出發前準備

每年暑假旅行前幾日，我同拾爺都忙到癲！去旅行駛錢，去旅行前駛得更多錢！年年都要添衣去玩，今年好乖，冇買相機，但就要周圍撲我哋部S90嘅電！(只剩一粒原裝電，搞到冇得替換……)去咗幾間百老匯同豐澤都空手而回……好彩今日食完嘢，行出去見到中原，拾爺提議入去睇睇，結果買到一粒代電！S90唔駛被迫退役喇！

早幾日，捉住拾爺行街買衫，呢幾年都愛買Addidas嘅tee，之前睇中咗件藍色tee，想話等出咗張AE card先買，終於出到card喇，件衫卻賣到斷碼咁滯……The One間冇咗，朗豪坊又冇，新世紀間仲離譜，同我講全線斷我要嘅碼！其實我曾經喺運動家見到，但俾錢前一刻，拾爺又嫌棄件衫係display，仲扣過防盜裝置，搞到我冇買到，想話睇吓新世紀間Addidas專門店有冇。當新世紀間Addidas嘅sales同我講佢哋全線斷碼時，我即刻撲番去運動家，卻眼白白睇住件衫被另一個女人買咗！我嗰刻真係好唔開心！於是，我打俾拾爺，迫令佢一定要放學後到九龍灣幫我搵！拾爺當然萬般唔願意，但我當時怒火中燒，佢完全冇得say no！好彩我叫佢去睇吓，真係俾佢搵到，仲要有新貨！失而復得嘅感覺真好！拾爺話我好多Addidas嘅衫，我話自己可以做代言人，佢即時表示佢自己可以做間條代言人……對！拾爺真係有好多條子衫呢！

除咗衫同電，今日仲去咗掃防曬，就拾爺一人，已經買咗一支搽臉、一支body同一支游水用嘅，而我，就為咗拎盡HSBC嘅優惠 (今個禮拜rebate quota已用盡！)，聽日先去再買！

因為呢個blog太多相，我已用咗接近七成嘅容量，所以嚟緊所有有關去旅行嘅post (舊嘅都會搬過去，但有comments嘅我唔捨得delete，會改為純文字post，減少呢個blog嘅容量。)，我都會搬到以下個blog，我仲同佢開咗個facebook page添，大家請賞臉visit吓同like吓個page啦！

Blog﹕https://loveeatplay.wordpress.com

Facebook﹕https://www.facebook.com/pages/80%E5%BE%8C%E7%AA%AE%E9%81%8A%E4%B8%96%E7%95%8C/408006792675131

Café de Paris

與亞桔及菜菜之飯聚，用盡張AE白金卡，揀咗間有折嘅餐廳gathering，Café de Paris是也！Openrice個分數就唔高架喇，但見有折，就將就吓啦。

去到餐廳，亞桔已到，佢問我最近如何，我當然有提及爸爸嘅病情，講講吓又忍唔住喊咗出嚟……呢頭收咗聲，嗰頭菜菜嚟到，見我眼紅紅，問我咩事，結果我又喊住交待爸爸病情。哭訴過後，心情舒坦，講吓其他輕鬆嘢，過咗個愉快嘅夜晚。

Café de Paris呢間餐廳面積唔大，餐枱之間距離好近，我哋三個人坐四人枱，先可以有多一張空凳放嘢，如果唔係，餐廳只可以提供枱底嘅勾俾人掛嘢……嘢食方面，選擇很少……

點好餐後，waiter為我哋每人放上一小碟牛油，我expect會有餐包上，但上嚟嘅竟然係我哋點嘅salad……我問waiter點解要放三小碟嘢俾我哋，其實係想問會唔會有餐包，點知佢答我呢三碟係牛油……鬼唔知咩﹖！我於是就問俾牛油我哋做乜，佢話用嚟搽麵包，我就係等佢呢句，於是就問佢點解唔係上麵包先，佢話熱緊……好彩，佢之後好快就上到餐包俾我哋。

餐包﹕剛熱好嘅麵包，熱度適中，外脆內軟，稍嫌欠麵包味……

Salade de crevettes façon Café de Paris, légumes et moutarde de Pommery ($128)﹕見佢係chef’s recommendation先揀佢，點知中哂伏！！！我哋三個都覺得個sauce味道怪怪哋咁，尤其我唔鍾意mustard嘅，更覺得難食！呢道菜最後我哋冇食嘢，就由得waiter收走佢。以我咁食得唔好嘥嘅性格，都任由佢俾人收走，可想而知，我覺得佢有幾難食。

Tagliatelle aux crevettes, asperges, oignons, ail, persil et vin blanc ($178)﹕個sauce幾好味，但我覺得呢道菜唔用咁闊嘅pasta會更好，因為啲麵可以索更多汁。

Aloyau de boeuf black Angus, beurre façon Café de Paris ($268)﹕三個人share10 oz 嘅西冷扒都足夠，個扒唔怕嚡同韌，肉味同肉汁都合格，配菜方面，salad又有我唔鍾意嘅mustard……唔喜歡！但薯條幾好，又熱又脆，仲有薯皮，讚！

餐廳上菜速度好快，我哋都食得唔慢，食完三道菜後，waiter主動遞上menu，想我哋再點菜，但我哋覺得食物水準一般，選擇又唔多，冇mood再食主菜，反而要求dessert menu，點咗兩樣嘢。

Crème brûlée ($68)﹕唔好食，一啲都唔滑！

Fondue au chocolat, fruits, chamallows et boudoirs ($78)﹕啲朱古力完全唔熱，就連暖都談唔上……味道普通到不得了……

埋單$556，因為AE白金卡有67折，價錢唔算貴，但以其位置、進食環境、食物選擇嚟講，唔值再嚟！

評分時間﹕
食物：一般
服務：一般
環境：中下
衛生：一般
價錢：Overpriced
總結﹕不值一試

餐廳資料：
Café de Paris
中環蘇豪伊利近街23號
2810 0771

 

 

陪爸爸化療

番學校on duty，期間爸爸打嚟問我係咪會陪佢去做化療，因為噚晚我whatsapp問過佢時間，我答係，爸爸就叫我唔好太早過去，話兩點先開始，叫我慢慢做完學校嘢先再去。收線後，又想喊……其實我一直掙扎唔知陪唔陪爸爸去好，我怕我到時又忍唔住喊，影響爸爸作戰情緒。拾爺贊成我去，叫我要忍住唔好喊，但我知道自己唔好tough嘅人，如果到時見到爸爸受苦，我又會眼紅紅……

準時兩點去到醫院，行去嘅時候，哥哥打嚟問我位置，我正想答佢就見到佢個背影，兩兄妹一齊去會合爸爸。陪爸爸坐咗一陣，佢就被姑娘叫咗入去上藥，今次好好彩，姑娘一搵就搵到佢條血管，可以做到療程。同哥哥喺出面等，間中會入吓去睇爸爸。入面啲冷氣好勁，我怕爸爸唔夠暖，佢話自己ok，下次會帶件再厚少少，然後就不斷催我出番去，爸爸知我身體弱，怕我凍親又會氣管炎。而家有病嘅係佢，但佢卻仍然去擔心我……

過咗大約一個鐘，爸爸就完成第一次嘅療程，今次只上一包藥。下次係下星期三，到時我會陪爸爸，咁哥哥就唔駛專登請假。不過，下次爸爸會上兩包藥，時間會耐啲。

爸爸個裝喉手術亦已落實喺7月28日做，前一晚入院，我同拾爺7月28日晚飛，我打算探完爸爸先去機場。

Q is for Quickly

女俠媽媽之前跌親，令女俠甚為擔心，師姐發起集資買藥材予女俠媽媽進補，望其早日康復活動。除咗夾錢，我仲整咗張卡予女俠媽媽。

Stamp: You Are Loved, Occasions Alphabet, Priceless (Stampin’ Up)

Paper: White, Green, Blue

Ink: Versa Magic – Mango Madness, Versa Color Bark, Distress Ink – Tumble Glass

Accessories: Decorative Label punch, Large Oval punch, Itty Bitty Shapes Punch Pack, Pearl

Reference: Stamping Inspiration

Read more:

我是水造的！

放學後，喺學校做多陣嘢，就出發去QE，同哥哥一齊陪爸爸覆診。等咗成個鐘先到爸爸睇醫生，入到去，醫生幫爸爸做啲簡單檢查，再confirm爸爸做化療嘅事宜，哥哥好冷靜咁問醫生有關爸爸嘅病情，我一如以往，每到呢啲大事發生位，我都會腦袋一片空白，唔識問嘢，唔曉諗嘢，剩係識得忍住唔喊……可惜……今次，我忍唔住……

見醫生，醫生話爸爸個肺嘅腫瘤最大為1.1 cm，肝就3.5cm，做化療嘅話要做6次，每次3個禮拜，即要辛苦18個禮拜。醫生提醒爸爸上次化療有過敏反應，今次再做，有機會引起過敏性休克，會有生命危險。我哋要小心觀察，一旦發現爸爸出紅疹就要通知醫院，如果番到屋企全身出紅疹，要即時call白車。醫生仲話爸爸啲血管比較難搵，如果嚟到姑娘搵唔到血管，就做唔到，建議我哋排期幫佢插喉仔方便打針入藥……插喉仔有其風險，會令爸爸唔舒服，但最麻煩係，排期唔知排幾耐……爸爸怕排得嚟，腫瘤擴散，病情難以控制，唯有叫醫生插喉、化療同時安排。聽到爸爸要做化療，我已經好唔開心，而家仲要插喉，我好心痛！佢一把年紀，我真係唔想佢再受苦。上次個大手術做咗一年都未夠，點解又要佢受苦﹖！點解唔可以俾佢舒服多一陣﹖！之後，哥哥問醫生化療可唔可以幫助控制病情，醫生表示只可以作舒緩之效，即係減慢惡化速度，一定唔可以令腫瘤消失。醫生話爸爸呢個cancer好惡，之前已經試過化療，所用嘅藥，已經係鼻煙癌當中叫有效嘅，但對爸爸都唔work，所以佢話只能盡力去試，今次化療都唔保證到任何嘢，可能做緊療程時，仍然會惡化……

見完醫生，同爸爸行出房，哥哥一個留低再問多少少嘢，我同爸爸就坐低等預約紙。等緊嘅時候，我盡量強忍淚水，但爸爸一同我講做化療係望延長多幾個月命，我就忍唔住眼紅紅。佢見我想喊，就安慰我叫我唔駛喊，話雖然睇唔到我生仔，但知道我有佢都已經好開心。佢話奶奶都會好開心。我知爸爸好想做公公，如果可以，我真係好想即刻生個外孫俾佢玩，可惜，怕只怕就算我而家即刻有咗，我都生唔切出嚟俾爸爸抱。爸爸越講呢啲，我就越忍唔住，結果喺醫院到喊咗出嚟……爸爸呢個時候都忍唔住喊埋一份。哥哥出番嚟見到我哋咁，佢又忍唔住喊埋一份……哥哥叫我哋要保持積極態度，不過，醫生話爸爸個肝一惡化，生命就會以月計算，預計只有10個月……我唔想影響爸爸作戰情緒，但我真係控制唔到自己啲淚水……我好憎我自己帶埋啲咁負面嘅情緒俾屋企人！可能，我唔適合陪佢去見醫生……

因為話咗番奶奶到食飯，六點半到我就先行離開醫院，哥哥繼續陪爸爸等攞預約紙。番到奶奶到，拾爺一打開門，我一見到拾爺就忍唔住再喊，嚇親奶奶，佢以為我爸爸又入醫院。我冷靜番個人之後(其實都係邊喊邊講)，就同奶奶交代爸爸而家個病況，奶奶聽完都唔太開心，佢亦只能盡量安慰我，佢話我身體唔好，叫我不宜太難過。

番到屋企，心情仍然難過……每每諗起爸爸嘅一番話，我就好後悔遲遲唔落實生B大計，而家拾爺又肌肉撕裂中，此計暫時更無法實行……真心希望爸爸能夠抱抱我個B。求極速生B法！

賣萌小子

飯後，細妹攞咗個士多啤梨雪豆出嚟，小王子突然將當包伏，狀甚有趣！喺我仲未嚟得及捕捉有趣情景時，小王子已經玩厭雪豆……好彩，我show啲相俾佢睇後，佢覺得有趣，於是又擺出pose俾我影，總覺得呢兩張相係佢故意擺pose影出嚟嘅。小子應屆識得望鏡頭之齡了！

樂華四白癡

晚飯過後，打工達人表示隔離The One呢排嘅主題為佢最愛嘅「大口仔」，於是我哋一干人等即刻陪佢去影相影餐飽。本來只係打工達人一個要影，慳妹幫佢揸機，但我見等候影相嘅人唔多，反正大家都到齊，就提議四個人合照。本來只係影少少，但睇番打工達人啲搞笑相，我哋四個又傻婆上身，影埋好多白癡相，雖然白癡，但大家都樂在其中。我哋果然不負「樂華四白癡」之名呀！

 

極尚大喜屋

國泰的生日飯，揀咗呢期人氣極盛嘅「極尚大喜屋」，身邊唔少朋友去過讚好，搞到我心癢癢想試！

六點鬆啲到達餐廳，只見樓梯現人龍，呢到好似Mr Steak咁，準時先放人入座，到我時，講低電話號碼，被安排42號卡位。

餐廳環境擠迫，雖然我哋坐嘅係卡位，但其實同隔離枱只係隔咗塊茶色玻璃，根本就係零距離！其他位置都見到餐廳用盡每一吋空間去放枱，食客坐得擠迫，侍應又行得辛苦……餐廳收咁嘅價錢，卻provide咁嘅環境，感覺係一間錢字行頭，對食物毫無誠意嘅食店！

坐低後，開始睇order紙有咩好食，期時打工達人已到，兩個人一路睇，一路點嘢食，呢到食放題，我哋當然邊食邊等其他人啦！同打工達人食咗一輪刺身、熱食後，國泰到埋，三個人又繼續點嘢食。差唔多七點，我都食到半飽，慳妹先趕到，佢一嚟到，又狂點嘢食，我怕點得太多食唔哂，慳妹卻表示自從有兩個小孩後，每次食飯不過15分鐘，最耐冇飽飯食，仲話要多謝我哋俾餐飽飯佢食，有冇咁慘呀﹖！國泰呢頭先話心急想要做媽媽，慳妹嗰頭就道出為人母親之苦，真係唔知要好定唔要好……

每次gathering，大家都係簡單交代吓近況，有時互相呻吓工作之苦，咁就歡度一個晚上。

講吓今晚食咗啲咩先﹕

刺身﹕叫咗幾round刺身，包括~

三文魚﹕厚切，有口感，但唔夠新鮮……

甜蝦﹕又唔甜，又冇咩蝦味……

天使蝦﹕蝦味頗濃。

赤貝﹕爽口味美。

象拔蚌﹕爽口，略腥。

帶子﹕打工達人不停讚口，但我唔覺得鮮甜喎！

「魚立」魚薄切﹕有口感！

仲有玉子(唔知點解會放刺身類……)、北寄貝、池魚等，但我冇食。

壽司﹕雖未至於難食，但冇一樣覺得好味……

海膽軍艦﹕海膽雖唔腥唔苦，但卻有欠鮮甜……啲紫菜上枱時已經「淋」哂，劣！

熟蝦只係凍冰冰，一啲蝦味都冇……鵝肝帶子壽司無故被加上甜甜嘅醬汁，搶去本身都唔知有冇嘅鮮味……失敗！

炙燒三文魚腩﹕第一round order嘅，又真係有溶喺口嘅感覺，但之後嘅……就唔ok喇……

炙燒牛肉﹕只係食到甜醬油個味……

炙燒帆立貝﹕只係食到甜醬油個味……

意式黑松露帶子沙律﹕帶子味道一般，唔係太食到黑松露個味，沙律菜好唔新鮮……

柚子大蝦沙律﹕冇食到。但隻蝦一睇就知唔係大囉！

燒有機菠蘿﹕打工達人點嘅，我冇試到。話笑我哋張枱太細，放唔到咁多嘢，國泰就將打工達人點嘅朱古力馬卡龍放埋入燒菠蘿隻碟到，我同打工達人即時覺得此舉唔妥，但國泰認為燒菠蘿冇汁，冇問題……我即時表示要影低佢嘅所作所為！燒菠蘿冇汁，但菠蘿本身有水份架嘛！哈哈。

燒牛舌﹕水準一般。

雞軟骨﹕慳妹話齋個骨令人「o趙」好耐，食完都冇力講嘢呀！

蒜片牛柳﹕牛味頗濃，唔錯！

北海燒帆立貝﹕唔鍾意佢個sauce！

芝麻雞翼﹕好味！辣辣哋好醒胃，雞翼半燒炸到好香！一向不算好雞翼，加上知道食得多冇益嘅我都忍唔住食咗三隻！

芝士年糕﹕冇咗個甜醬油就perfect喇！本身個年糕嘅size唔細，入面又多多芝士，好味！

燒羊鞍﹕好難食！個調味怪，啲肉又韌又嚡，食多兩啖都嫌佢嘥我quota。

辣酒煮花螺﹕冇食到。打工達人話一啲都唔辣。

甜品﹕絕對係一個伏嚟架！

曲奇妙趣芝士蛋糕﹕口感好怪，完全唔似cheese cake。

焦糖朱古力意式蛋糕﹕味道好怪，我想即刻吐番出嚟！

紅豆綠茶慕絲餅﹕見到佢個賣相我已經唔想食！所以冇試。

法式脆糖布甸﹕面層一啲都唔脆……但個蛋尚算滑溜。

每位食客仲可以點一杯Häagen-Dazs嘅雪糕，但啲flavour唔太吸引，我、打工達人同慳妹都要咗限量版嘅流心雪糕，國泰就要Cookies and cream。流心雪糕係Tiramisu味，話佢流心，不如話有啲toffee喺入面算喇。

埋單$1223，唔明點解咁多讚好，又話啲嘢新鮮好味，我真係唔覺！三百蚊一個，我期望食到好食嘅嘢，但呢到冇咩嘢可以叫好，我冇理由用三百蚊嚟狂食雞翼呀﹖！

評分時間﹕
食物：一般
服務：一般
環境：差
衛生：一般
價錢：Overpriced
總結﹕不值一試

餐廳資料：
極尚大喜屋
尖沙咀加連威老道2-6號愛賓商業大廈後座1樓102號舖
31882882

 

 

變身妹仔！！！

一早同校長請一個鐘頭假，飛的去法國醫院接媽媽出院。醫院又話要十二點前出院，但會計部卻遲遲唔出單，我一去到已經要求要單，但姑娘話未有，叫我等，一等等成半個鐘，我再去催，有姑娘仲串嘴話未夠十二點，我火火哋，想鬧佢當時已經差唔多十二點，同埋係佢哋要求人哋十二點出院，而唔係十二點找數，好彩有其他姑娘喺我正想出聲之際表現友善，話即刻幫我跟進，如果唔係，我應該會大鬧法國醫院！我唔係想搵人發洩，而係當時我自問好有禮貌咁問佢哋有單未，我唔明點解要被人串，而家我係客，呢到係私家醫院，又唔係公立醫院受政府津貼，我點解要貼錢受閒氣﹖！

等多陣，終於收到張單，即刻落去俾錢，再上樓等媽媽執好嘢，換埋鞋，就帶媽媽出去俾單、交鎖匙，拎好藥後，俾埋姑娘剪牌就走得。出去前，我叫媽媽除番人家件外套出嚟，媽媽就話件外套係哥哥番屋企拎俾佢嘅，我奇怪點解件外套同隔離床嘅一樣，仲有醫院名，但竟然係哥哥於家中拎過嚟，點知……媽媽一行出去姑娘做嘢處，人家就叫佢除番件外套出嚟，話係醫院之物……真係瘀爆！

離開醫院前，姑娘再三叮囑媽媽唔好拎重嘢，於是，我一邊膊頭孭起媽媽個背囊，再手執自己個袋，另一邊就手扶媽媽，再拎袋藥護送佢到樓下大堂。然後，發覺一雙手唔夠用，放好袋藥，再拎把遮出嚟，將手袋放上膊，一手扶住媽媽，一手撐傘咁同佢行出去坐的士番娘家。繼早前幫拾爺著褲、著鞋後，再次變身成為妹仔！

送媽媽番娘家後，再提佢食止痛藥，make sure佢分清啲眼藥水同眼膏幾時滴同幾時揸後，就趁佢滴咗眼藥水休息緊時，詢問爸爸情況。爸爸話醫生叫佢做化療，做咗，仲有一年可以玩吓，唔做，就只得七、八個月命……爸爸下星期一四點覆診，我已放學，可以去陪佢，到時再問清楚爸爸而家個情況。爸爸再三吩咐我唔好同媽媽講，但是晚，佢whatsapp我哋話媽媽已經知道咗……

難過

媽媽就近確診患上黃斑病變，左眼要做小手術，雖然呢個手術可以喺clinic進行，但媽媽本身心臟有事，為咗安心，我哋決定貴幾萬蚊都要揀入院做，有咩事，都有足夠嘅醫生同儀器補救。

放學後本想打的去法國醫院，但打俾哥哥後先知媽媽嘅手術安排喺兩點半進行，媽媽而家喺醫院瞓緊覺，佢同爸爸仲有細妹都行開咗去食嘢 (哥哥同細妹陪媽媽入院，爸爸被醫院召去驗血，去完醫院後，爸爸亦去咗探媽媽。)，哥哥叫我唔駛急，教我點樣搭車去醫院。去到法國醫院，就上病房搵媽媽。兩母女傾咗陣計，媽媽雖然緊張陣間嘅小手術，但仍然關心拾爺病況。媽媽話入院時，姑娘竟然以為佢做右眼嘅手術，佢急忙澄清係左眼，仲叫哥哥打去搵clinic個姑娘跟進事情，聽到呢到，我突然對個眼科醫生冇咩信心，點解左、右眼都搞得錯架﹖！

兩母女傾到咁上下，哥哥嚟埋，仲幫我買咗個lunch添。細妹則去咗陪爸爸覆診。之後，大約兩點半，有嬸嬸嚟送媽媽去手術室，媽媽因為滴咗眼藥水，視力模糊，所以嬸嬸用輪椅推媽媽到手術室。我哋先被帶到眼科中心等候，醫生嚟到後，就喺房入面同我同哥哥講一次手術流程，醫生強調自己清楚媽媽係左眼要做手術，話出錯嘅係姑娘，從佢嘅談吐，我開始對佢有番啲信心。之後媽媽就被推進手術室，我見媽媽越加緊張，拳頭握實，表情流露著慌張神色，就趁佢被送走以後，叫住醫生，請佢一陣盡量講啲說話為媽媽定定心神。醫生話媽媽個case其實適合用全身麻醉，奈何媽媽擔心自己心臟負荷唔嚟，堅持選擇局部麻醉……

醫生離開後，哥哥同我講其實好多醫生都話媽媽可以做全身麻醉，但媽媽就係唔信人……唉，我覺得，媽媽一陣要膽驚受怕個幾鐘，控制自己唔好亂郁以免醫生稍一不慎傷害眼睛，箇中嘅心理壓力，可能比全身麻醉更影響其心臟！

等候媽媽出嚟嘅時間雖然只得個幾鐘，但真係好難過！上次爸爸嘅九個鐘手術，我因為要番學，keep住自己不停做嘢，冇時間去諗同去驚，但今次坐喺手術室門外，個人就亂！都唔知係好彩定唔好彩，拾爺噚晚又唔舒服，搞到我都冇覺好瞓，今日全日個人都好攰，所以等等吓我就瞓著咗。

醒咗之後，哥哥同我講細妹打嚟，話爸爸個肺同肝都被照到有腫瘤……其中肝個腫瘤有成3 cm咁大……醫生建議佢做化療……哥哥叫我一陣千祈唔好同媽媽講住。聽到爸爸cancer又再復發，我真係好唔開心，佢個大手術做咗一年都冇，咁快又出事……佢年紀唔細，又手術又化療，真係好辛苦架！點解唔可以俾佢舒服啲咁過日子喎﹖！媽媽而家仲做緊手術，都未知做成點，又到爸爸出事……拾爺個病又反反覆覆咁 (如果佢再覺得唔舒服，聽日又要番去Dr Lam到覆診架喇！)，我個人其實唔硬淨架，我真係承受唔到！

媽媽被推出嚟一刻，望到佢左眼被蓋上紗布，右眼則通紅，一睇就知喊過嚟，神色仍然慌張，彷彿剛才受到極大驚嚇。我即刻上前慰問媽媽，佢第一句就話﹕「好痛呀！仲痛過生仔！」，媽媽話麻醉咗都仲感覺到刀片割眼嘅痛，但因為唔敢亂郁，佢只可以死命握緊拳頭去忍，個幾鐘入面，佢痛到出哂汗……見到媽媽咁樣，我真係好心痛！好彩，過咗一陣之後，媽媽開始心情好番啲，個人冇咁繃緊，慢慢講到頭先手術情況。

醫生出嚟之後，就話媽媽個手術成功，黃斑病變嘅情況唔壞，佢唔需要為媽媽雙眼噴氣。

陪媽媽上病房後，我哋唔想阻住佢休息，就同哥哥離開。我倆去九龍城廣場嘅吉之島幫媽媽買咗盒飯，哥哥收到細妹order，幫佢買咗個魚柳包，再去幫爸爸買牛肉粥，番到醫院，爸爸同細妹已到。以為媽媽瞓緊覺，點知原來佢冇瞓過，佢話個頭好痛！等咗好耐，姑娘先拎到止痛藥嚟……本來夜晚係打算等齊人一齊去食dinner，傾吓爸爸化療嘅嘢，但我越坐個人越唔舒服……可能之前唔夠瞓，個鼻又好敏感，為免自己病倒，我差唔多七點就先行離去，番屋企。

一番到屋企，見到拾爺，就忍唔住喊住同佢講爸媽嘅事。呢幾日，眼見身邊至親個個都出事，我真係好難過！