上次星期六嚟，冇set lunch,所以改咗去永年士多，今日睇牙出開尖咀，即刻嚟填補遺憾。結果，本來嘅填補遺憾，變成製造遺憾……有quota真係幫襯另一間餐廳好過。
招牌去骨海南雞餐 （$58）：最正係個湯，熱辣辣，仲有蝦仔。主角海南雞完全冇雞味……唯有可取係唔嚡。油飯令人極之失望！完全唔熱，我懷疑餐廳之前整多咗一碟，放咗喺到等人嗌，咁啱我叫就俾我，啲飯攤到室溫咁，但我食到一半時，見到遲我嚟嘅食客，食嘅飯係熱辣辣嘅……油飯欠油香，仲好濕，唔好食。
呢間餐廳從此blacklist!
餐廳資料:
雞匠
尖沙咀柯士甸路15號地下A號舖
34622765
工作關係，到黃大仙開餐，出發前上Openrice睇吓，見到呢間餐廳好多笑臉，食客評價唔錯，望望set lunch價錢，有平有貴,就此敲定。
叫咗個咖哩炸蝦定食 ($58)，定食包3塊三文魚刺身，蒸蛋同飲品。
先講刺身，餐廳絕對唔孤寒，3塊都係厚切嘅，味道嘛，唔會覺得好鮮，但有魚味過噚晚喺5星酒店自助餐食到嘅刺身。
蒸蛋鹹到喊，個廚唔知發生咩事落鹽落到咁重身……
咖哩炸蝦飯得3條奀挑鬼命嘅天婦羅蝦，炸醬已經唔薄，啲蝦仲咁細隻，可想而知啲蝦嘅真身有幾袖珍。蝦唔特別好食，啲咖哩對我嚟講好辣！日式咖哩唔係甜架咩？！點解會辣成咁?！不過，咖哩汁夠多，真係可以撈勻成碗飯。當然，個飯唔算大碗。
杯柚子蜜偏淡，料落得唔夠……
餐廳資料:
和氣食堂
黃大仙正德街103號黃大仙中心南館地下G12A號舖
26418829
細佬喺whatsapp到send咗新假期介紹有關Cafe East呢期嘅「牛迷盛宴自助晚餐」，然後我啲兄弟妹都想試，於是就造就咗呢次一家人10大1小1B嘅buffet宴。 雖然餐廳喺5星酒店之內，但自助區其實好細，食物選擇唔算多，話就話係牛迷盛宴，但完全唔覺得牛係主角…… 不過，以每人$414(已計加一)嘅價錢去5星酒店嘅環境用餐，尚算OK嘅。
講吓嘢食先！
麵包蟹﹕我呢啲懶鬼最怕食要自己拆肉嘅海鮮，食蟹最鍾意揀蟹蓋，因為方便易食，仲有蟹膏呢！呢個蟹蓋爆哂膏，食得我好過癮呢！
Ham﹕其中一隻幾好味，但我唔知佢哋係咩ham……
煙三文魚﹕一般啦。
三文魚刺身﹕得個凍字，完全冇鮮味……
甜蝦﹕都係冇咩味……
鐵板系列﹕
蝦﹕普通
三文魚﹕一般
牛﹕冇咩牛味，又話係和牛……
羊﹕好韌……
燉湯﹕好夠熱！味道唔錯！
炸魚﹕好味！雖然個炸漿差咗啲，但入面嘅魚肉仲好juicy！
炸蝦﹕唔ok！唔夠熱，唔夠脆！
紫薯天婦羅﹕都食唔到紫薯味……
扇貝﹕唔好食……
西班牙乳豬﹕啲皮係幾脆嘅，但啲肉冇咩味，而且好肥，食到人好「漏」……
蝦片﹕厚咗少少。
串燒﹕冇特別。
葡撻﹕好味！啲蛋夠滑，味道濃郁。
芝士撻﹕呢個都幾好，我鍾意佢係流心芝士，食落唔會好滯之餘，芝士味亦好夠！
焗蠔﹕配料多多，而且好鹹……隻蠔細到食咗都唔知……差！
焦糖燉蛋﹕好味！鍾意佢加咗雲呢嗱籽！
燕窩燉蛋﹕淡而無味……
各式蛋糕﹕除咗cheese cake之外，其他都好難食……
梳乎厘﹕好難食！我食咗一啖就成個俾咗我妹，甜到癲，實在食唔落第二啖。
抹茶奶凍﹕又係超甜，食唔到抹茶本身嘅回甘……
餐廳資料﹕
Cafe East
尖沙咀麼地道72號千禧新世界香港酒店1樓
23134222
今日出到大埔工作，去咗Beans食lunch！等位都等咗15分鐘有多……坐低叫咗兩個set lunch，我揀咗軟殼蟹黑松露意粉，再同同事share waffle。呢到嘅set lunch$48起，算幾抵食！
不過，枱與枱之間距離太近，呢樣嘢我唔太鍾意……但啲waiter/waitress好nice，服務唔錯！
軟殼蟹黑松露意粉 ($69)﹕兩隻軟殼蟹細細隻，炸得唔係好夠脆，仲有少少油「益」味.…意粉唔太淋但未去到al dente……個sauce幾唔錯，好creamy！
檸檬蜂蜜﹕飲落有陣奇奇怪怪嘅味道，唔識形容。
Caramel Banana Waffle (Pineapple dice, Custard, Green tea ice-cream, Yogurt <$58>)﹕本來跟餐嘅雪糕係vanilla，但我要求改為green tea，餐廳又ok喎，幾好！講番個餐，waffle新鮮整起，熱辣辣，周邊夠脆，內裡蛋糕味濃，唔錯！焦糖香蕉、菠蘿粒、cream、吉士同其他脆脆味道正常！
餐廳資料﹕
BEANS The Courtyard
大埔安邦路9號大埔超級城D區地下670A-671A號舖
53962747
同事有日路經黃大仙中心嘅麻布茶房，見到有一人一鍋餐做緊promotion，跟餐有H牌雪糕，於是大伙起哄要一齊去試試。
一人一鍋餐有3隻湯底，麻辣、豚骨同蕃茄，我哋全部要蕃茄，肉有牛、豬同雞，我哋又全部要牛。呢個餐有3種價錢，揀75ml雪糕嘅原價$108，特價後$54。Menu有7種味道，看似吸引，卻是魔鬼在細節，每日供應味道視乎餐廳貨存……我哋今日只有士多啤梨同咖啡兩隻味揀……揀mochi雪糕嘅原價$118，特價後$59，味兒有抹茶同紅豆選擇。最後係跟餐廳嘅甜品，軟雪糕下跟自選內餡口味嘅蕃薯，原價$128，特價後$64。所有餐加一要跟原價。我要咗跟mochi雪糕嘅餐。
蕃茄湯底﹕味道好淡，唔睇顏色絕對唔知係蕃茄湯底……
牛肉﹕肥膏多過肉，而且只得兩、三塊，食咗都唔覺有食過……
菜﹕唔新鮮！
龍蝦丸﹕冇咩味……
獅子狗、日本魚片、菇同粉絲味道正常。
白飯﹕濕咗啲……
基本上靠個鍋絕對食唔飽，我就話大食，好多時都唔飽，我嘅同事個個食完都話唔飽……最後係靠杯雪糕/甜品先夠飽。
講完嘢食，講吓間嘢嘅service，分別有一黑(衫)一白(衫)嘅男人serve過我哋，佢哋係一致地黑口黑臉嘅！黑衫人上菜時，撞瀉我同事杯茶少少，因為我一見撞上就即刻用手捉實同移走隻杯，而佢就一放低嘢就走，明知撞瀉茶都唔理，一句唔好意思都冇！之後，幫我上菜，就將盤嘢推到貼哂我面前，離埋枱，再過少少就請我條裙食火鍋。我哋食嘢途中，有同事叫佢加茶，佢加完該位同事後，另一同事叫佢都加茶，佢就串嘴話﹕「通常加茶唔會每枱只加一位嘅。」其實同事係好有禮貌咁叫佢加茶，有講唔該，唔知點解佢要發我哋脾氣！白衫人雖然都黑臉，但佢起碼冇串嘴。
呢間餐廳已被我哋列入黑名單！
博士約食飯，話要同即將去旅行嘅Mall女同埋我踐行，哈哈。去咗Spaghetti 360開餐。
喺餐廳門口等位時，發覺餐牌有誤導成份，同同事口痕向經理指出，對方無奈表示餐牌唔係佢哋所整。之後，差唔多有位時，我哋先落單，點知我一心想點嘅餐售罄，經理知道我其實只想飲紫薯牛奶，於是「私人」轉俾我哋，開心死！其實我對個burger嘅輕食餐興趣唔大，只為紫薯牛奶，而家可以食其他餐免費upgrade去飲紫薯牛奶(其他餐點轉飲要補$22)，即刻轉食pasta餐啦！
蘑菇湯﹕湯夠熱，仲有濃濃嘅蘑菇味，唔錯！
香草包﹕略嫌個包有啲硬，唔夠脆！
檸檬黑胡椒醬海蝦意大利粉 ($82)﹕意粉雖唔算al dente，但又唔會過淋，都ok嘅。我鍾意個sauce，酸酸辣辣，好醒胃！蝦得3粒，又唔大隻……好彩仲有啲魷魚。
紫薯牛奶﹕紫薯味好濃，但成杯嘢過甜……
Waffle﹕新鮮整起，夠熱，但唔脆……
會員價為加一後8折，抵！最正係，呢餐同事請，嘢飲又free upgrade，好開心呀！
本來想去「雞匠」食海南雞，但星期六冇set，好似唔太抵咁，拾爺又未試過「永年士多」，於是改咗去食車仔麵。
叫咗兩碗麵，拾爺平時唔好車仔麵，嚟到唔知食咩好，叫我幫佢揸主意……佢好多嘢都唔食，要我揸主意真係考起我，最後我揀哂啲5樣推介再加多樣嘢就算。要咗兩碗油麵，一碗要豬腸、豬紅同流心蛋，另一碗就要豬皮、蘿蔔、牛筋，3餸麵$39一碗。兩碗麵都要咗小辣，因為我掛住諗食乜，唔記得睇吓辣分咩程度，店員問我要唔要辣時，我隨口話要小辣，結果中招……原來小辣之下仲有微辣！我同拾爺都唔係食得辣之人，食第一啖已經嗌救命！
講番啲餸，其實我戒咗豬紅好多年，因為始終用血整唔太健康同衛生，但知道呢到嘅豬紅出名，上次嚟就點咗嚟食，一食就愛上，今次亦再翻兜！呢到嘅豬紅細細粒易入口，中間顏色係帶粉嫩，食落有甜味，係糖心豬紅呢！
蘿蔔亦好好味，就算浸喺碗辣麵入面，我都仲食到佢嘅清甜！而且佢冇渣，唔錯！
豬腸同豬皮就正常味道，前者唔會有尿「壓」味，算係洗得乾淨，後者我只係食咗一塊，本來拾爺都唔食豬皮，但因為碗麵太辣，豬皮吸哂辣味，我實在食唔到，佢就幫我食喇。
流心蛋得一隻就當一個餸，貴都算，唔好食，唔流心嗰吓令人氣忿！
牛筋我冇食到(因為拾爺唔食豬紅同豬腸，所以我都唔敢食佢咁多餸。)，但拾爺話好普通。
本來要埋腐乳通菜，但店員話通菜唔當造，問我要唔要改生菜，我又唔想食生菜，所以索性唔要。上次嚟試過佢個咖央多士，覺得好一般，所以冇點。
餐廳資料﹕
永年士多
尖沙咀加拿分道46號地下7-8號舖
之前上ENB有關茶文化嘅seminar，得知有NGO會入學校教學生泡茶，當時好有興趣！得知佢哋會開個老師茶藝班後，更即場報名參加，因為拾爺一向愛茶，所以幫佢報埋名添！
10點去到聖公會聖三一中學，去到時，門口已有一班同學列隊歡迎我哋，本來我同拾爺打算行樓梯上4樓課室，但有同學熱心地帶我哋去搭lift，於是我哋就搭lift上去。
入到課室，我哋先簽到，再搵位坐。課室嘅枱凳已佈置好，兩人一組，我同拾爺坐到後排其中一枱(因為前排都被坐滿喇)，等咗一陣，茶藝班開始。
主持人講咗一陣開場白後，就由三位同學示範泡茶，再將茶送到我哋每位參加者前，我因為唔想除箍，所以杯茶俾拾爺飲埋佢。
睇完同學示範，主持人就將時間交俾茶藝師，再由茶藝師逐步示範同講解泡茶程序，之後就到我哋自己實踐。我同拾爺一組，先讓拾爺泡，全程錄影，拾爺泡完，就到我，佢再幫我影吓相。
泡完茶，大家要幫手清洗用具，但飲茶嘅杯就可以帶走留念。
最後，主持人再分享吓到校開班嘅經驗，讓老師發問問題，茶藝班就完結喇。原來嚟緊嘅academic year，呢間NGO唔會再到校開班……但有機會會有其他NGO接手，不過到時係咪免費就不得而知喇……唉，仲諗住引入學校添……
一直都好想試「柳氏家」，知道佢最近做緊$1優惠，不過，只限頭50名食客，心裡明白，這些機會不屬於我！但$74嘅90分鐘用餐優惠卻只限星期一至四，就真係令我覺得好唔抵！因為……工作關係，我今日先有幸出嚟呢頭開飯……算啦，唯有用$88喺到食個60分鐘嘅午飯啦！
坐低先點餐，因為同事唔食辣，所以揀咗蒜香蜜糖味嘅雞，另外再要精選豬肉同牛肉，因為同事食量唔大，所以年糕份量只要標準，要咗韓國拉麵放棄炒飯，其他要加錢嘅如芝士、海鮮等一概唔要！
等緊烤雞時，出去嚟自助區食物，選擇好少……熟食只有炸雞、雞翼、薯條、炒粉絲、豬腩肉片……配菜只得生菜同蒜片，湯就有大醬湯同海帶湯。
講吓啲嘢食先，炸雞味道普通，唔太乾但唔juicy，雞翼外層辣辣哋，都幾惹味，但啲肉就啖茂茂……薯條唔脆，豬腩肉得個辣字同埋好嚡……粉絲我冇食到，但生菜好新鮮！冇飲海帶湯，大醬湯就鹹咗少少。
等到烤雞嚟，發覺2人份嘅烤雞，雞肉得4件，真係少到喊……好彩仲有幾片牛肉、幾片豬肉、年糕同埋韓國拉麵填包肚子。店員會幫手炒嘢食，但佢哋為求快，會用力捽爛啲肉嚟炒，雖然肉唔會係靚嘢，但咁嘅煮法真係俾人一種好唔識品嚐食物嘅感覺呀！成兜嘢冇咩特別，可以食，但唔覺得好食！
食完主菜，就拎甜品，雖然有唔同口味嘅蛋糕仔，但大部分都好難食……雪糕就有3、4種口味。我要咗杯蜜瓜味，味道正常。
60分鐘用餐時間，盛惠每位$88再加一，唔抵食。
餐廳資料﹕
柳氏家
沙田正街18號新城市廣場一期7樓709號舖
35719993
材料﹕
| 烏冬 | 2包 |
| 蝦 | 1包 |
| 泡菜 | 1盒 |
| 菠菜 | 半包 |
| 洋蔥 | 1個 |
| 芝麻 | 適量 |
| 韓國辣椒醬 | 半湯匙 |
| 麻油 | 1湯匙 |
做法﹕
註﹕選用菠菜因本人唔愛椰菜。
Eat, Play, Love 