好耐冇做手作喇！隻手痕咗好耐！開咗新stamp，其實上個月買咗好多set stamp都未開封，遲啲逐一開嚟玩吓先！屋企有咁多set未用嘅stamp都好嘅，起碼可以提醒我唔好又再買喇！(慳錢慳錢慳錢~~~)
Stamp: Fifth Avenue Floral
Paper: White, Melon Mambo
Ink: Melon Mambo, Pumpkin Pie, Certainly Celery
Accessories: Ribbon
Inspired by: Lorri Heiling (From Confessions of a Stamping Addict)
「竊聽風雲」的成功，造就了「竊聽風雲 2」的誕生。這齣由「竊聽風雲」原班人馬拍攝的第二章，說的卻是另一個故事。電影仍然由劉青雲、古天樂及吳彥祖擔正，三人的角色性格卻跟上一回完全相反， 可以說是一個「大執位」！上集最貪婪的，這回卻要伸張正義！上集最重情義的，這回卻變了貪生怕死之徒。三位演員可謂「過足戲癮」了！
「竊聽風雲」及「竊聽風雲 2」同以「竊聽」為引子，帶出電影故事。兩者皆以探討人性貪婪為電影主題，只是前者主力著墨於三位小人物身上，談的是個人層面。後者卻與本港金融歷史及社會時弊掛鈎，層面提昇至整個社會。
雖 然兩齣電影皆要探討貪婪，其帶出主題的手法卻大不相同！「竊聽風雲」是單刀直入的帶出故事。三位主角本為竊聽人員，因成功盜聽一則股票的內幕消息而起貪 念。觀眾見證著主角每一步的行動，觀察著他們的心理變化，也不期然的越看越投入，劇情的張力因為觀眾的心理因素而慢慢形成。「竊聽風雲 2」卻滿怖疑陣，觀眾不知道羅敏生隱藏了什麼秘密，吸引司徒念祖日夜的監視竊聽；更不知道司徒念祖的身份是誰，屬正屬邪。唯有跟著何智強慢慢抽絲剝繭，把劇中所有人物的身份背景及他們所幹過的事情揪出。電影的張力也不少，從開首羅敏生與司徒念祖的追逐，中段何智強對司徒念祖的追捕，到後來羅敏生為地主會購買股票的過程，都能扣緊觀眾情緒。不過，由於開段未知各人身份背景，末段又對「神通廣大的地主會頭目竟向一名黃毛小子低頭」難以理解，所以電影的張力只是來自那些追逐的鏡頭及人物的動態，而非劇情本身……難怪網上有人批評「竊聽風雲 2」的張力不及「竊聽風雲」。
喜 歡「竊聽風雲」並非單單是因為劇情張力無窮、主角卡士十足，而是電影想要探討的話題 — 貪。貪，是潛藏各人內心的陰暗物質，是我們用理智去壓抑的一種情緒。看到漂亮的東西，我們會想擁有。看到美味的食物，我們會想吃一口。這都是貪的表現！只 是，我們的財富未必能滿足我們的所有慾望……就如經濟學所言，「Wants are unlimited but resources are limited.」所以，我們得靠理智去壓抑貪念。但……理智一旦失守，貪念頓起，其後果卻未必人人能夠承受。「竊聽風雲」要談的，就是這麼一個簡單道 理。
從他人的影評得到啟發，「竊聽風雲」的英文片名為「Overheard」，把字拆開，再引以港式英語的想法，意思便成為「多聽了」。主 角楊仔及祥仔就是多聽了一段對話，得知股市的內幕消息，因為貪念，從此萬劫不復。楊仔的貪，源於身患絕症，為了家人將來的安穩生活，他決定放手一搏。作為 觀眾，我們當然同情他的原委，但卻未必能接受他為了掩飾一個大話，把情如兄弟，本來正直不柯的俊哥牽進事件之中之餘，更一次又一次的離經叛道。祥仔的貪， 源自其不甘再受未來外父的制肘及白眼而起，可是，他的貪卻惹人討厭。明明未婚妻不介意他的出身，明明未婚妻對他給予支持，他有何貪的理由﹖要是他不想被未 來外父強行要求轉行，要是他真的熱愛自己的職業，他不是更應該做好自己的本份嗎﹖為何違反守則之餘，更大貪得借下五百萬去炒孖展﹖當股價升上不少，明明已 有數百萬下袋的他，還不理楊仔的勸喻，抓著股票死命不放，為的 是要再多賺他數百萬，其貪婪的個性，直叫觀眾可恨！最初雖是楊仔提議知情不報的，但後來最貪的竟是這個我們原以為對兄弟仗義相助的有為警員。看到這幕，再 想起光仔曾對俊哥提及祥仔的前途無可限量，成就隨時在兩人之上云云，頓感世事何其諷刺。就是恃著年青，做事更會不顧後果吧！
「竊聽風雲 2」以「報仇」為主要骨幹，影片為了交待司徒念祖的身份，及其報復的原因，難免對人 性貪婪的探討及各主角的性格刻劃不夠深入。影片談及以富豪及股票經紀成立的「地主會」操控股票市場這個題材既敏感又新鮮，「地主會」的成員及其於股壇的影 響力，令人難以不以之對照現今香港社會的地產霸權！還有羅敏生回想前事後，慨嘆的一句﹕以前咩都冇，就係得機會！可惜現今的八十後及九十後青年，不但什麼 都沒有，就連機會都沒有。讓觀眾產生共鳴這一點，影片確有做出一百分的水平呢！除卻「地主會」外，觀眾亦不難於片中找到導演對社會時弊的諷刺。何智 強身為保安主任，卻常把「差人做到嘅嘢其實真係好有限架咋！」掛在嘴；就連大法官的姪女掌摑警員一事亦被影射！現今的香港社會，不就是人人恃惡行兇，政府 弱勢嗎﹖不過，導演也有為金融講公道話，沒有金融市場支撐，香港實無立足之地。水能載舟，亦能覆舟。香港需要金融市場，卻不能過於依賴之。
「竊 聽風雲」初段較為平淡，在主角並未最得有用情報前，觀眾首先從幾幕片段得知各故事人物的性格特徵，俊哥性格隨和，重情重義，尤其對兄弟朋友，可惜感情上卻 拖泥帶水。楊仔為人草根，粗心大意，與妻子恩愛非常，育有數子女，可惜其中一人患病。祥仔表面風光，實際處處受到未來外父打壓，有苦自己知。其他人物如光 仔及另外兩名的警員亦有他們背後的故事。導演並沒有刻意把每個人的背後故事拍出呈現觀眾眼前，有些資料只需從他們的簡單對話便能得到。這麼一大堆的背景資 料，也只用數個場景片段作交待，保持電影節奏明快。
相對「竊聽風雲 2」對主角的描寫委實水過鴨背，大義滅親的何智強這幾年是怎樣捱過的﹖既然故事設定了他有這麼一個耐人尋味的背景，為何不再讓觀眾深入一探他的內心世界﹖何智強這個角色彷彿只是司徒念祖的一隻棋子，他倆的互動關係只會讓人錯想成「暗戰」的翻版， 要突出影片的獨有性，不是該作其他角度的探討嗎﹖司徒念祖與忘父的關係又是只作流水式的描述，讓人很是失望。既然影片是以他為父報復為主幹，我想多講述他 與父親的點滴，才讓結局中他的自我犧牲以完成整個報復計劃更有說服力吧！羅敏生的心路歷程算是交待得最為完滿！由當初熱心救華資公司，吸引祥叔招攬，到後 來為錢甘受地主會擺佈，再因為「那張支票」喚醒良知，觀眾都能逐一見證他的心理變化。
整體而言，還是喜歡「竊聽風雲」多於「竊聽風雲 2」！
P.S. 「竊聽風雲 2」那幕「鉅記」的宣傳技倆實在讓人咋舌！現今電影業真的很艱難，看到此幕，只覺可悲可悲！
一早起身同拾爺去銀行！話說一月尾時，我哋去咗DBS開戶口，為嘅係貪佢三個月會有$200利息！其實……我哋應該一早就去cut咗佢！不過……懶人性格，拖到而家先去，嘻！
Cancel咗個戶口，將啲錢入番落我哋中銀個聯名戶口到，再處理埋其他嘢。而家諗緊好唔好去開番個人仔戶口……係就係遲哂架喇，但再唔開，只會更遲……不過啲銀行好衰架！一定要人新買入，先有好嘅息口……我之前剩番嘅人仔就唔count……
離開美孚，諗緊番唔番屋企附近食lunch，定係出荃灣。然後，我口痕話去沙田食，之前一直想試吓City Art個半自助餐架喇，不過好難book位嘅……打定輸數book唔到，但又想搏吓。於是，都係打去問。點知，有喎！Yeah！
Book咗一點！收線之後，拾爺話驚人哋留啲門口位俾我哋……唔會啩……係嘅，最多咪唔食！
去到City Art，等waitress帶我哋去坐。行過門口排位後，我同拾爺兩個笨蛋都鬆咗一口氣，哈哈！幾驚佢要我哋做門神呀！
坐低，即刻拎嘢食！呢到嘅半自助餐係可以任食頭盤同甜品架！每位$158，HSBC card有八五折，Heng Sang同Citibank就有八折！
出到去，見到好多ham呀！開心死我呀！雖然之前喺歐洲日日都食，但我仲未厭呀！真係超鍾意食ham呀！
於是，我又一貫食ham作風 — 樣樣拎一塊嚟試喇！除咗ham，我係一個好鍾意飲湯嘅人嚟嘅！一見到忌廉蘑菇湯，我又忍唔住要即刻舀嚟飲喇！不過……鹹咗啲又唔夠cream喎……
呢到都幾得意架！擺得一鍋湯，但當啲人飲哂鍋忌廉蘑菇湯之後，佢哋唔係refill番同一款湯。而係捧另一款 — 龍蝦湯出嚟！所以，我今日飲唨兩種湯，好滿足！
下圖就係我拎過嘅嘢食喇！
拾爺食咗呢啲啫﹕
主菜方面，拾爺揀咗煙三文魚Fettuccine，我就要炭燒肉眼扒。Waitress上咗一兜麵包 俾我哋，但我顧住食其他嘢，只係食咗一小塊有蕃茄味嘅，拾爺話其他都幾硬……冇乜點試拾爺個main course，因為我連自己嗰個都要拾爺包底……所以不予評價喇。我個steak都整得唔錯，唔怕咬唔開，雖未去到好juicy，但肉汁冇話流失哂。
食完main course，當然要食吓甜品啦！有啲真係好甜，甜到我食唔落……而且，款式唔算好多，大部份都唔係我杯茶……
食完飯，喺新城市行咗陣街。喺Ted Baker買咗個新銀包，$900，用HSBC card有9折。真皮銀包都係收呢個價，真係好抵！雖然外面係柒皮，但ok啦！我鍾意佢隻色好sharp，係橙色嚟架！所以，就算有兩嚿嘢突起少少，有啲 阻地，我都照單全收！我嗰舊銀包用咗4年，都係時候退役喇！(都係真皮嚟架！當年用咗$330買咋！我係咪好慳家呢﹖！)
行完街就番娘家喇！我同拾爺決定以後除特別事件外，都會逢星期六番去，陪多啲屋企人！今晚好齊人，除咗細佬去咗旅行啦！成家人坐埋一齊，有講有笑咁食飯，好開心呀！
傾開偈，嫂嫂知道拾爺番去要洗衫，就問我負責咩，我答﹕玩！
嫂嫂﹕……咁妳都幾歎架喎！
我﹕我有時都會整甜品俾佢食架！整完我會洗嘢囉！
嫂嫂﹕咁唔整咪唔洗洗囉！
我﹕都係嘅……但我會整架嘛！
媽媽﹕好心佢洗衫，妳就幫手晾衫啦！
我﹕我有幫過架！但佢次次都話我晾得唔好，唔俾我再晾……
媽媽﹕咁洗碗呢﹖
我﹕我有洗架！但佢話我洗得唔乾淨呀！我上次洗完個煲，佢隔幾日就話我之前洗得唔好喇……吸塵又話我會整花佢幅牆，拖地更加唔俾我做，每次佢一拖地，就唔俾我行，話怕我跣低……
媽媽(同拾爺講)﹕佢洗得唔乾淨就算啦，你唔好出聲喇。(注﹕媽媽唔係幫我口，只係唔想佢個女我承機乜都唔做，佢係戥拾爺辛苦咋！)
其實媽媽一向都知我哋嘅情況，所以佢好明白點解拾爺咁鍾意小朋友都話唔生，因為，佢知道拾爺一個人，冇可能又番工又做哂所有家務，又湊我，又湊亞B……
其實……我都知拾爺辛苦架喇……但係……我好enjoy而家乜都唔駛理嘅生活喎……雖然我嘅實際年齡不斷成長緊，但我個精神年齡好明顯係拒絕增長中！
早前送給E仔們的卡仔！因為佢哋真係好盡力去做份工，我衷心慶幸自己有呢班好幫手！為佢哋嘅努力感到驕傲！
Stamp: En français(Stampin’ Up), Clear stamps from Studio G
Paper: Black, White, Grey, Yellow
Ink: Versa Magic Midnight Black
Accessories: Ribbon, Owl builder
Inspired by: Chat M. Wszelaki (From Me, My Stamps and I)
噚日狠下心腸，所有遲交功課嘅同學嚟見我時，我都拋下一句﹕聽日交，八折！呢招都幾有用，今日收番好多喇！不過，噚日都搞笑喇，有學生同我講價，問我九五折 得唔得，之後有人話因為漏咗份嘢喺屋企，朝早臨時做，想交住先後，第二日再換番。嘩！佢哋當我賣嘢架﹖！講完價後，又要換貨﹖！睬佢都傻呀！
今日繼續兇我嗰班，要佢哋準時入課室，如果唔係，一概當遲到論！臨落堂前，又叫佢哋唔好當今年係honeymoon period，掛住玩唔讀書，希望佢哋真係生性啲啦！要佢哋好勤力咁讀就冇可能架喇，但至少唔好玩到個心創哂啦！
放學，print少少嘢後，就即時去做facial。本來想行過去架！(平時都係咁！)但因為我已經遲到，太耐冇著番學鞋，對腳又唔聽話，所以都係搭地鐵。
做完facial，就去咗老苔目到食 飯。呢間餐廳係之前睇報紙介紹嘅，係同「千福大少」同一版架！噚日食咗咁正嘅「千福大少」，今日就試埋呢間啦！聞說魯肉飯都整得唔錯架！雖然 Openrice好多人話佢大不如前，但魯肉飯好似都保持到水準，對於癲愛魯肉飯嘅我嚟講，點都要去試一試！唔好食，都係冇咗幾十蚊！好食嘅話，以後開 餐，又會多一個地方喇！
入到去，坐低，睇餐牌。下午茶餐冇魯 肉飯……反面午市優惠有！細碗就$14，大碗就$18，但係……呢到最低消費要$20囉！咩料呀﹖！午市優惠又冇加$4有嘢飲……反而下午茶餐會有！雖然可以揀魯肉便當，但我唔想食便當喎……於是，就要咗個細魯肉飯($14)、蚵仔煎($24)再加$4要咗杯荔枝烏龍喇！
嘢食上枱，第一時間整番啖魯肉飯先！好失望……得個鹹字……唔係難食，但唔會覺得好食囉！唉，睇怕喺香港都食唔番喺台北嗰間正嘢嘅古早味魯肉飯架喇……蚵仔煎都幾正宗，真係有嗰啲好似鼻涕(sorry，係核突咗少少嘅……)嘅嘢喺入面！蚵仔落咗胡椒粉，都幾野味架！
結論﹕唔再番轉頭嘅餐廳是也！
食完，喺太子行咗陣，就番屋企喇！因為對鞋著到我對腳太痛喇！所以要番去換鞋，先再去奶奶到！
Eat, Play, Love 