AE白金卡呢排offer咗個優惠俾卡主，就係免費享用La Prairie嘅30分鐘eye treatment服務！咁jetso我當然唔會錯過，今日就去咗試！
約好6點去做，但搵咗陣路先搵到間舖頭，6點13分到到達，店員剛好打俾我，我就答佢剛到門口。
入去坐低填吓個人資料，就跟facial姐姐入房，放好隨身物後，就上床休息。Facial姐姐幫我洗臉，再分析皮膚，其實當時我已經好眼瞓，好鬼想瞓覺，但又唔可以唔俾反應人……終於等到佢分析完，幫我按眼，我就被按按吓後瞓著咗，都唔知facial姐姐幾時出咗房……
瞓到咁上下，facial姐姐就入番嚟幫我搽番面霜，再叫我起身，其實……我未瞓夠……
出番去，人家當然又sell我買嘢啦！因為我一向冇搽eye cream嘅習慣，屋企其實都冇eye cream，達人又曾經讚過呢到啲eye cream好，加上而家買嘢有旅行裝送，於是我就買咗最平嘅eye gel ，當係用$950買eye gel加做eye treatment，加買埋面霜、eye cream、eye serum同面部精華嘅旅行裝啦。
之前扯完亞頭衫尾去Chanel個VIP event得到redeem facial一個，今日終於可以去享用喇！放學後，搭車去Elements，好彩唔駛等好耐小巴，準時四點半去到！但我準時，Chanel卻唔準時……等咗一陣先放我入房，不過……一入到去，就覺得環境好正！換好衫後，就開門俾facial姐姐入嚟，瞓上床，facial姐姐先幫我按摩，不過我一向唔受力，佢按膊時，我忍唔住要求細力少少，佢就話我好緊，叫我跳吓鄭多燕。之後就到洗臉、磨沙、清黑頭 (但唔係針清！)，按臉時，我已經舒服到瞓著咗！敷mask時，我有啲急，想去洗手間，但又唔可以咁樣行出去toilet，唯有忍……平時咁樣忍法，我係唔會瞓到覺，但佢喺我敷緊mask時幫我按手，按到舒服時，我感覺得自己又再瞓過，哈哈。敷完mask，搽完臉霜後，再按背，不過佢真係好大力，唔舒服……
做完facial，一出嚟，第一件事係衝去洗手間！之後就埋單！因為呢個係redeem facial，我一早揀好要嘅產品！碌完卡後，個staff仲俾咗三支sample我呢！
其實，呢到環境真係好relax，我真係好想join package，但講緊最平嘅水份treatment都耍七百幾蚊一次，一次過買10次，真係好貴！雖然HSBC白金卡有買10送1優惠，圍番每次唔算好貴，但一次過俾真係好甘！
上個禮拜，亞頭同我講佢喺Chanel做facial時，個facial姐姐叫佢報名參加Chanel將會舉行嘅event，話有得飲有得食，亞頭本來冇興趣，但知道有facial coupon後就決定去。亞頭本來以為我呢啲晚晚番奶奶到食飯嘅人唔會有興趣去，點知我一聽就話想去，我話﹕「有jetso點解唔去﹖！」於是，亞頭就打俾佢個facial姐姐問人可唔可以俾佢帶多個friend嚟，結果，當然係YES啦，哈哈！如是者，今日，我就扯住亞頭衫尾咁跟佢參加呢個party啦！
放學後，先同亞頭、同名人同埋女副校飛的去尖咀唱K，同名人利申自己只會唱舊歌時，我就表明超喜歡唱舊歌，點嘅歌仲舊過佢揀嗰啲呀！但我揀嘅舊歌，往往引起女副校興趣，佢本來專心改卷，但一到「藍月亮」、「夏日之神話」、「堆積情感」等等老餅歌時，佢就會自然拎起支咪同我一齊唱！
唱到六點，同亞頭先行離開。亞頭本來提議搭西鐵去到柯士甸站再行去Elements，但我見南昌站已經有得轉番東涌線去九龍，即時提議搭多一個站，亞頭本來擔心南昌站內要行嚟行去，點知一出車廂，對面月台就係喇。佢又怕要等好耐車，點知一行到去，車站就宣佈只需等兩分鐘。
去到Elements，亞頭已經好熟路咁帶我去到Chanel，講低姓名後，就有個staff嚟招呼我哋，先講吓今日個event做咩，原來係佢哋最新嘅指甲油同make-up products發佈會。今日所有guests都可以享有免費嘅按手、搽指甲同化妝嘅service。我只做咗第一個，亞頭就做咗一、三，搽指甲，我倆都好抗拒。雖然亞頭都有叫我試吓化妝，但我唔想番到屋企又要落妝……而且……我唔鍾意個化妝師！佢幫亞頭化完都好似冇做過任何嘢咁，唔係鬼斧神工到化咗等於冇化但令人靚咗，係真係毫無分別……唯一最顯眼係佢幫亞頭搽咗紫色嘅mascara囉。
享用完哂service之後，個staff就介紹新出嘅香水俾我哋，再介紹少少skincare products，然後俾時間我哋揀吓嘢。亞頭做人一向公道，享用咗人哋嘅service，就決定買番少少嘢，佢買咗紫色嘅eye shadow同橙色嘅gloss lipstick。而我，當然係咩都冇買啦！埋單後，臨走前，係最開心嘅時間 — 拎贈品！
最有用係嗰封redeem facial letter！六月尾前book facial做，用咗嘅錢可以全數換番products，YEAH~~~
P.S. 呢個event係就係有得飲有得食，但佢哋啲waiter捧完啲嘢食不停游走，好間唔中先會問人要唔要，唔容易食到囉……唔通喺啲咁嘅地方，仲要人大動作咁stop佢哋再拎嘢食咩……不過唔緊要，我個target唔係嘢食，係facial，嘩哈哈，如願了。
Eat, Play, Love 