叫我哋走，換番姑媽入嚟。我出去時同姑媽講，爸爸要家姐唔要個女，姑媽聽後即笑。
受保護的文章：Sports Day
City Art
等咗成個月，終於睇到駱醫生，佢果然如Dr Lam所講，好細心！相反，個姑娘cool爆，搞到我有啲驚……唉，身體又出毛病，其實由細到大，我身體都唔係好架喇，但點解要俾咁多唔同種類嘅病我﹖氣 管唔好、啲血發炎、心律不正、定期腳腫、啲骨有窿都唔夠，而家再整多個大大粒肌瘤……
睇完醫生，去咗帝京酒店入面嘅 City Art食lunch。本來係想食佢個半自助午餐嘅，但間餐廳好full，原來啲人早一日訂哂枱，最後被安排住門口位……我同拾爺揀呢度食，係貪佢環境唔錯，價錢合理，但百幾蚊一個坐門口位嘅話，又略嫌太貴，所以我哋最後揀咗食set lunch($78一個)。反正半自助同lunch set嘅主菜都係一樣嘅，前者只係有得任食hams同desserts啫，但每人貴成四十幾蚊，都唔可以話係好抵架！
我要咗黃鰭吞拿魚沙律做前菜，拾爺就要周打栗米蒜蓉蝦天婦羅湯，主打方面，我就要燒羊鞍配薯蓉，拾爺就食扒三文魚配薯條。Lunch set除咗有咖啡同茶外，仲有柑橘慕思蛋糕添。
侍應先上餐包，啲包唔係好熱，只係微暖，我食咗一塊加咗提子乾嘅方包，塊包嘅麵包味唔夠，外面層皮就好「韌」……至於另外嘅，我只係咬咗一啖，都係一般貨式。
食完麵包，侍應就上我個沙律同拾爺嘅餐湯。塊黃鰭吞拿魚本身冇嚟魚味，廚師唔知係有心定無意，喺調味上更加上醋同黑椒，係想玩fushion咁用意式去煮，定因為知道塊魚冇魚味，乘機落重手啲定個食客食到有啲味﹖不論原因熟那，我都唔buy！
雖然個沙律係失敗嘅，但個湯就好正！好濃嘅忌廉栗米味！不過，如果你鍾意飲好滑嘅湯，呢款未必合你心意，因為廚師冇打勻哂所有嘢，飲起上嚟，仲feel到一粒粒嘅材料。至於湯中嘅炸蝦天婦羅，基本上俾個湯浸到「淋」哂，只係食到啲蒜蓉味，冇咩特別。
兩碟主菜一齊上，不過，個三文魚又係唔夠熱，而且煎得普通……其實三文魚本身肉質較嚡，要整得好食， 一係就要煎到香脆可口，一係就要由汁入手，可惜呢間餐廳兩者都冇做到……佢似有淋咗啲汁上條蒸魚到咁……至於個羊鞍就好好多喇，當然，講到熱佢都係唔夠， 但啲肉唔怕「韌」，又唔怕好羶，瘦肉方面只係帶少少羶味，肥膏就重啲！但對我呢個覺得羊肉應該要有羶味先夠好食嘅人嚟講，肥膏嘅羶完全可以接受！我直頭覺 得瘦肉應該再羶啲添呀！
食完主菜，侍應先上餐飲。我同拾爺飲飲吓覺得唔對路，平時唔係上甜品先嘅咩﹖就喺我哋滿肚疑惑，打算 捉個人嚟問時，甜品就上枱喇。通常跟餐嘅甜品都係細得可憐嘅，但今次呢件都算幾大件，同自己俾錢買嘅咁上下size！份量係好夠，但如果落少啲糖就 perfect喇！我同拾爺都覺得太甜！
埋單$171.6，值得再嚟！番到屋企上Openrice睇吓間餐廳拎幾多分，原來都有成4分架！每次同拾爺食到好食嘅嘢，我哋都會開心成日，冇計，我倆都係為食鬼！
食完lunch，去一田血拼，可能要買嘅上次都買哂，所以除咗Ice Fire嘅三對襪外，毫無斬獲……去埋無印買咗個Acrylic櫃桶仔用嚟放印台後，就番歸喇。
告別ICU
以為爸爸要喺ICU住上好幾日，點知今日五點幾已經轉番出普通病房，不過，每次探病人數仲少過ICU，只有兩位……我今日一去到，就冇得探……要等媽媽出嚟，換我入去。
今日見到爸爸比噚日精神，頸上那粒礙眼東西亦貼咗膠布遮住了。今日爸爸仍然要用魔術手寫板同我哋溝通，不過，佢有時都會忍唔住開聲講兩句。佢見到今日嚟探病嘅只有我，就問拾爺喺邊，我話佢知拾爺噚日係專登請假唔補課咁嚟，今日唔可以再咁樣，因為佢唔補課，學生就被分俾其他老師，咁樣其實係加重咗人哋嘅負擔，偶爾一次可以，經常就唔得喇。爸爸知道後，就叫我哋太忙就唔駛嚟，話自己冇咩事。
傾到咁上下，見爸爸開始攰，媽媽同我就打算走，點知，哥哥、大妹同妹夫嚟埋……我哋不得不走，但爸爸就冇得抖lu……
離開醫院，直接番屋企。媽媽知道我呢幾日都冇番奶奶到食飯，怕我唔夠營養……冇辦法，呢排工作好忙，出卷、改嘢、處理其他admin paper work，連備課嘅時間都唔夠……每日都係做到被校工趕先捨得走，所以去完醫院後，我已經攰到唔想再番奶奶到先，然後至番屋企。本來夜晚想食沙律菜當dinner，點知supermarket賣哂……拾爺就煮咗個公仔麵俾我食，佢今晚番咗奶奶到，仲拎咗湯番嚟俾我飲呢。雖然，奶奶煮嘅嘢好清淡，有時食得多都會覺得厭，但呢幾日冇番去食飯，食出面嘢或求其食，令我覺得有住家飯食，其實係超幸福架！
放學ICU
咁大個女，第一次入ICU探病……希望呢個係我人生唯一一次，我唔想身邊嘅人受病魔折磨，我想個個都健健康康！
放學後，同拾爺一齊去醫院。拾爺本來星期一至四都被迫同學生補課(學校規定……)，但佢向亞頭請咗假，所以可以咁早出嚟陪我探爸爸。
去到差唔多六點，見到ICU門外已有一大堆人等緊。幾秒後，有一姑娘(嬸嬸﹖)出嚟，大伙就排隊報上病人名稱，再拎保護衣穿上，然後入去。我同拾爺拎咗保護衣後，我先著，拾爺幫我拎嘢。到拾爺著時，我發現佢將前後調轉咗……呢啲就係平時唔睇電視劇嘅結果！都唔好話我成日掛住煲劇，煲劇其實都有嘢學到架！
入到ICU，先發現入面仲有好多病床，妹夫只喺whatsapp交代ICU房，冇講到床位……於是，我即時行去姑娘到問。問完後，就去搵爸爸。行到埋爸爸床邊一刻，非常震撼！見到爸爸好攰，好辛苦咁嘅樣，鼻到插咗支管，右下顎插咗五支嘢，加下顎又有一、兩支，插管位滲出陣陣血水……見佢上身插滿喉管，我真係好心痛……行近爸爸到再望，見到佢開刀位縫哂線，個area好大，啲線滿佈爸爸流出並已凝固嘅血……再睇到床下五個血包輸緊血入去，我真係好想喊……
爸爸未講到嘢住，姑娘俾咗塊魔術手寫板我哋，爸爸就喺塊板到寫字同我哋溝通，佢話手術做咗九個鐘，算係成功，但可能要喺ICU瞓多三至五日。而家佢每六個鐘就要打一次止痛針。爸爸單手寫紙，加上寫喺魔術板上，有時我同拾爺都估唔到佢寫乜，搞到佢又要寫過……其實我好過意唔去，因為爸爸其實好攰……同爸爸傾傾吓，拾爺突然表示唔舒服、見暈，於是佢先出去。佢出咗去一陣，媽媽就到喇。我哋傾咗陣偈，傾傾吓，我發現爸爸右頸位置有啲好奇怪嘅嘢突咗出嚟，於是再望真啲，發現係佢個nipple！我唔太相信自己雙眼，於是講俾媽媽聽，等佢驗證。媽媽望完之後，塊臉即時死灰色一樣，佢將自己嘅擔心同不快宣之於口，我叫佢唔好再講，佢又唔聽……講到爸爸有少少激動，佢見到爸爸激動，先肯收口……
離開醫院後，我即時致電哥哥。我一直以為醫生幫爸爸切除頸上腫瘤後，係將佢pat pat嘅肉補上去，但哥哥話醫生一直係話要切前面……(但連媽媽都話記得係pat pat喎……)我想像唔到體虛氣弱嘅爸爸，係點捱過呢心口一刀！一諗到醫生喺爸爸心口到割咗塊肉去補，就好心痛……點解醫生唔避開嗰個位置﹖可能真係避唔到……但咁樣，唔通要爸爸成世carry住呢粒嘢喺頸上﹖好想約醫生見見，問問發生咩事。
手術日
爸爸嘅手術日終於到來！我啲兄弟姊妹請哂假，七點半就去醫院陪爸爸，為爸爸入手術室前壯壯膽，而我……呢個時候卻係喺學校準備一天辛勞嘅工作……細個好唔鍾意有咁多兄弟姊妹，分薄哂啲資源，大個就好慶幸有咁多兄弟姊妹幫我分擔照顧爸媽嘅工作，如果爸媽只得我一粒女，而我又請唔到假讓爸爸入手術室前得到一啲親人嘅支持，咁就真係罪該萬死！
今個月對老師嚟講絕對係busy month，我亦忙到好多時唔記得咗爸爸做緊手術(好不孝……)，上堂時好投入講書，但落堂後，一靜落嚟就會開始擔心……好彩，因為呢排忙出卷，所以好快又迫自己投入工作，唔諗太多。
放學後得知哥哥自己一人喺醫院等候，真係好敬佩哥哥嘅孝心，我呢個哥哥真係好鍚屋企人！佢唔係剩係孝順父母，對我哋呢班細佬妹都好好架！所以，我哋都好錫小王子！六點幾離開學校，想話去醫院睇吓爸爸，但哥哥話手術未完成……叫我唔好去，佢話我去到都只係等，冇其他嘢做到……其實，我覺得自己完全唔出現好衰，但嗰一刻，忙咗成日學校嘢，我真係好攰……對眼開唔到咁滯……所以，我最後都係衰女地番咗屋企等消息。
等到夜晚十點幾，先收到妹夫whatsapp，話爸爸手術完成，入咗ICU。原來佢同大妹，仲有媽媽同細佬都去咗醫院，陪住哥哥等爸爸。記得爸爸問我生唔生小朋友時，我表示怕生著啲衰嘅，唔生好過生，爸爸就話自己生咗五個，覺得我哋全部都好乖。其實……我覺得自己一啲都唔乖……
Welcome Baby
好耐好耐冇整卡仔，好友剛生咗個B女，約好呢個禮拜六去抱B，藉此作為自己整卡嘅動力。
Hugo’s
補祝拾爺壽辰，揀咗Hugo’s嘅brunch，因為佢喺Openrice嘅評分為4.1，加上是大少奶喜愛嘅餐廳，所以book咗嚟試。
十二點鬆啲到達，因為book位時要求較佳位置，所以獲餐廳安排窗邊半圓sofa位。
餐廳環境
坐低冇耐，waiter已急不及待問我哋飲乜……我表示一陣再點，佢就問我係咪乜都唔飲……我重申一陣先點，佢先行開。呢個位我覺得餐廳做得唔太好，人客剛到，都未settle好，有冇必要咁急去問﹖！
Waiter再番嚟時，就遞上menu兩份，同拾爺商量好主菜嘅選擇後，又有一waiter走嚟問我哋要咗嘢飲未……我要求睇睇drink menu，發現佢哋嘅distill water係我好唔鍾意嘅Evian，sparkling water又唔係我同拾爺愛飲嘅嘢，見隔離枱嘅人有tap water，於是我就問可唔可以要tap water，結果，成功慳番開水錢！
我同拾爺點咗牛同lobster。
點咗主菜後，我先出去拎嘢食，呢到嘅brunch屬半自助形式，頭盤同dessert都係buffet形式，主菜就只可以揀一樣。頭盤選擇唔算好多﹕
栗子湯: 有專人幫你滔完，再送到枱上。
Bread, cheese and salad
Selection of Pickled and Marinated Vegetables
More salad
Seafood: Oysters and lobsters
Seafood: Shrimps, shells and crab legs
Smoked salmon
Serrano ham, Melon
Ham
Foie Gras Chicken Liver Terrine
我出去拎第一轉嘢食時，waiter送上餐包，賣相好吸引！
拾爺每樣包都試咗幾啖，我就唔想浪費quota，只係食咗個蒜蓉包，好鍾意佢落足蒜！不過，個麵包係就係夠脆，但脆得嚟硬咗少少，包身又唔夠軟，呢個包只可以叫ok，唔可以叫好食。若以酒店級論，我會予以fail。
食到飽飽後，先發覺得哋冇試到呢到嘅牛油……勁後悔……好味嘅牛油，可以好好味架嘛！(拾爺話齋，呢句唔係廢話！)
第一轉樣樣要咗啲！
Salmon: 我唔太buy用香草醃，尤其佢呢個自家香草隻味唔係我杯茶……唔好食……
Oyster: 食蠔我一向唔需要大大件，好多時細細件更見蠔味！不過……呢隻唔係……蠔味淡咗少少……拾爺問我夠唔夠馬代食到嘅好食，嘩，唔可以同馬代比架喎！
Lobster: 又嚡又霉，只有雪味，沒有鮮味……
Tomatoes Mozzarella Cheese: 隻mozzarella cheese唔靚……
Cod Fish Rillette: 味道ok，我鍾意佢挾埋塊牛油果！
Serrano Ham, Melon: 啲ham切得太細塊，細到包唔到塊melon……
栗子湯: 從來唔特別鍾意栗子，我一心為南瓜湯或龍蝦湯而嚟，結果，兩樣都冇……好失望……
第二轉，加咗啲新嘢，亦encore咗某啲嘢！
生牛肉他他: 呢個行到去counter，會有waiter幫你舀。味道唔錯，但酸瓜份量唔多，食太多會滯，少食多滋味。
Dried tomatoes: 還是喜歡喺法國食到嘅。
Pickled and Marinated Mushroom: 味道一般。
Tuna and Penne Salad: 冇特別。
Foie Gras Chicken Liver Terrine: 我最最最愛嘅頭盤食物！呢個鵝肝雞肝凍真係好滑！又好夠鵝肝味！一啖食落去，先feel到好濃嘅鵝肝味，雖然係一pat醬，但卻感覺滑滑，吞完啖醬後，口內仍然感到香甜，仲feel到有少少辣味。總之就好正啦！
拾爺見我又拎蠔食，於是就放膽一試，試完之後話覺得好一般。
第三轉，食多少少海鮮先！
Shells: 味道好一般……
蟹腳: 又係只有雪味冇鮮味……不過，酒店已經開哂邊，食得好方便！
Ham: 又係好一般……
以下係拾爺嘅數轉:
拾爺都好鍾意食Foie Gras Chicken Liver Terrine，我倆食咗幾次，用哂呢緊幾個月嘅quota喇，哈哈！最後嘅係feta cheese melon，冇哂mozzarella cheese後就改用呢樣代替。
食夠start，就叫餐廳上主菜:
Roasted US Rib of Beef: Menu 寫明係served from the carving wagon，結果，個chef推架車出嚟，就係為咗切一片牛俾點咗呢道菜嘅客，um……over咗少少囉。塊牛係就係幾淋嘅，但牛味唔夠……
Hugo’s Classic Half Boston Lobster Thermidor: 用cheese焗令人完全食唔到龍蝦嘅鮮味……啲cheese又唔夠香……不過，龍蝦肉一早起哂，食得方便，加上龍蝦肉幾彈牙，算係挽回分數。
食完主菜，到甜品時間！
Fruit
Ice-cream
Crème Brulee
Mango Mille Feuille & Raspberry Cake
Various cakes
Chocolate Brownies, Assorted Macaroon, Lemon and Lime Tarties
Strawberry Tart, & Chocolate Earl Grey Tea Cake
Rhubarb Upside Down Pudding
Bread
食甜品唔係我強項，我同拾爺都係每樣拎啲大家share。
Mango Mille Feuille: 食唔出芒果味，亦唔覺得好味……
Chocolate Earl Grey Tea Cake: 好正！朱古力又濃又滑！
Rhubarb Upside Down Pudding: 唔鍾意……
Crème Brulee: 以為係熱嘅，點知係凍嘅，但好滑，好味！
Hugo’s自家製雪糕﹕芒果味唔好食……Vanlina味道唔錯，但個texture唔夠綿，雲呢嗱籽又唔夠香……我最鍾意朱古力，味道夠濃，個texture又夠煙韌，I like it！
食食吓，餐廳為拾爺預備嘅birthday souffle送到！
個souffle味道都唔錯架！不過，又未去到好正囉。
本來係拎俾自己食嘅fruit，最後被拾爺清哂咁滯……
Chocolate Brownies: 好普通……
Lemon and Lime Tarties: 好一般。
Raspberry Cake: 唔好食……
Chocolate Dipped Strawberry: 正常味道。
最後飲番杯coffee or tea，呢餐飽到我同拾爺全日都冇再食嘢喇。
埋單$1381.6，如果有AE白金卡可以有85折，可惜我哋已經cut咗……餐廳服務係幾唔錯，但食物水準好一般，收呢個價，我期望嘢食做得更好！差唔多價錢嘅餐廳，我覺得Sabatini好過佢，呢到嘅性價比都幾低。
P.S. 遇著一枱客，懷疑係老細請食飯，席間個疑似老細人物不停發表其偉論，唔係講中國就係講美國經濟，講講吓又到貨幣政策，就連昂山素姬都唔放過……佢班員工就話唔駛錢嚟食嘢要聽佢講嘢交貨啫，我哋其他人呢﹖我哋俾錢嚟enjoy同relax，但就要聽佢大大聲講呢樣講嗰樣，真係好討厭！三個鐘頭嘅bunch，佢講足兩個半鐘……有佢講冇人講，我懷疑其他人其實都係左耳入右耳出架咋！(第一幅相背鏡嘅皮褸就係該名口水佬。)
野蠻小子
捨爺要回校工作，我亦約咗人交收，一點出門口，先去Living Plaza買壽司蓆，再到荔枝角拎衫，件衫係之前上網買嘅，$220，想唔到呢個價錢下，件衫都厚厚哋，幾抵！
拎完衫就去咗葵芳行街，好耐冇買衫，好想買，但睇唔啱……
三點幾番屋企，改吓嘢，到六點半就出發番娘家。七點半番到娘家樓下，會合拾爺一齊上去。今晚好好餸，有雞有燒肉！小王子一嚟到就瞓咗覺，大家食完飯佢先起身，呆完一輪就開始精神，不過，大妹餵佢食嘢，佢食咗幾啖，就掛住玩唔肯食……佢睇中個玩具結他，拾爺整鬼佢，喺佢面前show完之後就收埋身後，搞到小王子左望右望要搵佢出嚟。其實拾爺都幾小朋友架，哈哈！
聽嫂嫂講，小王子之前用水樽掟表姐仔呢，唉，呢個小子真係野蠻！
小王子都幾鍾意我國國粹。
呢排小王子經常作出呢個表情，好似係學表姐仔架！呢次係因為細妹入咗佢一粒積木，佢即刻用呢個表情示威！另外，佢塊面嘅瘀痕深色咗，睇見就令人心痛……
Eat, Play, Love 