Moomin Cafe

27 二月, 2015honeyhinbaby 日日有食神 2 則迴響

與亞桔同菜菜久違了嘅gathering，選址亞桔鍾意嘅Moomin Cafe！6點15分去到，亞桔已到，但要人齊先俾入去……等咗一陣，我去洗手間時，餐廳又突然俾亞桔入去坐，仲要俾我哋坐喺姆明同科妮隔離！但我哋要8點交枱。

餐廳環境﹕全場姆明佈置唔多，就只有我哋隔離嘅呢pair公仔……坐呢個位，好處係隨時可以攝位同公仔影相，唔好處係，隔離成日有人出出入入，最離譜係，有兩個女仔竟然叫我幫手揸機！佢哋係喺冇嘗試搵waiter嘅情況下，就叫我揸！我叫菜菜未嚟，又未點嘢食，所以就幫佢，如果唔係，我一定叫佢叫waiter，低能架，我嚟食嘢，唔係嚟幫妳揸機架！

初時以為呢啲隱蔽位置係個伏，架船駛走後先知原來本身係海景位！可憐之前嚟食嘢嘅人，個海景被艘船遮哂！

餐具只有刀、叉、匙係用姆明同精靈樣，碟都只係印餐廳logo。亞桔嫌餐廳孤寒，連裝水嘅杯都唔係用印有姆明等卡通人物樣嘅嚟招呼食客。

夜晚menu有北極光套餐，一人份索價$289，完全係搶錢咁搶！我哋當然唔會叫啦，3個人散叫咗﹕

自家醃製三文魚($60)﹕無甚特別。

是日意粉 ($110)﹕超級細碟加唔好食！

肉眼扒配牛油香煎蝦 ($180)﹕薄薄一塊扒，又乾又嚡……隻蝦又霉又冇味……差！

姆明之家班戟 ($138)﹕全晚最好嘅一道菜！賣相同味道都叫正常啲，先講pancake，少甜有蛋味，而且好熱，邊位微脆，cream又唔漏，唔錯！屋仔裝咗3樣甜品，最高一層係cream brulêe，略嫌太實，亦唔夠滑，但唔會過甜。中間一層係桃味jelly，味道好假，唔好食！最底嗰層係chocolate mousse，mousse唔算好滑，朱古力味都算濃，中規中舉咁啦。點呢道菜，可以揀隻公仔帶走，但冇亞桔最愛嘅史力奇，我哋揀咗亞美。

埋單$537，完全唔抵食！

其實，想入餐廳影相唔駛幫襯都得，因為所有人都可以自出自入間餐廳，我見真係有家人走入嚟攬住姆明同科妮影完相後就走，waiter都冇阻止過，可能佢哋根本就唔知，哈哈。

評分時間﹕
食物：差
服務：中下
環境：一般
衛生：一般
價錢：差
總結﹕不值一試！

餐廳資料：
Moomin Cafe
尖沙咀廣東道17號海港城海運大廈LCX 3樓32號舖
2730 0963

2015 韓國之旅 Index

27 二月, 2015honeyhinbaby 走過浮華大地發表留言

莆田

14 二月, 2015honeyhinbaby 日日有食神 2 則迴響

因為我新年去旅行，所以娘家提早喺今日食團年飯，情人節食團年飯，大妹都覺得怪怪哋咁……餐廳係哥哥見到想試嘅，但其實我同拾爺之前已經幫襯過銅鑼灣嗰間，不過，兩個人食，選擇有限，今次一家人嚟食，可以嗌多好多嘢，yeah~~

Book咗8點食飯，但去到餐廳話未執好枱，等等等，超過15分鐘仲未執好，我哋再三催促先有枱……大妹發現遲過我哋嚟嘅，竟然有枱先，張枱大細同我哋一樣，唯一唔同嘅係，人哋個位置更佳！

一坐低，媽媽就丟張呢間餐廳嘅宣傳單張俾我，話要試人家嘅十小碟……但其實張嘢係寫呢到十樣出名嘅嘢，冇講過係小碟，當中有前菜，亦有主菜，仲有更多係兩件起咁叫嘅，搞到我落單時，不停被問要幾多件……(另外，等咗好耐先有人嚟落單……)

蝦苗拌紫菜 ($48)﹕上次同拾爺食時有半價，份量同呢個一樣！今次原價食，感覺冇咁抵……不過，味道真係唔錯，哥哥都讚。

一品醉蚶 ($78)﹕味道一般。

九轉小腸 ($78)﹕呢個味道唔錯，但我嫌佢口感略硬。

土筍凍 ($33)﹕媽媽又要叫，叫咗發現係生嘅又唔敢食……哥哥要幫佢食咗佢。好彩餐廳賣剩一碟，如果唔係，之前叫3碟，哥哥要全食哂就慘喇。

阿元香草雞 ($78)﹕收到咁貴，但份量又咁少，味道卻非常普通，仲偏鹹！以性價比計算，呢碟係劣！

冰浸苦瓜 ($48)﹕唔點蜜糖，真係好苦！

酥炸蟶乾 ($58)﹕真係好乾……份量好少……

鹽焗豬肝 ($58)﹕以為豬肝會整到溶於口，點知塊塊都好硬……

酥炒芋頭 (小, $88)﹕味道略甜，但都算幾唔錯，大妹鍾意食！

原味燜黃瓜魚 ($58)﹕點呢個菜時，個waitress同我哋講條魚好細條，叫我哋一人一條，好彩我哋只打算試吓，點咗一條，條魚一上枱，我哋都覺得個waitress好唔老實！大細觀念各有不同都算，但叫我哋一人一條，真係好冇企業良心！味道如何我唔知，因為我一向唔好魚。

莆田扁肉湯 (大, $158)﹕好好味！湯底酸酸味味，入面嘅扁肉細細粒容易食，我哋大愛！

蒲田燜豆腐 ($)﹕上次食有嘢座熱，今次冇……

莆田荔枝肉 (大, $178)﹕同上次一樣，啲肉外脆內熱，味道唔錯！只係……今次叫大碟，荔枝粒數仍然好少，同小碟冇分別……

農家擦粉 ($158)﹕呢個真係把鬼，米粉浸到一pat pat咁，唔好食！

包菜伴飯 (中, $117)﹕又一把鬼之作，冇咩菜可言，個飯更加係唔好食！

自製滑豆腐 (大, $158)﹕豆腐真係好滑，正！

興化米粉 (小, $78)﹕又一把鬼菜式，唔好食！

椒鹽豬手 (6件, $234)﹕大妹話要試，叫咗6件，大家好辛苦先食得哂。我食咗一啖仔，滯到食唔落……全晚最貴呢道菜，卻不受我哋歡迎！

我哋仲叫咗白飯2碗 ($20)，連埋每人$10茶錢同餐廳規定嘅3碟前菜 ($24)，埋單$2220。

餐廳門口有免費薑茶俾人試飲，味道唔錯！

評分時間﹕
食物：一般
服務：中下
環境：一般
衛生：一般
價錢：中下
總結﹕可以一試！但要小心點菜！

餐廳資料：
莆田
鑽石山龍蟠街3號荷里活廣場2樓214舖莆田
2111 8388

遲來的星星毒

12 二月, 2015honeyhinbaby 電影兩面睇 2 則迴響

韓國之旅即將行起，我呢兩個禮拜努力煲哂「來自星星的你」！其實一直想睇呢套劇，但又唔想花時間追字幕咁睇，咁啱上個禮拜發燒，唔番得學，但手上嘅嘢又改哂，備課材料又喺學校，喺屋企瞓到悶時，就決定睇吓套劇，為嘅係唔想自己之後睇完，發覺好鍾意，然後後悔喺呢個trip冇去某啲景點。

我一向對韓劇印象麻麻，最怕嗰啲全套劇嘅人冇一個唔係生cancer，集集都喊到就連眼都要生cancer嘅劇情。咁耐以嚟，我只睇過「宮」，但老實講，我都嫌「宮」嘅劇情拖得太慢，開始時都幾悶……但係……「星星」頭5集俾我嘅感覺已經好唔同，劇集節奏明快，而且人物角色生動，尤其女主角惹笑得來又帶點傻氣，雖未至於有讓我有一口氣看哂咁多集嘅衝動，但仍能令我堅持追落去。

劇集去到中段時，我開始沉迷，每睇完一集，都想要再追。未睇呢套劇前，我唔明點解啲人咁鍾意金秀賢，但睇完後，我自己都不能自拔地愛上佢！一個討好嘅角色，真係會令觀眾連個演員都鍾意埋，對上一個令我有呢個感覺嘅係吳尊。我想都敏俊嘅吸引，唔止係因為佢會默默咁保護女主角，仲因為佢學識淵博，佢嘅知性美，最吸引我。最初那個cool爆嘅都敏俊，因為女主角而流露嘅孩子氣，又或時而散發嘅醋意，亦非常可愛。

不過，套劇去到最後兩、三集，劇情有啲拖拉，女主角同男主角又成日喊苦喊忽咁，令我覺得套劇有少少爛尾。而且，我唔明點解男主角入咗蟲洞都可以換到衫…… 因為套劇有交代過佢最初只可以停留幾秒，但每次都唔同衫，去到同女主角kiss嗰場，佢仲有件大褸俾到女主角，成件事真係好玄！算啦，人家係外星人，本身已經好玄，男主角點解會嚟咗地球，又只得佢一個嚟，佢個星球嘅人互相冇特別關係，啲外星BB點出世，全部我都想知，但套劇都冇講啦，我都無謂研究佢點換衫呢點喇。

「來自星星的你」嘅成功，除咗係因為男主角對女主角嘅的愛護 (真係又愛又保護呢！)同深情，令女觀眾不其然陶醉其中，我個人覺得此劇豐富嘅劇情亦係成功嘅要素之一。劇集講嘅唔止係男女主角置身現代嘅愛情故事，仲有佢哋四百年前嘅相遇，其實最初吸引我嘅，反而係佢哋四百年前嘅相遇，編劇並無一次過交代兩人嘅故事，而係透過都敏俊間中嘅回憶去交待，呢個敍述方法，反倒令我有追看嘅意欲。除咗呢條線之外，女主角身陷險境呢條線又係好好睇，單純睇男女主角談情，點都唔及殺人、追殺呢啲戲碼緊張刺激。

最後，我發覺自己而家好鍾意金秀賢，我決定要睇番「擁抱太陽的月亮」同埋「Dream High」，哈哈哈！喺youtube睇埋「星星」嘅製作特輯，更加鍾意金秀賢，因為我睇到佢嘅專業同humble。韓國男演員，繼曹承佑之後，又多一個俾我鍾意。

P.S. 全智賢喺戲入面好多衫、頭飾等等被人搶購，其實大部份都唔係我杯茶，反而冰湖嗰場戲著嘅軍褸我覺得好靚，尤其褸上嘅白色毛毛圍成一圈後！不過，件褸好貴囉！而冰湖呢場戲，亦拍得好靚，女主角件褸就有白毛，男主角就係黑色毛，好襯！