盈翠半島

下午3點幾，收到agent whatsapp，話盈翠有個望公園景嘅單位放售，本來約好聽日下午5點去睇樓，點知……是夜9點半，agent再whatsapp，話個單位賣咗……我懷疑買家連樓都冇睇就買喇，而家啲人真有錢，講緊698萬呀！不過，單位座向真係唔錯架！我好想睇吓個景……

城中/都會駅 + 維景灣畔

可憐嘅拾爺聽日就開學，最後一日假，我倆當然要出去走走啦！無無聊聊又去睇樓，今次揀咗城中/都會駅同維景灣畔。因為而家冇咩鎖匙盤，所以agent都係帶我哋去睇租盤。

先講城中/都會駅，地鐵站上蓋，位置方便，但跟屋苑嘅商場好細，購物同飲食都冇咩選擇……屋苑樓齡細，裝潢舒服，而且唔俾養狗，呢幾點我都buy，只係……佢係長實樓，用料一定差啲。睇咗幾個單位，我同拾爺唔太buy呢到嘅三房隻則，兩房反而仲見駛！但同昇悅居，呢到嘅兩房面積細啲，仲要有露台，真正可用空間就更小……雖然，我同拾爺都想可以喺露台改吓嘢，行入其中一個海景單位，喺露台上吹吹風真係好寫意，但可以收納更多雜物，更係我哋首要條件。

另一屋苑係新地樓，用料一定好啲，但就俾養狗，而且樓齡耐啲，屋苑裝修較老土，屋苑冇自己商場，要買嘢就要行去隔離城中/都會駅個商場……我哋只係睇到兩房單位，雖然其中一間景觀唔錯，但個則就唔多好……

總結﹕將軍澳對我哋嚟講，都係太遠喇……

 

觀月‧樺峯

全家加姑媽、表姐一家到觀塘飲茶，飲完茶大妹提議去「觀月‧樺峯」睇樓，於是，我同拾爺同埋大、細妹一齊去運吓吉。

行到「觀月‧樺峯」樓下，見到將來會係健康院，立即對棟樓嘅評分打個折扣！屋苑有健康院，即係會人來人往，最怕人多！行入大廈前，有一地產經紀搭訕，於是我哋一行四人就跟佢入去睇樓。入去前，我哋被要求每一拎一頂地盤帽……原以為要帶住頂帽睇樓咁麻煩，仲想走人，點知原來我哋只需拎住頂帽入去，搭lift上樓前，會有另一staff收番頂帽……Agent話因為佢哋外牆仲施緊工，所以入去要拎帽，如果唔係發展商會被罰。

Agent先帶我哋睇一間已裝修嘅三房單位，單位實用面積都成八百幾九百，景觀開揚，間隔四正，所有嘢都好好，係價錢唔好……成千幾萬，我呢世都唔知搵唔搵到咁多錢！再睇另一間細啲嘅三房，價錢仍然令人卻步。之後又睇咗兩、三間，都唔太記得喇，只記得最後一間兩房兩廁嘅景觀最好！但最平嘅都要成九百幾萬，真係唔駛諗！同埋，個人覺得兩房兩廁嘅設計有啲浪費，將套廁位俾埋主人房，咁個衣櫃可以大好多囉，而家個主人房放衣櫃位好細，根本就唔夠擺衫！

不過，其實「觀月‧樺峯」係幾有潛力，而家起好第一座，將會有多四座，屋苑差唔多完成時，就會有天橋駁去地鐵站，落實埋單軌列車到油輪碼頭，東九龍其實仲有升值潛力，只係……呢到真的太貴了！

大妹同agent好好傾，由「觀月‧樺峯」講到「天晉IIIA」再到長沙灣嘅單幢樓，我同細妹始終覺得買樓花唔安全，我亦非常抗拒單幢樓。

昇悅居 Again

兩公婆一齊搵外快，出發前，拾爺明明叫我做完可以走先，唔好等佢，結果卻係……我做完想走先，仲同同事say咗goodbye，拾爺卻扁嘴唔想我走……好彩我帶咗嘢改！個幾鐘後，同事見到我仲喺到，忍唔住問我﹕「妳唔係走咗好耐架啦咩﹖！」只能答句﹕「男人都係口不對心架！」

兩公婆一齊搵外快，出發前提議做完嘢去睇樓，拾爺卻表示自己仲有好多嘢要趕住番屋企做，加上天氣唔好，睇嚟都冇意思。結果卻係……大家都做完嘢後，有人唔想番屋企，以唔想「我」失望為由，「陪我」去睇樓。

睇樓前，先send個whatsapp問問中原個agent最近有冇兩房大size放盤，佢話放親都叫6百萬以上，仲要係中低層……但我明明見到香港屋網有盤放，對方就話佢哋冇……同拾爺商量過後，都係決定去到附近搵間agent入去問吓。本來係想去置業18，因為見到佢哋喺香港屋網到放咗唔少盤出嚟，但去到卻發現佢哋間舖裝修緊……最後，改為入去利嘉閣。因為我哋係出咗嚟先臨時決定去睇樓，所以冇帶到之前嘅睇樓紙，agent要俾張map我，同我講佢有咩單位，等我睇番幅圖，憑印象去記吓有冇睇過。雖然我唔驚重覆睇相同單位，因為我記得有興趣嘅單位，冇興趣嘅，即係唔會買，咁再睇都唔會要俾兩邊佣，但我唔想嘥啲咁嘅時間。

最後，因為冇乜兩房大size盤放出嚟，我哋睇咗兩個兩房鎖匙盤，同宇晴軒嘅兩房單位。Serve我哋嘅agent因為之後有約，所以就叫咗個同事負責帶我哋去睇……我同拾爺之前試過兩次咁嘅情況，今次又係一樣，被彈去嘅agent又係咩都唔識咁……

Agent帶我哋去第一個鎖匙盤時，一去到屋苑樓下，佢先錯報俾個security聽自己要睇業主盤……然後，帶我哋搭lift，又冇望清楚部lift係去單層樓嘅，入去見冇制撳，又帶番我哋出lift……第一個盤望嘅係內園景，景色一流，但呢隻兩房好細，完全唔夠用！首先個廳有玄關，個玄關又窄，放唔到鞋櫃，只會嘥咗個位……然後，個廳比起兩房大size嘅則細好多，整唔到拾爺心中嘅大收納櫃。呢個單位有露台，但個露台超細，同弘景臺嗰啲真係冇得比……人家可以一邊放櫃一邊晾衫，又或者放set枱凳喺出面hea，但呢到……真係晾衫都嫌佢細……睇完個廳，就行入房，入第一間，以為ok，再入另一間先知，原來頭先自己覺得作為細房個size都ok嘅房，其實已經係主人房！！！嘩！兩間房都好細，唔夠住囉！

再睇另一個同則單位，都係內園景，agent話更多人喜歡呢個方向嘅景觀，但我同拾爺都buy頭先嗰個多啲，然後，agent仲話呢個叫價更高……我明明出發前就問咗另一個agent所有單位嘅叫價，呢個應該係平啲……Agent得知我聽到嘅價同佢唔一樣時，即check文件，然後就發現自己搞錯咗……

行去宇晴軒睇另一單位，其實我冇興趣去宇晴軒睇樓，因為之前已經睇過該屋苑嘅兩房單位，個則唔太好，然後，agent報呎數時，更清楚個單位唔會夠住，但拾爺話一場嚟到就睇埋……結果……個agent唔太識路，跟住佢向左行幾步後，話自己記錯咗，帶我哋往右行，行咗一段路後，又話再次搞錯，又行番轉頭……宇晴軒個單位的確好細，細到完全唔會作考慮！

睇完樓後，個agent問我哋有冇興趣睇弘景臺，話可以安排，拾爺say yes，我即刻好大反應話之前睇過唔想睇。Agent走後，我即刻話鬼拾爺！明知個agent咁笨，仲跟佢去睇樓，即係搵自己笨！弘景臺嘅兩房單位我哋都睇過，個則唔及昇悅居，根本不作考慮，睇嚟都嫌嘥時間呀。

大妹新居

同親戚飲完茶後，除嫂嫂同肥仔外，我哋大伙衝上大妹屋企。大妹搬咗屋都有成個月，雖然間屋未完全執好，但難得大妹唔介意，我哋就當然要上去參觀吓啦！

大妹而家住嘅屋苑我同拾爺一直冇考慮，因為唔近地鐵站，我倆都嫌唔夠方便，但大妹就覺得屋苑有shuttle bus，再唔係搭van仔都係5分鐘就到地鐵站，所以佢唔覺得有問題。屋苑唔近地鐵站，所以環境清靜，呢樣係幾好嘅，仲有海傍行吓。不過，屋苑都幾舊，就大妹個單位，我哋已經見到個外牆唔多掂，應該好快要翻新。

大妹間屋間隔好好，同我屋苑一樣！不過……佢個單位嘅view卻唔係我杯茶……廳同細房都係樓景……大妹之前話佢間屋係海景單位，我仲以為係無敵大海景(利申﹕我唔係海景單位瘋愛者！我鍾意翠綠山景多啲，香港個海都唔靚嘅，用咁多錢買向海樓嚟做乜﹖！加上啲地產商，有位就起樓，海景樓本冇保證……買樓，我傾向買內園景多啲，因為有景觀不變嘅保證！)，點知……去到主人房，見到佢個細L型窗嘅一則先見到個海……另一則又係被其他樓遮住哂……基本上個海景要打則個身先睇到……大妹好鍾意自己個單位，細妹都激讚，爸爸都話價錢ok，只有我同媽媽覺得幾百萬嘅樓，要有所要求！我同媽媽都唔buy呢到個view。細妹覺得咩景都冇所謂，仲challenge我屋企都冇view，我即時強調我屋企係望泳池同有翠綠小山(因為座山都有樓，所以下層睇到好綠，上面就被block了，幸好大家距離遠，冇壓迫感。)。同埋，最重要係，我間屋係金融海嘯尾段時買，性價比高！不過，我明白每個人嘅喜好不一，唔係點解咩單位都可以有交易呢﹖！只要大妹鍾意就得喇，橫掂喺到住嘅係佢又唔係我，哈哈。

講開買樓，向家人透露咗我同拾爺心儀昇悅居，大、細妹都唔喜歡(我同兩個妹真係有代溝……)，話屋苑好差……唔知點解佢哋會咁認為……講方便，荔枝角屬市區，雖然個屋苑唔算地鐵站上蓋，但由地鐵站番去，沿路有遮有擋，而且距離唔遠。講樓齡，屋苑只係十歲樓仔，未有耐要夾錢翻新。講建築商，新鴻基出名最好！講則，廳、房同廚廁全部四四正正！講size，買唔起三房嘅我哋，兩房大size等同而家新興嘅兩房半，叫做俾到買唔起三房嘅家庭多一個選擇！呢到當然有嘢唔好啦，價錢貴，廁所細，大部份單位冇太陽曬、工廠區……我同拾爺都唔鍾意工廠區，但屋苑又唔係喺正工廠隔離，佢被其他屋苑包圍，反而係有所阻隔。

是夜，媽媽打嚟問我哋係咪打算買樓，我話一直有睇，但未睇啱，媽媽問我要唔要借錢，我就話要，問銀行借，哈哈。我知媽媽擔心我哋唔夠錢，想借俾我哋，但我知哥哥亦想上車，佢比我更需要。

昇悅居 + 泓景臺

上個禮拜睇完四小龍啲盤後，我同拾爺都鍾情昇悅居嘅兩房大size單位，可惜心儀個盤嘅業主獅子開大口，叫價高估價40萬，實在買唔落手……睇香港屋網見有人放呢類單位嘅盤，於是首次留言話想睇樓，以為係業主盤，點知原來都係代理盤……對方打嚟話我想睇嘅盤其實業主傾向放租多過放售……玩嘢咩﹖！但隔咗幾個鐘後，個agent又打嚟話有另一個盤可以俾我睇，望內園泳池，但超高層，高到根本望唔到個泳池……Agent話景觀可以遠眺蝴蝶谷，但叫價超過六百萬，我即時話唔作考慮。幾日後，agent又打嚟話有另一個盤叫我去睇吓，今次都係望內園，但係係超低層……本來冇咩興趣，但是日晏晝又得閒，於是就同拾爺去睇吓係咪低到接受唔到啦。

離睇樓兩個鐘到，agent打嚟話番唔切去公司陪我睇樓，將我彈咗俾個同事……此情此景，幾個月前另一間地產舖嘅agent都試過，結果，我哋被彈咗俾個騎呢人，今次……竟然又係咁！入到地產舖等，一見到個agent貌似我一個非常騎呢嘅前同事，我已經對佢冇咩好感，之後一路睇樓，就一路覺得佢好唔掂！

騎呢agent先帶我哋去睇我之前已經話咗冇興趣嘅超高層內園單位，睇完之後，我更加確定自己對呢個單位冇興趣！單位係就係可以睇到山景，但座山被前面啲樓斬開咗幾截……根本就係樓景……

再嚟就係超低層內園單位，個單位低到根本就毫無私隱可言，望嘅係平台景，屋內嘅人清楚睇到平台啲人做咩嘅時候，對方亦好輕易就睇哂屋入面嘅情景……呢個單位叫價都差唔多六百萬，如果呢個咁嘅單位都叫呢個價，咁我同拾爺之前睇中嘅嗰間個業主嘅叫價真係唔過份啦！

離開呢個單位，我表示單位太低，只望到平台，唔喜歡。騎呢agent問我高層啲會唔會考慮，我問佢高層係咩景，因為幢building前臨就係平台，好明顯唔容易望到泳池，點知個騎呢agent答我﹕「高層咪樓景囉。」，聽完我真係O咗，佢陪我哋睇咗兩個單位，唔係唔知我哋唔鍾意樓景呀嘛﹖！

再睇一間兩房細size嘅單位，但有人住嘅，周圍擺哂嘢，睇唔清楚間房本身個size……

睇完昇悅居，再睇泓景臺，後者嘅單位size同前者兩房大size差唔多，但卻包埋露台，agent同我哋講個size差唔多時，我問有冇露台，佢話有，我已經表示啲房會細啲，佢就強調大家差唔多size，我反問佢個size係包露台架嘛，佢竟然好肯定咁話﹕「size係包埋露台架！」，我夠知咯！That’s why我話間屋實際係細啲囉，因為啲位去咗露台到！佢唔明人哋講嘅嘢唔緊要，唔好搞到好似我係個idiot咁呀唔該！

泓景臺係高層望內園泳池單位，雖然向西，但前排被擋，所以唔怕曬。不過，向西真係幾悶熱……但有露台又真係好爽！只係……細房真係唔夠用，主人房個則又唔及昇悅居……

睇完所有單位後，泓景臺又想幫我哋call多幾個去睇，我同拾爺即時拒絕，一嚟係因為今日已經睇咗四個單位，個人好攰，二嚟係唔想再對住呢個騎呢agent！問佢嘢佢又答非所問，自己唔明人問乜，仲要搞到好似我問得奇怪同白痴，拾爺喺間屋度尺寸時，佢又成尊佛咁企喺到望到實一實，搞到拾爺好唔自在。

總結，唔想聽呢個騎呢agent嘅電話，以後再有agent將我哋彈俾其他人都唔再say yes！仲有，始終心繫昇悅居兩房大size單位。

西九四小龍

清明時節做乜好﹖天氣咁好，睇樓去也！

西九四小龍一直唔喺我哋張睇樓list上，因為拾爺幾年前去睇過，當時一間望馬路嘅低層單位嘈到佢頭都痛，但其開價卻足以駭人，加上呢幾個屋苑嘅實用率都唔高，所以，我哋一直冇考慮。直至早幾日再去睇萬景峰，發覺西九四小龍相對抵住，所以決定去睇一睇。

去到四小龍一帶，入咗其中一間地產舖，要求睇鎖匙盤。Agent揀咗5間帶我哋去睇。

先去昇悅居！上平台後，但見屋苑環境唔錯，行去第一間要睇嘅單位時，agent指指內園其中一帶有tent嘅地方表示嗰到係俾住客燒烤之處。

先睇一間一房單位，其實我同拾爺冇興趣，但agent叫我哋去睇吓個則啱唔啱，咁唯有去睇吓啦。睇完，唔啱。唔夠住係其中一個原因，另一原因係間屋景觀唔好，廳同房都係望樓，房仲要係L型窗，但就全部樓景，啲樓又起得近，感覺好壓迫！

再睇另一間兩房單位，呢個單位屬大size嘅兩房單位，廳同兩間房都係望泳池景，景觀開揚，我同拾爺都好鍾意！尤其，單位間隔實用，廳呈長方形，兩房都夠大，細房擺完床，仲可以放大書櫃，床上仲有空間整吊櫃，因為個樓底都幾高。主人房就更好，大到可以三邊落床，仲放到一個超大衣櫃！間屋最唔好係個洗手間，細到呢，真係要企上馬桶先閂到門……另外，廚房只可以話ok，基本嘢都夠放，但就應該冇位俾我哋做入牆式嘅焗爐……單位叫價$600萬，貴到呢！Agent知我哋兩個鍾情呢個單位，就話問過業主可以有$10萬蚊嘅下調空間，但減$10萬後都仲係貴……Agent好好，叫我哋影吓相，番去慢慢計吓數，星期一先再打俾我。

睇完昇悅居嘅單位，就行去泓景臺。泓景臺呢個屋苑同昇悅居所走嘅係好唔同嘅路線，昇悅居嘅設計簡潔舒服，泓景臺就玩渡假feel，一上平台花園，就覺得去咗東南亞國家渡假咁，四圍流水淙淙。

先睇一間兩房單位，實用size同景觀都同頭先我哋鍾情嘅昇悅居嗰間差唔多，但佢個實用面積卻包埋露台……我同拾爺都鍾意露台，尤其呢個屋苑嘅露台唔細，可以足夠我哋坐出去食早餐！但……我哋都係實際嘅人，啲位free咗出嚟做露台，而個廳又同昇悅居嘅差唔多大細，即係房會細咗……果然，細房真係細，大房都唔夠頭先大……以實用性嚟睇，昇悅居嗰間好好多！兩者仲要叫價相同，就連agent都話昇悅居嗰間抵啲。不過，呢間單位屬高層，頭先嗰間係中層，咁頭先嗰間個叫價就進取咗啲喇。

再睇另一間兩房單位，個size細少少，但叫價卻更高！呢間個間隔冇咁四正，廚房同飯廳位都係奇型怪狀嘅，要訂造傢俬至得。飯廳好細，放得張飯枱嚟，都放唔到其他嘢……呢間都有露台，又係望番昇悅居個泳池，景觀都幾開揚，再行入去睇洗手間，設計好啲啲，馬桶同到門有少少距離。兩間房都幾大，夠擺嘢。只係……龐真係唔夠用，開價$610萬，不作考慮！

最後轉戰宇晴軒，座向唔好(向西……曬到呢！)，景觀唔好(樓景……)，快快睇完快快走。

是晚番到屋企上網做吓research，發覺心儀單位網上估價幾間銀行都不足$560萬，我知網上估價係偏低，但相差$40萬，總反映咗啲嘢嘅！再睇多啲資料，發覺香港屋網有代理幫佢開post，叫價俾我哋agent講嘅低，但都仲係同銀行估價有距離……翻查資料，check到呢個單位業主當年用幾錢買翻嚟，估到佢唔會肯減太多，因為佢會覺得冇肉食，加上佢又放售又放租，價錢唔啱佢寧願唔賣架喇，議價空間好細，睇嚟都係冇望架喇。

「迎海‧星灣」實地視察

「迎海‧星灣」第三次抽籤結果今晚公佈，我同拾爺就趁今日放假去現場實地視察吓呢個樓盤。雖然屋苑鄰近馬鐵站，但作為馬鐵尾站，仲要去到大圍先有得轉車，車程都幾耐，我有啲懷疑樓書所寫由屋苑到達其他地方嘅時間……

一到站，喺月台已經見到屋苑，我同拾爺先喺月台望望屋苑，確定只會望到馬鐵站嘅層數後，再出站。

出閘後，見到唔少agent喺到兜客，我哋企喺個bridge到再數數樓層。其實，我同拾爺都唔鍾意向馬鐵站的單位，因為就算高層，都只係望番銀湖‧天峰……雖然兩者有距離，但5百萬買望樓單位，雖然係一手樓，但卻係我哋杯茶。

今次抽籤主力賣嘅21座，低層單位要望住呢嚿嘢，但價錢卻比之前兩張價單貴，俾我就算抽到都唔會買！根本就係搵笨！

隔條馬路唔係馬鐵站就係銀湖‧天峰，又嘈又冇景……

睇完望馬鐵站呢一面，我哋就沿路慢慢行去望海嘅一面，發覺有唔少人同我哋一樣嚟作實地考察。

行到見到海嗰邊，發現屋苑前有一大堆樹，啲樹仲幾高添，數一數，發覺向呢邊嘅單位，至少要中層先真正望海，低層根本就睇唔到海，只有望樹嘅份兒……記得當日我跟埋國泰去買樓時，聽到某agent同個客講3樓望唔到海，5樓就冇問題，我因為咁問過自己agent，佢同我講全部都望到……而家發覺，全部都呃人就真！我同拾爺數過，起碼要12樓以上先睇到，但樹會長高，所以……要享有永久海景嘅景觀，就要買高層！一諗到呢到，即時拎張價單出嚟睇，心都寒埋，根本就買唔起……

望樹係好過望樓，但收望海嘅價錢，買樹木景觀，唔抵！

去到嘅時候係潮退，景色真係幾靚！馬鞍山呢邊嘅海靚過青衣同荃灣所望到嘅，因為冇船，但位置上，真係冇咁方便……唔知潮漲又係邊樣嘅呢﹖

夜晚，agent遲遲未whatsapp我結果，我已經估到number好後，後來忍唔住whatsapp問佢，佢先講俾我知。呢個人做嘢都幾漏氣！佢今次冇再叫我入紙再抽，一嚟係發展商冇話再推(但其實大家都知一定會再推！)，二嚟佢知我冇心再玩。佢話會幫我搞退票，希望佢快快幫我拎番啲錢啦！

 

「迎海‧星灣」買賣實錄

國泰抽「迎海‧星灣」，抽到239號籌，我同拾爺最前嘅number也不過是969……因為我同拾爺都未見識過買一手樓嘅情況，於是就向國泰提出「湊熱鬧」嘅要求，國泰同佢先生都好好人，俾我哋跟埋去睇吓嘢。不過我一早講明，去到唔會俾任何意見。始終而家係買幾百萬嘅樓，而唔係買棵菜，一陣令到人哋做錯決定，就無謂啦。

五點到去到IFC，國泰同佢先生仲有佢媽咪已經排緊隊。原來所有抽到前號嘅準買家都會五點到場，然後就按號碼順序排隊。我哋喺lobby到排咗超過半個鐘後，就有人嗌到包括國泰嘅number以內嘅號碼，跟住職員搭lift，上一個大hall入面，自行搵位坐，再等叫number。國泰個agent話呢到叫A區，一陣仲有B、C兩區要入。

喺hall入面已經坐咗好多人，我哋搵唔到位一齊坐，只好分開坐。等等等，等到悶時，見到發展商擺哂嘢食陣，於是就去排隊拎嘢食，有煙三文魚卷、鵝肝醬多士、香腸、碗仔翅、乾燒伊麵等等。排隊食嘢嗰陣，聽到後面一對couple傾揀咩單位，佢哋aim at 5樓同3樓嘅最細單位，如果冇咩就走人，聽到佢哋仲打算做9成按揭。其實，嗰幾個單位，價錢唔平(雖然已經係全場最平)，要成接近五百萬，但景觀好差！如果要成五百萬，我寧願揀啲舊嘅屋苑，但高層啲同有靚啲嘅景。但人人鍾意嘅嘢唔同，可能人哋鍾情新樓加大型會所。

終於等到職員嗌國泰個number，我同拾爺都想跟入去B區，但國泰嘅媽媽同佢亞姨就好似冇意慾去郁，我同拾爺就決定唔等佢哋，先行去會合國泰，點知佢哋又好快就入咗B區……我同拾爺決定問一問啲staff俾唔俾我哋入去會合朋友，佢哋又俾喎！於是，我哋叫埋國泰嘅媽媽同佢亞姨一齊入去。入到去，先發現B區係一條好窄嘅長廊，冇凳坐，個個都企哂喺到一路睇住部顯示賣剩單位嘅大電視，一路等叫自己個籌。國泰嘅媽媽同佢亞姨一見到冇位坐，就選擇出番去坐住等佢哋。我同拾爺就當然留低睇嘢啦！

國泰同我講佢嘅心水單位只剩下32F，點知……話口未完，32F已被他人買下……國泰即時表現失望，佢個agent一知佢哋所有心水單位都冇哂後，即時勁sell佢哋買海景單位，但海景單位唔係佢哋個budget以內，所以國泰老公好快就reject咗個agent。Agent於是再發功，sell佢哋買特色單位，但特色單位都唔係佢哋杯茶……佢兩個諗緊走唔走好，agent怕會冇咗單生意，當然叫佢哋入咗C區(揀樓區)先。

終於叫到國泰個籌，我哋四個跟住agent入去，恕我孤陋寡聞，一直以為買一手樓，得到嘅待遇會比較尊貴，發展商叫完number，我哋會被安排坐喺counter對住部電腦，舒舒服服咁揀單位。點知……入到去，我哋被引領到只得國泰agent所屬公司嘅職員圍住嘅長枱，然後，四、五個該agent公司職員一人一句，不停游說佢哋買特色單位。國泰兩公婆根本就冇打算買特色單位，但難得抽到前啲嘅籌，可以再做業主，又唔捨得拂袖而去。我同拾爺企企吓，被幾個該公司嘅agent撞開，佢哋又帶其他客入嚟揀單位，為求儘快sell嘢，不惜撞開我哋……好‧討‧厭！

我同拾爺企埋一、二邊，等國泰佢哋揀樓，我見班agents好aggressive，不停叫佢哋買特色單位，又話靚又話保值，完全係chur到個客爆咁滯，令人冇時間去思考。我雖然講過唔會俾意見國泰，但見啲agent嘅selling technique咁離譜，忍唔住趁國泰望向我時，大叫一句﹕「冷靜啲呀！」。國泰一早已被包圍佢嘅agents煩到想走，一見到我呢個熟人喺到，就即時推開其他人，走番嚟我身邊。我真係明佢喺入面有幾不安，班agents真係好狼，令到人好迷失！國泰老公見到老婆行開咗，佢又走埋出嚟，當然，佢哋個agent又跟埋出嚟，想繼續sell啦。我唔理個agent，只係問佢哋，佢哋要買嘅單位方向係面向馬鐵站，一個咁嘅景觀有冇需要俾多一嚿錢要個超廣角露台或者水晶玻璃屋嘅style。國泰老公話價錢其實冇多到，只係房間間隔唔同，本來兩房半嘅單位，變成特色單位後，只得一房。其實咁樣已經係變相多咗錢，因為佢哋原本就係想要兩房半，如果買咗呢個，就要自己另外俾錢間房，佢哋當初揀呢到，就係貪佢裝修好哂，唔駛再駛多筆。我都未及表達意見，個agent就話間房幾百蚊就搞掂……我唔熟價，但覺得幾百蚊唔會搞得掂囉，個agent就係隨口噏當秘笈！仍然拿唔定主意時，agent話可以先要咗個單位，再入另一邊坐時慢慢諗清楚，真係唔要，可以無條件掟番個單位出嚟。我confirm而家話要個單位係冇任何法律責任之後，佢哋就say yes。點知，呢個時候，有一個佢哋張list上嘅心水單位被人掟番出嚟，佢哋即時要咗該單位。國泰開心到即刻攬住我。

Confirm咗個單位後，我哋就行入去搵位坐，但冇……企喺到時，國泰老公已經喺到盤算緊啲首期、厘印。原來佢哋而家要咗嘅單位，價錢仲貴過上一層，因為佢哋個樓底高啲，有11呎。拾爺問agent普通嘅樓底幾高，agent故意唔用呎去講，只用cm代替，但拾爺心水清，一計就發現兩者相差好少 – 15cm，但呢少少嘅相差，卻要付出20萬嘅代價。拾爺暗叫唔抵，我當然知道，但我哋都冇出聲。由confirm買個單位，到得知呎吋，其實有足夠時間去冷靜，以我所認識嘅國泰老公，佢應該已經意識到呢一點。我知佢哋兩個都想上番車，所以寧願俾多少少，都唔想錯失再做業主嘅機會。既然係咁，我哋作為旁人就無謂多事。

大家等叫number時，有一中銀職員approach我哋，國泰老公就乘機問一問按揭事宜，我亦聽一聽學吓嘢。經該職員提醒，我發覺自己同國泰老公一樣，誤以為銀行貸款係以折扣後嘅樓價計算，原來銀行會連發展商回贈嘅厘印都扣埋先計，好彩國泰老公為人穩陣，預留一筆錢作後備，揀樓時，冇用盡家財嚟俾首期，如果唔係，真係唔知去邊到再搵多筆錢去填數……

等咗好耐，發展商仍然未嗌國泰揀咗嘅單位去簽臨約，諗到有人會喺呢個等緊嘅時間反悔而掟番個單位出嚟，我就問agent可唔可以出番去執死雞，agent話唔得。其實，我覺得一定得！佢只係唔想節外生枝啫！而家諗番，國泰可以一人買三個單位架嘛，我哋其實可以喺未簽臨約前，邊hold住一個，邊出去等執死雞添呀！

等到咁上下，聽到全場拍掌，原來所有單位皆賣出。

八點半，仲未到國泰簽約，佢媽媽同亞姨已經走咗，我同拾爺都等唔到咁夜，亦先行離開。後尾whatsapp國泰先知，佢哋差唔多十點先簽約，由五點鐘嚟排隊，等到十點先簽約，足足用咗5個鐘，真係好折磨人！

今日真係學咗好多嘢！其實，我覺得政府監管基金買賣，規定要有21日冷靜期嘅同時，係咪都應該考慮規管埋一手樓買賣嘅冷靜期呢﹖！我覺得一手樓買賣個銷售方式，更易令人做錯決定！

迎海‧星灣

早幾日葵芳個agent打嚟，話我知我之前睇嘅盤都賣哂，問我仲有冇其他盤想睇，順便sell我買迎海2期，呢個盤之前聽唔少人sell過，感覺好似幾抵咁，但同國泰傾過，佢俾到我嘅資訊同嚟自agent嘅唔同……八卦心態下就多口問吓個agent，佢力sell我，仲想我即刻開票去抽，可惜，當日就係deadline，我完全唔得閒去做呢件事！加上我都未摸清呢個屋苑嘅底……

過咗第一輪抽籤日後，個agent又whatsapp我，問我有冇興趣去睇示範單位，話要交數，叫我幫幫手。問問拾爺後，就約定今日去睇。其實真係要抽，我屬意自己開個屋苑嘅相熟agent，但見佢咁積極，就算喇。點知……

今日十二點準時到達IFC，卻收到另一個agent嘅電話，話同我哋約好嘅agent帶緊客去睇樓，趕唔切嚟，由佢代替……我同拾爺聽後都好反感，我覺得同我約好嘅agent可以早一啲打俾我哋講番個情況，唔係去到夠鐘先話我知！最離譜係，我同個agent講我入咗IFC，佢竟然叫我落番地鐵站等佢……而家係佢想做成單生意，唔係我求佢帶我去睇樓，因為喺IFC已經堆滿哂estate agents，我同拾爺都被好多人搭過訕，絕對唔愁冇人帶路！我叫嗰個人自己上嚟搵我。其實，我同拾爺都好唔想再show佢哋，但見人家老遠走到嚟，如果唔去會合佢哋，又好似叫人白做咁……於是，就姑且俾次機會佢。呢個時候，我先收到原先個agent嘅whatsapp同我交代件事，佢根本一早就應該同我講咗先，而唔係將我個電話俾咗佢上司，由佢上司去contact我，搞到我唔知頭唔知路，一聽到個電話，傻咗唔識回應咁！當初係佢話要交數叫我幫幫手，而家卻一啲都唔尊重我！

個agent一上到嚟，就打俾我，然後自己喺個位置到狂揮手，一身裝扮，完全唔係開工look……佢帶我哋去排隊時，不知幾多人走去sell佢……排隊時，我哋都唔想同佢多講兩句，因為，佢陣煙味真係好勁！！！佢自己搵行家傾偈，個行家正正就企我哋後面，佢夠敢死隔住我哋同人傾……我同拾爺都覺得好odd，odd到我哋自己行先，俾個機會佢自己同人慢慢傾！

睇緊個agent俾我嘅資料時，睇唔明個管理費，佢以一份計算，咁我就問agent每呎幾多，佢答我$3.6，但另一行家話唔駛咁多……佢好似唔多熟啲資料喎！之後去睇示範單位，佢好似好趕時間咁，知我哋主攻兩房，就想skip咗三房唔睇，又話清水房準啲，就想skip咗decorated嗰間唔睇……我同拾爺當然唔鬼理佢啦。

睇完樓後，佢就帶我哋去到一間超大嘅房，入面坐咗好多人，好多都係agents，呢到就係俾人填表抽籤嘅，原先約我哋嘅agent都到咗，佢哋加埋同公司某駐場agent一齊sell我哋。其實，睇到張報價單，價錢係幾吸引嘅，因為佢有多項回贈！樓價、印花稅都有回贈，兩樣扣埋，真係可以五百萬唔駛就買到兩房，當然係低層加冇景觀嗰隻啦！資金鬆動少少嘅，都可以考慮俾多啲，要高層，甚至更有財力嘅要海景，因為呢個係不變景觀，有保障！(但我冇……)喺而家買二手樓都要呢個價，仲要俾經紀佣、印花稅同預筆錢for裝修嘅情況下，呢個盤係有佢嘅competitive power嘅！財力不足嘅人，又可以免insurance咁按9成，當然，利息會幾甘啦！但呢到有兩樣嘢唔好，其一，洗手間冇窗……其二，亦係我最concern嘅，就係呢到俾養小動物！仲要個會所有寵物美容服務，即係真係喺到住時，我行出行入每日都要擔驚受怕……

我同拾爺最後都有入紙去抽，反正咁多人爭，都未必會中，抽咗先再慢慢諗 (其實都只有一日時間……)買唔買啦，哈哈。應該話，呢幾日計計夠錢買邊隻。拾爺想要海景，但海景低層都過六百萬，點買﹖

P.S. 入票時，長駐agent主動offer幫我寫支票，我簽名時發現佢冇幫我刪去「或持票人」一欄，我覺得佢好唔專業囉！