CHANEL

上個禮拜，亞頭同我講佢喺Chanel做facial時，個facial姐姐叫佢報名參加Chanel將會舉行嘅event，話有得飲有得食，亞頭本來冇興趣，但知道有facial coupon後就決定去。亞頭本來以為我呢啲晚晚番奶奶到食飯嘅人唔會有興趣去，點知我一聽就話想去，我話﹕「有jetso點解唔去﹖！」於是，亞頭就打俾佢個facial姐姐問人可唔可以俾佢帶多個friend嚟，結果，當然係YES啦，哈哈！如是者，今日，我就扯住亞頭衫尾咁跟佢參加呢個party啦！

放學後，先同亞頭、同名人同埋女副校飛的去尖咀唱K，同名人利申自己只會唱舊歌時，我就表明超喜歡唱舊歌，點嘅歌仲舊過佢揀嗰啲呀！但我揀嘅舊歌，往往引起女副校興趣，佢本來專心改卷，但一到「藍月亮」、「夏日之神話」、「堆積情感」等等老餅歌時，佢就會自然拎起支咪同我一齊唱！

唱到六點，同亞頭先行離開。亞頭本來提議搭西鐵去到柯士甸站再行去Elements，但我見南昌站已經有得轉番東涌線去九龍，即時提議搭多一個站，亞頭本來擔心南昌站內要行嚟行去，點知一出車廂，對面月台就係喇。佢又怕要等好耐車，點知一行到去，車站就宣佈只需等兩分鐘。

去到Elements，亞頭已經好熟路咁帶我去到Chanel，講低姓名後，就有個staff嚟招呼我哋，先講吓今日個event做咩，原來係佢哋最新嘅指甲油同make-up products發佈會。今日所有guests都可以享有免費嘅按手、搽指甲同化妝嘅service。我只做咗第一個，亞頭就做咗一、三，搽指甲，我倆都好抗拒。雖然亞頭都有叫我試吓化妝，但我唔想番到屋企又要落妝……而且……我唔鍾意個化妝師！佢幫亞頭化完都好似冇做過任何嘢咁，唔係鬼斧神工到化咗等於冇化但令人靚咗，係真係毫無分別……唯一最顯眼係佢幫亞頭搽咗紫色嘅mascara囉。

享用完哂service之後，個staff就介紹新出嘅香水俾我哋，再介紹少少skincare products，然後俾時間我哋揀吓嘢。亞頭做人一向公道，享用咗人哋嘅service，就決定買番少少嘢，佢買咗紫色嘅eye shadow同橙色嘅gloss lipstick。而我，當然係咩都冇買啦！埋單後，臨走前，係最開心嘅時間 — 拎贈品！

最有用係嗰封redeem facial letter！六月尾前book facial做，用咗嘅錢可以全數換番products，YEAH~~~

P.S. 呢個event係就係有得飲有得食，但佢哋啲waiter捧完啲嘢食不停游走，好間唔中先會問人要唔要，唔容易食到囉……唔通喺啲咁嘅地方，仲要人大動作咁stop佢哋再拎嘢食咩……不過唔緊要，我個target唔係嘢食，係facial，嘩哈哈，如願了。

Hit the Road

拾爺明明話自己好忙，唔得閒陪我玩，但一見到外面天朗氣清，就話要出去！當然，佢亦好乖，改卷進度理想先可以咁。

噚日去咗一田，今日就當然到Sogo啦！

出銅鑼灣，先去搵食。去咗Hit the Road！餐廳又係位處橫巷之中，好彩我行大路時有瞄一瞄條橫街，見到個building有大大個燈箱indicate街號，如果唔係又會搵唔到……

上到去未夠鐘，餐廳未開……餐廳門口貼住「只招待會員」，我同拾爺擔心會白行一趟，但我記得Openrice未mention過呢樣嘢，落樓搵個位，上網再check，Openrice真係冇講。唔放心，打個電話去問，原來入到去填張form就係會員。問佢開門未，佢話已開，同拾爺再搭lift上去，同lift仲有另外兩個女仔都嚟食嘢。因為我哋出lift先，我同拾爺就成為第一對客，推門而進，waiter問我哋幾多位，然後就指指入面嘅二人枱，叫我哋行去坐。我同拾爺坐低後，見另外兩個女仔揀咗張四人sofa坐，正覺得自己笨咗時，waiter示意該兩位女仔改坐隔離嘅二人枱。但後來，有一對情侶入到嚟，兩個人坐四人sofa，waiter冇叫佢哋轉枱，我覺得有啲唔fair囉……

今日天氣好好，好到好猛太陽，餐廳好多位置都好曬……兩枱食客都要中途轉枱，我同拾爺好彩，揀嘅位一啲都唔曬，可以慢慢enjoy食物。

餐廳環境

同拾爺研究完餐牌加上網睇完食評後就點咗﹕

All day happy meal ($76)﹕有三種sausages，全部都煎到好香，外表金黃，咬落脆口！Grille tomato都煎得好夠熱，不過只得三粒……Caramelized pineapple就冇試到，但連皮上我覺得進食時唔太方便……雖然，賣相係會靚啲嘅。Butter toast就正常水準。整體嚟講，味道唔算impressive，但份量就真係太少，性價比低。

拾爺個all day happy meal仲包一杯飲品，佢揀咗apple & ginger organic tea，唔記得影相，但我同拾爺都嫌杯茶味道太淡，又唔夠蘋果味，又唔夠薑味……

Spaghetti with honey grilled chicken in homemade pesto ($75)﹕網上見好多人大讚，於是點嚟試試。食物一上枱，見到塊雞扒grill得幾靚，但啲意粉就……好似一pat嘢咁……先試意粉，自家製嘅pesto唔會太重口味，幾好，但略嫌個sauce唔夠油潤，個pesto就似一陣醬咁搽上啲意粉到，而唔係融入意粉當中……意粉亦唔夠硬。雞扒就grill得唔錯，當然，收呢個價，餐廳唔會用新鮮雞，所以唔會食到鮮味，但切開雞扒，甚至放入口後，都感覺雞扒好juicy，唔會grill到乾哂。而且，雞扒外表grill到金金黃黃(少焦難免，亦無傷大雅。)，略帶微脆，值得一試！

估計我同拾爺都唔會再番嚟幫襯，所以叫埋呢到自稱嘅招牌菜﹕

Chocolate molten cake ($42)﹕好失望！先談賣相，基本上只有一小件cake，完全冇decorate過碟dish。碟cake一送到上嚟，我同拾爺已經知係失敗之作，用湯匙切落去，果然係唔crispy……唔止唔crispy，簡直係「淋pat pat」，如果咁都叫signature dish，呢間餐廳已無其他可取之處！真心，呢個水準，只要有食譜在手，(正常)人人都整到啦！

埋單$193，只收現金，好彩我同拾爺帶夠cash啫。結論，因為塊雞扒(唔係咩驚喜之作，但味道算係咁啦！)，呢到都值得一試嘅。

 

 

一田感謝日

拾爺補完課打番嚟撩我出街食嘢，本來打算努力工作至傍晚先出街番娘家，但拾爺一通電話，就搞到我出鬼咗去……好彩，勤力嘅我，一朝已經改完一疊功課，加出咗少少來年form six嘅mid-term卷，仲打咗幾題今年DSE份卷嘅題目落word file。因為我個位越嚟越多嘢，實在唔可以keep咁多hard copy，我要將啲past paper逐步轉做soft copy咁keep。

出荃灣，本來想去創意廚房食嘢，但搵咗好耐先搵到嘅海德街又斷開一截截，街道牌又唔show街號……都唔知向左走定向右走好……然後，我又因為心急上網撳錯制，搞到部電話自行upgrade某程式，想上網都唔得……拾爺部電話又唔係smart phone……行到身水身汗嘅我哋，最後放棄，去咗譚仔食米線。等食時，部電話終於upgrade完，上網再check，發現創意廚房所在係我哋頭先行過嘅某條街再轉入去，真係好鬼「liu lung」……

食完譚仔，行出餐廳一刻，個肚同個胃有少少唔舒服……應該係因為頭先太熱，飲咗凍華田所致……其實我已經好少飲凍飲，一嚟凍飲對女性身體唔好，二嚟對我氣管唔好，三嚟，餐廳嘅冰通常用水喉水，我腸胃一向比人差，飲完好易肚痾……

同拾爺行去荃灣廣場買suitcase，行一圈後，始終心儀American tourister，本來我倆都情傾一個青色嘅24吋suitcase，但番轉頭打算買時，俾我見到另一個25吋嘅suitcase，仲有得加大20% volume嘅suitcase，價錢仲要平啲，$838！雖然，呢個suitcase嘅顏色只有灰、橙同紫，著實冇青色咁吸引，但佢大啲之餘，仲要平成一百蚊！Money is king，我倆最後買咗25吋嗰隻suitcase，要咗紫色。

買完suitcase，上一層買skincare，原來荃灣一田得好少skincare舖頭，本來想買Ultima II嘅water massage cream，但$220嘅優惠價賣哂，所以我冇買到嘢，再上去supermarket，個肚越嚟越痛，最後拾爺都唔買嘢，陪我番屋企。

是晚，番唔到娘家食飯，個肚痛咗兩、三個鐘，去咗三次洗手間，先真正肚痾……

打番娘家話番唔到去，爸爸聽到我又肚痾都表現得好無奈。

Applegreen

呢排工作辛苦，我同拾爺逢星期五晚都唔番奶奶到，出去食飯放鬆吓，早幾日行葵芳見到開咗間Applegreen，好耐冇幫襯過，於是今晚就去呢到開餐。七點前去到walk in，餐廳俾咗張四人枱我哋，話可以食到八點半，非常好！反正我哋都唔會stay太耐，八點半要番到屋企睇Master Chef！

餐廳環境

點完餐後，等食時見到餐具唔多乾淨……

餐廳好快送上嘢食，嘢食一上枱，當堂打咗個突，份量比以前細咗好多！但價錢卻比以前貴！咁嘅份量，我倆三扒兩撥已經食完，但俾呢個價，我唔想只食一個快餐嘅時間，咁樣我不如去大家樂開餐啦！最慘係，熱食我同拾爺都喜歡趁熱食，攤唔到太多時間……

Green Goddess / 蟹肉牛油果青瓜沙律 ($89)﹕早知半份得咁少就叫全份……平時唔太好青瓜，但呢個沙律嘅青瓜我食到津津有味，個醬同啲青瓜好夾，食落感覺新清。

跟沙律嘅香蕉杏仁蛋糕，要同waiter/ waitress講要餐廳先會附上，味道一般。

Carbonara ($98)﹕份量好少……以前食會覺得好正，但而家冇咗呢種好正嘅感覺，可能因為同哥哥買平cream太方便，自己都整到。

半個鐘頭都唔夠，我同拾爺已經食完以上兩樣嘢，唔夠飽加上唔想用中價餐廳嘅價錢食快餐，於是就叫多個小食，坐耐少少。

Truffle Fries / 白松露薯條 ($38)﹕薯條唔夠脆，而且好油同好鹹……

埋單$248，都應該唔會再幫襯喇，性價比太低，唔係話唔好食，但唔係好食到不得了，價錢又唔係平，份量細成咁……我同拾爺食完之後都好似冇食過嘢咁……再計算埋用餐時間，呢到真係唔抵幫襯！

檸檬雞

檸檬雞

食譜來源﹕吾淑吾食

 

材料﹕

雞脾肉 1盒

檸檬 半個

(原食譜仲有薑，但超市pack好哂一盒盒，迫人一次過買幾嚿，我根本就唔會用得哂……所以冇買，落唔到……)

調味﹕

老抽 1湯匙

生抽 1湯匙

蠔油 1湯匙

冰糖 2小粒 (家冇片糖，唯有以冰糖代替之。)

做法﹕

1. 檸檬切片備用。

2. 煎香雞脾肉至金黃色後，將檸檬片同調味料同時放入鍋內，猛火燜至汁液濃稠即可。

食後感﹕口味淡嘅拾爺覺得雞肉略鹹，建議調味再減半。

越式焦糖雞

越式焦糖雞 (食譜來源﹕肥丁手工坊)

材料﹕

雞脾肉                   1盒

黃糖                       4 湯匙

清水                       3湯匙

薑蓉                        3湯匙

米酒                        1湯匙

魚露                        1湯匙

做法﹕

1. 雞脾肉洗淨，抹乾水份。
2. 小鍋中放入黃糖及清水，小火加熱成糖水，煮約4-5分鐘直至慢慢變成焦糖色後立即熄火，倒出焦糖備用。
3. 用少許油燒熱鑊，爆香薑蓉，加入雞脾肉，贊米酒，將表面稍微煎至金黃色，倒入剛煮好的焦糖漿，拌勻，轉為小火，加蓋焗至雞肉全熟，再下魚露拌勻，即可。

註﹕煮焦糖時切忌攪拌，否則焦糖會被crystalize。

紙包骨

早兩日睇「食平DD」，肥媽教整「紙包骨」，開心到我癲咁滯！事關好細個時，曾經跟媽媽去新世界中心(而家都冇咗lu……)飲茶，當時酒樓有紙包骨賣，媽媽見到好開心，點咗一籠，佢同我講紙包骨好好食，但已經冇咩酒樓有得賣。嗰次係我第一次，亦係到目前為止唯一一次食紙包骨，呢道菜真係好好食！到而家，我仍然好想食番呢道菜！既然出面食唔到，肥媽又講到咁易整，一於整俾自己食，還自己一個心願！

我家廚房一向只煎不炸，就算我幾鍾意食蝦餅、吉列豬扒等等，我都唔會喺屋企整，今次，為咗紙包骨，我要打破佢慣例！(冇辦法，呢道菜出面食唔到呀嘛，哈哈！)

紙包骨  (食譜來源﹕食平DD)

材料:

腩排 半磅

調味﹕

油 少許

黑椒粉 (原食譜為胡椒粉) 少許

豉油 半湯匙

糖 半湯匙

蠔油 半湯匙

紹興酒 一湯匙

做法﹕

1. 用油、黑椒粉、豉油、糖、蠔油、紹興酒醃好腩排，用煮食用牛油紙 (原食譜寫為蛋糕紙)包實腩排。

2. 將紙包腩排放落油鑊炸熟，上碟即可。

註﹕不需拆開牛油紙，腩排連紙上碟，食用時才拆開牛油紙。

睇張相以為炸濃咗少少，原來冇！

啲色仲好金黃好靚添！

食後感﹕味道唔夠……肥媽教煮冇話要醃，但我照食譜咁整，覺得啲腩排一啲都唔入味……所以，下次再整嘅話 (應該會係下年，炸嘢實在用太多油啦！)，我會醃吓啲排骨，同時個人唔太喜歡腩排個口感，下次改用飛排或一字排。同埋，一定要落紹酒，真係好香！個人覺得紹酒嘅香，唔係米酒可以取代。

Beans

奶奶被姑仔book咗去食sushi，冇得同佢慶祝母親節，我同拾爺就自己拍拖去。

拾爺帶咗我去荃灣搵食，出發前，佢叫我有心理準備隨時排上一個鐘 (又嚟﹖！)，但如果去到落雨，就唔排，因為嗰到落雨排隊唔方便。結果，我哋今次好彩，可能今日天氣唔穩定，加上呢間餐廳唔太適合用於慶祝母親節，去到前面只有兩、三pair人，等咗幾個字就入座。

因為係街舖，排隊位又冇遮有擋，落起雨上嚟都幾「哩hea」。

店舖細小，座位有限，難怪食客動輒要等上一個鐘……

排隊時，我同拾爺已經揀好要食嘅嘢，坐低後，再confirm一時大家嘅選擇就點餐。

Waitress先送上餐飲。

跟餐飲品﹕前面為我嘅黑糖薑茶，後面為拾爺嘅檸檬蜂蜜。我杯黑糖薑茶味道好淡，又唔夠甜又唔夠辣……

等緊嘢食時，我同拾爺都發現呢到嘅waiters同waitresses唔多friendly，雖然佢哋唔係向食客惡言相向，但啲面口全部都好苦，木口木面咁……我同拾爺都覺得呢種小店應該sell食物之餘，仲要sell warm，waiters同waitresses嘅表現同呢種小店仍予人嘅感覺實在好唔match……

焦糖香蕉楓糖熱烘鬆餅全日早餐 ($68)﹕拾爺之選，焦糖香蕉味道ok，唔會過甜，其他見下面。

豪華英式全日早餐 ($88)﹕My choice，根據menu，呢個餐有窩夫、煙三文魚、煙肉、豬肉腸、蕃茄、茄汁豆、炒蛋、什菌。先講個waffle，其實即係拾爺個餐嘅鬆餅，睇個樣，我覺得佢應該叫鬆餅，而唔應該叫waffle，但呢到嘅waffle餐，都係用呢個上……撇除佢唔應該叫waffle呢個事實，個「鬆餅」其實整得幾好食！外微脆，內軟，唔會好乾，唔錯唔錯！跟waffle嘅cream我更愛！我一向唔太buy cream，食親蛋糕都會盡量片走哂啲cream佢，但呢到嘅cream唔甜，食落去又唔會覺得好heavy，我食吓食吓，食哂添呀！至於煙三文魚就一定唔及我哥哥間公司賣嘅好，冇得比架喇。煙肉冇煎到乾哂水同濃都叫算係咁啦，豬肉腸我反而嫌佢煎得唔夠耐，應該上番少少色先好食架嘛……蕃茄同茄汁豆都係正常味道，炒蛋好明顯係靠個奶先不至於嚡，什菌就一般水準。

食完兩個餐，發牙痕，要咗個小食拼盤！本來係打算食佢個綠茶白朱古力流心蛋糕，但知道食完小食拼盤後，唔會再有胃口食，所以都係留番下次啦！

Beans小食拼盤 ($88)﹕包括香辣、焦糖、孜然雞翼，肉醬薯條。先講肉醬薯條，見人食到咁開心，所以我先叫個小食拼盤去試，但其實個薯條冇乜特別……至於雞翼，呢到用嘅係單骨雞翼，所以全部都好細隻，數量雖多，但因為只係單骨，所以其實都唔算食咗好多。雞翼味道ok，但唔會予人好好食嘅感覺，三款入面，我同拾爺都鍾意食焦糖味多啲，不過……食到最後一隻雞翼時，發現唔熟……其實之前都有一隻唔太熟架喇，但最後一隻真係好紅！於是同個waitress講，佢就叫廚房整番兩隻俾我！

補回嘅焦糖雞翼熱辣辣！

埋單$244，鬆餅整得唔錯，可以再試，但下次再嚟，一定要試番綠茶白朱古力流心蛋糕！不過，要排隊嘅話就咪搞！

P.S. 隔離坐咗三代同堂嘅婆、女、孫，應該係個女帶埋個孫女同亞婆慶祝母親節，但亞婆不停大聲講嘢，同呢到嘅氣氛唔係太搭配……

 

小廚港作

睇完樓，去醫肚，本來係去億利搵食嘅，但心儀嘅餐廳，竟然係廠廈環境，高級餐廳收費……改去呢間茶餐廳求其食算。

呢間叫「小禱港作」嘅茶餐廳裝修一般，面積雖小，卻有幾個卡位，一入去就有卡位坐。餐廳冇hard copy嘅menu，要叫嘢食就要行去收銀嗰邊睇大電視，點好餐，俾錢，再番位等嘢食嚟。

拾爺點嘅叻沙，唔記得咗個名，係有雞嘅叻沙，但啲雞唔好食……叻沙個汁叫做ok，但佢好得意，一半粉絲一半油麵，唔知點解要係咁嘅combination，亦唔覺得呢個combination有咩咁特別……

沙嗲牛肉麵﹕啲牛肉唔係薄薄一片嗰隻，有少少厚度，但我寧願佢薄啲，然後俾多幾塊我，好過而家食落去要用啲力咬……

餐肉、雞蛋、多士﹕一般茶餐廳水準。

埋單$76，試過就算。

昇悅居 Again

兩公婆一齊搵外快，出發前，拾爺明明叫我做完可以走先，唔好等佢，結果卻係……我做完想走先，仲同同事say咗goodbye，拾爺卻扁嘴唔想我走……好彩我帶咗嘢改！個幾鐘後，同事見到我仲喺到，忍唔住問我﹕「妳唔係走咗好耐架啦咩﹖！」只能答句﹕「男人都係口不對心架！」

兩公婆一齊搵外快，出發前提議做完嘢去睇樓，拾爺卻表示自己仲有好多嘢要趕住番屋企做，加上天氣唔好，睇嚟都冇意思。結果卻係……大家都做完嘢後，有人唔想番屋企，以唔想「我」失望為由，「陪我」去睇樓。

睇樓前，先send個whatsapp問問中原個agent最近有冇兩房大size放盤，佢話放親都叫6百萬以上，仲要係中低層……但我明明見到香港屋網有盤放，對方就話佢哋冇……同拾爺商量過後，都係決定去到附近搵間agent入去問吓。本來係想去置業18，因為見到佢哋喺香港屋網到放咗唔少盤出嚟，但去到卻發現佢哋間舖裝修緊……最後，改為入去利嘉閣。因為我哋係出咗嚟先臨時決定去睇樓，所以冇帶到之前嘅睇樓紙，agent要俾張map我，同我講佢有咩單位，等我睇番幅圖，憑印象去記吓有冇睇過。雖然我唔驚重覆睇相同單位，因為我記得有興趣嘅單位，冇興趣嘅，即係唔會買，咁再睇都唔會要俾兩邊佣，但我唔想嘥啲咁嘅時間。

最後，因為冇乜兩房大size盤放出嚟，我哋睇咗兩個兩房鎖匙盤，同宇晴軒嘅兩房單位。Serve我哋嘅agent因為之後有約，所以就叫咗個同事負責帶我哋去睇……我同拾爺之前試過兩次咁嘅情況，今次又係一樣，被彈去嘅agent又係咩都唔識咁……

Agent帶我哋去第一個鎖匙盤時，一去到屋苑樓下，佢先錯報俾個security聽自己要睇業主盤……然後，帶我哋搭lift，又冇望清楚部lift係去單層樓嘅，入去見冇制撳，又帶番我哋出lift……第一個盤望嘅係內園景，景色一流，但呢隻兩房好細，完全唔夠用！首先個廳有玄關，個玄關又窄，放唔到鞋櫃，只會嘥咗個位……然後，個廳比起兩房大size嘅則細好多，整唔到拾爺心中嘅大收納櫃。呢個單位有露台，但個露台超細，同弘景臺嗰啲真係冇得比……人家可以一邊放櫃一邊晾衫，又或者放set枱凳喺出面hea，但呢到……真係晾衫都嫌佢細……睇完個廳，就行入房，入第一間，以為ok，再入另一間先知，原來頭先自己覺得作為細房個size都ok嘅房，其實已經係主人房！！！嘩！兩間房都好細，唔夠住囉！

再睇另一個同則單位，都係內園景，agent話更多人喜歡呢個方向嘅景觀，但我同拾爺都buy頭先嗰個多啲，然後，agent仲話呢個叫價更高……我明明出發前就問咗另一個agent所有單位嘅叫價，呢個應該係平啲……Agent得知我聽到嘅價同佢唔一樣時，即check文件，然後就發現自己搞錯咗……

行去宇晴軒睇另一單位，其實我冇興趣去宇晴軒睇樓，因為之前已經睇過該屋苑嘅兩房單位，個則唔太好，然後，agent報呎數時，更清楚個單位唔會夠住，但拾爺話一場嚟到就睇埋……結果……個agent唔太識路，跟住佢向左行幾步後，話自己記錯咗，帶我哋往右行，行咗一段路後，又話再次搞錯，又行番轉頭……宇晴軒個單位的確好細，細到完全唔會作考慮！

睇完樓後，個agent問我哋有冇興趣睇弘景臺，話可以安排，拾爺say yes，我即刻好大反應話之前睇過唔想睇。Agent走後，我即刻話鬼拾爺！明知個agent咁笨，仲跟佢去睇樓，即係搵自己笨！弘景臺嘅兩房單位我哋都睇過，個則唔及昇悅居，根本不作考慮，睇嚟都嫌嘥時間呀。