繼

舊生請食飯，選址「繼」，點咗omakase ($580 per head)，舊生唔好tempura，改要多啲刺身同sushi，我本來話要tempura嘅，但師傅唔記得咗……結果都係要食多啲刺身同sushi……

舊生嚟咗好幾次，嚟到師傅都認得佢，佢覺得好正！而我都覺得有幾樣嘢係幾好味嘅，但未去到超滿足嘅感覺囉。不過，呢個價錢食到omasake，都抵！有機會都會試吓佢個鐵板餐。不過，鐵板餐平日價錢同假日一樣，就唔及秋田同鐵人旨花抵喇。

沙律﹕啲菜就唔算新鮮，個芝麻汁就正正常常咁囉。食咩餐都會跟呢個沙律嘅。

水雲菜﹕個sauce酸味味，幾醒胃！個菜就滑潺潺咁囉。

石鯛魚﹕個酸汁幾開胃，魚肉個texture我幾鍾意，有啲咬口，又唔會太韌。

赤貝﹕唔會韌！夠新鮮！

鮫鰈﹕油脂豐富，尤其用火槍燒過之後，油份迫哂出嚟，食落有少許溶於口中嘅感覺真係好正！略嫌師傅調味落手重咗啲同唔均勻，有啲位過鹹。

深海池魚﹕師傅知我唔食太重味，走咗面層嘅調味俾我，但今次落手又太輕，帶唔出魚嘅味道……呢件好一般。

油甘魚﹕普通。

金目鯛﹕又係用火槍燒過，迫咗啲油脂出嚟，但因為塊魚皮有啲韌，所以影響咗整體口感。

帶子﹕網燒帶子，有少許濃……

Toro﹕好好食！塊toro被火槍燒過後，油份被迫出，入口即溶！加塊包菜，去去油感，正！全場最正之物！

鱈魚﹕用火槍燒過，但油份唔夠……

鰹魚﹕一般。

玉子﹕冇咩特別……

海膽﹕一般，唔鮮、唔甜、唔腥咁囉。

麵豉湯﹕好鹹！

奶凍﹕唔夠滑……

餐廳資料﹕

繼

荔枝角長順街15號D2 Place二期3樓311號舖

37067703

金滿都越南餐廳

呢間越菜餐廳令我倆對越式蝦餅有新嘅認識，幫襯完之後，發覺之前喺越北牛肉粉專門店食到嘅香茅豬扒撈檬真係超高質！

越式蝦餅撈檬 ($36)﹕呢碟嘢一上枱，我嚇到呆咗！我被嚇倒嘅表情就連上菜嘅阿姐都忍唔住望咗我幾眼，冇辦法，我見識少，從冇諗過蝦餅會被片到蝦片咁薄，實在叫人驚訝！吃過不少撈檬，卻未見過花生碎及紅蘿蔔粒(連絲都唔係……)分開嘅，香葉、青瓜久奉，真係孤栆到呢。呢碗都可算係我食過賣相同味道最差嘅一碗撈檬，就連魚露都淡色過人，彷彿被溝了水一樣……

豬頸肉撈檬 ($36)﹕撈檬唔多說，豬頸肉嘛，好乾好嚡！

埋單先發現原來茶餐跟湯粉，撈檬要加$2……結果兩碗浪費肚皮quota嘅撈檬埋單價為$72，呢間餐廳從此blacklist！

餐廳資料﹕
金滿都越南餐廳
長沙灣元州街303號元州商場地下1號舖
23430833

鐵牛台灣牛肉麵

到旺角食lunch，見到鐵牛有set lunch，於是入咗去。記得上次同老公嚟，因為係星期六，冇set，叫碗牛肉麵都要$60，好貴……今次個set，叫平少少，一碗招牌紅燒牛肉麵加一杯熱檸水，盛惠$58。牛肉有3件，全部都好「淋」，個麵冇咩特別，唔算好掛汁，湯底好濃，啱重口味嘅朋友多啲。

餐廳資料﹕
鐵牛台灣牛肉麵
旺角彌敦道688號旺角中心1期地庫A舖
37554286

牛摩

牛摩呢星期優惠，極品牛小排二人同行一人價錢，7點前入座，兩位夾埋只係$262，可以一試。

今日狀態麻麻，兩人只食咗六碟牛……其中第三碟牛，我哋覺得唔係牛小排嚟嘅……荃灣分店食身同青衣分店有少少唔同，呢到有串燒，嗰邊冇……呢到係芝麻味雪糕，嗰邊係朱古力味yoghurt。不過，呢到會催人走，嗰邊唔會囉。

餐廳資料﹕

牛摩

荃灣眾安街68號千色匯I期2樓2031號舖

23208260

 

茶木 ‧ 台式休閒餐廳

同Madam一齊出外工作，Madam提議到Teawood食lunch，其實Teawood對我嚟講唔算平，但呢餐係Madam請，成件事舒服哂！
揀咗A餐，包三款前菜，一個主菜同一個飯或麵，仲有一杯嘢飲，$63加一，同公司附近嘅餐廳比，叫較平嘅選擇，但呢間餐廳坐落公屋區，我覺得佢個定價貴咗啲。當然，呢間係連鎖店，要做到間間一樣價，咁冇辦法，佢一定係呢個價位。

前菜﹕芽菜普通，滷水蛋凍咗啲，花枝丸細粒到食唔到花枝囉……
主食﹕我揀咗巴蜀崧子雞，夠哂辣(對我嚟講)，雞就冇咩雞味架喇，但就唔怕嚡口，所以都ok。
肉臊手工麵﹕其實肉臊配飯係好啲，但我見佢係手工麵，好似好正咁就要麵，不過……食完覺得都係好普通……
黑糖薑母茶﹕太甜……

餐廳資料﹕
茶木 ‧ 台式休閒餐廳

樂富聯合道198號樂富廣場1樓1108-1110號舖

23630339

阿賢麵線

放學後，同拾爺去咗附近嘅小店晚餐。
叫咗一個優惠餐同一碗大嘅魯肉飯，餐飲轉椰果奶茶(因為冇哂珍珠……)，埋單$76。唔貴但又唔特別好食，試過就算喇。

大腸紅麵線 (餐價$43，單點$28)﹕其實我唔知點樣嘅麵線先叫正宗，食過都係糊糊嘅一碗，其實咁濕，唔係我杯茶……大腸嘛，同本土車仔麵嘅豬腸比，真係差得遠……

魯肉飯 ($28，大)﹕拾爺話好鹹，我因為碗麵線味濃，所以食佢時又唔太覺。但我覺得呢碗飯啲肉太瘦，冇肥肉可言，食魯肉飯猜肥肉邊好食架！而且，魯肉飯唔係應該多啲汁架咩﹖

百頁豆腐 (跟餐，單點要$15！)﹕又話好有豆味，完全食唔出囉……又唔滑喎……

椰果奶茶﹕拾爺話好好飲，全枱最正係佢喎！

餐廳資料﹕
阿賢麵線
長沙灣福榮街218號美居中心地下41A號舖
62318008

J & V Mini Kitchen

出到新蒲崗工作，本來一嚐北正宗的越南粉，點知原來新世紀food court嗰間唔係分店，係搬舖……結果，求其入咗間餐廳食set lunch。餐廳為求做多轉生意，提供快餐店服務，坐低後餐牌都未睇就嚟問我哋食咩……上菜急趕，幾乎係要飛碟飯上枱咁滯，上餐飲啲熱水彈到我，道歉都冇句……同事嘅嘢飲仲要落錯單……奶茶用沖包更為經典！（可能被人投訴得多，落單時有講明。）同事覺得餐廳營運欠遠見，留唔住食客。

跟餐麵包﹕夠熱，夠脆，但冇味……都唔知上面嗰層係牛油定蒜蓉，總之就係冇味。

雜菜湯﹕正常味道。

焗紅咖哩雞球飯 ($50)﹕份量好少，但個炒飯都算乾身，紅咖哩汁幾惹味，雞球數量太少太細，未食真個味已經食哂……

餐廳資料﹕
J & V Mini Kitchen
新蒲崗景福街 71 號
23236788

上海婆婆

工幹到上水，其中一位同事病咗，所以lunch揀咗中菜，去咗上海婆婆。Set lunch $55起，免加一，比起公司附近算平，但其實又唔係真係好平囉。

婆婆擔擔麵 (套餐價$63)﹕麵淋咗啲，但個湯底好夠花生味。

青花椒湯小雲吞 (套餐價$63)﹕雲吞冇咩特別，但個湯底幾特別。

餐廳資料﹕

上海婆婆

上水龍琛路39號上水廣場5樓503-505號舖

26397090

 

 

牛八

牛八午市有四人同行三人價錢嘅優惠，於是同同事湊夠四人一齊去開餐！
去到餐廳，坐低後，等咗好耐都冇人行過可以幫我哋落單，呢到明顯人手不足！最後，係我行出去，搵一個剛幫其他人落完單嘅人，叫佢行去我哋張枱到幫我哋落單……

因為送嘅餐會係最平嘅，所以四人揀同一價錢會最抵！我哋四個都揀咗牛八餐，即澳洲穀飼牛 ($72)。

湯底我揀咗胡椒和牛清湯。呢到嘅每人一鍋，個鍋好細，所以湯底好快滾，但同時又會好快冇哂，要添……我好少食呢啲要頻頻加湯，真係好嘥時間。湯底好重胡椒味，但和牛味就欠奉喇，當然，呢個價錢我係預咗嘅，所以胡椒湯底夠惹味，我已經收貨喇。

澳洲穀飼牛偏瘦，鍾意食瘦肉嘅人就啱哂喇，可惜我鍾情肥牛，所以嫌佢嚡口。
自助區都有唔同食物，但同其他同類型餐廳比較，選擇算少，脆皮腸、獅子狗、菠菜丸、芝士丸、豆腐、粟米、南瓜、冬菇、金菇、秀珍菇、唐生菜、娃娃菜等。丸未解凍拎出嚟，菜就見到有黃，唔新鮮。

甜品有乳酪，我冇食到，汽水飲咗道地檸茶，甜到癲……我寧願佢溝水。
埋單$244.8，每人$61.2。大家都覺得呢個價錢尚可接受，原價就唔值得試喇。

餐廳資料﹕
牛八涮涮鍋專門店
黃大仙正德街103號黃大仙中心南館LG層LG2號舖
35801670

一風堂

一風堂同HSBC合作推出優惠，指定拉麵買一送一，即刻同老公去食。其實多年前幫襯過一風堂，當年覺得啲拉麵好一般，今日再試，仍然覺得冇特別……唯一特別係份量特別少，完全唔夠我哋「攝」牙罅……

特製赤丸新味拉麵 (圖上，$88)﹕唔太夠熱，隻蛋仲好細……

特製白丸元味拉麵 (圖下，$88)﹕湯頭鹹咗少少，麵已經揀咗硬但仲係唔夠硬……

埋單$96.8。

餐廳資料﹕

一風堂

金鐘金鐘道93號Lab Concept 金鐘廊1樓F04-F06舖

25273526