香煎棒棒雞
食譜來源﹕238個料理的為什麼﹖
材料：
雞翼鎚 7隻
醃料：
醬油 1湯匙
米油 1湯匙
糖 1/4茶匙
黑椒 少許
脆漿粉：
低筋麵粉 5湯匙
生粉 2.5湯匙
泡打粉 1茶匙
清水 6湯匙
油 1湯匙
作法：
1. 雞翼鎚洗淨後擦乾水份，用較剪沿住骨頭剪開雞肉，使其骨肉分離。
2. 順著骨頭往下將肉脫退至底部，再將雞肉翻開，讓雞皮在內，成為棒棒雞。
3. 將棒棒雞加入醃料內，醃30分鐘，備用。
4. 將脆漿粉中嘅麵粉、生粉、泡打粉過篩混勻後，慢慢加水將其攪拌成粉漿。
5. 粉漿放雪櫃冷藏30分鐘，加入油。
6. 將醃好嘅棒棒雞沾上粉漿，落鑊將其煎至熟透，即成。
呢個禮拜我哋一team人特別多活動要搞，辛苦到呢~~所以我相約大家活動過後，一齊食lunch！本來想book香宮，因為亞頭有staff discount，但full咗……改去海景軒！以為某啲credit card會有折，點知原來weekend冇……呢餐女副校主動請客，慰勞我哋一team人，多謝佢之餘，亦為著自己冇問清楚折頭上嘅嘢而感到唔好意思……
前菜﹕上次一挾就有頭髮，結果酒店為表歉意，送我一碟山楂卷同每人一碗南瓜露，今回前菜好乾淨，冇免費甜品食喇。
叫咗以下嘅嘢﹕
洋蔥牛柳春卷 (3件, $54)﹕春卷皮脆，餡料味道唔錯，但我嫌呢道菜唔夠熱……不過，春卷嘛，都係欣圖軒整得好味啲。
茶香肘子花 ($88)﹕其實即係茶香薫蹄，茶香味足，但薫蹄口感較嚡……過份乾身……
龍皇珊瑚煎米粉 ($238)﹕佢哋個個讚好味，話米粉煎到好脆，我卻嫌佢脆得嚟太硬……不過，個茨汁做得唔錯，用料十足！
桂花葡提牛柳粒 ($268)﹕賣相佳！牛柳粒好「淋」，但卻沒甚牛味……
福袋三味豆腐 ($228)﹕賣相好靚！四個福袋內藏菇同唔知咩耳喇，味道一般。心形糕點分三層，低層係南瓜茸，中間係豆腐，上層據waitress講係紫心蕃薯，但唔知點解會係綠色……同埋其實我哋個個都食唔出佢係紫心蕃薯……賣相一流，但味道普通……
蜜梅燒骨 ($198)﹕好味！個醬汁甜得嚟又帶酸，開胃得嚟唔會太漏，排骨肉質「淋」身，肥瘦適中，讚！
當紅脆皮雞 ($436)﹕皮薄而脆，雞肉嫩滑，係唔太夠雞味要扣一扣分啫。
本來想食山楂卷，但餐廳呢期嘅dessert冇呢樣嘢……所以叫咗﹕
黑芝麻卷 ($42)﹕黑芝麻味道香濃，讚！薄薄一卷都分兩層，給予食客兩層口感，兩種滋味。
杭菊凍糕 ($45)﹕除咗淡淡菊花香外，仲有芒果同柚子，感覺係一件冰凍嘅菊花味楊枝金露，好食！
埋單$1910，女副校請客。
評分時間﹕
食物：好
服務：很好
環境：不錯
衛生：一般
價錢：有折去食會開心好多！
總結﹕值得再吃
餐廳資料：
海景軒
尖沙咀麼地道70號海景嘉福酒店B2層
27312883
約咗相識多年嘅blog友DnA一齊去朝聖！想當年，我哋係因為差唔多時間結婚，又同時喜愛Kiki & Lala，兼認識亞柑，所以至會於網上結緣。我哋嘅網絡友誼就係喺大家互相追看彼此嘅blog到一點一滴咁累積落嚟，雖然並不常見 (幾年先見一次……)，但因為佢會睇我個blog，所以相比起一啲會同我見面嘅朋友，佢對我嘅生活了解更深！
12點準時去到餐廳，向waiter表明來意，對方卻叫我移步到lift口排隊……當時前面都有好幾group人……等咗一陣，DnA嚟埋，兩個人一邊傾偈一邊，終於，喺12點8到可以入座！但餐廳規定進食時間為1個鐘……
入到去，我哋被安排同另外兩個女仔share一張四人枱……餐廳其實好細，雖以Kiki & Lala為主題，但只有三個卡位比較特別，大部份人坐嘅位都咩佈置……我覺得嚟得呢到嘅人，都係Kiki & Lala迷，大家都想影多啲Kiki & Lala嘅嘢，但呢到好明顯offer唔到呢樣嘢出嚟！
餐廳環境
坐低後，waitress放低餐具、set lunch menu同一張點餐紙俾我哋，我同DnA都覺得呢到嘅set lunch似早餐同tea多啲……
呢到真係規距多多！
叫個waitress俾杯水我，結果，隻杯印有「滿記甜品」四隻字……呢到同滿記有咩關係﹖！
100 Bites Brunch ($98)﹕我份餐，嚟呢到早有心理準備啲嘢唔會好食，我呢個brunch果然冇令我失望，真係無甚特別！慶幸佢未至於難食。Waffle雖然唔特別crispy，但唔怕淋，sausage係芝士腸，令我喜出望外，兩片包就真係整得差咗啲喇，沙律菜亦唔夠新鮮……
100 Bites Egg Benedict ($98)﹕DnA點嘅餐，冇問到佢味道如何……不過，佢喺facebook到講咗覺得唔好食……
Kiki Coconut & Pineapple Drink﹕跟餐飲品，上枱時見到杯嘢係藍色真係嚇咗一跳！據說呢隻粉藍色唔係嚟自色素而係加咗少許天然嘅藍柑橘醬而成，明白餐廳要玩gimmick，但始終被隻色嚇親……不過，佢個味道又真係好椰子同菠蘿嘅。
Lala Strawberry and Orange Drink﹕DnA嘅餐飲，都係染色，但起埋感覺士多啤梨啲。
一個鐘頭嘅飯聚，大家咩都傾啲，完全冇悶場。飯後，我倆仲走到拍照區同Kiki & Lala嚟咗張大合照添呀！
拍照區
評分時間﹕
食物：中下
服務：一般
環境：中下 (枱與枱之間距離太近，餐廳甚少Kiki & Lala嘅裝飾……)
衛生：一般
價錢：Overpriced
總結﹕唔試唔可惜 (如果唔係Kiki & Lala迷嘅話，更加唔駛嚟朝聖！)
餐廳資料：
Sanrio Star Dining (Little Twin Stars Pop-up Cafe)
旺角朗豪坊10樓21-25號舖
2191 6638 （不設訂位服務）
日期：9月1日至10月31日
喺娘家食完dinner，執嘢準備離開時……
媽媽﹕妳唔食埋橙先走呀﹖
我﹕咁夜……除非妳切埋粒俾我食啦！
媽媽﹕……
我﹕咁即係切唔切粒﹖
媽媽 (冇我符地)﹕切啦切啦！
嫂嫂﹕妳喺企屋妳老公會唔會切粒俾妳食﹖
我﹕唔會，但佢會剝哂皮，再"meet"開一"kai kai"咁餵我食囉！
嫂嫂立時露出一副唔知好嬲定好笑嘅表情。
細妹﹕算啦！我哋幾個都係港孩嚟架！
我 (一臉得意)﹕如果食蘋果或者梨，我老公會批皮，再切四邊最好味嘅部份俾我，然後自己食個芯。
嫂嫂 (望向哥哥)﹕我嫁咗俾妳亞哥咁耐呀，佢一粒生果都未切過俾我食呀！
我 (立刻護兄)﹕Hey，佢唔識呀嘛！
細妹 (幫口)﹕但佢會幫妳剝蝦殼喎！
我 (再加把口)﹕係囉係囉！我老公都唔會幫我剝蝦殼嘅，佢嫌煩，自己都唔會剝嚟食添呀！
睇完Dr Lam，快快食個lunch趕番屋企，事關我漏咗部叉緊電嘅手機在機……揀咗小王牛肉麵！
喺門口拎飛，等咗陣就入座，座位好擠迫……咁嘅環境我一定唔會點百幾二百蚊嘅牛肉麵嚟食！
餐廳環境
又限人食1個鐘，又叫人最好俾現金，又唔係坐得舒服，又唔算收得平，咁多規矩，我同拾爺未食已經決定唔再幫襯！
快快點咗三樣嘢﹕
半筋半肉麵 ($55)﹕好差嘅一碗麵！完全唔夠熱！啲麵又過淋！牛肉係就係淋，但完全冇牛味……就連呢個冇特別嘅湯底啲味都滲唔到入去，呢碗嘢我真係唔明點解隔離枱對男女一邊食一邊讚好味……仲話下次要試二百蚊嗰款麵……唔通「淋」就係皇道﹖！
台式肉燥飯 ($38)﹕一睇個賣相就覺得中伏，雖然未去到唔好食，但份量唔好再少啲，咁少肉燥邊夠送飯﹖！睇啲肉燥好似好乾咁，但下面其實浸滿油……我覺得佢似係滔完油，再滔肉燥上枱嘅一碗飯……
等了又等，催單後又要再等，先等到嘅﹕
干香牛肉餅 ($24)﹕我好懷疑佢違反咗商品說明條列囉！張相影到咁靚，咁多芝麻，但實物個樣衰到一個點囉唔該！雖然食落佢好夠熱，但啲牛肉超羶！撞鬼！唔知嘅，仲以為自己食緊羊肉……
評分時間﹕
食物：差
服務：一般
環境：中下
衛生：一般
價錢：Overpriced
總結﹕唔試唔可惜
餐廳資料：
小王牛肉麵
九龍灣偉業街33號德福廣場2期4樓410舖
離開鮨處松戶，我哋轉場到Cova飲嘢同食dessert！
餐廳最初俾張門口枱我哋，我當然唔收貨喇，最後安排坐入少少，但都屬出面位置，因為我哋唔係fine dining，又唔係食dessert buffet，所以唔可以坐入去……
一坐低，打工達人已經話環境舒服到想瞓覺！諗諗吓又係喎，我哋之前幾次gathering所揀嘅餐廳都坐得唔舒服……剛剛嘅鮨處松戶、國泰生日飯嘅極尚大喜屋、慳妹生日飯嘅Sinmei Tea，全部都坐得唔舒服……下次嘅Christmas gathering一定要揀嘅環境好啲嘅餐廳！
餐廳環境
四個人叫咗四杯嘢飲同兩個dessert！
Hot chocolate (COVA Cioccolata Calda, $70) X 2﹕味道一般，始終覺得Leonidas啲朱古力好飲啲，味濃啲！
Iced Cappuccino ($70)﹕慳妹之選！
Irish Coffee ($75)﹕打工達人之選！
Torta Di Formaggio & Dolce Passione (Homemade baked cheese tart with fresh passion fruit served with crema gelato, $96)﹕成個甜品都好普通，雪糕唔特別綿滑，甜品更食唔到有幾cheese同passion fruit嘅味都唔夠出……
Tiramisù (Tiramisù cup ~ Follow the traditional recipe of COVA Milan, $86) ﹕又一普通之作……
環境舒服咗，傾偈都傾得開懷啲，慳妹透露完約後會全職湊仔，其實我覺得係好事，經濟許可嘅話，仔女由自己湊，點都好過假手於人！
埋單$514，呢到好明顯係食環境嘅餐廳是也！
評分時間﹕
食物：一般
服務：中上
環境：中上
衛生：一般
價錢：可以接受
總結﹕食環境之選
餐廳資料：
Cova Ristorante & Caffe
尖沙咀廣東道17號海港城港威商場地下G315號舖
2907 3882
中學同學為我補祝生日，我揀咗鮨處松戶！原因係見到Tablemap表示through佢哋訂枱刺身、壽司都有半價優惠！
Book咗7點半，準時上到去，一出lift門就見到餐廳大大個招牌！
行入餐廳，見到原來呢到用渣打卡埋單都有半價優惠，不過……優惠只適用於星期六至四，即係今日冇……睇到呢個牌，我開始有啲擔心Tablemap嘅優惠都係唔包星期五。
向reception表明來意後，對方帶我入座，餐廳環境擠迫，所有餐枱都排到密麻麻，通道全都狹窄過人……我被帶到一通道位，眼見餐廳明明有卡位，於是就要求調位，點知帶位waiter話卡位要俾5人坐，佢哋會隨時加多咗凳要人坐主席位……事實上我真係見到佢哋喺已經唔太行到人嘅通道上多加一張凳喺卡位旁要食客坐主席位……
餐廳環境
冇得調位，我唯有死死氣坐哋。Pat pat都未掂凳，已經感到一陣寒氣，風‧口‧位！雖然我坐嘅係四人枱，但位置擠迫，我又一袋二袋，冇位放嘢，於是叫來waiter俾多張凳我放嘢。等緊張凳嚟時，快快上網睇吓Tablemap今日有冇半價優惠，原來真係唔包星期五！中‧伏‧了！都怪自己睇得唔仔細……揭吓menu，嘩，冇半價嘅話，個價錢實在令人難以接受！雖然唔係叫好貴，因為個價其實同一般餐廳差唔多，但以呢到嘅環境，我被安排嘅座位，我真係唔甘心俾呢個價囉！
當waiter拎凳嚟時，我見旁邊嘅卡位明明只坐咗四個人，於是就問佢點解人家四個人可以坐卡位，但我唔可以，對方竟然答我張枱坐咗5個人……我點睇都係得4個，當然就challenge佢啦，然後另一個waitress話人家訂枱時已要求坐卡位。Okok，佢咁講，我仲可以講乜﹖！
越諗越唔忿氣，想拎袋走！趁佢哋3個未嚟，提議大家轉場！可能我塊面太黑，之前招呼我嘅reception就走嚟問我係咪唔會cut人，話可以俾張卡位我，因為可以轉位，我就打消轉場念頭喇。
喺卡位坐低一陣後，國泰就到喇，我同佢講中咗伏，冇折，佢話冇所謂。等多陣，連打工達人都到埋，慳妹就因為遲放工，所以要遲啲嚟。大家一齊睇menu，決定叫少少嘢食後，就轉場食dessert。
坐低後，waiter會送上一杯茶、一小碟前菜同一條抹手巾。
吉列黑豚咖哩飯 ($120)﹕打工達人同國泰都話個豬扒好食，但我覺得啲黑豚又乾又嚡唔ok喎！啲飯又過濕，加得太多水……收呢個價，絕對係overpriced！
山賊燒雞翼 ($58)﹕得個辣字，除咗嚟自黑椒嘅辣味，我食唔到其他味，差！
日式蟹肉燒薄餅 ($98)﹕所謂嘅蟹肉我哋只係食到一粒粒硬到死嘅軟殼蟹……餅底根本就係意式pizza，硬到呢~~~又一劣作！
雜錦刺身 (特上, $560)﹕每種刺身都有3件，但每樣都唔新鮮！打工達人話要從此blacklist呢間嘢！老老實實，呢啲咁嘅質素，就算有半價都唔幫襯唔過，更唔好講叫我用原價去食！
埋單$750，唔知點解佢照offer刺身半價俾我哋，所以個雜錦刺身只收$280！但餐廳環境真係好差，唔止係因為擠迫，仲係因為我哋全程食完二手煙咁去食飯！我食到咁上下，真係忍唔住要問waitress點解可以咁大陣煙味，佢話可能啲人喺後樓梯食煙……咁呢到嘅防煙門都做得好差，陣味可以攻入嚟餐廳到！我哋已經唔係坐門口位都可以聞到咁大陣味，咁坐門口位嗰啲點算﹖！
成餐飯，大家都係交待吓暑假嘅旅行發生嘅趣事，我、國泰同打工達人都去咗個好攰嘅trip，哈哈！打工達人就話去做嘢，我同國泰明明係俾錢去relax，卻玩到身心疲憊，睇嚟來年要好好plan吓個旅行大計。
評分時間﹕
食物：劣
服務：一般
環境：劣
衛生：一般
價錢：Overpriced
總結﹕唔試唔可惜
餐廳資料：
鮨處松戶
尖沙咀廣東道100號彩星集團大廈8樓
3106 4468
AE白金卡呢排offer咗個優惠俾卡主，就係免費享用La Prairie嘅30分鐘eye treatment服務！咁jetso我當然唔會錯過，今日就去咗試！
約好6點去做，但搵咗陣路先搵到間舖頭，6點13分到到達，店員剛好打俾我，我就答佢剛到門口。
入去坐低填吓個人資料，就跟facial姐姐入房，放好隨身物後，就上床休息。Facial姐姐幫我洗臉，再分析皮膚，其實當時我已經好眼瞓，好鬼想瞓覺，但又唔可以唔俾反應人……終於等到佢分析完，幫我按眼，我就被按按吓後瞓著咗，都唔知facial姐姐幾時出咗房……
瞓到咁上下，facial姐姐就入番嚟幫我搽番面霜，再叫我起身，其實……我未瞓夠……
出番去，人家當然又sell我買嘢啦！因為我一向冇搽eye cream嘅習慣，屋企其實都冇eye cream，達人又曾經讚過呢到啲eye cream好，加上而家買嘢有旅行裝送，於是我就買咗最平嘅eye gel ，當係用$950買eye gel加做eye treatment，加買埋面霜、eye cream、eye serum同面部精華嘅旅行裝啦。
中秋翌日假行假，行到四點幾五點先去開飯 (late lunch)，因為太肚餓，見到餐廳就入，結果……揀咗呢間……
一出lift，就見到餐廳招牌！
行到餐廳門口，望望餐廳內只有一枱食客，餐廳環境頗為擠迫，全為高枱高凳，應該唔會坐得好舒服……不過，當時已經好肚餓，加上呢到仲有tea食，於是就決定搏一搏，坐低咗。
餐廳環境
呢到嘅tea其實只有焗飯嘅選擇，不過點樣形式就好似車仔麵咁，醬汁、飯類同主菜可以自由配搭，另包前菜同飲品，不過……後者全為罐裝或樽裝飲品……
餐單
前菜二揀一，我同拾爺各選一款！
炸蕃薯 (左)﹕完全唔熱，麵粉厚過蕃薯好多！好難食！
芥香昆布條 (右)﹕鹹到呢~~
食完前菜，心感中伏，即時上Openrice睇睇佢個分，驚見有成3.7分，唔同……焗飯會好好味﹖
特式葡汁牛舌珍珠米﹕焗飯熱辣辣，份量足，醬汁多，就咁醬撈飯都可以清哂成兜！但係……我冇expect過個醬汁會咁辣……另外，啲牛舌一啲都唔好食！白烚完後就咁放入去焗，咩味都冇……
日式咖哩汁羊仔柳粒珍珠米﹕都係熱辣辣，份量足，醬汁多，但啲羊仔柳粒好羶……
埋單$76，冇下次！
評分時間﹕
食物：中下
服務：冇服務可言
環境：中下
衛生：一般
價錢：可以接受
總結﹕唔試唔可惜
餐廳資料：
肚餓了串燒烤焗專門店
尖沙咀亞士厘道17-19號6樓
2468 0438
臨近中秋，美心集團旗下食肆唔再offer discount俾AE 白金卡卡主，既然到到都冇折，梗係試吓其他嘢啦！揀咗「樂天皇朝」！
因為今日仍然要番學，大妹又唔鍾意太早開飯，所以揀咗食尾輪，八點去到，仲要等一等先有枱……不過，一埋枱，就見到餐廳好細心地，一早為小王子預備一套兒童用嘅食具。
太夜開飯，小王子餓扁了，嫂嫂倒咗啲提子乾俾佢食，佢嫌太少，不停嚷著要「多多」呢。
坐低後，大家討論點叫小籠包好，最後都係決定要八色，到時再鬥快挾自己想要食嘅味道！十大一小，可以點嘅菜多元化得多，而且我同自己嘅兄弟姊妹口味相近，所以大家點嘅嘢都好合各人胃口。
以下為食物上枱次序﹕
皇朝小籠包 ($88 x 3)﹕先叫咗兩籠，然後再追加一籠，要追加並唔係因為佢整得好好味，只係大家都想再試吓其他味。坦白講，啲小籠包整得幾差，餐廳有指引教我哋挾頂部，好似鼎泰豐咁，但人家真係做到頂部夠硬同厚俾人挾，呢到就唔得喇，我哋要挾中間位，但啲皮又濕又黐，一不小心，就會整穿整皮，湯汁漏哂出嚟……(我同拾爺冇事，但其他人就……)我試咗鵝肝、芝士同蟹粉，最好味當然係最common嘅蟹粉小籠包啦，但其實芝士都唔錯，啲肉入面有煮溶咗嘅芝士，鵝肝仲重口味咗少少，但我覺得所有味道都係一試無妨嘅。
三色瑪瑙蛋 ($48)﹕好鹹！以為面層係雞蛋白，點知係鹹蛋白……但賣相確係靚！
蘿蔔絲酥餅 ($34)﹕好味！外層嘅酥皮絲絲分明，咬落脆而不硬，內裡嘅蘿蔔絲份量十足，而且濕潤可口，讚！
香辣蒜泥白肉 ($58)﹕欣賞餐廳用上XO醬，使整個菜色辛辣刺激，但青瓜同白肉卻被搶去風頭……
老田家菜肉雲吞湯 ($48)﹕冇食到，唔知好唔好味……
重慶紅油抄手 ($46)﹕聽個名好似好辣咁，但食落又唔太辣，味道普通，冇驚喜，但又唔難食。
金陵素八仙 ($42)﹕媽媽揀嘅，睇個樣已經冇興趣試……
瑤柱芙蓉賽螃蟹 ($72)﹕食咗一啖咁大把，試唔真……不過，啲味都幾淡，比起其他咁重口味嘅菜式嚟講，呢個算幾清淡。
豬骨湯鮮肉卷拉麵 ($58)﹕點俾爸爸食嘅，特意叫waiter要求廚房將其煮至極淋。我都試咗少少湯底同鮮肉，前者唔太飲到個豬骨味，後者只覺得佢好嚡……
無錫鮮肉鍋貼 ($32)﹕冇試到……
香滑咖啡骨 ($68)﹕我唔飲咖啡，但又想試吓呢個咖啡骨，鍾意佢咖啡味唔濃，只係好淡好淡，唔愛咖啡嘅我都接受到，但……呢道菜都係過鹹……
成都口水雞 ($68)﹕Overpriced嘅一道菜，一啲都唔好食！雞又唔滑又缺雞味，個sauce又整得唔好味……
揚州蟹粉獅子頭 ($62)﹕好細小嘅一道菜，完全食唔出有蟹粉……獅子頭口感過淋，好似落粉多過落肉，感覺被打劫了……
木樨肉炒拉麵 ($68)﹕試咗一啖，味道好濃……
外婆紅燒肉 ($78)﹕肥膏部份未能煮到入口即溶，口感過硬，瘦肉部份非常嚡口，唔好食……
肉碎欖菜乾煸四季豆 ($68)﹕又係過鹹之作！大妹話食到一粒粒鹽添呀！
揚州糟溜滑魚片 ($88)﹕一向唔鍾意食魚，所以冇食到。
家鄉素菜包 ($28)﹕又係冇試到。
餐廳waiters其實態度幾好，可惜上菜次序好奇怪，前菜、主菜上枱次序完全亂嚟，咁都算喇，白飯應該係一早煮好，一叫即有嘅嘢，竟然係要一等再等先送到……我哋一落單就要求要白飯，用以餵飽小王子，點知……兩籠小籠包加幾碟小食都送到，白飯卻仍然冇影……為免餓壞baby，我哋唯有催單。到後來，我、拾爺、大妹同妹夫都想食飯，落兩個飯，餐廳卻落錯單以為只要一碗，但一碗又好，兩碗也罷，都係等到啲飯菜凍哂都未嚟……又要再催……
清哂枱面餸菜，就到切蛋糕時間！今晚除咗提早做節，爸爸仲指明要為自己個孫提前慶生！順帶一提，餐廳唔收切餅費，幾好！
我哋一齊唱生日歌俾小王子聽，點知個傻豬唔知做乜突然好驚，唔敢望人……
茶錢每位$7，白飯就此12碗，埋單$1469，都算抵食嘅。
評分時間﹕
食物：一般
服務：中上
環境：中上
衛生：一般
價錢：可以接受
總結﹕一試無妨
餐廳資料：
樂天皇朝
銅鑼灣波斯富街99號利舞臺廣場6樓
2177 0903
Eat, Play, Love 