Mia Pasta Trattoria

放學留咗喺學校睇吓啲旅遊資料，好羨慕網上某啲人，成日都可以去旅行，點解人哋會有咁多錢同時間嘅呢﹖去嘅地方又遠又貴，仲要一去去成幾十日，真係好想知佢哋做咩架！

之後就到美孚同桃子交收，但掛住趕去，唔記得咗提款……將銀包有嘅錢俾哂桃子後都仲差一百……好彩桃子好人，俾我事後過數啫！不過……我落order時太大意，買錯咗其中一疊紙……希望桃子幫忙出post後，會有人幫我買咗佢走喇。

一拎完嘢，就飛奔去Mia Pasta Trattoria。呢間餐廳真係好串，只hold 5分鐘枱，亦只俾你食一個鐘，但收費一啲都唔便宜！

叫咗兩個set dinner﹕

沙律or湯，我哋就一人要一樣，兩樣都係普普通通啫，然後，見到隔離枱碟麵包幾吸引，於是加$20要咗碟，個包外脆內軟，暖暖哋，係幾好食架！

Pasta就要咗忌廉蘑菇長通粉同大蝦意粉，前者有啲鹹，後者好唔掂，雖然唔係難食，但個sauce絕對唔會令人覺得開胃……可能上次嚟食過，有咗expectation，所以今次再食，覺得物非所值喇！

再加$15要個是日甜品 — 芒果奶凍，呢個幾好味！我鍾意呢到啲甜品夠「杰」身！

埋單$293，應該唔會再番嚟幫襯架喇，又唔係特別好食，又要食得趕(一個鐘就要人走，一晚做三round生意，唔怪得佢哋一個月賺廿萬！)，又坐得唔舒服……

Qui Ristorante Italiano

早起身，拾爺見天氣唔錯，就提議出去行吓。雖然我想留喺屋企整卡卡，但……我哋都真係好耐冇出去玩吓喇，好啦！就出去啦！

上網search餐廳，睇中嘅唔係冇開，就係冇位，又或者係冇lunch食……唯有近近哋揀咗Qui Ristorante Italiano！

Indoor餐廳位置唔多，但佢仲有出面嘅outdoor area，去到時冇人坐出面，入面都坐唔滿，假期都得咁少人，真係唔知佢點維皮。

叫咗兩個lunch set，waitress先遞上一籃麵包，可惜佢粗暴得滿，整跌咗一塊……

麵包未至卡外脆內軟，但亦唔怕硬到一食就知係隔夜嗰隻。

餐前飲品方面，我同拾爺都揀咗橙汁。

Appetizer & soup一齊上，唔明點解要用磚上呢味菜，我同拾爺睇到佢用磚上，第一時間就係望吓個地板睇吓兩塊磚係咪一樣，好彩唔係啫！

前菜係將一堆菜煎成一團餅，唔太好食……個湯就係雜菜湯，冇咩特別。

拾爺揀咗Lobster with squid risotto in mascapine cheese sauce ($118)做主菜，好鍾意佢撈咗squid喺啲飯入面，令到每啖飯都好有咬口，口感豐富！而且呢碟飯上時好夠熱，讚！

我揀咗Lamb & goat cheese spinach ravioli in mascapine sauce ($108)做主菜，不過……碟嘢一上枱已經知出事喇！所謂嘅意大利雲吞大大件(不過得兩件……)，但一睇就知overcook咗，塊皮睇到已經又濕又 梅，令人食慾大減！食落去，更覺不知所謂！呢碟嘢竟然食我$108，簡直係敲詐！

再來是日甜品 — tiramisu，酒味好濃，唔係我哋兩個杯茶！

餐飲方面，我杯檸茶啲茶有啲嚡，咖啡亦係普普通通。