我的自大老公

10 十月, 2015honeyhinbaby 甜蜜蜜發表留言

拾爺 (唱)﹕你當我是傻瓜吧~~

我﹕你又真係有幾分傻氣嘅！

拾爺﹕我呢啲係英氣，唔係傻氣。

我﹕你真係唔知醜架喎！

拾爺﹕冇醜又點知呢﹖！

過份

21 七月, 2015honeyhinbaby 甜蜜蜜發表留言

我﹕你睇吓 (展示大脾近pat pat位嘅三撻蚊「難」)，我俾蚊咬咗三撻，好痕。
老公(睇完)﹕係喎！好喇，摸完pat pat快啲洗番手。
我﹕呢到唔係pat pat嚟架喎！
老公﹕係喎，唔係pat pat，係頭！

作大

22 四月, 2015honeyhinbaby 甜蜜蜜發表留言

拾爺 (唱)﹕人總需要勇敢生存我還是重新許願

我 (唱)﹕例如學會承受失戀

拾爺﹕咦﹖

我﹕做咩呀﹖

拾爺﹕你又知嘅！

我﹕我頭先唱先架，係你跟我咋！

拾爺﹕冇可能！

我﹕明明頭先我唱完，你仲跟住唱。

拾爺﹕頭先即係幾時。

我﹕啱啱囉。

拾爺﹕我噚日已經唱緊啦！

我﹕其實陳奕迅未出呢首歌前我已經唱緊啦！

拾爺﹕會唔會呀﹖

我﹕唓，你作到咁大，我咪又講大啲囉。

拾爺﹕實大唔過你。

我﹕…… (沾沾自喜中)

拾爺﹕其實首歌係我作架！

我……完全被技術性擊倒了……

話、哦、錫

19 四月, 2015honeyhinbaby 甜蜜蜜 2 則迴響

拾爺﹕你知唔知其實我好錫你架！

我﹕但你成日話我……

拾爺﹕話其實係錫嘅表現。

我﹕咁你可唔可以用另一種方式去表現呢﹖

拾爺﹕好呀，咁我「哦」妳囉！

我﹕……

On Five

27 三月, 2015honeyhinbaby 甜蜜蜜 2 則迴響

拾爺果然知我心意，結婚5周年，送上佢作嘅詩一首俾我做禮物。呢首係佢第2首為我寫嘅詩 (第一首於求婚時送上。)，對我嚟講，份禮物係無價架！

也許

17 六月, 2014honeyhinbaby 甜蜜蜜、同事三分親 2 則迴響

喺學校staff common room改改吓卷，突然~~

小肥 (唱)﹕也許 ~~

我 (接力)﹕相戀這條路擠迫的懷抱

小肥﹕吓﹖！我唔係諗緊呢首歌喎。

我﹕咁你諗緊邊首﹖

小肥﹕我諗緊「也許相愛很難」。

亞頭﹕吓﹖！我唔係諗緊呢首歌喎。

小肥﹕咁妳諗緊邊首﹖

亞頭﹕我諗緊「也許當天的癡未完想講的講未完」。

放學後，同拾爺歎下午茶，話佢知發生呢件事。

拾爺﹕吓﹖我諗緊「也許我真的太累也許我要睡一睡」。

我﹕哎呀，要唱出嚟架，你呢首都唔係歌！

拾爺﹕咁我唱出嚟啦 (唱) 「也許我真的太累也許我要睡一睡」……

我﹕……

人間有情

29 四月, 2014honeyhinbaby 甜蜜蜜 2 則迴響

氣管炎雖然辛苦，但每次病發，都感覺人間有情。

上星期五我個樣應該真係好病，好多同事都趕我回家，星期一番學後，同事都走嚟問候我，佢哋話我上個星期五成個人好冇精神，令人擔心。我想我平時太跳跳紮，突然嘅冇嚟神氣，令到佢哋都好唔慣呢。呢兩日想趁自己精神番啲，爭取時間工作，卻換嚟同事﹕「好心妳病就番屋企抖吓啦！」嘅回應。其實，我食咗藥，尤其吸咗類固醇，已經好多喇。

除咗同事，爸媽都有打電話問候我。媽媽喺番嚟香港之後嘅第二日已經打俾我，問我病情，得知我曾經發燒，都表現擔心。爸爸之後又有打嚟(應該係奉媽媽之命)，除咗問候我，都有關心埋拾爺有否被我傳染。我倆免疫力差嘅形象實在太深入民心了……奶奶喺佢餐生日飯過後，得知台灣醫院啲藥唔啱我，都有whatsapp催我去睇多次醫生。

記得上星期五喺學校病到辛苦想喊時，收到嫂嫂嘅whatsapp，原來佢同哥哥教曉小王子嗌「大姑姐」後，專登錄咗音send俾我聽，聽到小王子嘅一聲「大姑姐」，心頭一暖，嗰刻完全明白同事口中「兒女會給你力量」嘅意思。小王子雖然唔係我兒，但我真係好鍚佢！

至於最鍚我嘅一定係拾爺！其實，每次病到好辛苦時，都會因為得到拾爺嘅愛護而感到溫暖。記得落機嗰晚，拾爺幫我照顧爸媽，送佢哋上車後，同我番到屋企，第一時間要我去沖涼梳洗，佢就忙於unpack行李。當晚又攰又夜，但佢都堅持開機洗衫，之後，佢得知我發燒，就監督我食退燒藥，再睇實我上床安睡後，先去沖涼。沖完涼後，仲要晾衫。我食咗藥，好快瞓著，都唔知佢幾點先上床瞓，但我知佢其實自己都好攰……番嚟香港呢幾日，我都因為病而做唔到啲咩嘢，拾爺就一力搞掂哂執行李嘅事。佢比我早開學，又要兼顧教學，仲要照顧我呢個病人加做哂所有家務(其實平時都係咁架喇……)，睇到出佢好攰……但佢幾攰，都會喺見到我病得辛苦時，走嚟摸摸我個頭呵我。尤其半夜，我因為鼻水倒流情況嚴重，好多時兩個鼻孔都塞哂，所以半夜會塞醒，每次拾爺都會feel到，見我辛苦，就會呵我。

我成日都話自己其實幾好運(雖然我從來冇乜抽獎運)，有一個大家庭，兄弟姊妹間感情好。讀書唔叻，成績唔好，但又勉勉強強大學畢業。能力唔高，卻又有學校請我，收入雖然唔會叫人眼前一亮，但就勝在穩定，比上不足，比下有餘，足夠我生活。性格唔好，卻又嫁到個超好老公，忍受我嘅臭脾氣，對我嘅照顧實在無微不至。我唔係嗰種追求權力同名利(雖然錢係冇人嫌多嘅，哈哈！)嘅人，只想每日都過得開開心心，而家嘅生活，我已經覺得好美滿喇。