Il Bel Paese + 江川

一 早check facebook，發覺今日Amor Workshop有精選$4 pattern paper賣，即刻心郁郁想撲出灣仔。拾爺本想以去銀行同Taste為由，唔放人(因為我晏晝要番學……)！但最後當然輸俾我呢個扭計大王身上啦！結果， 兩個人食完早餐，即刻換衫出灣仔！

出到去，未到12點，先去Il Bel Paese。上次嚟相機冇電，乜都影唔到……今次我check清楚啲電先出門口架！上次嘅Lasagna超正，今次當次要再叫啦！再叫多個Pasta of the day，係Penne with Pesto Sauce，個waitress講嘅明明係長通粉，但turn out碟嘢都唔係……啲炒一條條蟲咁都算，硬身得滯，真係唔多好食……雖然對意大利人嚟講，咁先係正中，但我真係唔多buy……而且，個waitress 之前話呢碟係cream sauce，但我一啲都唔覺得cream……同上次一樣，呢碟Pasta of the day要$68，但唔好食……反而$58嘅Lasagne依然係咁正！雖然今次有咗expectation，又冇上次嚟嘅時候咁肚餓，食落去冇上次咁大感 覺(上次我同拾爺正係覺得超好味！係全城至好味架！)，但依然覺得好正！個Lasagna夠熱，仲有好多cheese喺面，如果份量大啲仲正！

幫我哋落單嘅waitress，唔係 native，但英文好流利(因為我以為所有侍應都講英文，所以一落單我就講英文……後尾拾爺話我知佢識講廣東話架！)，我奇怪點解一個英文咁好嘅女仔會 嚟做waitress，後尾聽到佢同人傾開計至知原來佢係學生，係part-time嚟嘅。

呢度星期六會有buffet，百三蚊一位，由十二點食到兩點半，我哋上去睇過食物種類唔多，但同知己友好用百三蚊嘅價錢喺到享受一個中午都係一個唔錯嘅選擇！

食完飯，就去Amor Workshop到掃貨喇，買咗好多特價$4嘅pattern paper！同埋少少工具﹕

1. 間尺($40) – Olivia話把尺一面係鐵，方面用cutter cut嘢時用，而且有scale。

2. Clear stamp連Acrylic block ($80)。

3. MS嘅bone folder ($80)

4. Cutting matt ($88)

不過，我而家諗諗吓覺得自己買得太衝動，成$40一把尺，bone foler又要$80，其實應該出去睇吓其他地方會唔會有得賣，因為Amor啲嘢mark up得好高嘅！就好似個MS scoring board咁，賣成$300，Olivia仲話來貨價好高，咁我都知，但佢mark up得都唔少囉！啲punches又係，Vivien賣$150時，佢賣成$198！不過，Pegeo cafe仲勁，過二百……呢啲就係舖價同網價嘅分別喇！做個精明嘅消費者，以後都係唔好幫佢買工具喇，但買紙都ok嘅！

離開Amor就番學校，今日有function。完咗之後，就出銅鑼灣會合以前嘅學生食飯。班死嘢，冇時間觀念架！約好七點，冇人蒲頭！打俾佢哋先知啲地點約到亂哂，不過點亂佢哋都係遲到架喇！我當然發揮我潑辣本色，大鬧佢哋啦！佢哋班軟皮蛇仲要話我煩……

成班人去咗江川食嘢，因為識人，可以 有jetso！喺房入面，一路食一路吹水，講吓以前啲嘢，例如佢哋帶榴槤番學俾我鬧、運酒入學校、食煙等等等等一單單搞到我狂俾高層接見事宜。大家講番以 前嘅嘢，真係幾開心！如果佢哋唔三句唔埋兩句就笑我，我仲開心！佢哋都識得講，我做親出嚟嘅嘢都係會被人笑，但會笑我嘅只有佢哋……呢班傻人，仲叫我番舊 校「小」人，話咩以前邊個對我唔好，而家可以番去「小」佢，同佢講我而家教得不知幾舒服云云。黐線架！我會好似佢哋咁，句句都夾個粗口字嚟講嘢，呢班衰 嘢，成晚勁講粗口，聽到我幾辛苦！以前作文又唔見佢哋咁叻，講粗口就出口成文，流利到痹！不過，佢哋把口衰還衰，心地好過好多所謂嘅好學生嘅！教佢哋都幾 開心架，佢哋真係癲架，好多我永世都唔會做嘅嘢，佢哋真係夠膽死！仲記得以前佢哋會喺條街到玩入定，而家有個女嘅會突然扮扯皮條，帶我哋去江川時，叫幾個男嘅做女，話一陣幾個係大客，叫佢哋醒醒定定，笑鬼死我。

食咗咁多嘢，埋單都只係位位$134，你話抵唔抵﹖

P.S. 佢哋問我同另一個佢哋中四時嘅班主任係咪有心病，因為嗰個小家種一見我喺facebook到話attend個gathering，就即刻話唔去。咁我都好 老實話其實我哋大家唔係咁啱囉，不過我冇講點解會搞到咁，廢時影響班細啦！唔通同佢哋講呢個亞sir一啲都唔識關心學生，做事卸膊，明明佢係正班主任，個 個都以為我先係，次次都隊啲麻煩嘢俾我做，怕孭鑊怕到出哂臉，當年我同學校講唔要再part佢，學校寧願俾我跟你班上，都唔要佢再做班主任云云咩﹖佢哋班 死嘢，講笑問我係咪當年唔識某個英文字，當佢個頭係字典咁揭囉(佢哋話亞sir個頭好似本字典，即係嗰啲37或者46分界頭嗰啲呢，好似本被人揭開咗嘅書 咁！)，笑到我死咗！

小平津

之前喺無印訂咗個牙刷座，一早拎得，但因為無得再上Paper craft101，搞到我遲遲未去拎……終於，今日同拾爺掟起心肝去拎。

先去小平津食個lunch！上次同幾位媽媽嚟時係食dinner嘅，當時人山人海，唔知係咪因為lunch只得幾款揀，所以人流少咁多呢！我哋叫咗一個午市精選 — 牛油果軟殼蟹卷($40)同一個午市定食 — 燒鰻魚($70)。

侍應先上沙律同漬物，前者酸味味幾開胃，後者我則掂都冇掂過，據拾爺 講，好鹹！之後，侍應再上麵豉湯，唔怕鹹，幾好！跟住到烏冬，有啲「淋」唔得彈牙……上哂呢堆嘢先上主菜牛油果軟殼蟹卷同燒鰻魚，其實我幾唔鍾意咁食法， 講明定食應該一次過上先開心架，樣樣都分開上(最誇張係上完鰻魚先再上汁……)，食食吓又要等，到喉唔到肺咁！講番個牛油果軟殼蟹卷，件件都幾大，味道一 般，唔會特別好食，但又唔怕難食！燒鰻魚就特別啲，平時食開嘅都比較「淋」身(我唔知點先為之正中，因為之前去日本都冇食到鰻魚飯……)，但今次呢件好彈 牙，真係似食鱔多啲。雖然唔知佢係咪加咗料搞到咁彈，但食落去彈牙好似新鮮啲咁。

食飽飽，去拎番個牙刷座，再去Sogo個超市掃貨番屋企，拾爺又要大展身手。喺超市買咗超大蘑菇，雖 然家冇焗爐，仍然釀嚟煎！不過，拾爺怕唔熟，搞到煎耐咗，有少少濃……但個菇真係好好食！拾爺仲整咗牛、豬肉丸，又係好正！雖然豬肉都係有少少「鞋」…… 不過最正嘅都係碟Carbonara，個sauce真係好好味！都係亞哥嘅cream得！

New York Cafe & Bar

同拾爺入元朗搵食。

一早決定去聞名已久嘅New York Cafe & Bar，我哋知佢出名，但估唔到已經受歡迎到要預早一個禮拜去book……臨出發前，上網睇到啲人咁講，於是即刻搵家後備！

餐廳一點開門，我哋就十二點半去到， 睇吓有冇運行。到達餐廳，都有幾分失望，一間咁外國feel嘅餐廳，開喺馬路邊，真係乜嘢感覺都冇哂！我哋見到有個光頭佬喺出面準備緊開舖，於是問吓佢仲 有冇位，佢話全日客滿，叫我哋一點二、三再嚟，睇吓有冇客臨時cancel個booking。

我哋見時間尚早，於是四圍逛吓，見到田中壽司刺身店，我記得聽人提過，唔知係好食定抵食喇，都有幾個人排緊隊等，入面就坐滿哂，不過喺出面就咁望入去，覺得間餐廳似飯堂多啲，坐得好迫。

行行行，見到恆香，老婆餅一個$3.5，拾爺話網上啲人讚大同好食啲，我提議食完lunch之後，買一個恆香一個大同，即時嚟個比較。

仲有時間，我哋就去搵blog友Tansy開嘅boutique喇，但原來佢開兩點……

之後番去New York Cafe & Bar，途經大同，老婆餅都係$3.5一個。

番到New York Cafe & Bar，問咗另一個伙食(因為之前個光頭佬唔係咁有禮貌！)有冇位，結果我哋幸運地獲安排坐出面啲高枱，好過冇啦！

晏晝只有lunch set，要咗一個烤羊腿($58)同一個8安士炭燒牛柳($118)。

坐底冇耐，侍應就嚟咗一杯(﹖)餅 乾，之後好快就上餐湯。拾爺話呢度啲湯好多人都讚好，於是我哋即刻襯熱飲，果然係正！雖然作為南瓜湯，其南瓜味唔夠出，但整體個湯都滑，又有粟米又有洋 蔥，再加上奶油，成個湯嘅味道都好豐富。唯有唔好嘅，就係份量太少喇，如前人話齋，一小杯仲只裝得六成……

四條餅乾味道一般，似係現成買多過餐廳自己焗，我食到最後一條先發現跟餅乾個醬，點嚟一試，正！味道酸酸辣辣，好開胃！

才剛飲完湯，侍應已經送上烤羊腿。呢度上菜速度之快，好明顯係叫客唔好久留，又係嘅，人哋咁full booking，啲錢要賺完一輪又一輪架嘛！羊腿上碟時唔算熱，叫做暖暖地，呢樣拾爺唔太buy。我一拎起把刀切，就知塊羊唔夠「淋」，切都要用啲力，咬 時就要用吓「勁」喇。雖然塊羊唔「淋」，但又未至於難咬，肉中帶有少少羶味，對於鍾意有羶味嘅我嚟講梗係正啦，仲嫌佢唔夠羶添呀！就算唔好羶味好似拾爺 咁，都唔會反感！伴碟嘅薯蓉又係好特別，一般出面食開嘅，都係打到好溶，但呢度就食到一粒粒薯仔。我覺得呢個個口感幾得意，但拾爺就prefer打到溶 哂。

食食吓羊腿，侍應就上埋個8安士炭燒牛柳，睇到塊牛柳就無悔揀呢個size，因為我同拾爺都係大食之 人，如果要咗4安士，我真係驚我哋會唔夠食。炭燒牛喺唔少餐廳食過，多數都係又「鞋」又乾……但今次呢塊，雖然唔係「淋」，但絕對唔怕「鞋」同乾。自問唔 係食家，食過嘅炭燒牛唔算多，之前去嘅都係高級餐廳，但食到嘅係肉汁流失哂，乾到爆嘅牛，今次呢塊真係做到鎖住肉汁！當然Juicy唔juicy就真係見 仁見智啦，但一百蚊鬆啲，你仲想點﹖伴碟嘅薯角、脆肉瓜同茄子就一般啦！

餐飲要咗網上食家推介嘅凍朱古力，滿心期待咁飲咗一啖，嘩！甜到呢……我知唔可以拎佢同Leonidas比，但而家啲糖唔使錢咩﹖甜成咁﹖！我接受唔到……

埋單一百七十六蚊，下次會嚟食dinner，試吓佢個安格斯牛有幾正！

開餐期間，都有唔少人想walk in入嚟食嘢，但都不得要領。不過，凡事有例外。有個亞婆想入嚟食，侍應同佢講咗兩點先有位，問佢要唔要留位，個亞婆不慌不忙咁慢慢摺好把遮，唔答人，然 後，摺完之後，就問人可唔可以而家入去，侍應重申要兩點後，佢仍然想即刻入去，侍應拒絕佢要求，叫佢行吓先，到兩點再番嚟。佢就發難話自己行到好攰，唔要 再行，又話嚟到冇得食云云，仲企正我哋張枱附近，阻住條路。侍應叫佢唔好企喺到阻住佢哋，叫咗佢行出去等，但佢就只係行前幾步，企喺另一張枱到等。之後， 光頭佬就叫咗佢入去食喇。

食飽飽，再去Tansy間boutique，門口明明寫住兩點開，到兩點幾都未開……出番去大同買咗一個老婆餅，咬咗一啖，極度失望！好明顯呢種菠蘿包皮嘅老婆餅唔係我哋杯茶！(都係晃記好味啲！)

一場嚟到元朗，又冇乜地方好去，於是 我哋就決定去睇吓Yoho Midtown嘅示範單位。行入新元朗中心，就俾中原個agent mark住咗，於是跟佢行一轉示範單位。單位分六百五、八百幾同千幾呎。雖然實用面積有七成八，但單位間隔麻麻，房間狹窄不已，想放張五吹床都有難度。問 吓經紀呎價幾多，估唔到而家啲樓真係顛到連元朗都要六千幾七千。經紀落力sell我哋買8座51樓一個特色一房單位，490呎，樓底3.4米，全屋冇窗 台，只有落力玻璃，景觀開揚，遠望海景添。不過，一切都係得個講字，因為呢度都未收樓，實景如何，實在不得而知。好奇問價，經紀道﹕三百八十多萬，今天購 買可得3%回贈，即三百六十多萬，若按九成，分三十年還錢，月供萬多蚊。聽到呢堆數字，我同拾爺只覺離譜，一房單位都貴成咁。雖說新樓，又係大型屋苑，但 始終係元朗，買到咁貴，都唔知回唔回到本。而且，最重要係……我哋都嘔唔出咁多錢做首期，而家已經供緊一層，如果用萬幾蚊再供多層，我哋會活得好慘。個經 紀唔知係咪feel到我哋冇乜興趣，於是就call多個同事嚟兩面夾供，可惜嗰位人兄都只係開口夾著脷。為應酬吓個agent，我哋跟咗佢去拎樓書，然 後，佢哋又出動高級同事嚟說項，講到個單位好有潛力，另外兩間地產公司都有客傾緊個盤，仲話個盤俾發展商hold到今朝先放出嚟添。不過，我哋都只推說要 番去諗諗，連電話都唔留就走喇。我feel到跟開我哋嘅agent謝哂。

今日去睇一睇樓，我哋都好攰，真係年紀大喇……