童話故事「國王的新衣」入面，國王因為小孩一句真話，尷尬敗走。現實卻係說真話嘅小孩被四周嘅大人責罵其說話令國王尷尬，大人們以一人一句緩和氣紛的說話，紛紛為國王解圍。
不理朝政嘅國王受到保護，只為追求公義而拆穿其「語言偽術」嘅小孩反被罵，一切只為要顧全國王的面子。大人們站在道德高地，指罵小孩不理他人感受時，不正罔顧小孩感受﹖自打嘴巴、雙重標準，大人們與國王之間的關係給顧全了，他們與小孩之間的關係卻給破壞了。當然，他們才不在乎。小孩也不在乎。保持赤子之心，為人之基本。
Category Archives: 議事論事
千祈唔好幫襯慈雲山中心街市檔「陳寬記雞鴨」
雖然肥仔去咗旅行今晚先番，媽媽都想提前做一做節，感覺佢怕爸爸捱唔到太耐……爸爸自從由醫院番嚟之後，水、腳開始有水腫，我哋勸佢去睇醫生，佢就點都唔肯……
媽媽今日專登去街市買雞，想話一家人坐埋食餐好嘅，嚟一個pre-做節，點知街市個雞檔老闆超冇良心，賣隻爛雞俾媽媽！媽媽話佢揀雞時，個老闆娘懶熱心咁介紹隻雞俾佢，同佢講呢隻靚，媽媽信佢，就俾錢買咗番嚟，點知番到屋企，一打開個袋，就發現隻雞有個位爛開哂！
媽媽見到好嬲，就拎隻雞落去同個老闆娘理論，人家堅持唔退貨，媽媽打嚟，叫我落去斬料，途中我遇到哥哥一家，大家一齊去街市搵媽媽，媽媽好嬲好激動，我去問老闆娘係咪唔退，我哋食咗有事係咪佢負責，佢話佢負責，我心諗連隻雞嘅錢都呃，醫藥費咁甘，佢點負責﹖！同哥哥影低佢間舖頭相時，有個領匯職員企埋一邊，驚我哋搞事，哼，我哋先唔會為咗啲冇商業道德嘅人，做有失身份嘅事。咁樣搵錢法，佢遲早趕走哂自己班客。
媽媽話佢由間舖一開業就有幫襯，對方間唔中都有啲雞唔太靚，好多時佢都算，自己斬走嗰個位就算，但今次真係好唔得，佢先落去嘈，估唔到對方咁衰。其實……媽媽中過咁多次招，點解仲幫趁佢架﹖！街市又唔係只得一檔賣雞……
就係呢間叫「陳寬記雞鴨」嘅檔口，賣隻爛雞俾我媽媽！
是晚，我哋冇雞食，改為食叉燒，媽媽keep起隻雞，話要等星期一去消委會投訴。
後記﹕結果，消委會話媽媽冇單據，不能受理……媽媽去街市要求個老闆娘開番張單俾佢，個老闆娘知媽媽要投訴佢，當然玩嘢話冇單啦，媽媽之前見過佢開單，就當場踢爆佢講大話，佢就話自己本簿用哂……嬲嬲哋，日日行過都叫佢俾單，煩到佢死為止！
心中有氣
放學後同小肥同埋另一舊生去食tea，舊生讀緊nursing，最近喺學校附近嘅醫院實習，放工後就嚟搵我哋。三個人去咗Spaghetti House到開餐，叫咗三個餐，落訂時，個waitress不停望住小肥，我懷疑佢哋認識，但小肥又冇咩反應，waitress終於忍唔住問佢係咪唔認得自己，小肥就驚訝哋反問人自己係咪識佢……後尾小肥就話覺得人家面善，隔咗一陣終於記起佢都係我哋舊生(我一定唔識佢，都冇教過，不過個妹都話認得我。)，小肥仲收過佢個電話添。小肥同人相認後，第一時間問人有冇優惠，人家話俾個9折我哋，我即刻表示自己有VIP card，有呢張卡第二客茶餐有半價，仲抵！(其實有東亞信用卡最抵，買二送一，可惜我哋三個都冇……)
Order完後，我哋三個就傾吓偈，嘢食送上嚟時，突然多咗一碟雞翼！原來係waitress舊生送我哋嘅，之後食完嘢，叫餐飲時，佢知我哋叫檸蜜後，就走過嚟話檸蜜唔好飲，叫我哋嗌啲特式嘢食，話免費幫我哋升級喎，開心屎我哋，最後我哋聽佢推介，每人都叫咗杯搽茶。
呢餐本來係nursing舊生請嘅，但佢銀包冇錢……小肥又有公事要走先，最後係我埋單囉！但有咁多好嘢，都只係$170.1，抵呀！我當埋呢餐係dinner架喇，今晚唔會再食嘢。
食完tea，nursing舊生陪我行去醫院，之後佢去搭車，我就去探爸爸。爸爸本來做完化療出咗院，但因為化療令佢身體好虛弱，又發燒又腸炎，肌肉又痛到瞓唔到，搞到噚日要喺屋企call白車送佢腸急症，醫生收咗佢入病房。今日見到爸爸精神狀態仍然好差，睇到佢個樣都feel到佢辛苦……我嚟之前，一早叫咗嫂嫂個妹send啲小王子嘅得意photo俾我，等我可以show俾爸爸睇，爸爸一聽到我有相，就話要睇，一路睇一路笑得好開心。小王子係爸爸嘅精神食糧，可惜佢太細，我哋唔方便帶埋佢嚟探爸爸，如果唔係，爸爸見到小王子，一定更開心。
聽爸爸講，呢到有啲護士態度好差！爸爸因為個心跳得好利害，所以請護士叫醫生，可惜醫生遲遲未嚟，爸爸就再問護士，護士卻表現得愛理不理，爸爸心中有氣，但仍平和地表示個心跳得太利害，會死人，護士卻串到爆咁話冇咁易死，態度之惡劣就連平日冇乜脾氣嘅爸爸都忍唔住問佢係乜嘢態度，但對方仲要串嘴話自己態度好好。
成日聽人講公立醫院啲醫生同護士好忙，我知，我明，但忙都唔需要將脾氣發喺病人身上呀﹖！自問爸爸都唔係提出無理要求，心跳唔正常加上爸爸本身心臟有事，可大可小，對方只係一個護士，佢有能力去判斷事態嘅嚴重性﹖可能有，但對唔住，去到呢個位，作為癌症病人嘅家屬，我信醫生多過佢！OK，就算佢真係覺得爸爸單case唔需要勞動醫生，佢都可以用專業啲嘅說話去安撫爸爸，唔需要咁串呀﹖！佢忙，係佢公司管理方面出現問題，關病人乜嘢事﹖！佢有種咪去鬧高層囉，蝦個亞伯好威咩而家﹖！仲有，有邊個人冇病冇痛會去住醫院﹖！而家係我爸爸好想入嚟住，好想煩到妳咩﹖！病人本身要受病魔折磨，已經好慘，有冇需要將佢自己工作上嘅不滿發洩喺病人身上﹖！護士應該係愛心行業，俾啲咁冇品嘅人處理生命行業，我都真係有啲驚！聽爸爸講，最後都冇醫生嚟睇過佢……好彩嘅係，佢個心隔咗一段時間後，就冇跳得咁利害。
我相信唔係每個護士都咁衰，但啲老鼠屎總係圍住上咗年紀嘅人，媽媽今日帶支白血球針到醫院，同護士講要幫爸爸打，對方又係態度惡劣到咩咁對答。其實搞到啲護士咁燥底，醫管局真係好大責任，佢哋個management真係要改革吓，唔好再做死啲醫護人員。
爸爸噚日傷口滲血，媽媽請護士幫忙清洗，對方話會叫人做，但十幾分鐘後都未有人做……因為佢哋當時真係好忙，後尾係捱到夜晚醫生巡房，媽媽向醫生再提，話驚傷口再唔清會發炎，影響爸爸病情，醫生先即刻叫人去洗……媽媽仲話見到病房有一灘水，完全冇人去抹，啲嬸嬸唔知去咗邊，其實好危險，因為病房不乏老人家，佢哋會有易冼親呢。
一般人，有病痛時，只可以入住公營醫院(除非保險包咗)，受病魔折磨嘅同時，仲要受醫護人員嘅氣，係咪窮人就只可以咁委曲求全﹖！
天兔
天兔嘅到來的確幫輕咗我同一班同事，大家都話抓緊咗呢日假去改嘢同備課。不過，睇到報紙講其他地方都有人傷亡，突然覺得自己想要呢一日假，係好自私嘅行為……對唔住，我唔係想有人受傷，亦覺得颱風下要番工嘅人好慘架，只係……呢個academic year實在太忙！已經每日做到被校工趕先走，番到屋企都仲繼續改嘢，星期六、日都只係改嘢同備課，但時間仍然唔夠用……多一日假，可以清一清工作之餘，又冇額外嘢加上去(如果上咗堂，又忍唔住俾功課架喇……)。
睇新聞見到有唔少人半夜去追風，覺得佢哋真係身在福中不知福，有幾多人連安居之所都冇，佢哋卻有屋企唔番，走去吹風。如果追風當中發生意外，咁點算呢﹖！最離譜係有大人帶埋小朋友去做呢樣嘢，唉……受呢啲「身教」影響，長大後就又一條騎呢漢架喇。
好唔鍾意啲人話個風冇料到，一啲動靜都冇，完全唔明呢種係咩心態！唔通打風打到屋企玻璃碎哂，死人加塌樓先好﹖一滴風都冇就有假，唔係最好咩﹖！(雖然最後大部份人都冇得放。)
Eat, Play, Love 