Cafe Too

媽媽同肥仔張Shangri-la coupon就嚟夠期，於是佢哋就叫埋我同大妹一齊去食buffet，用咗佢。大妹遲到，我先同媽媽同埋肥仔去到酒店嘅business centre到換voucher，呢兩個人一拎到封信，就咩都唔睇就行……我叫停佢哋，拎封信嚟睇，見到只係每人換咗USD 50嘅voucher，於是即刻番轉頭同個staff講之前俾咗每人兩封email佢，我哋係要換每人USD 100嘅voucher，對方即刻同我道歉，兼問我哋去邊到食嘢，話會搞掂後搵人送上嚟。

去到Cafe Too，我哋被安排坐兩張二人枱，因為細妹打去book枱時講明要用兩張vouchers去找數，所以餐廳安排兩張枱喺隔離，方便一陣分單找數。坐低前，waitress索性幫我哋將兩張枱排埋一齊，服務唔錯！

呢間Shangri-la嘅buffet我覺得唔及九龍嗰間，嘢食選擇好少……我都冇咩作戰mood……

第一輪﹕例牌食冷盤，ham同煙三文魚都唔係咩靚貨色，sashimi方面，tuna麻麻，但salmon幾肥美。

第二輪﹕好少食buffet有上海嘢！但個燻蛋蛋味唔夠，煙燻效果亦只屬一般，而且個sauce好鹹……醉雞味道過淡，水晶肉太薄，食咗好似冇食過嘢咁……至於個mozzarella cheese水準亦好一般。

甜蝦粉皮﹕個sauce好鹹……唔好食！

第三輪﹕蟹腳冇鮮味，青口直情冇味……

燒牛肉﹕呢塊有水準，塊牛唔怕嚡又唔覺韌，有少少牛味，幾好！

燉湯﹕唔太記得咩名堂，有冬瓜同雞咁啦，唔太特別，不過，我哋係一點出爐時去拎嘅，個湯好夠熱！

第四輪﹕再食燒牛肉，不過，今次呢塊嚡咗啲，頭先塊有肥有瘦，啱啱拎到靚位，所以好味，呢塊去到尾，只有瘦肉，所以冇咁好食……燒雞翼層皮就燒到好香，但啲雞完全冇味……

其實我仲有食吓香腸、蝦餃、魚柳等等，但冇影到相。

第N輪﹕終於到dessert time，不過，呢到啲甜品真係唔太吸引，我連樣樣試少少嘅動力都冇……圖中嗰3件，我全部都覺得唔好食……今次食咗4球Häagen-Dazs雪糕，green tea, chocolate, cookies and cream同caramel。

最後一輪﹕水果，蜜瓜同品蜜瓜都唔夠甜……又唔多水……

食食吓，見到周麗淇，真人好瘦，而且每次出嚟拎嘢食，都只係陪個friend拎，自己冇咩點食。後尾發現原來佢今日約咗呂良偉一齊食嘢，嗰刻先aware頭先佢係同呂良偉個老婆一齊出嚟拎嘢食。佢哋坐喺餐廳一角，仲有個架擋一擋嗰隻，有哂私人空間，我哋走嘅時候，見到佢哋仲影大合照呢。

埋單$550，因為voucher嗰到已扣USD 200，但餐廳唔俾我簽卡，堅持要係voucher持有人先可以埋單……

評分時間﹕
食物：一般
服務：中上
環境：中上
衛生：一般
價錢：Overpriced
總結﹕性價比太低，可以不試！

餐廳資料：
Cafe Too
金鐘金鐘道88號太古廣場2座港島香格里拉酒店7樓
2820 8571

On Five

拾爺果然知我心意，結婚5周年，送上佢作嘅詩一首俾我做禮物。呢首係佢第2首為我寫嘅詩 (第一首於求婚時送上。)，對我嚟講，份禮物係無價架！

Bread Street Kitchen & Bar

結婚5周年，去咗Gordon Ramsay間餐廳去朝聖！早於一個月前已經訂位，但都只係訂到6點15分……好彩，我同拾爺都可以趕得及去。

餐廳門口

餐廳環境

同拾爺準時到達，餐廳安排咗近窗靠邊嘅sofa位俾我哋，當時餐廳人唔多，我估大部份嘅人都book咗7點打後嘅時間。

餐廳佈置及menu

我哋order咗一個starter同兩個main courses，點餐後，waiter就送上麵包。

麵包﹕只有兩種選擇，其中一種外面有少少脆，但兩隻包都唔太有麵包味，談唔上好食……

Yellow fin tuna ceviche, avocado, sweet onion and sesame vinaigrette ($148)﹕好一道冇咩特別嘅菜……拾爺之前上網睇到有人叫過tuna嘅dish，該道菜係有煎tuna嘅，我哋以為呢道都係，點知原來只係tuna sashimi……食唔到啲咩cooking technique添……個sauce又鹹得滯，份量又少，呢道菜性價比低咗啲囉！

Slow roasted pork belly spiced apply puree (198)﹕雖然pork belly好易滯，兩件都夠我哋食，但感覺又真係好細份……個皮唔算好脆，食落去有啲韌……嚿肉個味道就普普通通咁，又係唔覺佢值呢個價！

Traditional shepherd’s pie, braised lamb, onions, carrots, celery, potato puree, parmesan, brioche garlic crumbs ($198)﹕拾爺先食，一食就話怕我受唔到，因為呢道菜好羶！我食完之後，都真係覺得好羶！不過，最大問題唔係羶，而係佢好鹹……鹹到令人好難接受……

食食吓道Traditional shepherd’s pie，有個waiter走嚟問我哋點，我哋就坦言道菜好鹹，佢就主動offer幫我哋換，仲同我哋講有咩問題都可以出聲。

等緊新嘅Traditional shepherd’s pie時，拾爺去咗洗手間，期間，另一個waiter走嚟同我講佢聽到我頭先話受唔到咁羶，佢話呢道菜嘅羊肉番到嚟係嗰隻味就係嗰隻味，怕再換一兜俾我，我都係受唔到，問我想唔想轉另一道菜，我當然話好，於是，就轉咗﹕

Bread Street Kitchen short rib burger, Monterey jack cheese, spicy sriracha mayo ($188)﹕上Openrice，見唔少人推薦呢道菜，係就係好足料，但我唔覺得好食……個麵包烘得唔夠脆，入面塊肉又唔夠juicy，冇咩特別……

Pineapple carpaccio, passion fruit, coconut sorbet ($88)﹕訂枱時，我有寫明呢餐係慶祝結婚周年，所以餐廳自行幫我哋喺甜品碟上寫字，好貼心！只係……個甜品啲菠蘿片好甜……餐廳用咗passion fruit汁去浸，但啲passion fruit汁好罐頭同好甜，搞到啲菠蘿片好難食……個coconut sorbet就正正常常咁啦。

埋單$685。

評分時間﹕
食物：一般
服務：好！
環境：中上
衛生：一般
價錢：Overpriced
總結﹕可以不試！

餐廳資料：
Bread Street Kitchen & Bar
中環雲咸街33號蘭桂芳酒店M層
2230 1800

 

Mock Court (對戰上屆亞軍)

最後一場決賽，今次對戰上屆亞軍，對方更係名校中嘅名校，我哋有哂心理準備會輸，但經過上次一役慘敗，過去一個禮拜，大家都更認真去備戰，見到班學生咁齊心同咁投入去準備呢個比賽，就算最後輸，我都咁開心。

今次我哋學精咗，早啲去到場地，霸間房練習。因為大家都已經豁出去，所以練練吓又會講吓笑緩和氣氛，我估出面啲人見到同聽到我哋一班師生咁傻笑，實以為我哋short嘅呢。

呢場比賽我好滿意，多得兩位證人夠硬淨，對方點都攻唔破我哋嘅供詞，尤其係茱莉亞，佢真係好認真，一路背稿，一路諗埋對方可能會問嘅嘢，然後再諗應對，結果對方真係問，而佢又兜得到！評判最後都走嚟讚兩個證人做得好呢！律師方面，今次隊長好認真，上次一役見大師姐輸得慘，就番屋企重寫結案陳詞，又幫兩個師妹執佢哋嘅主問同盤問問題，今次3個律師都夠淡定，壓到場，班妹話聽到評判都有讚佢哋呢。

至於友校方面，人家果然係名校之中嘅名校，佢哋有啲觀點係幾唔錯架，我哋之前打呢個位都冇諗過，主打律師雖然表情同聲線係浮誇咗，但人家唔駛點睇貓紙都可以講出一大輪嘢，而且即場發揮得收放自如，呢樣嘢係我班妹學幾世都學唔識架！我班妹係勤力，但佢哋即場應對真係好差……只係識跟稿讀，執生能力真係有待琢磨呢。

雖然未知結果如何，但聽講我哋呢場打得好過之前兩隊嗰場，睇到班妹有進步，我已經好開心喇。今場個官正常好多，中肯地指出呢場官司可以改善嘅地方，佢對友校嘅提議，其實就係我哋上場都有做嘅，但上場個官就完全唔buy我哋……所以班妹都話如果上場係佢主理，我哋個分應該唔會太低。而家只望今場可以幫我哋挽回劣勢啦。

Goobne Chicken

舊生介紹嘅餐廳，想試好耐架喇，因為去韓國食唔成炸雞，所以番嚟香港要搵番間韓國人主理嘅炸雞店食番餐勁嘅！不過，呢到嘅雞其實係焗唔係炸。

同另一個舊生嚟食，冇book枱，但因為我哋6點到去到，所以都有walk in枱，限時個半鐘。

餐廳環境

Menu﹕好colorful

餐枱佈置

因為得兩個人去食，所以可以點嘅嘢食好少，少到……只能叫兜雞，哈哈！

問waitress要水，結果大大隻杯只裝得一半嘅水……

舊生點嘅飲品，唔記得個名，只記得要$50。

Goobne Original ($148)﹕味道一般，因為係焗嘅，所以個皮唔得脆，肉汁唔多，雞更加唔嫩，加上兩個要食哂一兜，食到有啲悶……

埋單$218。

評分時間﹕
食物：一般
服務：一般
環境：一般
衛生：一般
價錢：一般
總結﹕冇必要試！

餐廳資料：
Goobne Chicken
赫德道4號The Hart 2樓
2311 0001

 

Mock Court (對戰上屆殿軍)

第一場mock court嘅決賽，對戰上屆殿軍，本來班妹一直表現唔錯，但因為人家盤我哋個被告時，佢哋因為被告答錯咗其中一題，就自亂陣腳。其實嗰一題唔算好重要，其他問題亦唔影響，但佢哋就慌死被人攻破防禦咁，夾硬搵嘢覆問……覆問係用以clarify一啲points，佢哋卻覆問之前問過嘅嘢，搞到個官都要質問佢哋覆問嘅原因，大師姐仲要答佢要「強調」，聽到我火都嚟埋，佢覆問時問錯問題已經被扣technical分，仲要答人想要強調，人哋仲唔再扣我哋﹖！場官司未完，我已經知輸硬！結果，個官嘅comment果然係favour另一邊，但我唔忿氣佢favour另一邊嘅原因純粹係佢buy對方律師嘅個人show。坦白講，論法律觀點，我覺得我哋啲points唔差，只係呢個官唔buy，但佢讚對方律師嘅嘢，其實好唔logical，佢話欣賞個律師唔識答，都會講啲嘢去拖住，但個律師根本就九唔搭八，九唔搭八咁拖住都值得欣賞﹖！我真係好唔同意囉！我覺得我哋係輸俾自己 (犯得太多可以避免嘅technical errors啦！)，而唔係輸俾友校，因為友校個表現都真係好平平無奇。

場官司一完，我急不及待要brief吓班妹，大師姐聽到我指出佢犯嘅毛病，為自己嘅出錯而喊。其實我平時好憎學生輸比賽喊架，但我知佢喊唔係因為輸，係因為覺得自己做得唔夠好，所以都有安慰佢。我知仲有同學對結果感到不快，覺得自己付出咗好多努力，但結果未如理想。其實我自己都好唔開心，但我覺得今次衰咗，咪檢討吓，下場打好啲囉！可以為自己表現得唔好而唔開心，但唔好因為收穫與付出不成正比而忿恨，需知道呢個世界一山還有一山高，你覺得自己已經付出好多，可能人家比你仲多呢，right﹖

擁抱太陽的月亮

「擁抱太陽的月亮」乃韓國MBC自2012年1月4日始播之水木迷你連續劇，改編自廷銀闕的同名小說，描寫喪失記憶後成為巫女的世子嬪與年輕王世子之間的愛情故事，是一套架空古裝劇。當年以超過40%的高收視被韓國媒體譽為「國民電視劇」。

因為「來自星星的你」而迷上金秀賢，因為迷上金秀賢而決定翻看他演出的作品！其實細妹曾經向我推介此劇，奈何當時我對韓劇的印象仍然停留於「藍色生死戀」及「天國的階梯」(其實兩套劇我想沒看過！)那種男、女主角都必需患上絕症，然後每天也得哭斷腸的劇情，所以我很抗拒觀看。不過，迷上金秀賢後，看過「來自星星的你」之後，我對「擁抱太陽的月亮」的劇情增添了信心。

當初抱著欣賞金秀賢演出的心態看劇，最後吸引我的，卻是首六集沒有金秀賢戲份的劇情！雖然，我是一邊觀賞，一邊冀盼金秀賢早些出場，但劇集中，李暄與煙雨之間的愛情卻是年少時那段最為吸引。事實上，此劇開始不久，收視率便折折上揚，當時金秀賢與韓佳人皆未出場，可見，韓國觀眾亦十分欣賞年輕時的李暄與煙雨的一段情。雖然，李暄一開始是被煙雨的美貌所吸引，但他對煙雨之情根卻是因對方的才智而所栽種。為了娶得賢妻，還是王世子的李暄不惜利用成均館向父皇施加壓力，其政治智慧令當時的聖上感滿意，藉機向皇太后施壓，如世子所願。奈何外戚狠毒，以「煞」害煙雨，使其患病，李暄雖為世所迫，未能保住愛人的世子嬪身份，但心裡卻從未放棄愛人，偷走出宮予以定情信物，於煙雨死後，八年來守身如玉，對後來的世子嬪不屑一顧，用情之深，實在叫人動容。不過，男女主角長大後所經歷的，對我而言，是有些拉扯，感覺劇情節奏過於緩慢……反而李暄於政治上與尹丞相的角力更為吸引！

金秀賢憑此劇走紅，實在是理所當然，得到一個如此吸引人的角色，根本就是成功的一半。原來早於「都敏俊」之前，佢已演過用情至深的角色，難怪「來自星星的你」令他的演藝事業更上一層樓，他根本就是情深的標誌了，怎會不吸引女性觀眾﹖！不過，我最喜歡的角色卻是李暄的內官，雖然偶爾會被李暄整得很慘，甚至會被大罵，但對王仍然忠心，甚至痛愛。他在王身邊多年，是最明白王的寂寞，及對煙雨的思念有多深。他與王之間的感情及互動緩和不少緊張劇情之氣氛，我從後來看到有關金秀賢與鄭殷杓的訪問才得知，兩人不時自行加插台詞，劇中有兩幕是李暄要求內侍別過臉去的場景，原來是金秀賢臨時加上去的，而鄭殷杓亦很有默契的去接戲，那兩場戲我個人非常喜歡，看得會心微笑呢。而劇中我最不喜歡的就是旼花公主！她真的非常自私！網絡上竟然有人讚她對許炎用情之深，我真的感到奇怪。就當旼花公主當年年少無知，被祖母利用作祭品，長大後的她明明見到丈夫為死去的妹妹終日鬱鬱寡歡，家婆不時以淚洗臉，向李暄明言終於知道自己所作的罪孽，可是，她卻表示並不後悔。原來，她的愛，就是要將自己喜歡的人留在身邊，哪管雙手沾血，哪管身邊人根本一點都不快樂。她愛的根本不是許炎，而是她自己！相比起煙雨，為了令所愛的人李暄及兄長不再難過，大方的原諒旼花公主，後者更顯得自私自利。對於結局，她竟得到許炎的原諒，雖然心裡明白許炎這樣做並不是出於對旼花公主的愛，只是想報答雪，但總覺得這個結局是讓旼花公主賺到了。

此劇不少飾演年少角色的演員我也甚為欣賞，首位一定是金裕貞！個人覺得她比韓佳人更美，予人不吃人間煙火之感，絕對是煙雨的不二人選！其次就是陳智熙，樣子甜美的她，飾演年少時期的旼花公主，她的出現，往往令整個場景的氣氛充滿歡樂。其實，差不多所有飾演年少角色的演員也比正式的主人公還要美麗或俊俏，陽明君如是，許炎亦如是，唯獨扮演李暄少年時期的演員，樣子真的不怎麼樣，我初時看到他扮演金秀賢的少年，心中不免有感不快，不過，他的演出也確是精彩，所以後來也就慢慢接受了這個年輕版的李暄。

最後，個人覺得劇集的成功不只是因為男女主角之間的愛情 (當然，男主角的深情居功厥偉！)，還有賴故事結合了歷史、政治等等的元素，而我最欣賞的，是故事對「王」的內心描寫！當所有人都以為「王」是要風得風之人時，作者卻透過李暄這個人物，立體地呈現出古時皇上的孤寂，有時位高權重至無人敢加以接近，或加以接近的都是有所求時，生活就只會剩下空虛與孤寂。