2012 雙馬遊 Day 3

六點鬆啲紮醒，即時起身睇吓睇唔睇到日出，結果……

(呢張走埋出屋外影呀！)

(呢邊唔係太陽升起嗰邊，但日光照住啲船屋，好靚！)

影完相，番上床再瞓過。懶瞓嘅拾爺，應該連我起過身出咗屋去影相都唔知架喇……

瞓到當地時間八點起身，梳洗後，就出發去食早餐。我哋唔想太早去食，因為想個飽肚感可以keep耐啲，哈哈，窮人去旅行係咁架喇！今日天氣依然好好，lucky！

(今日天氣依然正爆！)

去到Ufaa restaurant，我揀咗室外嘅枱，想話對住個swimming pool食嘢，但原來係會熱死架……

以為早餐係buffet形式，點知原來係半自助，麵包、果汁、水果、yoghurt就任拎，然後再喺menu揀三樣嘢食！

我哋揀咗Selection of cured continental meats & cheeses with tomato & basil, Eggs Benedict: poached eggs, prosciutto, rocket & hollandaise sauce Eggs同埋Royale: poached eggs, smoked salmon, spinach & dill hollandaise。Order嘢食前，waiter先問我哋要coffee定tea，拾爺要前者，我就要後者。之後，佢哋再送上butter。麵包 ﹖自己出去攞！

(其實有幾隻tea揀架，但waiter冇問我，就俾咗呢隻我……)

Settle好哂啲嘢之後，我已經急不及待睇吓有咩嘢食喇！

(有三種果汁選擇，全部fresh squeeze！第一種係橙汁！我今日飲咗三、四杯，太耐冇食橙喇，佢又係fresh squeeze，真係好正！)

(第二種果汁！)

(第三種果汁！新屎坑嘅我即刻倒一杯嚟飲，但飲唔夠幾啖就俾咗拾爺，哈哈！)

(好多yoghurt，但原味又太酸，有料嘅又太甜……結果，極愛食yoghurt嘅我，竟然冇咩點食……)

(麵包選擇雖多，但大部份都過甜……就算唔甜嘅，都做得唔夠鬆軟……)

(咁樣拎果醬我都係第一次見！)

(麵包！)

(好多水果，雖然拾爺唔贊成早餐食水果，但我唔理喇！)

(我嘅第一轉！)

(拾爺嘅第一轉！)

出去拎咗三轉嘢食到，order food到喇！

(Eggs Benedict: poached eggs, prosciutto, rocket & hollandaise sauce Eggs﹕好普通，唔覺得個蛋有蛋味，不過用料十足，塊ham好大塊，包食飽你！)

(Royale: poached eggs, smoked salmon, spinach & dill hollandaise﹕ 又係冇蛋味嘅蛋……但smoked salmon冇ham咁滯！)

(Selection of cured continental meats & cheeses with tomato & basil﹕係我唔夠細心，都冇留意到拾爺唔好hams，叫呢個其實拾爺係就我嘅喜好，最後要自己包底，飽到呢……馬代係禁豬肉入境嘅，但有啲ham，我 點睇點食都覺得係豬做架喎……)

食飽飽，先番房拎番個潛水鏡去Dive Centre換。出咗餐廳，見到個靚景，忍唔住又要影吓相先！

(用S90影嘅！)

(用我部單反影嘅！)

(間唔中會見到呢啲……大鳥﹖)

去 到人哋幫我較番fit我個size，拾爺又話已經係最緊……搞到我白白浪費咗噚日snorkelling嘅機會……離開Dive Centre，我哋行去reception到book出海釣魚，原來今日就有得出船，已經有兩pair人報咗名，於是我哋又join埋。本來係打算聽日或 後日先join嘅，因為我上個月M嚟早咗，所以我嚟緊呢次好有可能係聽日……我一心諗住將啲唔駛落水嘅活動安排哂喺唔方便嘅日子架！但難得出到船，當然要 join咗先啦！如果唔夠四人，一係就冇得玩，一係就要自己包船，包船貴勁多！而家都要每位US$75架！(又係未計加一同稅。)

Book 完釣魚項目，就行埋過隔離Como Shambhala Retreat Spa到book定走嗰日做spa。Staff招呼我哋入去坐，俾本嘢我哋揀做邊隻treatment，仲解釋得好詳細俾我哋聽。其實……我一早已經 check好哂，只打算做最平嘅signature spa，最平都要US$140，再加一同加6%稅架！Book咗Aug 3兩點鐘，但雙人房已經被人book咗，要同拾爺分開做喇……喺到book spa期間，staff俾咗杯ginger tea我哋飲，杯ginger tea好辣！但辣得嚟又酸酸甜甜咁，幾好飲喎！同我以往飲開嘅好唔同，佢個味複雜啲！但正！

(喺到hea吓都幾正架！)

出開嚟，book完spa，行埋隔離間boutique仔。睇中咗套泳衣，不過要成百幾蚊美金……唔會買喇！但真係好靚！拾爺都睇中啲泳褲，但又係百幾蚊美金……呢隻Kiwi牌子係名牌嚟架﹖怒我大鄉里，真係唔識……

之後，我哋過埋隔離個Hydrotherapy Pool到玩添。入到去，見到今朝幫我哋揸機影相嘅日本couple(係個男嘅主動話幫我哋揸機架！)，不過佢哋已經玩完走喇。有staff經過，仲教我哋點開啲制做水按添！拾爺又玩得好開心！

喺Hydrotherapy Pool玩飽後，我哋又去番噚日水色最靚嘅地方影相，坐喺淺水處任由啲浪衝過嚟，個感覺都好正架！呢個淺水位，會見到好多鯊魚BB架！我有時坐坐吓，就會 見到佢哋游過嚟，雖然明知佢哋冇殺傷力，但都好自然地嚇到彈起身走人，大佬成四、五條游過嚟喎，鯊魚喎，就算係BB都驚囉……

(鯊魚BB呀！好難影得清楚……)

喺 到玩夠影飽相後，就同拾爺番房玩snorkelling喇！我今日大膽咗，因為師奶仔性格嘅我，覺得俾咗咁多錢，唔可以驚到唔玩，咁樣唔抵嘛，哈哈！換咗 個鏡，我有snorkel到架！不過，我都係唔習慣用呼吸，平時我慣咗口吸鼻呼，所以snorkel得唔耐……而且我始終唔敢離開露台條樓梯太遠……所以 其實睇唔到啲乜嘢……拾爺見我仲係未夠放膽，於是改為同我玩著住件life jacket喺個海到飄，幾難得我夠膽飄完自己搲水企番起身，但唔爭氣嘅我，飄多兩飄有少少暈……睇嚟我同水都係無緣架喇，玩飄都暈浪……

暈 暈哋，就上番露台曬吓太陽，幫拾爺影吓相。等拾爺游完水，各自沖完涼後，就食lunch。Lunch嘛，其實我哋都唔太肚餓(因為早餐食到好飽！)，所以 食番自己帶嚟嘅方包。不過……旅行前忙於買衫，出發前一刻執嘢食時先發覺茄汁豆只有一罐……結果呢餐我哋要捱白麵包……

食 完嘢後，喺間屋到hea，hea到四點幾就出發去reception，我哋要出海釣魚喇！話說我好怕會暈浪，所以今朝喺reception到，已經問定人 拎暈浪丸，四點就啪咗一粒喇！雖然今日啲staff依然話個sea好calm，但我今日落水，覺得大浪過噚日囉！其實真係好「騰」，但一場嚟到，又唔想只 係同拾爺窩在間屋裡，所以……點都要撐住！

(四點幾時嘅Cocoa Island！)

我 同拾爺最先到reception，之後就陸續出現另外兩pair人喇，一pair係韓國人，另一pair係強國人。三pair人到齊，架船又ready 時，就有個staff出嚟自我介紹，話今日由佢帶隊。然後，大家就跟住佢上船喇。見到架船，開始驚……韓國人首先上船，我就專登俾對強國人上先，個男嘅都 有禮貌，同我鬥講﹕You first！哈哈！

(我哋架釣魚船！)

(圖左嗰pair就係強國人喇！)

(領隊講解今日流程。)

(犯賤嘅我，坐遊艇就暈，坐呢啲就冇事！身後係韓國人！)

釣魚船不斷向大海開出，我哋就見到晚霞、日落同月亮。最正係睇埋海豚！其實酒店有睇海豚活動架！收費唔平，兩個人要US$250，又係未計加一同稅！我哋冇join呀，而家更加覺得唔join都冇所謂啦！我哋仲見到其他船隻，應該係其他酒店安排嘅出海活動！

船員見到我同拾爺不斷幫大家影相，就好主動話幫我哋揸機，仲叫我哋行到船頭影添！拾爺好驚驚，捉到個欄杆好實，哈哈，佢個「騰」樣我就唔方便放上嚟喇！

(其實我都驚驚哋隻船會拋鬼咗我出去……原來要玩「I am the king of the world！」係有難度架！)

我哋影完相，就索性坐出去。船員主動幫另外兩pair影相，但強國人嗰pair只有個女嘅出去影，而且佢好大膽，雙手完全唔駛扶欄杆，喺個船頭到走嚟走去，睇到我同拾爺忍唔住叫好！哈哈！

當 船隻差唔多駛到目的地時，領隊就教我哋點樣用魚絲釣魚。之後，大家各自搵個靚位放魚絲。女仕通常有特別優待，船員幫強國女人放魚絲，呢頭放完，嗰頭幫佢釣 埋上嚟，係一隻大紅斑！！！見到有人釣到魚，我哋當然都想釣到啦！我亦有船員幫我放魚絲，佢又係呢頭放絲，我伸手想自己接番時，佢就突然同我講 ﹕Fish，之後幫我拉埋上嚟，然後就成條魚隊俾我……拾爺即時舉機幫我影相，哈哈，咁都算係我釣到咩﹖我條係黑斑，個size細強國人嘅紅斑好多，之前 領隊講過如果條魚太細，就要放番入海，所以我影完相，就問佢哋條魚係咪太細，領隊諗咗一陣就話俾我keep，嘻，聽日lunch有著落喇！呢個釣魚 trip包咗幫你煮好魚穫做翌日嘅lunch架！

兩條魚上釣 後，就係一輪沉寂。船員們自己拎哂杯同嘢飲上上層休息，我哋就喺下層等魚上釣。只有一個船員陪我哋一齊釣魚，佢就利害喇，三兩吓手腳就有魚上釣。過咗一 排，個個都冇魚上釣……船魚叫我哋拎條魚絲上嚟check吓，有的已經冇咗個魚餌(我就係其中一個，我連條魚幾時嚟偷食咗都唔知……都feel唔到特別郁 動……)，有的個餌浸到霉哂要換。

因為大家都太耐冇魚上釣， 領隊決定將船開去另一處。之後，大家又係要繼續等。強國女人好active，走出船頭搵有利位置，反而佢個另一半就求求其其是是但但，好似係嚟陪太子讀書 咁。等等等，有時feel到有魚食個餌，但一收絲佢就走……等到天黑，韓國女人有魚上釣，佢真係真真正正自己釣到魚架！條魚都大，大過我條啦，哈哈。

然 後，又係一輪沉寂。其實去到後期，我已經開始支持唔住，暈緊船浪……因為架船要停定嚟釣魚，所以有啲「浪」……聽到領隊話剩最後十分鐘，咁啱有船員嚟幫我 check魚絲(其實佢哋間唔中會幫我哋check吓，但又係幫女仕多囉，哈哈！)，我索性俾咗條絲佢幫我釣，瞓咗喺sofa到抖。個個都知我暈浪，有船 員俾埋啲毛巾我當枕頭瞓添。

夠鐘，冇魚再上釣，船長開番架船 番Cocoa Island喇。番歸途中，聽到有船員走嚟問拾爺聽日嘅lunch，想條魚點整法，拾爺問佢係咪得一條，佢哋話會俾多條拾爺。我都估到架喇。個個船員都上 去玩，點解會剩番一個喺到釣魚﹖因為我哋釣唔到魚，佢哋就要幫手釣夠數，so that聽日lunch人人都有魚食嘛！迷迷糊糊聽到拾爺揀咗wood grill同char grill，本來佢揀十二點食lunch架，但我暈住都糾正佢，早餐咁多嘢食，十二點都未落格，點食到lunch呢﹖所以，最後我哋改番做一點。另外兩 pair人，我聽到佢哋好似唔知有得食lunch咁(乜佢哋join活動前，唔會睇吓活動包啲咩架咩﹖！OK, 一定係人哋太有錢，都唔志在。)……韓國人同我哋一樣揀一點食，強國人嘛，覺得俾US$5嘅tray fee唔貴，所以揀in room dining。

(圖中最細嗰條黑色魚仔就係我聽日嘅lunch喇！最大嗰條咪就係屬於強國人囉！)

番到Cocoa Island時，見到個小島勁黑！

是晚玩到勁攰，真係飯都唔想食！窮人如我哋，再以杯麵同是日水果充飢！

(我哋晚晚都清哂啲水果架！)

2012 雙馬遊 Day 2

雖然酒店老闆話會八點morning call我哋，但做事一向小心謹慎嘅拾爺，噚晚都係較定鬧鐘，較咗七點半，但我六點幾已經醒咗……聽到出面間唔中會有車經過，不過噚日搭咗咁耐飛機，雖然一直合埋眼，但瞓唔到，所以逼自己喺張床到抖吓。

換好哂衫後，其實都只係著番噚日嗰套，我哋打算到咗Cocoa Island後先再沖涼換衫。我行出露台影吓相，想唔到呢到周圍雖為工地，但都望到海架！(不過要打側望……)

(酒店leaflet都話可以提供一系列嘅水上活動架！原來係要自己行到老遠又或者佢哋車去呢個被各工地遮住的海！)

八點鐘，我同拾爺都等咗一陣，仲未有人嚟叫我哋（房間冇電話，所以morning call都應該係人肉方式架喇！），拾爺講得啱，酒店啲人真係唔多可靠！我同拾爺都覺得唔會有人理我哋，於是就走出房，落去lobby，點 知……lobby係冇人，仲連燈都冇開……心知呢到又係唔會有人理，所以改為往上走，行上天台睇吓有早餐食未。噚日其實我冇乜點食過嘢，所以有啲肚餓 喇……

(出房後，我哋樓層嘅common room，都裝修得幾靚架！不過，唔會有機會用到囉！)

(沿住呢條甚有渡假屋feel嘅樓梯落去，就到lobby。)

(Lobby道門)

(冇人on duty嘅reception desk)

(我哋噚晚就係坐喺到呆等安排。)

上到天台，見到有職員on duty，推門而入，搵個位坐低等食早餐。Waiter又即係chef先送上橙汁兩杯，我同拾爺係唯一嘅客，喺到包場影相。呢到隔離雖然係地盤，但都望到海，向上又有藍天，偶爾有sea plane飛過，可惜影唔切相……

(天台景觀)

(喺到食早餐。)

(Sea Plane呀~~影唔切lu……)

等咗一陣，早餐上枱，之前喺Agoda訂房時，睇過有讚呢到早餐嘅comment，所以都有少少期望，點知……碟上只有兩塊toast、butter and jam各一盒、蘋果同橙各兩片，同埋烚蛋一隻……好唔吸引……快快食完早餐，免得被flies捷足先登！

就嚟食完時，有另一對情侶上咗嚟，我哋食完就落樓下影吓相，再番房坐。

(我哋就係住呢間酒店！)

(酒店最下層，都話連間酒店都未完工架啦！)

(點睇都似渡假屋多過酒店！)

(酒店大門)

過咗九點後，落lobby睇吓有人未。係就係有人，但lobby只係坐滿住客……同拾爺正想轉身離開時，有人嚟喇，拾爺即時問佢幾點集合出發去機場，佢叫我哋九點四落嚟。

番房後拾爺本想再hea一陣先，但我寜願早啲落lobby等，我怕佢哋車到就走，唔等我哋……拾爺唔想自己捧喼落樓，我明！因為個喼真係好重，捧落樓梯都幾攞命！好彩，一出去，就有職員經過，佢仲主動幫我哋拎行李添！

落到lobby，佢哋就話車到，跟住一大堆人就跟住佢哋落樓搭車，今次酒店安排咗一架旅遊巴，除咗我哋，仲有今朝一齊食早餐嘅情侶，噚晚同我哋一齊到步嘅香港couple，同埋一家三口。

大家都上哂車，連行李都搬埋上車後，司機就開車喇！噚日接機嘅staff今日又負責送我哋去機場，佢冇坐低，企咗喺上落車嗰位到，車門冇閂到，佢不時伸上半身出車外吹風，好鬼危險！

同 一條路，噚晚同呢刻嘅感覺截然不同！噚晚黑漆漆，街燈都冇支，只靠車頭燈照明，馬路雖闊，但兩旁完全冇欄杆，一下唔小心就會衝出大海……呢刻喺充沛嘅陽光 下，見到湛藍大海，未到小島已經感覺到呢到個海有幾靚！沿路所見，機場呢個島有好多正在施工嘅地盤，我估當地政府有意發展呢個小島。

到達機場後，我哋跟住酒店個staff行番去噚晚出閘嘅地方，今日所見，仍然有人舉牌接機，但數目就比噚晚少喇。我哋跟住酒店個staff行，見到唔少resort都有set counter去接待住客，我同拾爺努力搵Cocoa Island嘅counter，但搵唔到……其他住客都搵到人接佢哋，只剩我同拾爺……酒 店個staff帶咗我哋去一間叫Coco嘅resort，但resort個名冇Island喎，我同嗰邊講我住嘅係Cocoa Island，佢哋話係另一間嚟嘅，而且呢間酒店冇set counter……點解會咁架﹖！Cocoa Island唔係5星酒店嚟嘅咩﹖！唯有繼續跟住酒店個staff行，好彩佢冇一到機場就丟低我哋啫。Travel agent講得啱，馬代人做住客交接做得幾盡責。

就喺我覺得Cocoa Island應該唔會咁早派人嚟接我哋，我哋要咁早嚟係因為呢間hotel想就哂所有住客出機場嘅時間，先夾硬車埋我哋嚟時，就有Cocoa Island嘅staff approach我哋，yeah，終於交接成功！Cocoa Island個staff話酒店架船未到，叫我哋坐低等吓，佢一見有船，就番嚟接我哋。

(我就喺坐喺呢排凳到等，拾爺就周圍影吓相。)

(朝早開番個counter喇！)

(之前plan去Maldives旅行時，覺得唔一定要揀可以搭sea plane嘅島，而家又覺得試搭吓都幾過癮！)

(有啲人係專程走嚟呢到滑浪架！)

等咗幾個字後，Cocoa Island個staff番嚟接我哋喇，船到喇！於是我哋就跟佢行出碼頭。由於Cocoa Island距離機場唔遠，所以搭speed boat就到。我心中嘅speed boat係好似2008年去Davao時嘅Pearl Farm咁，真係搭快艇入，點知……Cocoa Island安排咗隻遊艇過我哋嘆囉！

(超豪內籠！)

有隻咁靚嘅遊艇，當然應該好好享受啦！可惜，我就係唔爭氣，一上船，就暈浪……我都唔想架，但真係好大浪，架船未開時，不停地「浪」，我真係支持唔住……酒店派咗個女仔嚟serve我哋，佢先幫我哋著救生衣(規定咗要著喎！)，再講解件衫。然後，佢見我暈，就提議我哋上上層，話會定啲喎。

(離開馬累市lu。)

上 層係定啲，而且我哋坐埋上層嘅captain位，幾威威呀！只係……我個人就係衰，一暈開，就係暈……喺上層坐坐吓，都係要伏喺拾爺個膊頭到休息。不過海 風吹過嚟，係好舒服嘅。同埋Cocoa Island送上凍毛巾俾我哋抹手或敷臉(有人真係咁做架！天氣熱嘛！)，條毛巾仲有隻佢哋嘅signature嘅香味，我好鍾意隻味呀！

45分鐘後，終於到喇！

(遠望我個dream place！)

我第一時間落船，實在要腳踏實地一下，符合番我本身性格，哈哈！船差唔多到時，有個女仔喺Island行出嚟，陪我哋搭船嘅staff話佢負責接待我哋。然後，兩個staff一齊take care我呢個暈船浪人。陪我哋搭船個staff仲話今日個海好calm，我想像唔到佢大浪時會係點，我諗我會暈死喺架船上囉！

(拾爺話我最威威，有兩個人服侍。)

暈浪歸暈浪，落船一刻，都不忘望多兩眼呢個咁靚嘅小島。啲水真係又清又靚，呢種藍真係其他地方搵唔到架！(擺明主觀感覺，但亦可能係客觀事實架！)

(睇到咁靚嘅風景，頓時覺得暈幾浪同船浪嚟到呢到都係值得架！)

我哋跟住接待嘅staff到reception，兩個大椰子已經ready好去welcome我哋。仲有呢到嘅senior manager，佢一早喺到等住握手歡迎我哋。(之後，我發現佢嘅工作都只係迎吓賓，同啲住客吹吓水，好疏乎！)

俾 咗張hotel voucher接待人後，我就同佢講冇帶marriage certificate嚟，佢問我有冇soft copy俾到佢，我都話冇。佢話佢哋會去double confirm，真係唔知佢可以點confirm喇，搞到我驚驚哋添。其實要呃佢哋唔難，都有人提議過我photoshop咗張結婚證書，但我唔想咁樣， 為咗呃個honeymoon offer做刑事嘢。其實個honeymoon offer係travel agent幫我落嘅，我都有同佢講我唔係，佢話照落睇吓對方俾唔俾喎。搞好哂手續後，接待人就帶我哋去我哋間房，佢話酒店upgrade咗我哋間房，由 Dhoni Suite upgrade 去Dhoni Loft Suite，其實可以住Dhoni Loft Suite已經好夠，我反而唔想再upgrade去Loft Villa，因為我想住船型屋，哈哈。Dhoni Suite同Dhoni Loft Suite嘅分別在於後者多一層，空間更大！

離開reception area，穿過沙灘，踏上木橋，放眼就係藍天、白雲、清水、船屋，入到自己間船屋，房號係825，如果可以再過一間826即我個生日日期就perfect喇！

入屋後，接待人略略同我哋簡介一下，我見有樽champagne喺到，應該係個honeymoon offer嚟嘅，但我同拾爺都唔飲酒，於是就話唔要喇，佢話會搵人拎番走。接待人離開後，就係我哋做指定動作嘅時候 — 影相！

(入屋後，先經過呢個特大衣帽間、洗手間同埋浴室。圖左上方嗰個夾萬，就係我哋之後幾日用嚟store貴重嘢嘅地方！以前去旅行都唔用呢啲嘢架！但嚟到呢到又唔同，唔會再孭哂所有嘢出去，只求輕便裝出動！)

(俾住客出沙灘用嘅basket。)

(兩個洗手盤，可以同拾爺一齊刷牙、洗臉，唔駛爭！)

(呢間房有好多水，全部用呢到嘅玻璃樽裝，好鍾意個樽！)

(浴室！拉開簾係塊磨砂玻璃，睇唔到出面個景……不過，我即時索吓啲沐浴露，聞吓係咪頭先條毛巾嘅味，真係！開心死！我決定要做cheap嘢，就係儲起用唔哂嘅沐浴露、洗頭水同埋護髮素！實在太愛呢隻味喇！)

(除咗浴室，仲有浴缸，旁邊仲擺放咗浴鹽，消毒吓個浴缸就可以浸浴喇！)

(離開集衣帽間、洗手間同埋浴室三大功能嘅大房，進入大廳前先經過呢條樓梯。)

(沿樓梯上，就到我哋嘅寢室。)

(呢到都有洗手間架！)

(由二樓寢室望番落個廳。)

(影音組合，電視機右面有個插口位，可以放ipod上去聽歌或叉電，下面係DVD player，住客可以去reception desk到借碟睇！)

(勁愛張sofa，瞓喺到勁舒服！而且仲對住出面個海呢！)

(Honeymoon offer送嘅香檳，不過我哋冇要到！)

(呢本書講咗好多呢頭會出沒嘅魚，其中一種會attack人類嘅，接待人叫我哋一見到就要遠離佢！)

(露台！可以坐喺到對住個海嘆吓茶！)

(旁邊嘅樓梯係可以俾我哋直接落海玩嘅！)

(又或者曬吓太陽！)

(呢到間間房都有露台對住個海架！)

(餐枱旁幅牆！)

(呢到每日都有水果供應。)

(仲有餐具！)

(Cocoa Island俾我哋嘅入住cert！)

(茶水部！)

(咖啡口味亦有多種選擇！不過我唔飲咖啡，冇得試……)

影完相，先沖番個涼，換件乾淨衫，再醫醫肚。嚟馬代用咗唔少錢，深知喺到用膳又會係一筆好甘嘅使費，所以，出發前，我已經同拾爺講咗我哋要每朝食飽啲，然後晏晝食個杯麵，夜晚先再出去食嘢！

為怕大食嘅拾爺食杯麵唔夠飽，出機場前，我哋去咗山崎到買咗一包方包，之前又喺Taste買定罐頭，實行茄汁豆方包，係杯麵以外嘅另一選擇！由於我同拾爺都唔太餓，加上麵包到期日比杯麵早，所以呢餐先食包！

(出露台食，好feel啲！)

(兩隻烏鴉覬覦我哋啲嘢食！其實我頭先影相時，已經見到隔離房冇執番露台嘅嘢食，引哂啲烏鴉撲埋去，好恐怖！)

食飽飽，就出去Dive Centre到借snorkelling equipment！

(門口，出面有兩張凳，可以坐喺到望另一邊海！)

(我哋住嘅係船型屋，再高一級係水上屋，唔係船型，喺遠方！而家行緊嗰邊係日出嘅方向，夜晚又可以望到月亮。呢啲筍位，當然俾哂啲貴房住客啦！另一邊望日落，就係超豪水上屋，可以fit到一家人住架！勁靚！遲啲有相睇！)

(唔鍾意坐喺自己屋前，可以住出嚟，欣賞吓個藍天白雲同清水幼沙。)

(其實八月屬於馬代雨季，所以亦係淡季，但我哋真係好好彩，今日天氣極好！入嚟時，我都問過接待人八月會唔會少啲人嚟，佢話overall會，但Cocoa Island唔會有旺、淡季之分，因為呢到房少，所以長期爆滿！)

(餐廳！接待人話呢間係award restaurant，我喺網上都睇過有人讚呢到啲嘢好食！)

(其 實Cocoa Island好細架咋！之前上網都有人講過20分鐘就行完。個島其實只有reception, visitor’s lounge, dive centre, spa centre, yoga pavilion, gym room, hydrotherapy pool, swimming pool, 一個bar同一間restaurant。我哋嘅屋全部都係喺水中所建，呢張相就係我位處島上，影番過去啲屋到喇！)

同拾爺借完snorkelling equipment，就番房換泳衣(泳衣照實在不能出街！拾爺都拒絕人前露點，哈哈！)，跟住就喺自家露台到落海玩喇。由於我仲未學識游水，所以就算有救 生衣，就算知道係會浮，就算啲水其實好淺，基本上我可以企喺海到，我都仲係好「騰」……拾爺用咗好耐時間去安撫我，氹我遠離露台條樓梯……雖然我嘗試玩 snorkelling，但個潛水眼入水……拾爺又搞佢唔掂，所以最後我哋放棄咗玩snorkelling，改為游吓水。拾爺陪我練咗一陣水，我就自己上 番露台曬吓太陽，拾爺就自己去游水喇。可能好多人會覺得唔識游水，唔敢snorkelling，嚟馬代好嘥，但我覺得喺個咁靚吓環境下，瞓吓覺、曬吓太 陽，甚至係hea吓都值！每個人去旅行想要嘅嘢唔一樣，我唔係一個好enjoy水上活動嘅人，所以我唔會覺得玩唔到係嘥，我去旅行最concern嘅係個 景，有靚景睇比shopping比喪玩更緊要！所以，就算番到香港有邊個話我去馬代係嘥，我都會好肯定同佢講，嗰到靚到就咁去坐都值！

其 實之前同拾爺講要去馬代，拾爺都質疑過我唔識游水，去嚟唔知做咩。為此，我都唔開心過。因為去馬代唔平(雖然我哋已經係揀咗問間平價五星酒店架喇！)，我 唔想用咁多錢後，拾爺係唔得盡興。但嚟到呢到，見到個咁靚嘅環境，加上間屋又大又靚，拾爺開心滿足嘅笑容，令我覺得自己冇揀錯旅行地點。見到拾爺玩水玩得 咁開心，我覺得就算自己玩唔到，都冇嚟錯！唔通我唔識游水，就要剝削埋我另一半去享受陽光與海灘嘅權利﹖！嚟到呢到，見到個靚景當然開心，但其實我最開心 嘅，係見到拾爺開心！拾爺，you know I love you！

玩咗陣水，我哋就出去影相喇！唔好嘥咗個靚景嘛！喺到要提一提，買 防水相機真係明智決定，唔駛成日怕整濕部S90，又可以影吓大家個水底樣！我哋此行第一次帶腳架，不過只係帶個細嘅，冇辦法啦，我哋出親門就帶好多嘢，實 在帶唔到大腳架……好彩呢個島人少，用細腳架就ok喇！(唔怕俾人拎咗部機走，一定追得番，哈哈！)之前我哋都係喺自己間屋或者對面餐廳個海到影相，點知 行過少少呢邊啲貴房區域，竟然見到啲海水色有所不同！嘩！勁靚！我鍾意呢隻藍呀！

喺到影完一輪相後，我哋繼續環繞個島行，見到餐廳set哂枱，應該有人喺到住夠5晚Villa得到beach dinner呢個honeymoon offer。但其實入夜後，成個beach都黑漆漆一片，喺到食dinner都唔係咁盞……

繼續行，行到因為潮退而生嘅sandbank。我哋唔敢行太遠，因為當時已經見到有兩邊海水開始有合番埋嘅跡象，我又唔識游水，一陣冇咗條路都唔知點番去……

(好多烏鴉！)

(開始日落喇！)

(拾爺有時都幾爛漫架！)

我哋見開始日落，就行番房喇。想像到呢到一入夜就會好黑，咁黑都影唔到相，不如早啲番房享受吓住大屋嘅感覺！番房途中，見到佢﹕

其實喺到會見到好多魚架！唔同種類，對於鍾意睇魚嘅拾爺嚟講，係一大享受！

(頭先介紹咗日出嗰邊，呢邊就係望日落嘅。放眼望過去，大部份都係我哋嗰種房型，只有一間係次一級即係我原先訂嗰級……去到最尾尾，就係最頂級嘅水上屋，真係又大又正！有個好開揚嘅露台俾佢哋睇日落呢！好想住吓！)

是 晚晚餐，冇出到去食。因為……呢到間award restaurant就係一碗湯都要US$18，食個pizza都要US $20，仲未計加一同6%稅。我哋又唔太肚餓，冇理由叫兩個pasta架嘛，但只叫一樣嘢食，又好似好樣衰咁……叫room service咩﹖原來要收US $5 tray fee。食杯麵算了！

(拾爺唔夠飽，食多樣嘢！呢盒嘢就嚟夠期，所以帶埋嚟食！)

加埋酒店提供嘅水果，飽哂！食完就沖涼瞓覺喇！馬代時間比香港慢三個鐘，但我完全適應唔到個時差，呢到十點幾時，我已經陷入半昏迷中了……

2012 雙馬遊 Day 1

九點起身，為今年夏天嘅雙馬之旅作最後準備 — 即係執行李，哈哈！每次同拾爺出門都會俾佢搞到好緊張架！

本來打算十二點出門口，但搞搞吓又過哂鐘……好彩一點鬆啲都到到機場。今次個車費好平，每人$3.5咋！多謝港鐵個搭十送一優惠，我哋用免費飛搭到去東涌，再搭S1巴士。不過，S1左兜右兜，搞到我暈車浪……

去馬航counter check in後，就快快入去搵lounge，雖然剩番半個鐘時間，但都要入去食嘢！

香港機場有兩個The Travelers’ Lounge，我上次去Toronto同亞頭入嘅，跟呢次同拾爺入嘅唔同，今次呢間好似大啲！

快快拎咗啲荷葉飯就番位食，但食咗幾啖就食唔落……應該係因為暈車浪，所以冇胃口……為免肚餓，我改為食啲味道較淡嘅「港式魚蛋粉」。只係……我連一小碗都食唔哂……

差唔多兩點時，我就同拾爺趕去閘口，去到啲人已經排隊上機，但咁早上到去又只係等……接近兩點九呢個起飛時間，竟然仲有人可以上機！喺機倉呆等令我好唔舒服……我不嬲都怕搭飛機，雖然今程只係三個幾鐘，但一入機艙，嗰陣味經已令我個胃反一反，差啲嘔……

三個幾鐘嘅機程，本來雄心壯志想話睇吓戲，點知我個位嘅remote壞嘅……加上個人暈暈哋，所以就改為瞓覺，但係馬航機啲位真係唔多舒服，完全瞓唔到……最慘係個飛機餐好濃味，聞到陣味我又唔舒服……

過咗痛苦嘅三個多小時後，我同拾爺就喺吉隆坡機場等待去馬里嘅機。要等成兩個鐘咁耐，我哋當然又去lounge坐啦！亞頭果然冇講錯，香港嘅lounge已經叫多嘢食，吉隆坡呢個真係……不過都叫有忌廉雞湯飲吓，仲有雪糕食！(拾爺唔俾我食架，但我唔聽話，哈！)

(咪睇杯雪糕賣相唔錯，其實唔好食……)

坐到七點九，就行去閘口等上機。由lounge去閘口，要先搭接駁train。去到閘口，又要做登機檢查，之後就等上機。八點九嘅機，八點半先開始放人入去。
今 次架機細啲，而且坐唔滿，不過座位舒服啲，只係……唔知點解我仍然暈浪……今程個飛機餐，我掂都冇掂過！終於捱到landing，點知又遲遲唔放人落 機……最後，當我腳踏馬代土地嘅一刻，之前杯古古力雪糕就給嘔番哂出嚟(即時被拾爺鬧我唔聽話食雪糕……根本就唔關事！)……嘔完之後，成個人舒服哂！不過，就影唔到喺停坪嘅相……因為當時拾爺要幫我拎哂所有嘢，冇手揸機喇……

同拾爺排隊入境，拎行李後，又要過多關安檢，之後出到去，就見到好多人舉哂牌，全部都係嚟接住客嘅酒店人員。我努力睇吓有冇自己個名出現，見唔到……但見到 有人舉住我哋會入住嘅酒店名牌。我拎張voucher出嚟確定後，就同拾爺行過去，對方喺佢張list到搵到我個名後，就叫我哋跟住佢行。行咗幾步，又有 一pair人(香港人嚟架！)走嚟，酒店staff帶我哋行埋一邊坐低，叫我哋等等，因為仲差一pair未到。

(前面堆人就係等緊住客嘅酒店staff或者係等緊被接嘅住客！)

(我哋就係喺呢堆枱凳到等最後一pair人嚟。)

終於等到最後一pair人嚟(兩個強國男人囉！)，洒店staff就帶我哋行出去等車，行出去見到有air taxi counter，不過冇開。亦都有上落車同船嘅地方。馬里機場位於一島上，馬累市中心則喺另一個島。大部分酒店都集中喺市中心個島上，過去要再搭船。但我哋今晚住嘅酒店，同機場同一個島，所以搭車就得。
以為酒店有車接我哋，原來佢哋call咗的士！不幸地，另一pair香港人坐咗部細的，我哋要同強國人share一部van……

(遠方嘅船就係搭去對面小島同埋酒店嘅speed boat。)

(我哋喺到等上van。)

坐 van仔去酒店時，feel到架車開得好快，拾爺見到時速開到百三公里，對於一向鍾意坐快車嘅我嚟講，本來唔係咩問題，但啱啱先暈完機浪，再坐快車，我個 胃實在係handle唔到……加上沿路黑漆漆一片，馬路兩旁就係海，日頭行車就係風景優美，夜晚嘛，荒涼得叫人心寒！雖然心知佢哋應該開慣呢啲快車，心入 面仍然驚會發生意外……

終於捱到去酒店，之前喺網上睇過住客comment，都知道間酒店近地盤，但估唔到係，佢周圍都係正在施工嘅爛地，就連酒店本身都好似仲未完工咁，荒涼到呢！

落車後，我哋先跟另一個staff入屋，well，我咁講係因為間酒店似渡假屋多啲！先上一樓lobby，等佢哋settle down後，老闆致歡迎辭，然後就叫我哋填form，form入面問好多個人資料，我同拾爺唔想透露，所以都漏空唔少！

(酒店lobby，個staff推緊我哋個喼入嚟，辛苦哂！)

填完form又要繼續等，對於馬代人嘅辦事效率真係不敢恭維！我唔係要佢哋做事好似香港人咁快，但至少要體諒眼前搭咗兩程機嘅客人已經好攰，加上當地時間已經係接近十二點，我真係好想即刻番房，沖個涼再上床瞓。

終 於等到佢安排完該對中國籍男子後，就到我哋喇！老闆話我哋原先訂嘅係superior twin room，但呢種房full咗，所以upgrade我哋去deluxe喎！不過，我本來打算聽朝十點半到機場再坐speed boat去Cocoa Island，就因為對方嗰邊要就番其他客，而被迫改早到九點半……老闆話會八點morning call我哋，仲叫我哋放心，話一定有足夠時間瞓覺。

上 房後，打開房門，真係覺得自己入咗長洲渡假屋！房間冷氣一早開咗，而且係勁凍嗰隻！其實頭先搭嘅嗰架車，啲冷氣都好勁！乜呢到啲電費好平架咩？！房間唔算 好大，由於隔離係地盤，所以會有小昆蟲出沒！呢到未至於污糟，但我唔覺得整潔。反正只係逗留幾個鐘，呢到已經係平價(都要六百幾蚊架！)中嘅理想之選喇！

(我覺得Superior twin room同deluxe room嘅分別只在於張床由兩張單人床變成一張雙人床！)

(右面到門外係露台，但呢到門絕對唔可以打開，因為對面係地盤，一下唔小心放咗隻蚊入嚟，就成晚都唔駛瞓……)

(洗 手間，企缸好大，但個馬桶唔太得，所以是晚我冇辦大事，入到Cocoa Island用番個五星級馬桶先再辦啦！值得一提，馬桶旁個小花灑應該係俾某種族人仕辦大事後用嚟洗手架！點解唔用洗手盤洗﹖因為佢哋用手清潔個出「事」 位架嘛，用洗手盤洗，咪洗哂啲便便落個洗手盤到﹖！到時又用番嚟洗臉咩﹖！)

其實番到房後，我仍未由暈機浪中ok過嚟，所以拾爺提議我唔好沖涼，直接上床瞓。但，搭咗咁耐飛機，我都想沖個涼，抖數吓精神。不過，我就攰到冇用洗臉奶同lotion，用清水洗完臉後，就上床瞓喇。

是晚熄咗冷氣瞓，因為天花板把吊扇已經好夠涼！拾爺話後悔間屋冇裝吊扇喎！

Ruby Tuesday

渣打卡有六折優惠，於是又去Ruby Tuesday開餐！

Ruby Tuesday呢排做緊promotion，非會員可以用優惠價$148食rib eye steak，足10安士嘅扒，仲有焗薯做配菜！應該可以食得飽人！本來我係想食burger，因為呢到啲burger好juicy，但拾爺唔想食……所以最後揀咗Parmesan Shrimp Pasta($228)，餐廳推介之一！

落order，waiter問我個扒要幾成熟，平時我會要七成，今日想試六成，但佢話 冇 六成，一係well done，一係medium well就要七成，咁佢就唔好問我要幾成熟，直接問我要幾熟，我就用英文答佢啦！落完單，叫佢俾水我哋，佢問我要凍水、暖水、熱水定唔知咩水(又一次鬼食 泥囉！)，我話要暖水，點知佢轉個頭，俾咗兩杯出哂煙嘅熱水我哋……因為啲水太熱，拾爺再叫個waiter，叫佢俾杯凍水，點知個waiter極唔禮貌地 表示﹕「都要轉頭先得架喇！你點都要等架喇！」呢個語氣同答覆已經好冇禮貌架啦，最過份係，佢轉咗幾十個頭，睇住佢俾水其他人，佢都唔俾拾爺！最後，我哋係同另一個waitress講，先有水飲咋！

講番啲嘢食，一個字 — 「正」！

呢個就係做緊promotion，會員$108，非會員要$148嘅rib eye set喇，雖然要計番正價$288嘅加一，但仍然抵食，因為真係整得有水準！當然，有水準嘅定義係以優惠價去衡量啦！我唔知佢係咪真係足十安士(應該都唔會呃秤嘅！)，但塊扒真係好大塊！雖然係炭燒，但肉汁仍能被鎖住，每一啖都唔怕又乾又嚡！美中不足係「牛味」唔夠囉。至於個焗薯，我只係食咗一、兩啖，都 ok，配菜我雖然冇食，但就賣相而言，差啲囉！

(下次想試生啲，但個promotion只係做到七月尾……)

另一道菜 — Parmesan Shrimp Pasta又係好正！個人好鍾意個sauce，最正係佢多cheese！上枱時覺得太細兜，但其實一個人都好夠，因為個sauce會令人好飽。蝦好彈，但就冇蝦味……好明顯唔係新鮮蝦，唔知佢加咗乜令到佢咁彈，有啲驚……另外，蝦嘅調味重手咗，個人覺得可以淡少少。最後，個蒜蓉包都好正！夠脆！

埋單$336.4，其實都幾貴……Ruby Tuesday呢啲地方，都係偶然去吓好喇……但係……個rib eye又真係好好食，好想可以成日食……哈哈，為食蟲又咬我喇！

中國芳

Book咗六點半，去到佢本來想我哋坐出面走廊嘅卡位，我要求坐大廳，於是改為坐窗口嘅四人枱位置。叫咗以下三樣嘢﹕

冰鎮餚肉($56) — 好少食一片片嘅餚肉，可能每片都太薄，口感唔及平常食開一粒粒嘅豐富……

賽旁蟹 ($78) — 碟就好大喇！但份量就……兩個人食都夠嘅，如果唔係我哋有AE卡嘅半價優惠，真係會覺得呢碟嘢唔抵食！不過，味道其實唔錯架！

咕嚕肉($78) — 係揀無可揀下嘅選擇！因為我太多嘢唔食得喇。味道一般，份量嘛，以佢個價錢嚟講都ok嘅，起碼唔係配料多多，咕嚕肉少少啦！

我哋另外仲叫咗兩碗白飯($11 x 2)，連埋茶價($11 x 2)同被迫要嘅前菜($15)，AE卡主餐牌菜餚5折優惠，埋單$196.5。

豚王

今日好鬼熱！喺出面排隊時，一滴風都冇，我真係就快焗暈！加上店舖位置好差，附近又有人上落貨，污污糟糟咁。等等等，等咗半個鐘到，終於可以入去坐！不過……要坐喺門口加路中心……唔鍾意！

坐低後，侍應好快端上水同order紙俾我。有豚王($75)、黑王($88)、赤王 ($88)同翠王($90)揀，我揀咗前者！另外，食客仲可以揀味道濃 度、香味油份量同蒜蓉份量，前者我要咗濃味，後兩者我就揀普通。食客仲可以選擇要唔要叉燒同蔥，我當然要啦。至於餐廳嘅秘製味噌，其實我都想試吓，可惜係 辣嘅，所以忍痛tick唔要……麵嘅軟硬度我就揀咗普通。然後……一場嚟到，排隊時又焗到咁辛苦，就獎勵自己要咗隻日本產半熟蛋($15)。

侍應先上半熟蛋﹕

等多一陣，就上埋拉麵喇！我第一時間，將隻蛋放埋入拉麵到﹕

因為怕食拉麵時，啲汁會彈到個袋，所以問侍應要咗張紙圍巾。之後，就開始食喇！先 講吓啲麵，呢到同「魂」唔同，「魂」連拉麵都有得揀，呢到就只得一隻麵，係幼直身嗰隻，亦係我唔太鍾意嘅麵類……所以，我會好subjective地講， 我唔buy！喺「魂」到食拉麵時，我都係揀適中，但食落就真係覺得軟硬度適中，但呢到我揀普通，我覺得麵嘅軟硬度傾向「淋」身……另外，呢到嘅叉燒雖然只 有一塊，但就好大塊！味道嘛……唔會特別難食，但都係唔及The Mist嗰塊入口即溶咁叫人難忘！至於隻半熟蛋……

幾好食喎！有蛋味(有啲係冇架！)，蛋白部份既軟且滑，當然唔係滑到一食落去就自動滑入喉嚨咁誇張啦！但以$15貨色嚟講，算唔錯！，再食到蛋黃，極富蛋味，呢$15冇加錯！埋單$90，呢到嘅service幾好，侍應不時會為食客加水。收銀亞姐見我食到流汗，即時遞上紙巾！只係……餐廳真係好細，坐得唔舒服……不過，個人會鍾意食「魂」嘅拉麵多啲。

Ruby Tuesday

Ruby Tuesday嘅Lunch set由$64起，我哋叫咗個Ruby Minis ($78)同Classic BBQ Ribs (1/3 Rack) ($108)。兩個set都跟餐湯或salad，我哋都揀咗前者，餐飲就稍後再叫。

先上餐湯連麵包﹕

麵包很一般，唔軟熟亦冇麵包味……不過，未至於難食。湯係忌廉蘑菇湯，味道唔算濃，但對於久未嚐湯嘅我嚟講，已經覺得好正！跟湯嘅麵包粒味道勁濃，食完後，成口都係蒜味！

飲完菜，就到主菜﹕

Ruby Minis嘅漢堡可揀牛肉同雞肉，我揀咗前者。麵包烘得好脆，咬落去係脆到聽到聲架！但脆得嚟又唔怕好乾，超正！漢堡嘅牛肉就唔及我上次嚟食咁正，雖然塊牛唔怕乾，但肉汁唔太夠……薯條嘛，因為我唔食得太熱氣，所以都係等到佢「淋」先嚟食，味道不能作準！

Ribs都好「淋」，「淋」得嚟唔係霉嗰隻，味道唔錯！不過，個sauce有少少辣，平時食就會覺得惹味，但我呢段時間比較敏感……

最後叫埋餐茶，我要檸茶，老公就要咖啡。

好少餐廳咁上檸茶，亦好少地方嘅檸茶係咁深色嘅！咁樣上檸茶係衛生啲嘅，因為檸檬皮唔會浸埋入茶到，但冇咗檸檬肉，杯茶嘅檸味就唔夠喇……

埋單$204，其實都幾貴……

台灣小倆口三文治

食店好細，有兩張枱俾食客坐低食嘢，亦做外賣生意。我先去cashier點咗要嘅嘢， 點菜前亦問過老闆最多人點嘅蛋餅係咩，答曰﹕肉鬆蛋餅，於是決心一試。對其他漢堡呀、三文治呀暫無興趣，原因係覺得既然食店以台灣菜作招徠，就食番啲台式 味重啲嘅嘢。俾錢($15)後，就坐低等嘢食。嘢食好快送到(可能當時只有我同另一對買外賣嘅夫婦兩枱客啦！)，用紙碟同膠叉上，再外附一包蒜蓉豉油。

恕我無知，我以為蛋餅真係用塊蛋包住啲餡，原來係用麵粉皮……個人唔太鍾意食麵粉皮……不過，老闆冇呃我，啲肉鬆真係好好食！佢話肉鬆由台灣，好多客都覺得好味過新東陽嗰啲。我冇食過新東陽嘅肉鬆，反而江記嗰啲食過真係覺得正！呢個同江記差唔多，都係好脆口！正！

下次搵埋老公試埋其他招牌菜！但蛋餅就……都係試一次就夠喇！

芽莊

因為仲要戒口，所以我唔食得撈檬……唯有叫番個蕃茄蟹湯檬啦！拾爺就食魚餅撈檬，為食嘅佢仲叫多個燒肉濱海呢！

(保持水準！平時同拾爺share，再狂叫小食，但今次食lunch，我又太多嘢唔食得，所以自己一個KO佢！我都已經係大食之人，但呢碗嘅份量之大，係食到我爆肚囉！)

(新嘗試 — 魚餅撈檬，我唔食得凍檬，所以只試咗魚餅，味道一般，撈檬始終鍾意肉丸多啲！)

(之前喺中環間舖食過濱海，整得超正！一餅餅嘅米粉軟硬適中，而且成塊濱海所用嘅米粉織得好密，可謂啖啖粉！唔似得出面有啲餐廳孤寒到死，食濱海時好似食空氣咁……但今次呢碟叫人極度失望！唔係用料唔足，而係塊濱海好濕……唔好食！)埋單$163，食到爆肚！

Bricklane

去尖咀嘅Bricklane開餐！

出到白蘭軒好快就見到呢間小店，而且門外已經有一對情侶加一個女子排緊隊。我同拾爺快快行去排，但見店舖好細，食客正在悠閒用餐，心諗應該要有排等……但一場嚟到，又唔想放棄……

等咗十分鐘，有一枱食客埋單走人，入咗排最前嘅一對情侶。但其他人就仲未有意慾離開……拾爺等到咁上下過咗K11去洗手間，佢走咗冇耐，就有個 waitress嚟問我哋一堆排隊嘅人係幾多位，然後就帶我哋去新店。我同個waitress講我拾爺行開咗，佢就叫我打俾拾爺叫佢番到舊舖後，問佢啲同事新舖位置就得。於是，我就跟佢過新舖，其實都只係隔離街。

新舖舖面比舊店大好多！不過，其裝潢又係另一種style。舊店英倫味重，但新舖卻似 一般嘅cafe。前者予人悠閒之感，係嗰種你可以坐一個下午，靜靜哋睇 吓書嘅舖頭，但後者卻係三五知己聚會嘅場所，各枱皆大聲講大聲笑。我同拾爺都係鍾意舊店嘅氣氛，耐何已經跟咗人嚟新舖……

薄薄一紙嘅食物menu，選擇唔多，我同拾爺分別要咗Egg Benedict with Parma Ham($85)同埋Fish and Chip($128)，飲品同甜品都另有一紙menu，但我哋都冇叫。其實我有叫拾爺嗌杯咖啡，但拾爺唔要，而我就因為要戒口，所以同飲品、甜品都無緣……

先上Fish and Chip，雖然醫師要我戒煎炸，但美食當前，加上呢一、兩日氣管好咗少少，咳又少咗，試少少啦！魚係用龍俐柳(問waiter得知)嘅，一口咬下，外表微脆，內裡嫩滑。不過，個人唔太鍾意呢種「脆皮」，感覺好滯……當然食客可以點伴隨而上嘅沙律醬開一開胃，畢竟個醬都叫酸味味，頗開胃，但我就係唔鍾意呢種炸法。(唔係餐廳整得唔好，係個人口味問題！)炸魚柳嘅皮同肉亦可隨時分隔，我唔係食家，唔知咁樣叫好定唔好，但對於我呢個唔可以食炸嘢嘅病人嚟講，係一 件好事，因為我可以只吃入面嘅嫩魚肉。至於薯條，叫人失望，唔夠脆亦唔夠薯味……伴隨而上嘅茄汁對於我嚟講味道過酸(又係個人口味問題)，所以我反而係點沙律醬嚟食。

Egg Benedict with Parma Ham味道好好，食落去蛋味夠！就算面層有濃濃嘅sauce蓋住，都唔覺得有飽滯感。美中不足係底層個麵包有啲韌，如果可以脆口一啲就好喇！

埋單$234，喺冇飲品，份量又唔算多，味道亦唔特出嘅情況下，我同拾爺都覺得價錢偏貴，應該唔會再幫襯！