爸爸的浸禮

30 五月, 2015honeyhinbaby 我們這一家發表留言

早幾日，細妹趁爸爸精神好番啲，就問定爸爸處理身後事嘅事宜，順便問佢仲有咩心願未了，爸爸話想受洗，於是，細妹即刻幫佢約牧師。由於爸爸行動不便，所以呢個灑水禮，係牧師親自上嚟我哋屋企為爸爸作嘅洗禮。本來細妹約好牧師6點上嚟，但拾爺學校畢業禮，為怕佢趕唔切，我哋將時間改為7點，幸好牧師願意協調，人家係用私人時間義務幫手，如非必要，我哋都唔想太麻煩人。

細妹問咗爸爸想咩人見證佢個洗禮，爸爸就話想姑媽同表姐一家嚟睇，於是，哥哥負責約實表姐，表姐表示會買花嚟。細妹建議我哋幾兄弟姊妹送咗卡俾爸爸，佢負責買，我哋都冇異議，而細妹揀嘅嗰張卡仲好靚添！但係……佢print咗兩張相，貼上卡到就出哂事喇！其實細妹預備好材料後，有whatsapp過我哋話自己冇藝術細胞，但哥哥叫佢go ahead，於是細妹就自行剪貼，當我發現呢埋對話時，已為時已晚，stop都stop唔切我妹對張卡造成嘅玻壞……見到張卡咁，我自動請纓去曬相同decorate過張卡。朝早同拾爺搞完銀行嘢，就去曬相，點知其中一張相個file size太大，曬唔到……要番屋企edit過後再出過去曬……又要等成個鐘先拎到相，一點半番到屋企後，我就開工，整整整，太耐冇玩手作，技術生疏哂……搞到差唔多4點半，拎好製成品番娘家，再為張卡作補救。我掛住整啲相，喺屋企只係食咗幾隻蝦刺身，番到屋企，細妹煮咗個米粉俾我食。搞掂張卡後，我哋幾個連埋我哋嘅另一半就寫字，小王子嚟到後，我就guide住佢去貼貼紙，done！

表姐一家6點45分到到達，但姑媽因為唔舒服，嚟唔到……牧師7點18分到達，佢先向爸爸講解一次過run down，然後，眾人就齊集大廳一齊見證爸爸嘅浸禮。我同哥哥負責錄影，拾爺就負責影相，成個浸禮只係20分鐘左右，但我同哥哥一齊舉機，攰到傻咗……浸禮完畢，我著小王子負責送上卡，表姐嘅一對子女就送上鮮花同禮物，之後，我哋就嚟張大合照，如牧師所講，呢個係一個簡單而隆重嘅浸禮。

Cooking Mama 360

29 五月, 2015honeyhinbaby 日日有食神發表留言

年頭續會Spaghetti House後，得到同一集團旗下其他餐廳嘅coupons，其中就有Cooking Mama 360嘅，於是，趁住今晚唔想煮飯，又想拍吓拖，同拾爺去咗Cooking Mama 360開餐！因為coupon有一張係送部隊鍋，所以，我哋就點咗呢個，再加一個小食！

20150529_184341

芝味shake shake年糕 ($48)﹕呢份嘢真係把鬼！首先，兜嘢一嚟，已經覺得份量奇少！其次，呢個炸物竟然一啲都唔熱！最後，面層嘅芝士粉好鹹，內裡嘅年糕又唔夠煙韌……總括嚟講，呢兜嘢好難食！

20150529_184116 20150529_184903

部隊鍋 ($208)﹕如果唔係有coupon唔駛錢，我同拾爺一定唔會食！In fact，上次去韓國旅行，我哋都冇去食到，就係因為拾爺嫌部隊鍋入面嘅食材全部都係junk food。雖然，我都係一個幾鍾意食junk food嘅人，但……食咁大兜junk food，又腸又午餐肉又火煺，真係食到我好辛苦……

埋單$40.8，好似好抵，但其實我哋食得好辛苦。

餐廳資料：
Cooking Mama 360
太子彌敦道750號始創中心地庫B01號右舖
2625 4277

撐下去

24 五月, 2015honeyhinbaby 我們這一家 4 則迴響

星期一收到細妹個whatsapp，話爸爸起身後同平時完全唔同哂，個人好懵，媽媽先係大笑不止，然後狂喊，因為佢見到爸爸個耳珠縮咗上去，諗到老人家提過咁係將要離世嘅徵兆，所以又擔心又傷心。我哋得知消息後，是晚除嫂嫂要湊小王子之外，各人都番屋企食飯。

星期二，細妹同妹夫都請咗假，細妹同爸媽，仲有我奶奶一齊去飲茶，之後細妹陪爸爸睇中醫，奶奶就陪我媽傾吓偈，細妹話媽媽同奶奶傾完，個人開心咗。至於妹夫就拎咗假，留家睇住兩老。是晚，哥哥、我、肥仔、大妹同妹夫都留家食飯。

星期三，我一放學就即刻番娘家，番到去，又見到妹夫，原來佢又拎咗假留家睇住爸媽。不過，我哋都係留到六點到去喇。前兩晚都夜番屋企，呢兩日番學個人都唔夠精神，所以今晚我番咗奶奶到食飯，食完早早番屋企洗涼瞓覺，要照顧身邊嘅人，自己先要有好嘅身子。今日哥哥去咗荃灣租輪椅俾爸爸，但當時剛好遇著紅雨，哥哥有遮都搞到成身濕哂……喺媽媽屋企留到差唔多時，拾爺突然出現！佢之前都冇講過會嚟，之後我咊一齊番奶奶到食飯，由地鐵站到奶奶家嘅一段路都要同大雨搏鬥，又係搞到成身濕哂……

星期四，喺學校開完會，就番娘家，拾爺今晚都陪我番去食飯。

星期五，放學又第一時間飛奔娘家，本來只會坐到6點，但媽媽整緊餃子，諗到食埋餃子，可以skip咗dinner，喺「俾撈場」慢慢做，所以就食埋先走。是晚，喺「俾撈場」做到10點先番屋企。

星期六，一早去「俾撈場」工作，做到3點就去食個tea，再番屋企搵吓旅行資料，之後番娘家食晚飯。

今朝仲瞓緊時，收到細妹電話，爸爸發燒，媽媽仲想刷埋牙先call白車，細妹搞媽媽唔掂，打嚟叫我同媽媽講，我即時要媽媽call白車，之後食埋早餐，就去醫院陪爸爸。去到醫院，本來睇緊早場嘅哥哥同肥仔已到，原來佢哋一知爸爸入院，就戲都唔睇趕嚟，媽媽話哥哥嚟到時對眼紅哂，生怕爸爸有事。爸爸喺觀察房等分上房，我哋就陪佢等，因為爸爸病床附近位置唔多，所以大部份人只係喺附近坐，哥哥陪爸爸最耐。我陪爸爸時，姑娘嚟幫佢拮手指check血糖，爸爸被姑娘一拮，即時露出痛苦表情……姑娘話爸爸血糖低，即時幫佢打兩支糖水。我幫爸爸按手指止血時，見到佢手到有一撻瘀痕，應該係頭先抽血造成嘅，哥哥話頭先姑娘幫爸爸抽血，搞咗好耐先抽到，因為爸爸太瘦，血管亦太幼喇……等到咁上下，哥哥叫細妹同媽媽先番屋企，我哋3個繼續等，爸爸上房後，因為未到探病時間，我哋唔入得去，只有哥哥可以陪入去辦理手續，於是，我就先走。之後，大妹同妹夫嚟到，哥哥同肥仔就走喇。是晚，我冇去探病，因為番到屋企後，個人好攰，個鼻唔知係敏感定作感冒，為咗有健康嘅身子可以多陪兩老，我要早早休息，聽日再去探爸爸。

其實呢個禮拜晚晚唔夠瞓，都幾支攰……好彩，嚟緊個禮拜，學校放早，之後就考試，可以每日早啲去陪兩老，然後早啲番屋企休息。

超唔掂嘅Expedia！(二)

18 五月, 2015honeyhinbaby 走過浮華大地 2 則迴響

仍然冇退到錢俾我！我已經唔想再自己打去嘈，我email多次佢個customer service，再喺facebook到send message，如果佢哋唔主動contact我，我會查吓旅協同消委會邊個會接受我個投訴。我同拾爺都覺得呢個唔係錢嘅問題，係道氣嘅問題！

唔爭氣……

17 五月, 2015honeyhinbaby 我們這一家 2 則迴響

細妹約咗佢一個喺善終治療做咗半年義工嘅教會姊妹同我哋傾吓喺爸爸尚在生時我哋幾兄弟姊妹要注意嘅事項，大家準時齊集餐廳。

細妹個教會姊妹本身係護士，得知爸爸嘅癌細胞已擴散至肝、肺同骨之後，佢話爸爸好tough，因為癌細胞去到骨，一般都會好痛，但爸爸好少喺我哋面前表現到好痛好辛苦，雖然我哋知佢有食止痛藥，但我冇諗過其實佢原來係痛到咁……聽到呢到，我已經唔爭氣咁喊……細妹個教會姊妹表示癌細胞擴散到肺，我哋就要注意爸爸日常飲食，因為一不小心食到唔乾淨嘅嘢，個肺會好易出事，但由於爸爸呢排都冇胃口，好少食嘢，所以會受感染嘅機會暫時唔高。至於個肝……爸爸臉色已經越嚟越黃……

因為我喊，搞到肥仔又忍唔住流淚，然後，提到媽媽壓力大一事，因為細妹對爸爸緊張，有時會唔為意地俾咗壓力媽媽，肥仔提佢要小心，我幫細妹講番句公道說話，就係佢自己都好大壓力，細妹聽到呢到，忍唔住喊，其實，佢同爸爸媽媽一齊住，要同時照顧兩老，壓力好大……之後，我喊住問細妹個教會姊妹有冇咩人可以介紹俾媽媽去傾訴吓，呢個時候，連大妹都喊埋一份……唉……我覺得自己好冇用，每次都係咁，一提到爸爸個病，就會忍唔住喊，然後，就搞到大家都陪我一齊喊……我好想自己可以堅強啲！