Mia Pasta Trattoria

出美孚食lunch，順便去建行開個聯名戶口，為的就係每月信用卡會自動過數，唔使吓吓自己去找，費時一陣唔記得找卡數俾銀行罰錢！

去咗之前喺Openrice見到都幾高分嘅Mia Pasta Trattoria到食，出門口前，拾爺已經book咗枱，十二點半食，只hold5分鐘枱，一點半要交枱。網上啲人講到呢到好爆，所以可以開出咁harsh嘅條件。

去到美孚都唔難搵到呢到，喺門外已經見到間餐廳細到不得了，唔怪得成 日爆滿啦，得嗰十四個位……未入去已經估到要坐窗口或者可以叫做門口位喇，都幾迫……Lunch set只有四款可揀，最平$42，最貴$62，全部只包一杯嘢飲……要加湯或沙律，要俾多$12，加個是日甜品就要俾多$15！

我同拾爺叫咗一個煙肉拿破倫意粉($56)同帶子龍俐柳意大利飯($62)。是日餐湯係忌廉蕃茄湯，沙律則為醋菜，冇特別，所以冇叫。

先上煙 肉拿破倫意粉，用料十足，成碟意粉加入唔少煙肉，煙肉帶少辣，落入以蕃茄醬為sauce嘅意粉中簡直一絕！其他配料顏色奪目，為整碟意粉於視覺上增加不少 分數之餘，其味道亦豐富咗成碟菜嘅口感。拾爺懷疑呢碟嘅菜用上我最喜愛嘅豆苗呢！但，我唔敢肯定……意粉嘅軟硬度亦恰到好處，以$56嘅售價嚟講，呢碟意 粉絕對值得！

至於拾爺，就較喜愛帶子龍俐柳意大利 飯，不過，佢仲嫌啲飯唔夠硬……但我就覺得夠喇，再硬就個胃受罪喇……呢碟飯唔係唔好食，但食過太多間啲忌廉汁整得好食過佢嘅餐廳喇，相比嗰啲餐廳，呢間 嘅忌廉太淡，唔太啱我胃口，唔係唔好食，但唔會令我覺得好正……不過，要讚嘅係，佢個帶子煎得唔錯，平時食親嘅帶子，都係「韌」到要夾硬吞落肚嘅，但呢 個，我真係咬碎嚟食架！個龍俐柳又係一絕，煎到周邊都脆脆哋架，雖然龍俐柳唔係咩貴價食材，但佢真係整得好味！

咖啡同檸茶都冇特別。但我身上條為食蟲又咬咗我一下，所以我臨尾加錢 要咗是日甜品 — 朱古力慕絲。好唔好食﹖我俾拾爺食咗幾啖之後，唔愛朱古力嘅佢，又叫咗一個喇！平時唔愛食cream嘅我，竟然食哂面層啲cream，就連拾爺呢個又一唔 愛cream之人都同我一樣，我哋都覺得呢到嘅cream唔會好似一般蛋糕嗰啲咁漏，good！個chocolate mousse其實唔算滑，每啖都黐口，但我鍾意佢入面夠實，真係會食飽人架，哈哈！市面嘅啲通常都打好多氣入去嘅，每一啖咬落去都只係咬空氣，好唔實在 呀！不過，都係嗰句啦，我唔係專業人仕，我唔知點樣嘅mousse先係最好，鍾唔鍾意食係好主觀嘅嘢嚟嘅。

埋單$148！得閒可以再嚟！呢到都幾多人嚟食架！我哋坐咗一個鐘都唔夠，啲人親身嚟碰運氣又有，打嚟問同訂枱又有，個frequency都幾高，所以下次再嚟一定要book枱！

好耐未試過食到一間喺Openrice高分而自己又滿意嘅餐廳喇！

銀座梅林

今朝冇陪拾爺去睇陳sir，因為呢幾日都出咗去玩，係時候要整理吓份mock卷嘅題目。十二點幾一點，見拾爺仲未番，於是call佢。原來佢番咗奶奶到，等 我電話，再決定晏晝餐飯點。本來我唔想出去架！但今日係無印買滿$500即有雙倍積分嘅last day，俾拾爺引誘咗出尖咀添……

出到尖咀都二點幾三點，去咗K11搵食。呢幾日使咗咁多錢，本來係想食平啲嘅，但身上嘅為食蟲不停咬我哋，最後，就以結婚九個月呢個名目，去咗銀座梅林食個late lunch。

入到去，拾爺即時點咗期間限定嘅金星豚定食($178)，而我就揀個平啲嘅白豚吉列豬扒定食($138)。

熱辣辣嘅定食上枱，但冇香噴噴伴 隨……即時食番啖豬扒先！唔熱，微暖only……我唔係專業食評家，唔識形容到啲食物天花龍鳳。少食炸物嘅我，更唔知咩為之好咩為之唔合格。不過，相比起 年頭食過嘅とん吉嘅吉列豬，我同拾爺都更喜歡呢度！吉列豬咬落有一層麵包糠，份量對我嚟講剛好！唔會覺得餐廳孤寒用薄漿，又唔會覺得麵包糠太多，令人食到 滯。我唔知佢用咩油同咩麵包糠嚟炸，平時食多兩啖吉列豬，總會覺得有少少漏，但呢個就唔怕，good！我個豬肉質較實，有少少嚡口。拾爺個金星豚就鬆啲， 不過個金星豚周邊有一層薄肥膏，我估唔太多人受到！自問比常人更鍾意食肥膏，都食到覺得漏……

定食嘅飯同椰菜絲都係任食嘅！我諗客人通常都只會添菜！但我呢個飯桶 就連飯都唔放過！我鍾意食呢啲一粒粒大大粒嘅飯呀！如果落少啲水去煮就仲好喇！(純粹個人喜好，我鍾意食硬身啲嘅飯！)椰菜絲都好好食，因為佢雪凍咗！哈 哈，我唔太好椰菜架！但雪凍咗就食唔到啲椰菜味，再加埋芝麻醬汁去食，酸味味好開胃！我添咗3次呀！

跟定食個麵豉湯都好特別架！一打開蓋，聞一聞，已經覺得個味同出面啲餐廳有唔同，飲落去，唔覺得係沖粉出嚟嘅普通嘢，佢唔鹹得嚟仲多咗份肉味！後嚟問個waitress，佢同我哋講呢到嘅麵豉湯有落豬肉去「淆」架！唔怪得個味咁特別啦！

除咗杯湯之外，呢到嘅茶都唔係一般供應嘅綠茶或玄米茶，而係用麥茶！雖然陣味好似炒濃茶葉咁(定係佢真係濃咗呢﹖)，但真係幾特別！(對唔住，係我大鄉里！)

我同拾爺都覺得呢間好味過とん吉，雖然我buyとん吉可以俾啲客自己中芝麻(拾爺就鍾意呢度個sauce夠酸……不過，我發覺得我同拾爺鍾意嘅，都唔係大眾所接受，因為呢度喺Openrice嘅評分唔高(好似我哋鍾意嘅芽莊都係同一命運……)……反而我哋唔buy嘅とん吉呀秋田呀就高分到爆！

除咗食物ok之外，我覺得呢度嘅service都唔錯，waiter同waitress都好 nice，叫佢哋加茶都好快手，問佢哋嘢又好樂意回答。食飯時仲有一段小插曲，就係個廚師大大聲鬧其中一個waiter，唔知佢哋咩事嗌交喇，不過，都係 聽到個廚師好惡咁兇人，個waiter就回應得好細聲。之後，我哋叫waiter加椰菜絲同茶，就係呢個同人嘈嘅waiter serve我哋嘅，如果唔係坐正佢哋開片附近，你唔會想像到佢啱啱先同人嘈嚟。因為佢好有禮貌，仲笑容可掬咁回答問題呢！

食完飯，行咗一陣K11，再行咗一陣I Square，就去Muji買嘢喇！買咗四樣嘢都係用嚟放我啲scrapbooking materials！番到屋企，即刻帶啲materials住新屋，正！成間屋企理哂！

夜晚，大妹同佢男友嚟咗幫我哋整電腦。唉，部腦半年都未夠就出哂事！雖然而家叫ok咗，但大妹男友走咗之後，我先發覺我仍然未能將部腦嘅files複製到部portable harddisk到……

ほかほか + 小肥牛

約咗打工達人同精明眼食lunch，到咗尖東，打俾佢兩個都唔聽電話……算，我自己入去坐住先！今次去咗試宗教主任之前推介嘅ほかほか。

坐底等咗一陣，打工達人打嚟話喺觀塘飛的過嚟，唉……精明眼就再隔咗一陣先出現。

等齊人後，就叫嘢食喇！我要咗三色定食($90)，因為之前宗教主任話呢到嘅海膽好鮮甜！打工達人要吉列豬扒飯($58)，精明眼就要秋刀魚定食($58)。

我個三色定食包一小碗飯同一小碗蕎麥麵。

個蕎麥麵上枱時好熱，我隔咗一陣先食。之前冇食過蕎麥麵，我唔知點先為之正宗同好味，只係呢碗絕對唔係我杯茶……我唔知蕎麥麵本身係咪就係咁「淋」身，但呢種毫無咬口，又食唔到麥味嘅麵，我唔會再主動點嚟食……而且跟麵嘅湯有啲鹹……

三色飯唔係我食開嘅三色，仲以為有我愛嘅牡丹蝦添……不過，初時聽到係三文魚籽都幾抗拒，仲主動話俾打工達人佢哋食，但打工達人怕腥唔要……點知……有驚喜！可能我之前食過嘅三文魚籽質素太低，我記得食過一次之後唔敢再食，因為好鹹好腥！但今次再食，完 全唔係呢回事，我唔會話好好食！但唔會再抗拒！食過呢間嘅三文魚籽，我會再俾機會呢樣食物！

海膽唔怕腥，但我唔覺得鮮甜，係咪我期望太高呢﹖又或者食唔食到好嘢真係好睇運氣。亦可能我同宗教主任嘅口味唔似……點都好，以$90嘅價錢，只有四小塊唔太特別嘅海膽，唔會再吸引我去叫。

最後嘅蔥吞拿魚，都係普普通通……我成日希望可以食到帶有魚味嘅蔥吞拿魚，係咪太大想頭﹖但……佢始終係魚，唔係應該要有番啲魚味架咩﹖點解我食親都唔覺有魚味嘅呢﹖

打工達人俾咗一小塊吉列豬扒過我食，只係食咗一小塊所以不便置評。至於精明眼個秋刀魚，我冇食到，只係見到佢不停挑骨，睇到都怕。食魚，我都係會揀番鯖魚！

打工達人加$10要咗杯咖啡，精明眼本來都有加錢要雪糕，不過冇貨……

三個人一路食一路傾，大家交換吓近況。打工達人現時嘅感情生活仍然空白，早前食咗舖炸糊，對佢打擊好大，大到佢自己都估唔到，佢話估唔到原來自己已經dry成咁……作為好友，我真係好希望佢可以幸福！其實佢由細到大條路都已經好崎嶇，希望佢將來嘅路可以平坦啲啦！

講開做家務，原來精明眼同佢老公會share嚟做！我提到屋企所有家務都係拾爺一手包辦，早幾日先俾舊同事串我﹕咩人嚟架妳﹖精明眼竟然咁樣回應﹕吓﹖熟悉妳嘅係唔會覺得奇怪架喎！嘩！咩意思呀﹖！

食完飯，三個人打算行陣街。拾爺呢個時候又出埋嚟，於是四個人行吓 K11，再行吓The One。拾爺就充當攝影師，幫我哋三個影吓相。行到K11 Oli個卡corner時，打工達人同精明眼都鼓勵我試吓賣手作卡，其實我唔係想賺大錢，反而如果有人真係肯出錢去買，即係有人好欣賞我嘅作品，我需要呢份 認同多啲！不過，自問手工拙劣，網上咁多人叻過我，幾時輪到我﹖！

行到咁上下，我問拾爺今晚嗰餐點，我提議去打邊爐，拾爺話冇所謂。呢段對話俾打工達人聽到，佢話又想打邊爐，於是我就提議一齊打！問埋精明眼，佢又冇所謂，仲叫埋個老公出嚟添！哈哈，我哋識咗咁耐，都未試過一齊打邊爐架，好開心呀！

由於精明眼老公喺屋企，所以佢負責去搵小肥牛或小肥羊位置，再打去book枱。我prefer小肥牛多啲，因為聽啲舊同事講到好好食咁。雖然灣仔店個分高啲，亦係精明眼地頭，但打工達人唔想過海，所以我哋去咗尖咀嘅小肥牛開餐。精明眼老公打去book位時，間餐廳話俾book嘅都full哂，我哋要六點去自己等位……

六點到到達小肥牛，去到都冇乜人，waitress帶咗我哋入間房，捧上調品料俾我哋自己落落豉油到！然後我哋就揀湯底同點嘢食。

第一round要咗個鴛鴦湯底 — 馬來沙嗲同豆腐清湯！再要一碟魚皮餃($32)、墨魚、牛同貢丸($38)、一碟齋貢丸($38)、栗米($22)、芝士牛丸($60)、本地手切肥牛($28)同兩碟特價安格斯牛肩頸($10 x 2)。

馬來沙嗲湯﹕好香沙嗲味，不過唔覺食物有索到個湯……

同豆腐清湯﹕冇試到……

魚皮餃﹕呢到嘅魚皮餃都幾大粒，不過好普通，平時媽媽喺街市買番嚟嘅靚過佢好多！

墨魚丸﹕好味！好墨魚！有啲彈牙！

牛丸﹕一般貨色……

貢丸﹕普通到不得了！都係嗰句，我亞媽買開嘅正佢好多！

栗米﹕怕麻煩，冇食到……

芝士牛丸﹕嘩！呢碟嘢簡直係呃錢架！啲芝士都唔溶嘅！唔講以為內藏豆腐咋！仲有，唔知點解佢哋要喺牛丸到混入陳皮粒，九唔搭八咁！

本地手切肥牛﹕唔好食……

特價安格斯牛肩頸﹕正！雖然因為特價，所以啲肥牛片又細又薄，但真係好有牛味，yummy！

坐咗冇耐，精明眼老公已經提議叫嘢飲， 不過我哋冇乜反應。然後……佢發現有特價啤酒，猛話好抵，仲同打工達人一唱一和，好明顯有人要R酒飲喇！不過，我同拾爺表明我哋唔飲酒嘅，所以唔使預我哋。隔咗一陣，有個啤酒女郎走嚟sell我哋，話有日本啤酒$12一大支，於是佢哋就叫咗一支喇。

第二round再嚟魚皮餃同墨魚丸，另外叫咗一碟澳洲極級雪花肥牛同油墨菜。

澳洲極級雪花肥牛﹕有啲「韌」……有啲所謂嘅雪花帶筋……牛味唔夠！特價品仲好味過佢！可惜，每兩人先可以叫一碟……

油墨菜﹕如果可以切細啲就好喇！

食到咁上下，啤酒女又嚟sell酒，話買多一支送多一支，精明眼老公即時嗌抵！然後，啤酒女話$20 3支！於是，佢哋三個酒鬼就叫多兩支，一人一支咁隊！

埋單位位$127，喺呢個凍冰冰嘅冬天，打個暖笠笠嘅邊爐，有好錫自己嘅老公陪伴，仲有好友陪住談天說地，係一件好幸福嘅事！

新華 + Spaghetti House

唔知係因為噚日打Wii打得犀利，定係瞓得唔好，拾爺條頸又出事……兩年冇事架啦，今年又嚟過……唯有陪佢去長沙灣搵陳sir睇睇啦！

買咗個豬柳蛋漢堡上陳sir到，拾爺俾人磋圓「禁」扁時，我就食包包。睇完，盛惠$250，明早十一點再覆診……

行去新華食late lunch，雖然啱啱先食完個豬柳蛋漢堡，但一場嚟到，冇理由唔食嘢架嘛，於是就同拾爺一樣，要個特餐﹕

沙嗲牛肉麵﹕印象中新華嘅沙嗲牛係好粉色架(雖然拾爺話唔係……)，但今次好似唔同咗！以前覺得杜鵑好味過呢度好多，而家又覺得新華個沙嗲牛都唔差，食得過！不過，都係杜鵑好啲，哈哈！

火腿奄列﹕今次個奄列一上枱，就有少少失望……睇個色已經覺得差咗……以前食到嘅，係充滿蛋汁，顏色奪目嘅奄列，今日呢個……煎過龍喇！好彩，蛋汁都仲有少少喺到！

牛油餐包﹕個包唔夠熱……

餐飲﹕華田都係咁……呢度嘅奶茶都出名架！不過，我唔飲嘅，所以不予置評。

食哂啲嘢之後，拾爺見到隔離枱有兩個師奶叫咗蛋撻，於是又扭計要食蛋撻，呢個小朋友呢，真係為食呀！

埋單$56。

食飽飽，就去睇毛百萬！之前喺ubuyibuy買戲飛，有兩小包爆谷送！不過……啱啱先食完個特餐， 真係睇到都有啲飽……等入場時，有個細路喺附近行嚟行去，非常annoying！但佢亞媽又唔管吓佢！><呢個細路仲突然整開拾爺，不停揮動 手作嘅物件，叫住媽咪咁隊俾我……咩料呀﹖唔該佢望吓人先啦，佢亞媽企咗喺後面喇！叫我做亞媽，如果你係我個仔，我將你變咗做叉燒包派俾人食喇！當佢發現 叫錯人時，即刻走開，對唔住都冇句囉！

毛百萬俾我想像中冇咁好睇，仲以為會好好笑……唔係冇笑位，但俾我再揀，我唔會俾錢入戲院睇囉！好彩買特價飛咋，如果真係$80一張嘅話，我真係會爆粗！

本來同拾爺係打算睇完戲就出尖咀睇燈飾，但散場出嚟，一陣陣寒風吹埋嚟，吹走哂呢個意欲！我哋決定留番喺呢個商場搵食算喇！

由於我倆都唔係好肚餓，於是嗰啲三百幾蚊per head嘅法國餐廳俾我哋out哂！既然係會食不知其味，就無為食咁貴啦，係咪﹖

最後決定食Spaghetti House，仲要揀最平嘅欣喜套餐($268)嚟食就算！

蘑菇湯﹕個湯好夠熱！仲要好夠菇味！

燒豬肋骨配瘋薯﹕薯條唔夠脆之餘亦冇嚟薯味……豬肋骨啲肉唔怕「韌」，不過唔特別好食，可能我本身都唔餓啦，真係食乜都覺得so so。

肉醬寬條麵﹕唔錯！夠熱！好cheese！

食食吓飯，突然醒起拾爺今年冇送禮物俾我，於是就開始炸佢型﹕

我﹕我今年冇聖誕禮物嘅……
拾爺﹕妳都冇掛隻襪出嚟，梗係冇啦！
我﹕咁我今晚掛番先！
拾爺﹕太遲喇！噚晚應該掛啦！聖誕老人噚晚派完喇！
我﹕呢個世界咁多人，一晚邊派得哂呀！或者佢今晚先嚟我哋屋企呢。
拾爺﹕好，咁妳想要咩呀﹖隻襪咁細，塞唔落一部Wii架喎！
我﹕嘩！你送Wii俾我呀﹖！

哈哈，聖誕節就係我呢啲長唔大嘅「小朋友」R禮物嘅最佳節日！

P.S. 等夠鐘先去食飯時，曾有衝動買部Wii番去打機打夠本！因為我哋部腦壞咗……想上網睇戲又唔得……屋企又冇DVD player，電視又冇嘢好睇，今晚都唔知做乜好……但係，師奶嘅我，又想等最紅驚喜個優惠！加上，商場唯一一間嘅豐澤冇貨……乜都唔駛諗lu！

Simply Thai + 西貢星越泰風味館

朝早萬分不願咁起身……因為噚日個腸胃又出事，所以唔敢同拾爺一齊食大早餐，只係買咗個包食啫。等拾爺完成佢個大早餐後，就入場睇Harry Potter喇！！！

我覺得呢集係最好睇架！可能故事將近尾 聲，開始交代好多嘢，令到成套戲個故事好豐富！加上多咗人物內心世界嘅描述，我最愛嘅Hermoine真係好到爆！為咗成就大事，忍痛唔跟自己心儀嘅 Ron走！而且，佢就算帶住個分靈體都唔會好似Harry同Ron咁亂發脾氣，真係又靚EQ又高呀！

睇完戲，就同拾爺出沙田。喺新城市嘅Simply Thai食個late lunch，人哋已經係tea time喇，叫咗個咖哩雞配茉香飯同軟殼蟹‧芒果米紙卷。

其實叫一個小食，一碟飯，我都怕兩個 人會唔夠飽，尤其我同拾爺都係大食之人……不過，又好想食軟殼蟹喎！點知……呢碟軟殼蟹係我食過最唔好食架！其實軟殼蟹好難整我唔好食，放隻嘢落鑊炸之 嘛，但呢間餐廳做到！我未試過覺得咁難食架！連啲粉都慳，個炸粉都「淋」又薄，一咬落去，只係feel到一pat pat……失望！

再上個咖哩雞配茉香飯，我同拾爺又一次俾個名呃咗……原來茉香飯都只不過係白飯一碗……叫茉香，係因為用咗泰國嘅茉香米……可惜，呢隻米，我唔覺得有咩特別！至於個咖哩，都係一般啫！早知就叫菠蘿炒飯啦！

差唔多食哂啲飯時，我同拾爺都覺得唔太飽……加上見到咁多咖哩汁，唔想嘥，於是……我哋叫多咗碗雞油飯嚟食。碗飯都叫幾香，不過始終唔及芽莊嘅蒜香飯正！

餐飲方面，拾爺就要咖啡，我就加$8要咗杯薑荔枝，嘢飲指明要少甜，飲落個味道啱啱好！

睇到餐牌有lemongrass味嘅雪糕，一球$15，當然要試試啦！可惜……都係食唔番喺Singapore食過嘅嗰隻味！而且，我覺得呢度嘅lemongrass雪糕溝咗味，有啲雲哩拿喺入面添呀！就連texture都有兩隻，有綿嘅亦有冰嘅，no good！

埋單$157.3，食tea都食成百幾蚊，我哋真過份！

食完嘢，就去新城市附近嘅商場仔行吓啲boutique仔，跟住就搭車去第一城琴姐屋企。上到去，火燒港鐵站、妃同排球女將已經到咗喇，佢哋四個仲玩緊Mario添！靚太要趕做assignment唔嚟……Bra就夜晚先嚟。

因為得四個手掣，所以我哋六個輪住玩，玩咗一輪Mario後，就玩賤兔同Wii resort。拾爺第一次玩Wii，咩掣打掣都未搞清楚，玩Mario時就成日向前衝，唔係推啲同伴去死，就係自己衝入火海，睇到我勁肉緊！玩賤兔時，明 明教咗佢點郁，佢就成日問點樣點樣，完全搞唔掂，成日攞唔到分！不過，賤兔呢啲低B games啱我，哈哈，洗底褲好好玩！有一場西瓜波對戰，琴姐同火燒港鐵站兩個平時成日煲Wii嘅人竟然聯成一線，對排球女將同拾爺兩個冇乜玩過嘅人，結 果後者當然係輸咗啦！最好笑係，排球女將食波餅，個頭俾個西瓜笠住咗！現實生活嘅佢明明好打得架嘛，打Wii時竟然慘敗……

拾爺就鍾意玩Mario同劍擊。今勻再玩劍擊，感覺冇上次咁正！雖然 都係亂嚟，但今次個人冇咁顛！當我哋個個都大動作揮動個手掣嚟玩時，拾爺只係輕微郁幾吓，就贏哂！最好笑係睇佢同妃對打，妃大動作到死都輸俾拾爺！不過， 佢唔甘心，上訴後用策略嚟贏。玩滑水又係好好笑，妃玩先，又係勁大動作，然後佢指導拾爺叫佢動作大啲時，拾爺依然係輕微咁郁，呢個拾爺，就係玩都唔夠放架 喇！

打緊Wii時，主人家拎啲薯片出嚟招呼我哋，睇到我對眼發哂光！可惜大管家拾爺喺到，我只能偷食幾塊……雖然眾人幫口，叫拾爺唔好禁制我，但拾爺以我仲病緊做理由，唔俾我食……好慘……好彩，火燒港鐵站嘅自家製chocolate muffin可以食啫！

玩到咁上下，排球女將個老公都到咗第一城喇，我哋就齊齊落樓拎之前訂 咗嘅pizza準備轉埸去妃屋企。去到pizza舖，但見大排長龍，原來都幾多人同我哋一樣，聖誕唔係去食大餐，而係pizza，哈哈。不過，間舖應該係 忙到接唔到咁多order喇，琴姐問佢哋咩佢哋都話唔知……睇嚟我哋嘅pizza都係未整架喇，咁唯有去第二度食啦！行去和亭，有排等位……改去一入去就 有位嘅西貢星越泰風味館。

七個人叫咗十一樣嘢﹕

見到特價紙有啲菜式都唔錯，於是提議佢哋叫，結果叫咗三樣特價嘢﹕

青瓜蝦沙律﹕對我嚟講都幾辣，所以唔係食咗好多！但火燒港鐵站同排球女將就好鍾意食！啲青瓜都幾爽口，但啲蝦就好「梅」……

白雪蝦球﹕呢碟啲蝦爽口好多！不過冇乜味……

牛仔骨﹕又薄又乾……

其他原價菜式有﹕

馬拉盞少通菜﹕唔太鹹，又冇落辣，ok！

炒金邊粉﹕一般。

菠蘿炒飯﹕呢個正呀！雖然係濕咗啲(火燒港鐵站話正宗係要濕架喎，但我同琴姐始終覺得佢濕過頭……)，但啲飯好有味！出面食開嘅，乾得嚟，啲飯都冇味嘅，又唔索汁，又冇嚟飯香……

串燒﹕冇特別……

牛油雞翼﹕完全唔得！冇牛油味，雞翼又冇嚟雞味，想點﹖！

濱海﹕塊濱香太濕，成塊黐埋一pat咁……唔好食……

肉碎生菜包﹕食咗一小啖，辣到狂飲我杯染色薄荷青檸冰……

冬陰公﹕從來唔飲冬陰公嘅我(因為我食唔到辣……)，因為佢哋個個都話唔辣，所以飲咗少少。果然唔辣！得個酸字，哈哈！咁當然係唔正宗啦！

埋單七百幾蚊，位位$108。

上妃屋企，大家頭先打Wii都打到手痛，所以改為玩Uno。點知……拾爺話唔係好識玩，想旁觀就 算……但偉哥派埋佢份牌，所以我哋叫佢邊玩邊學。拾爺坐我隔位，我有時會幫吓佢，不過呢個人都有夠笨，講咗咁多次，佢都仲係搞唔清楚幾時可以cut牌，幾 時出邊隻……仲要成日俾妃呢個cheap精偷睇佢啲牌……我因為唔捨得罰拾爺，都試過幾次因為咁搞到hold住啲佔分重嘅function牌到最後……如 果唔係，我個排位都應該幾唔錯架！佢哋有時都話鬼我幫住哂拾爺呢，哈哈！

玩到十點三到，Bra同佢女友嚟到妃屋企附近，妃就同我同拾爺落樓，教我哋搭車，再接Bra同佢女友上佢屋企，呢班夜鬼今晚唔知玩到幾點喇！

Le Moment

一早起身整卡卡，整到咁上下就打吓notes，噚日就算請病假，我依然有打notes架！(不過都有整吓卡，適當地relax吓嘛！)唔好以為我哋啲老師真係放假就乜都唔做呀！

十一點幾出門口，約咗拾爺(佢今日要番學，慘慘！)出中環食lunch，因為之前喺ubuyibuy買咗張coupon，今日拎去用！之前上網睇啲人嘅食評，一個lunch set大概七十幾蚊，所以我只係買咗一張coupon，點知weekend只有brunch……要成$98……咁都算喇，最慘係，個brunch冇乜嘢 食……

橙汁 — 開水橙水加入大量冰量……

主菜 — Toast烘得好脆，脆到可以「block」穿人個頭嗰隻……我都係buy微脆多啲。不過，餐廳提供牛油同果醬，俾到我同拾爺嚟一個牛油加果醬咁搽嘅選擇 都唔錯嘅！雜菜沙律，好味！我鍾意食呢類沙律，加啲醋，酸酸味味，又有苦苦哋嘅火箭菜喺入面，口感豐富！忌廉雜菇，普通，唔特別好食，但唔會覺得難食。主 角腿蛋toast，又係冇乜特別……最後嘅生果，唔新鮮，啲橙乾哂水，好明顯唔係靚嘢……

咖啡/ 茶﹕冇得揀，跟餐只包最basic嘅咖啡同茶，仲諗陳豪介紹過呢度，可以俾拾爺試吓呢度啲咖啡係咪真係咁堅添！拾爺話杯咖啡普通，唔特別好飲。而我杯茶都係冇特別……但飲到咁上下，waitress有走嚟問我要唔要添水，service都算唔錯。

成間餐廳好細，但同時又冇咩客，除咗我同拾爺，就只有一個男人坐咗出面個露天位，我同拾爺可以話係包 咗場咁！如果你鍾意去啲冇乜人嘅餐廳，呢間會係一個唔錯嘅選擇。不過，食物水準一般嘅同時，價錢又唔算相宜，如果有coupon都食得過，如果唔係，我同 拾爺再嚟幫襯嘅機會都唔大lu。

食飽飽，就同拾爺去咗Victoria Prison。監獄嘛，睇戲就見得多，真實場景真係未見過，當然，亦唔希望有此機會啦！見到一張張碌架床，我突然諗起「監獄風雲」入面周潤發嗰句﹕我大聲 唔代表我冇禮貌，sir！哈哈，其實細個都唔知有冇睇過呢套戲，我到而家都唔知佢講乜嘅，只係知呢句係金句！

之前睇Simon影嘅engagment photos知道有開放，佢仲影到啲相鬼咁死靚，點知去到，只係見到一間間又殘又臭嘅房……大師真係大師，化腐朽為神奇！我要努力儲錢，搵佢幫我同拾爺影番輯anniversary至得！

冇行哂成個監獄就走喇，因為飲得太多水，我同拾爺都要去解決，哈哈！

離開中環，上咗Oli到買特價紙！買咗20張$4紙，5張X’mas pattern 紙同4張閃閃紙，盛惠$148。本來想買埋embossing powder架，但要成pack買，我又唔係想要哂啲色！加上知道呢到本身賣嘅嘢mark up都好高，所以都係忍忍手！

本來想睇小熊老師嘅立體卡示範架！但因為呢兩日個肚仔都成日唔舒服……所以都係番咗屋企喇！就連本來應承咗媽媽番去食飯，都打咗番去話唔番呢！我已經成個月冇番娘家喇，差媽媽兩個月家用添呀！嚟緊個禮拜，點都要番一番去先得！

P.S. 我發覺我個腸胃就好似我屋企部抽油煙機咁，係有自動清洗功能架！佢久唔久，就會自動幫我清腸胃，唔知咁樣有冇得瘦啲呢﹖