搞掂機票後，我就張羅住宿。本來我係打算第一晚飛入Santorini後，就直接入Oia，但因為Oia好多酒店都唔包接送，夜晚又冇機場巴士，打的又太貴，加上我之後只會留一晚Fira，怕唔夠時間玩，諗咗成晚，決定第一晚先住Fira，搵間有接送服務嘅平嘢住。Search咗一輪後，揀咗Thea Studios-Rooms。但book完之後，收到一封話係waiting嘅email，就再收唔到任何消息……明明去email話24小時內會confirm我，但過咗24小時，都係冇聲氣……我send咗封email去問佢哋，仍然未有回覆……我之後再有send emails或留message俾佢，但佢都係唔reply……唔知佢想點……呢間酒店我之前send過email問佢嘢，佢都算答得幾快，想唔到click完reserve反而出事……得唔得都講聲呀，等我好作準備。佢再唔覆email，我就會打電話去我張credit card嘅customer service到，講番個情況出嚟，問吓可唔可以禁止呢間公司過數，so that我可以book過另一間。
第四晚我哋又會番去Fira到住，本來我係打算求其搵啲平嘢住就算，因為預計都會成日出去唔同嘅beach到玩。但睇多幾篇blog後，又改變主意，想住喺懸崖邊，欣賞Fira嘅日落。上網search咗好耐，價錢相宜嘅都fully booked，最後搵到一間叫做平少少嘅，就book咗先。唔包早餐€140，包埋要€150。同拾爺商量過後，決定book後者，好彩咋！因為後者有free cancellation policy，我喺Agoda book完間酒店後，再上間酒店嘅official website先發現佢有另一個button，click入去show嘅rates最平！於是，我急急send email俾間酒店問價同availability。過咗一日之後，間酒店覆番我，但佢報嘅價同Agoda一樣，我就問佢點解同website唔同，佢答我website嘅係九月價，但我明明就見到個價係由七月做到九月……因為Hotel Alkyon嘅關係，我又嘗試講價，叫佢做番€135俾我。酒店回覆最盡只可以俾我€140連早餐，yeah~~
Mykonos嘅住宿叫我最頭痛！我知Mykonos嘅住宿同物價指數都貴，只係唔知貴到一個點，€100嘅房叫budgeted room……冇星嘅hotel都收超過呢個價，要sea view就€160起標，貴到呢……Check咗好多間，全部都貴到我揀唔落手……因為要住兩晚，咁搞法會過€300，實在book唔落手……話說我send咗一大堆email去問價，好多都冇回覆……但有一間四星酒店嘅manager reply我，仲報埋價，山景房€160，海景房€180。咁貴，我當然住唔起，本來封email睇完就算，但過咗一日之後，個manager又send email嚟，話收唔到我回覆，問我要唔要房，我就有禮地答佢佢間hotel好nice (其實佢啲咁feminine嘅裝修唔係我杯茶……)，但我afford唔起。原以為大家個conversation會就咁完，點知佢又reply我，話可以offer每晚€10嘅discounts。我見佢咁爽快，就問佢可唔可以減多啲，但佢唔肯……幾經掙扎，睇到網上對呢間酒店嘅評價唔錯，住客尤其對佢嘅service甚為滿意，仲激讚酒店位置居高臨下，夜晚睇夜景唔錯。我見佢咁有誠意，主動send email問我考慮成點，又俾discounts，於是，我就決定豪佢一豪，住兩晚海景房！Send email去book海景房，卻換嚟佢話自己睇漏咗我嘅入住日期原來係weekend，所以唔可以俾discounts我。嘩！四星酒店講過唔算數﹖！佢之前已經不斷叫我做「Mister」，就算我個署名明明係一個女性名字……忍咗佢三封emails後，我同佢講我係「Miss」，點知佢叫我做「Mrs」……後尾先識叫番「Miss」，我以為佢英文唔好(從佢啲文筆得知)，佢又試過搞錯房間價錢，我要問番清楚，以為佢一時唔小心，點知，佢連discounts都可以唔小心俾錯，然後要求收番……對呢間酒店好失望！但為咗個夜景，我仍然回一封email要求佢遵守承諾。如果佢最後都唔offer個discount俾我，我一定唔會幫襯，反正以佢呢個價，我可以有好多選擇 (當然，唔會係四星酒店啦。)！同埋，我都唔鍾意佢嘅裝修。不過，之前必定翌日覆我嘅佢，隔咗兩日都未覆，睇嚟，佢想將件事不了了之。唔緊要，我自會幫佢喺tripadvisor到拉低個分。
由於我已經預咗唔會住Hotel Alkyon，所以又要睇番Mykonos嘅酒店。之前有諗過住海灘附近，就算唔近town centre都唔緊要，最緊要有海景同平，但而家又覺得住喺可以睇到夜景嘅hotel仲正，反正晚上嘅海都只係海漆漆一片，喺Santorini三晚都住海景房，嚟到Mykonos唔望海都ok嘅。翻查自己之前做嘅記錄，見到有間兩星酒店offer嘅價錢超平，兩晚夾埋只係人家一晚嘅價錢，行去town centre都只係兩、三個字嘅時間，對於我同拾爺呢啲每次去旅行都行餐死嘅個性嚟講，實在不存在唔方便呀！我見酒店好似有mention佢有海景房，所以send咗email問清楚我想住嘅房有冇sea view，而家等緊佢覆。
小島住宿搞到七七八八，就到Athens喇。睇完小島嘅酒店，再睇番Athens嘅，真係覺得呢到啲酒店好抵住！由於我哋夜晚先到Athens，翌日又要搭八點火車去Meteora，所以我要揀近火車站嘅酒店，一間兩星，一間三星，兩星嗰間我睇過有住過嘅人影嘅相都好ok，每晚只係€28，包埋早餐，真係平到喊！另一間三星唔要早餐就€39，連埋早餐要€46，裝修當然又好少少啦，但我只係想要個地方沖涼同瞓覺，唔會stay得耐，唔需要太高級嘅享受。只係……三星酒店比較近火車站，房間可以望到個站同售票處，兩星就要行一條街，行唔係問題，治安係我最大concern！太多太多人話Athens治安唔好，聽到我都有啲驚。所以，Athens住宿實在決定唔到……由Meteora番嚟嗰晚又係超夜，本來想住另一區，so that我哋可以一早食完早餐就去Acropolis，但為安全計，應該都會住番火車站附近。其實住番火車站同埋同一間酒店有好處，因為我哋可以寄存行李喺酒店，輕裝去Meteora，番嚟拎番行李就上房，last day又可以先寄存行李，玩完後，再搭火車去機場。
Meteora嘅酒店都搵埋，但未book，因為我未買到火車飛……其實想住高啲，唔近火車站嘅，夜晚望住啲大石。但捧行李上山都唔係易事，加上唔知我哋喺山上玩幾耐，第一日晏晝同第二朝都會上山，如果中午已經行完，我哋可以行埋Kalampaka呢個小鎮，咁住火車站附近就唔駛拎住行李去行喇。
上年plan法國嘅海岸線之旅都冇咁煩，火車、住宿、行程，完全喺我掌握之中，但希臘啲酒店地址，我打落google map都search唔到，啲blogger又唔會mention正確嘅景點名稱，我完全掌握唔到佢哋嘅位置，plan唔到去邊到先……明明係開心嘅旅行，我就搞到日日都要為呢樣為嗰樣煩，呢排睡眠質素好差……我真係要改吓自己事事擔心嘅性格，旅行係為放鬆心情，唔係加重擔憂架嘛！
Eat, Play, Love 