童話故事「國王的新衣」入面，國王因為小孩一句真話，尷尬敗走。現實卻係說真話嘅小孩被四周嘅大人責罵其說話令國王尷尬，大人們以一人一句緩和氣紛的說話，紛紛為國王解圍。
不理朝政嘅國王受到保護，只為追求公義而拆穿其「語言偽術」嘅小孩反被罵，一切只為要顧全國王的面子。大人們站在道德高地，指罵小孩不理他人感受時，不正罔顧小孩感受﹖自打嘴巴、雙重標準，大人們與國王之間的關係給顧全了，他們與小孩之間的關係卻給破壞了。當然，他們才不在乎。小孩也不在乎。保持赤子之心，為人之基本。
小念頭
因為舊生不下一次提及小念頭嘅蛋糕有幾好食，搞到我心郁郁，尤其因為佢好多蛋糕都係以茶味為主，所以我一直都想試，但卻未有機會去訂。終於，等到佢開舖，可以去嘆杯茶，食件cake。原來小店老闆都係舊生，不過我冇教過佢。今日上去，佢介紹埋父母俾我認識，仲介紹我作前老師，哈哈，因為我已經冇喺嗰間學校教喇。
店舖裝修簡約舒適，好啱三五知己上嚟閒聊一聚。
芝士奶蓋炭培烏龍 ($45)﹕我呢杯係冷泡茶，大熱天時，呷一啖，成個人涼哂！面層係芝士同奶，老闆的媽媽教我頭一啖要大啖飲，咁先飲到3個層次，一飲，飲到芝士嘅鹹，奶味雖淡，但亦能嚐到，仲有烏龍嘅清香，口感特別！
鐵觀音芝士蛋糕 ($40)﹕上層嘅鐵觀音茶味濃，下層嘅芝士亦夠香滑，唔錯！而且蛋糕唔會太甜，好！
焦糖菠蘿布丁 ($45)﹕來自台灣的菠蘿好juicy，而且冇渣，很好！但老公嫌仍唔夠甜……不過，菠蘿用焦糖處理過，雖冇天然甜，亦有人工去補數。反而我嫌下面個雞蛋布丁太甜，唔淋焦糖汁都好甜呢……
手煮鐵觀音黑糖奶茶 ($38)﹕我一向唔飲奶茶，不過都有呷一啖，普普通通，冇咩特別。
餐廳資料﹕
小念頭
旺角通菜街75號1樓
61831450
1963 木十豆寸
自從睇過蘋果新聞嘅介紹後，便一直想試，適逢今日有事需到附近，當然唔放過呢個機會，魯肉飯係必試架喇，問題係食邊個餐呢﹖最後揀咗「脆皮雞腿飯」。
脆皮雞腿飯 ($68)﹕附前菜、香酥雞腿及台式滷肉飯，索價$68，卻連飲品都冇……要飲嘢就要加錢……
前菜﹕菜脯一般，車厘茄微酸，幾開胃！
台式滷肉飯﹕好好味！我覺得好食過「請坐」，滷肉嘅肥瘦比例好好，尤其肥肉部份更係入口即溶，飯嘅油份足夠，唯一唔好食太太太細碗！
香酥炸雞腿﹕呢個餐名為脆皮雞腿，可惜雞脾個皮唔脆，而且仲好乾……雞肉亦炸過頭，一啲都唔juicy……令人失望，唯一亮點係個汁，酸味味，問咗店員，原來係桔汁，幾特別。
餐廳資料﹕
1963 木十豆寸
灣仔灣仔道110號中匯大樓2樓
31050160
新記越式牛肉粉
放學後，又喺附近搵食，想試嘅炸物店仍然大排長龍，我倆唯有轉戰越式小店。呢間小店生意非常好，不斷有食客進出、等位及買外賣，我覺得價錢係一大原因，喺新店林立嘅長沙灣，食店索價得人驚，呢到$40一碗粉，去邊到搵﹖
生牛肉河粉 ($40)﹕牛肉嚡，湯底重味精，一般啦。
鮮蔬香茅豬扒撈檬 ($40)﹕賣相唔ok，配料好差，但個豬扒好好食！熱辣辣上枱，食落鬆軟，仲好juicy，有驚喜！
餐廳資料﹕
新記越式牛肉粉
長沙灣青山道349號地舖
27280628
The Sandwhich Club
科大cafe星期五結業喇，以前喺科大讀書時，好鍾意食呢嘅雞翼同薯條，以前讀書時期嘅餐廳已經逐間執笠，就連cafe都難逃一劫……
趁住佛誕假期，朝早專心工作過後，下午就迫拾爺陪我入嚟回味一番！
雞翼 ($8/1隻)﹕鹹咗少少，但辣辣哋、濃濃哋，好惹味！
薯條 ($9)﹕相比以前，遜色哂喇，又可能今日多人，唔夠脆……
帶子蛋沙律茶餐 ($18)﹕其實佢唔特別好食，但因為只有茶餐只可以食到帶子，所以讀書時，一到tea time，如果去cafe開餐，一定叫帶子餐，好多人都係咁，久而久之，一講起cafe，就會諗到帶子餐。今日多人，啲帶子一早整起哂，唔夠熱……
牛肉漢堡茶餐 ($31)﹕唔太記得個名，個包好厚，牛肉唔太juicy，蕃茄唔新鮮，已變黃……
識食一定係食帶子餐、雞翼加薯條！只有非科大畢業嘅先會叫埋啲漢堡餐……不過，我仍然感謝拾爺山長水遠咁陪我入嚟食呢餐，垃圾食物從來唔係佢杯茶，但食嘅係junk food，品嘅卻是我大學生活的回憶呢！今日好多人好似我咁，特意番嚟回味一番呢！
餐廳資料﹕
The Sandwhich Club
Tea Hub
奶奶帶我哋去食好西！餐廳裝修雅致，不過食物價錢偏貴，一個餐附小小小沙律作前菜、主菜及餐飲，索價$78，我哋3個都只要主菜，都仲要$58，貴！都算喇，最慘係唔好食！
茶湯麵﹕唔好食！麵唔好食，一pat pat嘅口感，個茶淡得嚟唔香唔好食！差！
茉莉花豆腐﹕完全食唔到茉莉花香味，只見其中一件豆腐給煎濃了……
柚子煎茶雞翼﹕最好食已經係呢個，甜甜哋，但完全食唔出柚子味……
茶漬飯﹕茶較茶湯麵嘅茶濃，不過都係唔好味……
茉香雞粉絲配溏心蛋﹕粉絲入到味，食到茉香，其他就好普通，溏心蛋蛋味完全唔出……
香茅薑茶脆魚塊﹕魚塊係幾脆嘅，但有啲齣，配嘅香茅薑茶好淡，完全食唔出香茅薑茶味……
餐廳資料﹕
Tea Hub
順寧道439號 順寧閣 地下2 號舖
23377278
鹹蛋薯片
除咗鹹蛋魚皮，拾爺公幹時仲買咗鹹蛋薯片俾我。之前嫂嫂話薯片冇咁好食，我又唔覺喎，咪又係鹹蛋味！不過，我一向鍾意食薄身薯片，呢個薯片我嫌佢唔夠薄……但味道嘛，同魚皮一樣，都係好鹹蛋同辣辣哋，我鍾意！
御前上茶
Lunch同同事過咗樂富搵食，去咗御前上茶，其實我係為咗杯抹茶雪糕而嚟。Set lunch$56加一，有小食、主菜同餐飲，算幾抵食。細食嘅同事嗌飽，我就一般般啦！甜品要加錢先有，加埋其實都唔平，但食埋就飽到個肚爆咁滯。
關西鱆魚燒丸子﹕淋咗啲……
蟹羔蟹肉親子茶漬飯﹕個茶湯加埋飯素鹹咗啲……
御前抹茶﹕唔夠苦……
御前輕怡聖代 (餐加$24)﹕戚風蛋糕上附上雪糕，揀咗抹茶味，但抹茶味唔夠濃、唔夠苦……
薯仔沙律﹕同事之選
汁煮豬軟骨飯﹕同事之選
玉子和風牛肉稻庭烏冬﹕同事之選
和風咖喱牛肉飯﹕同事之選
餐廳資料﹕
御前上茶
樂富聯合道198號樂富廣場1樓1105號舖
29863568
津津食店
有事要到堅尼地城一趟，晚餐求其入咗間小店搞掂，點咗碗香茅豬扒湯河 （$36），味道一般，完全食唔出喺越式食物，似係普通廣式河粉加塊豬扒喺上面……小店服務卻是非一般，入到去，明明尚有幾張空枱，卻要去同個陌生男子同枱，我問可否自成一枱（也不過是張二人枱），侍應即黑臉話:是但妳啦。其實佢大可拒絕，咁我咪過隔離食米線囉，你俾得我咁坐，就唔好黑我臉啦!最後，你咪又係喺明明有其他空枱嘅情況下，搵人搭我枱，又唔見你叫佢搭番陌生男子張枱?!
餐廳資料﹕
津津食店
西環卑路乍街55號地下
28186803
EXP again!!!
同相識多年嘅blog友食飯，又去EXP，因為我想試埋個大蝦豆角炒飯。每次去食lunch，我都會要求嘢飲用外賣杯拎走，因為杯果汁係凍嘅，我一定會放到室溫先嚟飲，每次啲waiter或waitress都會應我要求，唯獨今次個waitress拎住張餐牌同我講話嘢飲只限堂食……如果我第一次嚟佢哋咁講，我會即刻收聲，但因為我之前嚟過幾次，每次都可以上咁做，所以我堅持。我唔係唔想環保，但我真係唔想飲咁凍。佢哋杯嘢飲又唔會特快咁上，有時食到一半先嚟，實在等唔切佢變得冇咁凍呢。
越式燒豬頸肉撈檬 ($98)﹕Blog友之選，冇問佢好唔好食，只知份量好細，佢食完兩個鐘後嗌餓……
大C級 (跟餐餐飲)﹕由橙、奇異果同士多啤梨打成，太甜，唔啱我……
大蝦豆角炒飯 ($98)﹕ 辣辣哋，幾惹味！但來來去去都只得豆角，蝦得三、四粒，食到有啲悶……
餐廳資料﹕
EXP
九龍塘達之路80號又一城UG層23號舖
22658298
Eat, Play, Love 