年三十晚，當然要食湯圓團圓團買，今年試試自己整，賣相同口感有待改進……
抹茶擂沙湯圓 (食譜來源﹕韋太烹飪教室)
材料(約7-8粒份量) :
糯米粉 75 g
生粉 5g (半湯匙)
澄麵 5g (半湯匙)
砂糖 15g (1 湯匙) [原食譜為30g]
水 65 g
生油 半湯匙
黃豆粉 適量
即食黑芝麻蓉
做法 :
1. 將糯米粉、生粉、澄麵、砂糖、水及生油搓勻成麵糰，平均分成7至8粒。
2. 將即食黑芝麻蓉包入(1)備用。
3. 燒滾一鍋熱水，將湯圓放入，用慢火將湯圓煮至脹起及浮面，盛起，滾上抖茶粉便可進食。
鎮江骨 (食譜來源﹕大少奶’s Delicatessen)
材料﹕
金沙骨 12件 (買唔到金沙骨，用豬扒頂住先。)
薑及蔥 幾片及幾段 (唔想洗蔥，所以冇落。)
醃料：
生抽、糖、酒、生粉 適量
調味：
鎮江醋 80ml
片糖 1片 (如怕甜可以先加半片)
生抽 半湯匙
水 半杯
做法：
1. 先醃金沙骨，再將其煎至表面金黃色，然後爆香薑及蔥。
2. 將汁料撈勻倒入金沙骨中，滾起片糖溶化。
3. 用高速鍋炆 10分鐘，減壓排氣，然後放回鑊煮到收汁便可以。或用明火炆40分鐘，然後才較大火收汁。
媽媽堅持今年嘅團年飯，一定要食「屏山盆菜」，縱使我哋反對，佢都一意孤行，仲自行打電話訂咗一盆中size嘅添，佢更口出狂言，憑一己之力，足以奉盆嘢番屋企……爸爸唔放心，上個禮拜自行探路，打算今日同媽媽一齊去拎，我當然大加反對！反正我同拾爺今日開始放假，我一早預咗去做苦力。之前同姑仔及奶奶提起呢件事，姑仔提議我call van，我問過價，都係百六蚊到，好相宜！噚日向媽媽提議call van，佢唔肯……言談間，佢誤會我阻止佢去拎嘢，仲省咗我一大餐，嬲到我即時whatsapp各兄弟姊妹大吐苦水！嫂嫂知道後，就叫哥哥打俾媽媽傾吓。結果，哥哥打嚟叫我call van。哼！媽媽就係咁架喇，唔駛講我都估到哥哥一定狂話佢，令到佢屈服，媽媽只會兇我……可惜嘅係，噚晚太夜得到媽媽首肯，電召中心收咗工……到今朝再打去，人家話好多司機都收爐，著我要車前一個鐘頭先再打上去……本來拾爺病咗，call到車我就自己同媽媽去拎盆菜，等拾爺可以在家多休息，但而家call唔到車，隨時要自己拎，想唔打搞拾爺都唔得……
今日本來仲約咗國泰佢哋食lunch，但我正打算換衫外出時，又肚痾……為免一陣食完嘢唔舒服，陪唔到媽媽去拎盆菜，我缺席聚會。
同拾爺兩點幾出發，三點半到天水圍站會合媽媽，再一齊行去屏山盆菜。叫咗媽媽喺A出口等我哋，佢卻去咗B出口，仲話嗰邊先有輕鐵搭……一定係因為爸爸上次嚟搭輕鐵，所以佢就以為我哋都要搭。其實由A出口行去，15分鐘到就到架喇。
一行出站，媽媽即刻質疑我哋，又話冇路又話冇人行……我同佢講拾爺帶病上陣，叫佢唔好再咁多挑剔。點知媽媽竟然怪我帶埋拾爺嚟，話我同佢兩個已經ok……佢真係以為盆盆菜好輕……
行到去屏山盆菜，但見門口枱上一盆盆嘅盆菜就咁放哂喺到……又唔係雪住，又唔係熱住，感覺好唔衛生……媽媽講低姓氏，店方就包起屬於我哋嗰盆，媽媽俾錢後，我同拾爺就拎貨。嘩！重到呢！媽媽話佢打嚟訂盆菜時問對方自己一個拎唔拎到，對方答佢可以，但今日我哋嚟到，一個店員叫我哋輪流拎話好重，另一個直情叫我同拾爺一人拎一邊。雖然我一早預咗佢重，但對於舖頭嘅人亂咁噏當秘笈，真係好不滿！
我同拾爺一人拎一邊，將盆菜捧至天水圍站，先放低，由我去customer service到問吓有冇巴士搭番娘家，之後再將盆菜捧至D出口，過對面先搵到車站。問路時為四點，喺車站等咗一陣就有車，架車開得好順，我哋落車後，本想轉的士番屋企，但截唔到，於是再搭小巴，番到屋企都只不過係5點鐘。
我同拾爺捧盆盆菜捧到又攰又肚餓，先落樓食杯越南粉，再番屋企等各人番嚟食團年飯。
是夜，各人圍住盆盆菜食飯，其實盆嘢味道一般，絕對唔值得我哋捧得咁辛苦，甚至係山長水遠去食囉！
同場加映鬼馬小王子！
小王子被媽媽訓練到一聽到「ET phone home」，就會伸出小手指同人接觸，一講驚驚，就會拍吓心口，好鬼得意呀！食完飯，媽媽俾咗半條蕉佢食，我故意走去叫佢俾我食，佢唔肯，我就不停R佢，真係出聲兼狂R佢個body，R到佢煩時，索性扭轉臉，收埋條蕉唔俾我食。
與奶奶及姑仔團年飯，去咗Madam Sixty Ate開餐。
同拾爺早咗到，去到餐廳安排我哋坐一張靠窗嘅4人枱，餐廳環境昏暗，地方寬敞，情侶談心、知己相聚皆宜。
開放式嘅廚房不時傳來陣陣香味。
等緊奶奶佢哋時，拾爺先問waitress有乜好介紹，略知餐廳嘅拿手菜後，就待奶奶佢哋到時，商量菜單。
四個人叫咗3個3 courses ($498 per person)同1個4 courses ($558 per person)嘅set。所有嘢share嚟食！
Waitress落完單後，表示稍後會送上house made bread，但等咗好一陣，仲未見影……終於，等到啲house made bread嚟喇，睇到一碟熱騰騰嘅house made bread上枱，終於知道點解要等咁耐，原來係新鮮出爐架！
麵包外脆內軟，而且好有麵包味，讚！如果麵包嘅外層脆得嚟唔係咁硬，就更完美！好耐冇食過咁熱咁新鮮嘅麵包，喺麵包上搽一層牛油，牛油即時溶化，滲出淡淡牛油香，一口咬下，幸福！
Dungeness crab, crisp pastry, bergamot mousse, avocado sorbet and ginger pearls﹕賣相精緻，未食已經令人開懷。三小份蟹卷都十份足料，啖啖蟹肉！Dungeness crab釀入crisp pastry內，一脆一軟，予以食客兩種口感，讚！只是，蟹肉略嫌蟹味唔夠、鮮味不足……Avocado被整成sorbet，冰冰嘅感覺，配以淡淡嘅味道，口感清新。Bergamot mousse及ginger pearls一酸一辣，絕對係開胃之選，作為starter嘅配角，非常合適。
Smoked octopus, seared squid, house made chorizo, tangerine tonic, black olive powder﹕又一賣相可媲美藝術品嘅菜式。欣賞廚師的刀功，把octopus片得薄薄一片，煙燻後嘅octopus味道很唔錯，亦比較少見有餐廳供應(就我而言)。除卻octopus，其他食物水準一般。
“Ode to Eliza” pork belly, black & white garlic, girolle broth, 63 egg﹕因為怕starter份量少，唔夠分，加上之前兩道starters都真係份量少，所以呢個starter，同之前個蟹卷一樣，我哋都係order咗兩份。但係……今次呢道菜嘅份量卻可以媲美main course，件pork belly好大份！講番個味道先，豬皮被燒至脆卜卜，豬肉嘅肥瘦部份都軟淋易入口，屬上佳之作！只係……肥嘅部份太多喇……加上我腸胃敏感仲未好番，所以食多兩啖，又覺得滯喇……
Sagabuta pork loin, girolle mushrooms, bacon fricassee, maple bourbon glaze﹕Waitress推介嘅菜式之一，廚師以60度溫度慢煮日本豬肉而成，不過，豬肉只會煮至medium rare，所以上枱時，豬肉嘅顏色會呈現淡粉紅色。Main course份量唔多，加上我哋四個人分，所以每人都只係半小塊豬肉，滿有期待咁將豬肉放入口，卻落得極度失望嘅下場。豬肉好嚡，肉汁流失，而且淡而無味……差！
Wagru rump, beef brisket, sweetbreads, smoked parsnip and celeriac with coffe soil﹕Waitress冇推介，但姑仔堅持要試嘅main course！幸好有姑仔嘅堅持，呢個main course係云云我哋點選嘅main course之中最好食架！牛肉被煮至medium rare，粉嫩嘅顏色吸引眼球，食落去味道更佳！肉嫩多汁，令人想一吃再吃！唯一要挑剔嘅，係牛肉味唔夠濃……
Saltbrush lamb, green peas, fava beans and celeriac remoulade﹕嚟自法國嘅羊架，算係少食到。不過……味道卻無甚特別……羊架煮至medium rare (其實餐廳係唔會問食客想要幾成熟，通通都煮至medium rare就算。)，肉色呈現鮮嫩粉紅，入口尚算嫩淋，肉汁亦未盡見流失，但卻有少許乾。配菜亦以肉為主，食到人好滯……
Barramundi, house made chorizo, torched baby prawn black garlic, fennel vermouth cream﹕Waitress推介之一，嚟自澳洲嘅魚，但愛魚之一如姑仔都覺得冇特別，更何況我呢啲唔好魚嘅人﹖！
Poached pear, chocolate rock, Zacapa rum bubble, chestnut ice cream﹕奶奶之選，冇試過，waitress話廚師以法式煮法去整，好似好特別咁，但感覺奶奶唔太欣賞。
Peanut butter dacquoise, chocolate ganache, burnt bananas, banana ice cream coffee﹕姑仔之選，佢食唔哂，我同拾爺就喺另一邊，撩咗少少試吓，好一個充滿花生醬嘅甜品……鹹嘅甜品，我真係唔識欣賞……同埋，呢個dessert真係食到人好滯……得個chocolate ganache係我覺得好食架咋！
Warm financier, pumpkin mousse, brown butter ice cream﹕拾爺之選，佢好滿意，覺得好好食。我食咗一小嚿warm financier係幾唔錯，pumpkin mousse就唔係好覺係pumpkin味，至於個brown butter ice cream味道好奇怪……
White chocolate, passion fruit mousse, soda, pineapple ginger beer sherbet﹕食到咁滯，我特登揀個味道較為開胃嘅甜品，呢個甜品冇咩特別，但就好啱食到滯時去食佢。White chocolate原來係ice cream，味道冇我所想咁甜，應該話係唔甜，啱哂不嗜甜嘅我，讚！Passion fruit mousse原來係糕狀，酸味味，好開胃，如果可以更為軟滿滑就好喇！另外兩樣就一般般啦。
埋單$2257.2，奶奶請客，仲俾夠$2260。總結，番兜之選！
1月24日
補祝小雲生日飯，大隻佬太太提議咗間貴嘢 – 水月，呢間餐廳做私房菜，因為座位有限，加上要預備食材，所以一confirm訂位，就要先俾一半deposit，如果到時no show，都要全數付帳。其實我唔太贊成去呢到食，畢竟我哋之前啲gathering，總有人臨時有事嚟唔到，所以咁快俾錢，都幾risky。因為咁，我提議只訂5個位，到當日冇人話唔嚟，先多加一個，而我，就係呢個後備。結果，今日大家都ok，我亦喺晏晝打電話去加埋自己入去。
餐廳位置對我呢個對銅鑼灣唔太熟路嘅人嚟講，都幾難搵……我行行吓got lost，要打俾小雲求救。
大家到齊，就叫餐廳上菜。餐廳人手唔多，不過呢到座位數目都唔多，所以人手都叫夠用，只係……我哋要求咗多次加水，waiter都遲遲未俾到我哋，原來佢哋煲緊……但啲水都滾得好慢吓……而且，每次佢哋只係加少少水，我哋好快又飲哂，又要再三催四請先搵到人加水，呢方面嘅服務真係有待改善。
餐廳每上一道菜，都有個waitress嚟講解，呢點都唔錯。
蕃茄啫喱‧話梅蕃茄配日本冰菜‧蠔葉﹕賣相精緻，但味道一般……用嘅食材都唔係咩貴嘢，說穿了都只係蕃茄同菜……當然，你可以話呢道菜係食廚師嘅功夫，但……我寧願有啲實在啲嘅嘢食。
由淡味嘅開始食起……
蕃茄啫喱﹕如waitress所說，蕃茄去皮，一咬即穿，但食到肚，都只係蕃茄一粒，味道冇特別。
話梅蕃茄﹕食唔到話梅味……
日本冰菜﹕冇味……
蠔葉﹕依附蠔而生嘅葉，的確有蠔味，但如果係食蠔，我會更開心。旁為岩鹽打起的泡。
鹽燒新鮮雪場蟹腳配紅菜頭粉‧低溫烘焗BB蒜芯乾‧海苔粉爆谷
鹽燒新鮮鱈場蟹腳配紅菜頭粉﹕拆肉鱈場蟹啱哂我呢啲唔識自己拆殼嘅人食，但係，食完之後，一啲都唔覺得佢「鮮」……個紅菜頭粉好甜，雖然我一向唔太好紅菜頭，但都覺得個粉好味。
低溫烘焗BB蒜芯乾﹕好似食薯條咁，但除咗脆，食唔出其他味……
海苔粉爆谷﹕奇怪嘅配搭，又唔係特別好食……
龍吐珠﹕用龍眼包住蟹籽，再釀入蝦膠內炸成，因為內有水果，所以整道菜式口感並不油膩，味道唔錯，但唔特別。嘗試點些少沙律醬伴吃，卻應覺有我唔食嘅芥辣……
南瓜鱈場蟹鉗蛋白羹﹕又係拆肉鱈場蟹，又係食唔出鮮味……waitress話面層係南瓜湯，底層係蛋白，讓食客有兩種口感，呢個idea係幾唔錯嘅，如果整得好食嘅話……南瓜湯味道唔夠濃，蛋白又唔夠滑……成碗都唔知飲咗啲咩落肚……
麻籽烤威爾斯羊架﹕友人之選，我只試咗一小件，食唔到羊味，但條脷就麻咗好一陣子……唔好麻辣嘅人勿試！喜歡辣嘅人可能會鍾意嘅，友人都食得幾滋味，但始終覺得一道好嘅菜式，調味應該只作輔助之用，而唔係蓋過食物本身嘅味道。
北海道黑毛豬配八珍山渣汁﹕需加$40而轉，份量十足！唔止面積大，厚道亦好夠！廚師將扒煎至七、八成熟，有助保留其鮮嫰肉質，豬肉豐腴多汁，豬味甚濃，讚！雖然豬肉嘅脂肪部份唔多，但唔知點解食到一半時，感覺油膩……最後，我將剩下嘅四分一分給友人們共享。
香煎北海道帶子配蜜糖豉油汁﹕大隻佬太太之選，冇試過，不便給予評價。
香芒糖波‧朱古力泥
香芒糖波﹕糖皮好甜，唔係我杯茶……入面嘅泡泡餡料好唔實在……
朱古力泥﹕味道唔錯
水月朱古力牌﹕餐廳特別訂製其名嘅印，用以印上朱古力上。朱古力味道一般，無甚特別。
芒果熱情果味﹕食到滯時，揀番啲酸味味嘅嘢，開一開個胃。呢道菜其實只有賣相特別，味道好一般……
栗子味﹕只試咗一啖，唔太sure個味，友人話栗子味好濃，但越食越滯……
黑松露焦糖燉蛋﹕Dancing teacher激讚好食，我卻覺得鹹味甜品好奇怪……而且，啲蛋都唔滑嘅……
Tea﹕Ginger & Peach, 味香而淡。
六個女人咩都傾，講吓工作、愛情、家人、生育大計，就連body check都傾，不過……佢哋有時都講得幾露骨，就算有waiter喺隔離都唔理，搞到我都有少少尷尬……CFO永遠都係我哋嘅中心人物，有佢喺到，唔愁冇話題，佢真係又talkative又搞笑。呢餐雖然都幾貴，嘢食就唔係好架喇，但同埋大學同學聚吓，都食得幾開心。
埋單每人$714，五人請一人。
離開餐廳時，個肚有少少唔舒服，後尾冇事，以為係自己多疑，點知……地鐵一到站，就feel到個肚係唔妥，即時飛奔番屋企。結果，當晚去咗兩次洗手間，第一次stay咗喺洗手間好耐，起碼去咗3次！半夜三點幾，肚痛痛醒，再戰兩次……今朝又多兩次……俾咗咁多錢食好嘢，結果係痾到人都癲……但今晚仲有奶奶餐團年飯……
評分時間﹕
食物：一般
服務：一般
環境：中下
衛生：一般
價錢：Overpriced
總結﹕唔試唔可惜
餐廳資料：
水月
銅鑼灣信德街17號地下
26799969 / 61898686
噚日晏晝明明覺得個海南雞飯套餐份量太少，食完好似冇食過嘢咁……但唔知點解，放學番屋企途中，個人覺得好飽好滯……其實呢幾日都唔夠瞓，前晚個頭有少少痛，死撐咗成餐團年飯，今日個人全日都好冇精神……所以，一完咗個talk，就即刻番屋企。
回家前，去大家樂買咗個高湯酥排菜飯，留起咗大半做翌日飯盒，只係keep咗細半嚟做晚餐，但平時甚為大食嘅我，竟然連食嗰少少都覺得艱辛……
食完飯，快快沖涼，就上床倒頭大睡，但瞓唔到……對腳冰咁凍，瞓極都唔暖……其實每年冬天我都有腳凍嘅問題，但因為有拾爺在旁，我可以靠佢嘅體溫取暖。但噚晚拾爺學校有嘢做，要好夜至番，結果，我由八點半瞓到十點，對腳都係冰嘅……
終於等到拾爺番嚟，佢一見我咁早瞓就覺得奇怪。當時，我已經唔止對腳凍，就連個身都開始忽冷忽熱咁……拾爺即刻為我多蓋一張被，之後，我個人連對腳就慢慢開始暖。我覺得，除咗係因為張被，仲因為拾爺番咗嚟，嘻。
今日個人都仲冇咩精神，但之前又缺席咗太多次大學同學嘅聚會，所以掙扎一輪後，都係決定去。
ECA嘅committee同學透過人脈關係邀得「蘇萬聰」導演嚟為同學講解導演嘅工作，本來係我同亞頭負責嘅talk，小肥因為對呢個topic有興趣，又入埋嚟聽，大家都覺得學咗好多嘢。
蘇導演先講吓自己嘅入行經過，再提及少少無線電視嘅製作模式同其他地方嘅分別。原來美國嘅電視播放公司同製作公司係分開架，前者會向後者買片播，但香港嘅無記就由製作到播放，全部自己一手一腳去包辦。其他國家嘅製作通常係一日開一組戲，但無記就開兩組，所以我哋嘅劇集可以一星期播五集，有別於其他國家一星期一集。
蘇導演邀請我哋去問問題我見學生冇反應，於是就主動去問，因為我自己一直都想知無記啲劇集會有幾個導演一齊拍，佢哋當中會唔會分大細，同埋點樣可以令到劇集風格一致。蘇導演話一個二十集嘅劇，會分俾四個導演，每人負責五集。通常最資深嗰個會負責第一集，為咗令到劇集風格一致，佢哋被train到唔會有個人風格，或者係唔可以有個人風格，所以，我哋會覺得劇集過於流水作業。
完咗個talk之後，我哋三個都仲有keep住問導演嘢，始終我一畢業就出嚟教書，對其他行業真係一無所知……難得有人肯講，我當然會把握機會，滿足一下自己嘅好奇心啦。
因為噚晚去咗食團年飯，是日lunch冇飯盒，亞頭佢哋又約咗舊同事食晏，得我同小肥兩個，佢提議去「勝利小廚」。呢間小店之前聽達人講過話海南雞飯好味，雖然睇過Openrice，知道間舖嘅食物水準已經大不如前，仍然躍躍欲試。難得有小肥呢支盲公竹帶路，我當然唔會say no啦！
小肥話以前「勝利小廚」經常排長龍，但我哋今日喺lunch呢啲咁忙嘅時段，仍然可以一去到就有位，仲要係卡位，睇嚟，呢到嘅人氣真係大不如前，應該係同食物水準有關！
坐低，餐牌都唔花時間研究，直接要咗個「海南雞飯」套餐，$47包碗湯或一杯嘢飲，我要咗前者。
湯就唔好提喇，都係所謂老火，實際味精嘅加料水是也。直接講主菜啦！
雞﹕難得唔加8蚊都俾少少脾位我，可惜脾位都唔見得特別好食，只係冇雞胸咁嚡罷了。所有雞肉都毫無雞味，而且好嚡口，就算係脾位都好，以脾嚟講，佢都算嚡囉。雞肉口感有欠結實，幸好未至於霉。
飯﹕顏色尚可，味道欠佳。有色無味，完全食唔出油香……
整碟飯份量很少，我同小肥食完都覺得唔夠……但呢碟嘢卻索價$47……總結﹕不值一試！
同同事們嘅團年飯，女俠誠意邀請埋拾爺出席，所以我食得特別開心！
今年團年飯，選址「聘珍樓」，亞頭有ICBC信用卡，可以優惠價$2,288享用「冬日歡聚宴」。
三小品 ~ 蒜泥白肉卷﹕好普通，我寧願食薄薄加一片片嘅蒜泥白肉。
三小品 ~ 宮保蝦丁﹕冇咩點食，不予置評。
太極碧綠忌廉燕窩海皇羹﹕咩味都飲唔到……食呢個嘅時候，我哋因為食唔出係咩，就問有餐牌喺手嘅亞頭，佢做動作叫我哋估頭兩個字，但我同拾爺都唔知佢做緊乜……亞頭話我哋差，再向其他人，女副校竟然估中……但其實我覺得係因為佢兩個熟，正常人應該唔會估得到！亞頭只係雙手分別向前推，拾爺講笑估佢做緊「龜波氣功」囉。
上湯焗波士頓龍蝦 (脆麵底)﹕龍蝦唔霉，但毫無鮮味……啲麵係脆，但唔係脆口嗰隻脆，係硬脆……
三小品 ~ 潮式香酥鴨﹕鴨嘅成份好少，感覺食緊一件件嘅蝦膠，不過，幾好味！
蟹皇炒野菌伴琵琶金磚﹕琵琶豆腐好鹹！但佢啲「蟹皇」都幾足！
黑松露醬鮮百合上素﹕餐牌唔提我都唔知佢係用黑松露醬……食唔出……
蒜香一品燒雞﹕佢哋好多都讚個雞好食，但我一啲都唔覺得佢好食……佢只係唔難食……皮係幾脆，但隻雞都冇雞味……唔嚡唔代表好囉我覺得。
翅湯蝦乾浸豆苗﹕啲豆苗一睇就知唔係靚嘢！
生炒臘味糯米飯﹕毫無風味！
香芋燉鮮奶﹕本人唔太好香芋，加上一向食唔哂成碗燉奶，而家仲要兩樣滯嘢加埋一齊……雖然，最後我都食得哂 (難得！)，但真係唔鍾意呢個組合！><
螞蟻上樹
食譜來源：小小米桶
Eat, Play, Love 